Ngam Yul’yul’ u Gubin Ban’en

1, 2. Mang fan ni ma felfelan’ Jehovah u nap’an ni be guy ni gad be athamgil ni ngad yul’yul’gad? Mu susunnag.

REB e matin nge bochi pagel ni fak e kar bow u kantin nga wen. Me tal fachi pagel ya ke gin, ya bay bochi karrow u pa’ ni sana ke pagtalin ni nge sulweg, fa yog ko chitiningin ni nge chuw’iy nge fanay. Kari kireban’ me yog ko chitiningin ni nge ayuweg. Ma aram me yog e chitiningin ngak ni ngar sulow nga kantin nge sulweg fachi karrow me wenig ko girdien e maruwel u kantin. Ma nap’an ni sulweg fachi karrow ma ri felfelan’ e chitiningin. Mang fan?

² Ma felfelan’ e gallabthir ni faan yad ra guy pi fakrad ni kar nanged feni ga’ fan e yul’yul’. Maku er rogon e Chitamangidad nu tharmiy, ni ir reb e ‘Got nib yul’yul’.’ (Psalm 31:5) Nap’an nra guy ni gad be mon’og ko pigpig ni gad be tay ngak, ma ra felfelan’ ni be guydad ni gad be athamgil ni ngaud yul’yul’gad. Bochan ni gad baadag ni ngad rin’ed e tin nib m’agan’ ngay ma gad par ni gad ba t’uf rok, ma aram fan ni gad be fol ko fapi thin ni yog apostal Paul ni gaar: “Gamad baadag ni nggu yul’yul’gad u gubin ban’en.” (Hebrews 13:18, NW) Ere, ngad weliyed aningeg ban’en ni yu ngiyal’ e ba mo’maw’ ni ngad yul’yul’gad ngay. Ngemu’ ma gad weliy boch angin nra yib riy.

NGAM YUL’YUL’ NGOM

3-5. (a) Uw rogon ni be fonownagdad e Thin rok Got ni nge dab da bannaged gadad? (b) Mang e ra ayuwegdad ni ngad yul’yul’gad ngodad?

³ Som’on e ngam fil rogon ni ngam yul’yul’ ngom. Rib mom ni nge dab da yul’yul’gad ni bochan e dawor da flontgad. Bod rogon e thin ni yog Jesus ko pi Kristiano u Laodicea ni yad be bannaged yad ya yad be lemnag ni ke fel’ rogorad, machane bin riyul’ riy e ‘kar gafgowgad, ma dakuriy e mad u dakenrad, ma kar malmitgad’ ko tirok Got ban’en. (Revelation 3:17) Bochan ni kar bannaged yad, ma aram fan ni kari gel e gafgow rorad.

⁴ Sana ka ga manang e fonow ni pi’ James ni gaar: “Ra be finey be’ ni be liyor ngak Got ma faanra der yog rok ni nge gagiyegnag bolowthen nge siy ki yog e tin nib kireb, ma liyor ni be tay ngak Got e mm’ay fan, ma aram e ir e be bannag ir.” (James 1:26) Ere, faanra ud lemnaged nrayog ni nga u dogned e thin nib kireb ma ka gad be liyor ngak Jehovah, ma aram e ra yan i aw ni gad be bannaged gadad, ma pigpig ni gad be tay ngak Jehovah e ra yan i aw nib m’ay fan. Mang e rayog ni nge ayuwegdad ni ngad yul’yul’gad ngodad?

⁵ Ki yog James ni thin rok Got e taareb rogon ko therek. Ke yog ni ngad sapgad ko motochiyel rok Got ma gad puluwnag e ngongol rodad ngay. (Mu beeg e James 1:23-25.) Thin ko Bible e rayog ni nge ayuwegdad ni ngad yul’yul’gad, ma gad guy e n’en nib t’uf ni ngad mon’oggad riy. (Lamentations 3:40; Haggai 1:5) Rayog ni ngad meybilgad ngak Jehovah ni nge skengnagdad, ya nge yag nda guyed e gin ni gad ba meewar riy. (Psalm 139:23, 24) Ra dam yul’yul’ ma rayog ni ngam rin’ e kireb, ere ba t’uf ni ngad yul’yul’gad ya aram e n’en ni ma yaliy Got rodad. Proverbs 3:32, NW e be gaar: “Ba fanenikan Jehovah e girdi’ nde yul’yul’, ma Ba chugur ngak e piin nib mat’aw.” Rayog ni nge ayuwegdad Jehovah ni ngad lemgad ni bod rogon ni ma lem, ma gad sap ngodad ni bod rogon ni ma sap ngodad. Dab mu pagtalin e thin rok Paul ni gaar: “Gamad baadag ni nggu yul’yul’gad.” Dawor da flontgad, machane rayog ni ngad guyed rogon ni ngad yul’yul’gad.

NGAN YUL’YUL’ U TABINAW

6. Mang fan nib t’uf ni nge yul’yul’ e piin mabgol ngorad, ma mang boch ban’en ni thingar ra paloggad riy?

⁶ Yul’yul’ e ban’en ni dabisiy u lan e tabinaw ko Kristiano. En figirngiy nge en leengiy e thingar ra yul’yul’gow ngorow. Dariy ban’en ni nge kirebnag e mabgol ko Kristiano ni bod rogon ni ngam adag be’ ni gathi mabgol rom, fa ngaum nonow be’ u Internet nib mith, fa ngaum mith ngaum yaliy yaan boch ban’en nib puwlag. Boch e Kristiano ni kar mabgolgad e kar uned nga boch e pi ngongol ney, ma ur mithaged ko en mabgol rorad. Ireray e ngongol nde yul’yul’. Ke gaar David ni Pilung: “Dagur ma chagil ko piin ni dariy rogorad nga bang [“de yul’yul’,” NW]; dariy rogog ko piin yad ma dake modingniged yad.” (Psalm 26:4, BT) Ere, faan ga ra yul’yul’ ma rayog ni nge ayuwegem ni nge dab mu mithag ban’en ko en mabgol rom!

7, 8. Mang boch ban’en u Bible nrayog ni nge ayuweg e piin bitir ni ngar nanged feni ga’ fan e yul’yul’?

⁷ Nap’an ni be fil e gallabthir rogon fel’ngin e yul’yul’ ngak pi fakrad, mab fel’ ni ngar fanayed boch ban’en ni i rin’ boch e girdi’ u Bible. Boch e girdi’ nde yul’yul’ e bod rogon Akan ni iring boch ban’en me guy rogon ni nge mithag. Gehazi e lifith l’igin, ya baadag ni nge yag boch e chugum ngak. Ma Judas e ba moro’ro’ miki lifith l’igin ya nge yognag Jesus.​—Joshua 6:17-19; 7:11-25; 2 Kings 5:14-16, 20-27; Matthew 26:14, 15; John 12:6.

⁸ Boch e girdi’ nib yul’yul’ u Bible e bod rogon Jakob ni yog ngak fapi pagel ni fak ni ngar sulweged e salpiy ni kar pirieged ni bay u lan e tutuw rorad. Ma Jefthah nge fare rugod ni fak e kar rin’ew e n’en ni micheg Jefthah. Ma Jesus e de rus ni nge yog ir ko fapi girdi’ ni kar bad ni ngar koled, ya riyul’nag e thin ko profet me ayuweg e pi fager rok. (Genesis 43:12; Judges 11:30-40; John 18:3-11) Ireray boch e girdi’ nib yul’yul’ ni bay murung’agrad u Bible nrayog ni nge folwok e piin gallabthir rorad mar ayuweged pi fakrad ni ngar adaged me ga’ fan e yul’yul’ u wan’rad.

9. Mang e thingari ayuw e gallabthir riy ni faanra yad baadag ni ngar daged kanawoen e yul’yul’ ngak pi fakrad? Mang nib ga’ fan e re n’ey?

⁹ Ba milfan ngak e gallabthir ni ngar daged kanawoen e yul’yul’ ngak pi fakrad. Be gaar apostal Paul: “Ga be machibnag boch e girdi’ mang fan ndab mmachibnigem? Ga be machibnag ni be lungum, ‘Dab ni moro’ro’’ me gur ga ma moro’ro’ fa?” (Roma 2:21) Boch e gallabthir e yad ma fil ko bitir rorad ni ngar yul’yul’gad, machane yad e darur yul’yul’gad. Sana yad ra iring ban’en nib achig fa ra lifithed l’ugunrad, ma rogned boch e thin ni nge dabi m’ug ni kar moro’ro’gad fa kar lifithed l’ugunrad. Machane bin riyul’ riy e demtrug ko kam iring ban’en nib achig fa ban’en nib ga’, ma aram e kam moro’ro’. Ma ra kam ban u ban’en nib achig fa ban’en nib ga’, ma aram e kam lifith l’ugunam.a (Mu beeg e Luke 16:10.) Faanra dabi fol e gallabthir ko thin ni ka rogned mab mom ni nge guy e bitir ma rayog ni nge kirebnagrad. (Efesus 6:4) Faanra yad be guy nib yul’yul’ e gallabthir rorad, ma rayog ni ngar pininged e sorok ngak Jehovah mar pared ni yad ba yul’yul’.​—Proverbs 22:6.

NGAN YUL’YUL’ U LAN E ULUNG

10. Mang e ngad kol ayuwgad riy u nap’an ni gad be sabethin pi walagdad?

¹⁰ Boor ban’en ni ngad yul’yul’gad riy u nap’an ni gad be chag pi walagdad u lan e ulung. Kad filed faram ko Guruy ni 12 nib t’uf ni ngad ayuwgad u rogon ni gad ma non, nib ga’ nu nap’an ni gad ma non ngak pi walagdad u lan e ulung. Nap’an ni gad be sabethin mab mom ni ngad gun’gun’naged be’ fa da t’ared e thin nga daken be’. Faanra ngaud sulod ngad weliyed murung’agen ban’en ni kad rung’aged nde riyul’, ma aram e gad be ban. Ere, ba fel’ ni ngaud gonopiyed e n’en ni gad ma yog. (Proverbs 10:19) Sana kad rung’aged ban’en nib riyul’, machane gathi aram e be yip’ fan ni ngad weliyed i yan. Re n’ey e bod rogon ban’en ni kad rung’aged ndariy rogon ngodad fa de fel’ ni ngad weliyed. (1 Thessalonika 4:11) Boch e girdi’ e ma yog nde kireb ni ngan weliy ya ba riyul’ e pi thin nem, machane gubin ngiyal’ ma thingar u dogned e thin nib fel’ nra ayuweg be’.​—Mu beeg e Kolose 4:6.

11, 12. (a) Mang e ra rin’ boch e girdi’ ni kar denengad me gel boch e kireb rorad? (b) Mang boch ban’en ni ma bannag Satan e girdi’ riy u nap’an ni kar denengad, ma uw rogon ni ngad gelgad ngay? (c) Uw rogon ni nge m’ug ni gad ba yul’yul’ ko ulung rok Jehovah?

¹¹ Rib ga’ fan ni ngad yul’yul’gad ngak e piin ni yad be ayuweg e ulung. Boch e girdi’ ni kar uned ko ngongol nib kireb mi yad guy rogon ni ngar mithaged rok e piin piilal u nap’an ni kan fithrad e yad be gelnag e kireb rorad. Girdi’ ni aray rogon e yad be dake yad be liyor ngak Jehovah, machane yad be mith ngaur denengad. Ere, ra yan i aw ni gubin ban’en ni yad ma yog e goo ban. (Psalm 12:2) Boch e girdi’ e ma weliy ko piilal boch ban’en me mithag boch. (Acts 5:1-11) Pi ngongol ney e ke sum u boch ban’en ni ma bannagey Satan riy.​—Mu guy fare thin ni kenggin e, “Boch e Ban rok Satan ni Bay Rogon ko Denen nib Ubchiya’.”

¹² Ri kub ga’ fan ni ngad yul’yul’gad ko ulung rok Jehovah u nap’an ni gad be ngongliy boch e babyor. Bod rogon e report ko machib ni gad ma yoloy. Thingar da kol ayuwgad ndab da bangad. Ku taareb rogon nga boch e babyor ni gad ma fal’eg u nap’an ni ngad uned nga boch e maruwel. Dab ud bangad u murung’agdad.​—Mu beeg e Proverbs 6:16-19.

13. Uw rogon ni ngad yul’yul’gad ko maruwel ni gad ma tay pi walagdad u taabang?

¹³ Ngad yul’yul’gad ngak pi walagdad u nap’an e maruwel. Yu ngiyal’ ma boch e walag e sana yad ra maruwel u taabang. Ere, thingar ra ayuwgad ndab ra athkuyed e maruwel rorad ko liyor nge machib ni yad be tay. Faanra ke fek reb e walag be’ u lan e ulung ni nge maruwel rok, ma thingari yul’yul’ nga urngin puluwon ni ke micheg ni nge pi’ nge boch ban’en ni bay ko motochiyel ni thingari rin’. (1 Timothy 5:18; James 5:1-4) Machane faanra gad be maruwel rok reb e walag u lan e ulung, ma thingar da yul’yul’gad ko maruwel ni gad be tay. (2 Thessalonika 3:10) Dab da lemnaged ni bochan e taareb e michan’ rodad ma aram e ba thil rogon ni nge ayuwegdad ngak boch i girdien e maruwel.​—Efesus 6:5-8.

14. Nap’an nra ngongliy l’agruw e walag e siyobay rorow u taabang, ma mang e thingar ra rin’ew, ma mang fan?

¹⁴ Uw rogon ni faanra ngam fal’egew reb e walag e siyobay romew u taabang? Be pi’ e Bible e kanawo’ ngodad ni ngad yoloyed gubin ban’en nga but’! Bod rogon Jeremiah nnap’an ni chuw’iy bangi binaw, ma aram me fal’eg e babyor riy, me sayin, me pirdiiy e pow ngay ni aram e mich riy ni ke chuw’iy. (Jeremiah 32:9-12; kum guy e Genesis 23:16-20.) Ere, nap’an ni gimew ra fal’eg reb e walag e siyobay romew u taabang ma thingar mu fal’egew babyoren, mi gimew sayin ngay ni ngam michegew. Ya ra ayuwegmew ni nge dabi sum boch e magawon nge maluagthin u thilmew boch nga m’on. Pi Kristiano ni yad be ngongliy e siyobay u taabang e thingar dab ra paged e siyobay rorad ni nge kirebnag e taareban’ nge gapas u lan e ulung.b​—1 Korinth 6:1-8.

NGAN YUL’YUL’ U GUBIN BAN’EN NI YIBE RIN’ U FAYLENG

15. Uw rogon u wan’ Jehovah e siyobay ndanir yul’yul’ ngay, ma uw rogon u wan’ e pi Kristiano e re n’ey?

¹⁵ Gathi kemus ni nge yul’yul’ e pi Kristiano u lan e ulung. Be gaar Paul: “Gamad baadag ni nggu yul’yul’gad u gubin ban’en.” (Hebrews 13:18, NW) Baadag Jehovah ni ngad yul’yul’gad ko siyobay rodad. Bay in yay ni kan weliy murung’agen e thabthabel nde puluw u lan e babyor ko Proverbs. (Proverbs 11:1; 20:10, 23) Kakrom e ba ga’ ni yima fanay e thabthabel ni ngan nang tomalngin ban’en, ya ngan nang puluwon. Pi ta siyobay ndar yul’yul’gad e yad ma fanay l’agruw e thabthabel ni ngar bannaged e girdi’ ngay.c Ri ma fanenikay Jehovah e ngongol ko sasalap! Ra ngad pared ni gad ba t’uf rok ma thingar da paloggad u gubin e ngongol nde yul’yul’ ko siyobay.

16, 17. Mang boch ban’en nder yul’yul’ e girdi’ nu fayleng ngay e ngiyal’ ney? Mang e ma rin’ e tin riyul’ e Kristiano?

¹⁶ Bochan ni Satan e ir e be gagiyegnag e re fayleng ney ma aram fan ni dakir yul’yul’ e girdi’. Gubin e rran ni gad ma mada’nag boch ban’en ni ma waliydad ni nge dab kud yul’yul’gad. Nap’an nra fal’eg be’ e babyor rok ni nge un ko maruwel, mab ga’ ni ma yoloy ban’en nde riyul’ u murung’agen. Ma boch e girdi’ e yad ma sasalpiy babyoren e salpiy ni ngar pied ko am ni bod e tax nge ku boch ban’en. Boch e bitir u skul e yad ma sasalpiy e skeng rorad, fa yad ma yan ko Internet ni ngar feked boch ban’en ni ke yoloy be’ ngar ted ko babyor rorad ngar pied ko sensey rorad. Ma boch e girdi’ e yad ma pi’ boch ban’en ngak e girdi’ nib tolang ko am, ya nge yag boch ban’en ngorad. Gad manang nra i buch e pi n’ey, ya girdi’ e “ke mus ni yad e yad be lemnagrad, ma kari gel e chogow rorad, ma kar, . . . dabuyed e tin nib fel’.”​—2 Timothy 3:1-5.

¹⁷ Tin riyul’ e Kristiano e yad ma guy rogon ni ngar pared ni yad ba yul’yul’ u gubin ban’en. Yu ngiyal’ e ba mo’maw’ ni ngad yul’yul’gad ni bochan e girdi’ ndarur yul’yul’gad e boor ban’en rorad. (Psalm 73:1-8) Pi Kristiano e rayog ni ngar gafgowgad ko salpiy ni bochan e yad be par ni yad ba yul’yul’ “u gubin ban’en.” Ere, ra yib angin ngorad, fa? Rra yib! Machane mang fan ni ngar pared ni yad ba yul’yul’? Ma mang tow’ath e ra yag ngorad ni faanra ur pared ni yad ba yul’yul’?

BOCH E TOW’ATH NRA YAG NGAK E PIIN NI YAD BA YUL’YUL’

18. Mang nib ga’ fan e yul’yul’ ni ga be tay?

¹⁸ De yoor ban’en ni ga ra pirieg ni kab ga’ fan ko nge fel’ thim ni bochan e gab yul’yul’, ma rayog ni ngan pagan’uy ngom. (Mu guy fare thin ni kenggin e, “Uw Feni Ri Gub Yul’yul’?”) Demtrug be’ nrayog ni nge yul’yul’. Der yan u rogon e salap rok be’, nge feni fel’ rogon, nge rogon yaan, nge ku boch ban’en ni ma lemnag e girdi’. Boor e girdi’ nder yag ni nge par nib fel’ thin. (Mikah 7:2) Sana boch e girdi’ e yad ra moningnagem ni bochan e gab yul’yul’, machane boch e girdi’ e yad ra tayfam ma ra pagan’rad ngom ni bochan e gab yul’yul’. Boor e Pi Mich Rok Jehovah e ngiyal’ ney e ke yib angin e yul’yul’ ni yad ma tay. Bochan ni yad ba yul’yul’ ma yima tayrad ko maruwel min chuweg e girdi’ ndarur yul’yul’gad, maku ba mom ni ngar pirieged e maruwel.

19. Mang e ra rin’ e yul’yul’ ko nangan’ rodad nge tha’ u thildad Jehovah?

¹⁹ Yugu demtrug ko ke buch ban’en rom ni aray rogon fa dawor, ma ga ra yul’yul’ ma boor e tow’ath nra yag ngom. Rayog ni nge beech e nangan’ rom. Be gaar Paul: “Gamad e mmudugilan’mad ngomad ndariy ban’en ni be yog lanin’mad ngomad ni kug rin’ed nib kireb.” (Hebrews 13:18) Faanra um yul’yul’ ma gubin ngiyal’ nra i guy Jehovah, ma ma t’ufeg e piin ni yad ba yul’yul’. (Mu beeg e Psalm 15:1, 2; Proverbs 22:1.) Faanra um yul’yul’ ma ra ayuwegem ni ngam par ni gab t’uf rok, ma aram e bin th’abi ga’ e tow’ath nra yag ngodad. Bin migid e guruy e gad ra fil riy ko uw rogon e maruwel u wan’ Jehovah.