GURUY NI 8

Mang Fan ni Gamad Ma Munmad nib Yalen u Nap’an ni Nggu Warod ko Muulung?

Reb e matam nge bochi pagel ni fak ni yow be fal’egew rogorow ni nga ranow ko muulung — Iceland

Reb e matin nge ba buliyel ni fak ni yow be fal’egew rogorow ni nga ranow ko muulung — Mexico

Boch e Pi Mich Rok Jehovah u Guinea-Bissau ni kar munmadgad nib fel’ rogon — Guinea-Bissau

Reb e tabinaw u Manile’ ni yad be yan u but’ i yan ko gin ni ngan tay e muulung riy — Manila

Kam guy rogon feni yaram e munmad ni ke tay e Pi Mich Rok Jehovah ko pi sasing ni baaray u nap’an ni nga ranod ko muulung? Mang fan ni gamad ma guy rogon ni ngaug munmadgad nib fel’ rogon mab yalen?

Nge m’ug ni gamad be tayfan e Got romad. Riyul’ ni gathi kemus ni yaadad e ma sap Got ngay. (1 Samuel 16:7) Machane, nap’an ni gamad ra muulung nga taabang ni nggu liyorgad ngak Got, ma gamad baadag ni nge m’ug ni gamad be tayfan, maku gamad be tayfan e piin ni gamad ma pigpig u taabang. Faanra nga darod da guyed reb e pilung ara president, ma dabisiy ni gad ra munmad nib fel’ rogon ni bochan e gad baadag ni ngad ted fan e liw rok. Ere, rogon yaamad ni gamad ma un ko muulung e be dag rogon ni gamad be tayfan fare “pilung ko urngin e nam” ni aram Jehovah Got, nge tagil e liyor romad ngak.—Jeremiah 10:7, BT.

Be m’ug riy e n’en nib ga’ fan u wan’mad. Be pi’ e Bible e athamgil nga laniyan e piin Kristiano ni ‘ngar gonopiyed rogon e mad rorad nge yan i par nib fel’ rogon, mi yad yin’ e mad nrogon yalen e munmad.’ (1 Timothy 2:9, 10) Ra ngan munmad ni “rogon yalen e munmad” ma be yip’ fan ni ngan chuw ko mad nib fel ma gathi kaygi k’ad nga dowey, ara ra karing e ar’ar nib kireb nga laniyan’ boch e girdi’. Maku reb e bochan ni gamad ma ‘gonopiy rogon e mad’ romad ma ma ayuwegmad ni nggu mel’eged e mad nib yalen ni nggu chuwgad ngay. Re kenggin e motochiyel ney e be dag nrayog ni nge be’ me mel’eg e miti mad ni baadag ni nge chuw ngay nib yalen. Ere, yug ra dawor gogned ko thin romad ma rogon e munmad romad e rayog ni nge ‘girngiy e fel’ ko machib ni murung’agen Got’ min pining e “sorok” ngak. (Titus 2:10; 1 Peter 2:12) Bochan nib yalen rogon e munmad ni gamad ma tay u nap’an ni nggu warod ko muulung, ma ma rin’ ban’en nga rogon ni ma lemnag boch e girdi’ e pigpig ni gamad ma tay ngak Jehovah.

Dab mu pag e munmad rom ni nge talegnem ndab mub ko muulung nga Kingdom Hall. De t’uf ni nge tolang puluwon e mad ni ngad chuwgad ngay ara nge pag feni fel’ yaan, ya n’en nib ga’ fan e ngad chuwgad ko mad nib yalen, mab beech, mab fel’ u p’eowchen e girdi’.

Uw feni ga’ fan e munmad rodad u nap’an ni gad be liyor ngak Got?
Mang boch i kenggin e motochiyel nra ayuwegdad u rogon e munmad ni gad ma tay nge rogon ni gad ma fal’eg yaadad?