Mang e Ba M’agan’ Got Ngay ni Fan ko Fayleng?

1. Mang fan ni sunmiy Got e fayleng?

Ke pi’ Jehovah e fayleng ko girdi’. Ireray tafedad. Ere, gal nsom’on e girdi’ ni Adam nge Efa e dan sunmiyrow ni ngar parew u tharmiy, ya ke sunmiy Got e pi engel ni yad e ngar pared u tharmiy. (Job 38:4, 7) I tay Got e bin som’on e pumoon nga lan ba paradis ni ka nog fare milay’ nu Eden ngay. (Genesis 2:15-17) I yog Jehovah ngak Adam nrayog ni ngar pared pi fak u fayleng ndariy n’umngin nap’an ni yad ba felfelan’.​—Mu beeg e Psalm 37:29; 115:16.

Som’on e kemus ni fare milay’ nu Eden e ba paradis. Ka nog ko gal nsom’on e girdi’ ni ngar diyengow ngar suguyew e fayleng ko girdi’, mar suweyed mi yad ngongliy nge mang paradis. (Genesis 1:28) Dariy biid nra kireb e fayleng. Ra par ni tafedad ni manemus.​—Mu beeg e Psalm 104:5.

2. Mang fan ndaki paradis e fayleng?

Bochan nde fol Adam nge Efa rok Got, ma aram me chuwegrow ko fagi milay’. Ke mul e paradis u pa’ e girdi’, ma dariy be’ ni ke yog rok ni nge sulweg. Ka aram nap’an i yib ni piin nib kireb e yad be gagiyegnag e fayleng.​—Mu beeg e Genesis 3:23, 24.

Ere, ke pagtalin Jehovah e n’en ni micheg ko tabolngin ni fan ko girdi’, fa? Danga’! Ir e Got ni gubin ma rayog rok. N’en ni ke yog e ra lebug. (Isaiah 45:18) Ra sulweg e girdi’ nga rarogorad ko som’on.​—Mu beeg e Psalm 37:11, 34.

3. Uw rogon ni yira sulweg e Paradis nga rogon?

Nap’an nra gagiyeg Jesus ni ir e Pilung ni ke dugliy Got, ma aram e ngiyal’ nra sul e paradis nga rogon. Nap’an fare mahl ni Armageddon ma ra pow’iy Jesus e pi engel rok Got ni ngar thanged e piin ni yad be togopluw ngak Got. Tomuren e re n’ey ma ra kalbusnag Jesus Satan u lan 1,000 e duw. Ra magey e pi tapigpig rok Got ni yad ba fas ni bochan e ra pow’iyrad Jesus me ayuwegrad. Ma aram e yad ra par u Paradis u fayleng ndariy n’umngin nap’an.​—Mu beeg e Revelation 20:1-3; 21:3, 4.

4. Mingiyal’ e ra chuw e gafgow?

Mingiyal’ e ra chuweg Got e gafgow u roy u fayleng? Ke pi’ Jesus e “pow” ni be tamilangnag ni ke chugur e tomur. Rogon e fayleng e ngiyal’ ney e be magawonnag e girdi’, ma be m’ug riy ni gad be par ko “ngiyal’ ni ke chugur nga tomuren e re m’ag ney.”​—Mu beeg e Matthew 24:3, NW, 7-14, 21, 22.

Ra chuweg Jesus urngin mit e gafgow u nap’an e gagiyeg nra tay u fayleng u lan 1,000 e duw. (Isaiah 9:6, 7; 11:9) Gathi kemus nra Pilung Jesus, ya ku ra mang Prist Nth’abi Tolang, me chuweg e denen rok e piin nib t’uf Got rorad. Ere, ra maruwel Got u daken Jesus ni nge chuweg e m’ar, nge pilibthir, nge yam’.​—Mu beeg e Isaiah 25:8; 33:24.

5. Mini’ e piin ni yad ra par u Paradis boch nga m’on?

Piin ni yad be fol rok Got e yad ra par u Paradis. (1 John 2:17) I l’og Jesus pi gachalpen ni nga ranod ra gayed e girdi’ ni yad ba sobut’an’, mi yad fil ngorad rogon ni ngar fel’gad u wan’ Got. Ngiyal’ ney e be fil Jehovah ngak bokum biyu’ e girdi’ rogon ni ngar pared u Paradis u fayleng boch nga m’on. (Zefaniah 2:3) U Kingdom Hall ko Pi Mich Rok Jehovah e aram e gin ni ma fil e girdi’ riy rogon ni ngar manged e piin figirngiy nge matam nib fel’, nge piin leengiy nge matin nib fel’. Piin bitir nge piin gallabthir e yad ma liyor u taabang ma yad ma fil rogon ni nge yib angin fare thin nib fel’ ngorad.​—Mu beeg e Mikah 4:1-4.