Mang Fan ni Be Pag Got e Kireb nge Gafgow?

1. Uw rogon ni tabab e kireb?

I tabab e kireb u fayleng u nap’an ni yog Satan e bin som’on e ban. Satan e immoy nsom’on ni ir reb e engel nib flont, machane “de par ko tin riyul’.” (John 8:44, NW) Baadag ni ngan liyor ngak ni bod rogon ni yima liyor ngak Got. I bannag Satan e bin som’on e ppin ni aram Efa, me k’aring ni nge fol rok ma gathi Jehovah. Ke un Adam ngak Efa kar th’abew e motochiyel rok Got. Ma bochan e n’en ni mel’eg Adam, ma aram me tabab e gafgow nge yam’.​—Mu beeg e Genesis 3:1-6, 19.

Nap’an ni yog Satan ngak Efa ni nge th’ab e motochiyel rok Got, ma aram e ke tabab ni nge togopluw nga mat’awun e gagiyeg rok Got. Boor e girdi’ e kar uned ngak Satan yad be togopluw nga mat’awun Got ni nge Gagiyegnagrad. Ere, Satan e ir e “be gagiyegnag e girdi’ nu roy u fayleng.”​—Mu beeg e John 14:30; 1 John 5:19.

2. Bay thibngin e pi n’en ni sunmiy Got, fa?

Gubin ban’en ni sunmiy Got mab fel’. Girdi’ nge engel ni sunmiy e rayog ni ngar folgad rok nib fel’ rogon. (Deuteronomy 32:4, 5) I sunmiydad Got nib puf rogodad nrayog ni ngad mel’eged e tin nib fel’ nge tin nib kireb, maku rayog ni ngad daged nib t’uf rodad.​—Mu beeg e James 1:13-15; 1 John 5:3.

3. Mang fan ni ke pag Got e gafgow ke mada’ ko ngiyal’ ney?

Ke pag Jehovah ni ngan togopuluw nga mat’awun e gagiyeg rok u Eden ke mada’ ko ngiyal’ ney. Mang fan? Ya nge m’ug riy ni dabiyog ko girdi’ ni ngar gagiyegniged yad. (Eklesiastes 7:29; 8:9) Chiney ni ke pag 6,000 e duw ni ke yan e ke m’ug e mich riy ni dabiyog ko girdi’ ni ngar gagiyegniged yad. Pi tayugang’ ko am e der yog rorad ni ngar taleged e mahl, ara togopluw ko motochiyel, ara sasalap, ara m’ar.​—Mu beeg e Jeremiah 10:23; Roma 9:17.

Ba thil e gagiyeg rok Got ko gagiyeg ni be tay e girdi’, ya gagiyeg rok Got e ra yib angin ngak e piin ni yad ra fol riy. (Isaiah 48:17, 18) Dabki n’uw nap’an ma ra chuweg Jehovah urngin e am ko girdi’. Kemus ni piin ni yad baadag ni nge gagiyegnagrad Got e yad ra tafanay e fayleng.​—Isaiah 11:9.​—Mu beeg e Daniel 2:44.

4. Mang e rayog ni ngad rin’ed ni bochan e be gum’an’ Got u puluwdad?

Ke yog Satan ni gad ma pigpig ngak Jehovah ni bochan e pi n’en nra yog riy ngodad. Ga baadag ni ngam micheg ni be ban Satan, fa? Rayog ni ngam rin’ e re n’ey! Be gum’an’ Got u puluwdad ya nge yog ni nge m’ug ko mini’ e gad baadag ni nge gagiyegnagdad. Rarogon e par rodad e ra m’ug riy ko mini’ e gad baadag ni nge gagiyegnagdad.​—Mu beeg e Job 1:8-12; Proverbs 27:11.

5. Uw rogon ni ngad dugliyed ni Got e nge Gagiyegnagdad?

Rayog ni ngad dugliyed ni nge Gagiyegnagdad Got ni aram e ngad gayed rogon ni ngad liyorgad ngak u kanawoen nib puluw ko Thin Rok, ni aram e Bible. (John 4:23) Rayog ni ngad siyeged e gagiyeg rok Satan ni aram e dab ud uned nga ngongolen e am nge mahl ni bod rogon Jesus.​—Mu beeg e John 17:14.

Ma maruwel Satan nga gelngin ni nge pingeg laniyan’ e girdi’ ngar adaged e tin nib kireb ban’en. Nap’an ni gad ra siyeg e pi ngongol ney, ma rayog ni nge moning ara togopuluw e pi tafager nge girdi’ rodad ngodad. (1 Peter 4:3, 4) Ere, thingar da dugliyed e n’en ni ngad rin’ed. Gad ra chag ko girdi’ nib t’uf Jehovah rorad, fa? Gad ra fol ko pi motochiyel rok ni bay e gonop nge t’ufeg riy, fa? Faan gad ra rin’ ni aray rogon, ma aram e gad be micheg ni ke ban Satan u nap’an ni yog nra yib e togopluw ngak e girdi’ ma aram e dab kur folgad rok Got.​—Mu beeg e 1 Korinth 6:9, 10; 15:33.

Bochan nib t’uf e girdi’ rok Got, ma ireray e mich riy nra chuweg e kireb nge gafgow. Piin ni yad be dag nib mich u wan’rad e re n’ey e yad ra par u fayleng ndariy n’umngin nap’an ni yad ba felfelan’.​—Mu beeg e John 3:16.