Uw Rogon ni Ngam Chugur ngak Got?

1. Gubin e meybil ni ma motoyil Got ngay, fa?

Be pining Got e girdi’ u gubin e nam ni ngar chugurgad ngak u daken e meybil. (Psalm 65:2) Machane, gathi gubin e meybil ni ma motoyil Got ngay. Bod ndabi motoyil ko meybil rok reb e pumoon ni ma gafgownag e ppin rok. (1 Peter 3:7) Maku reb e nap’an nda i fol piyu Israel rok Got, ma daki motoyil ko meybil rorad. Ere, ba tamilang ni meybil e reb e tow’ath. Mus ngak e piin ni kar ngongliyed reb e denen nib ubchiya’ ma ra motoyil Got ko meybil rorad ni faan yad ra kalngan’rad.​—Mu beeg e Isaiah 1:15; 55:7.

2. Susun ni uw rogon ni ngad meybilgad?

Meybil e bang ko liyor rodad, ere susun ni yigoo Jehovah ni En ni Sunmiydad e ir e ngaud meybilgad ngak. (Matthew 4:10; 6:9) Maku bochan ndawor da flontgad, ma susun e ngad meybilgad ngak u daken fithingan Jesus ni bochan e ir e yim’ ni fan ko denen rodad. (John 14:6) Dabun Jehovah ni ngaud sulod u daken taab meybil ni ke mit ngodad ara meybil ni kan yoloy. Baadag ni ngad meybilgad ngak ni ke yib u gum’ircha’dad.​—Mu beeg e Matthew 6:7; Filippi 4:6, 7.

En ni Sunmiydad e rayog ni nge rung’ag e meybil rodad ngki mada’ ko meybil ni gad ma tay u lanin’dad. (1 Samuel 1:12, 13) Baadag ni ngad meybilgad ngak ni gubin ngiyal’, ni bod e kakadbul nge blayal’, ngu m’on ni ngad abichgad, ngu nap’an ni kad mada’naged e magawon.​—Mu beeg e Psalm 55:22; Matthew 15:36.

3. Mang fan ni ma muulung e pi Kristiano nga taabang?

De mom ni ngan chugur ngak Got ni bochan e gad be par u fithik’ e girdi’ nde mich Got u wan’rad, maku yad ma moningnag e n’en ni ke micheg ni aram e ra gapas e fayleng. (2 Timothy 3:1, 4; 2 Peter 3:3, 13) Ere, ba t’uf ni ngaud bad nga taabang ya nge bagadad me pi’ e athamgil nga laniyan’ bagadad.​—Mu beeg e Hebrews 10:24, 25.

Gad ra chag ngak e piin nib t’uf Got rorad, ma ra ayuwegdad ni ngad chugurgad ngak. Pi muulung ni ma tay e Pi Mich Rok Jehovah e aram e gin rayog ni nge yib angin e michan’ rok boch e girdi’ riy ngodad.​—Mu beeg e Roma 1:11, 12.

4. Uw rogon ni ngam chugur ngak Got?

Faanra um fal’eg i lemnag e pi n’en ni kam fil ko Thin rok Got, ma aram e rayog ni ngam chugur ngak. Mu fal’eg i lemnag e pi n’en ni ma rin’, nge fonow ni ma pi’, nge pi n’en ni ke micheg. Faanra ud meybilgad, ma gad be fal’eg i lemnag boch ban’en, ma rayog ni nge ayuwegdad ni nge ga’ fan u wan’dad e t’ufeg nge gonop rok Got.​—Mu beeg e Joshua 1:8; Psalm 1:1-3.

Kemus ni faanra i pagan’um ngak Got ma be par nib mich u wan’um, ma rayog ni ngam chugur ngak. Machane, michan’ e bod ba ke woldug nib t’uf ni ngaun rannag. Faanra nge gel e michan’ rodad, ma gubin ngiyal’ ni ngaud fal’eged i lemnag e pi n’en ni ke mich u wan’dad.​—Mu beeg e Matthew 4:4; Hebrews 11:1, 6.

5. Faan gad ra chugur ngak Got ma uw rogon nra yib angin ngodad?

Ma lemnag Jehovah e piin ni yad ba t’uf rok. Rayog ni nge ayuwegrad ni nge dabi kireb e michan’ rorad, ma dabi mul e athap rorad ko yafas ni manemus. (Psalm 91:1, 2, 7-10) Ma yog boch ban’en ndab da rin’ed nra k’aring e m’ar ngodad ma dab kud felfelan’gad. Ma fil Jehovah ngodad e bin nth’abi fel’ kanawoen e yafas.​—Mu beeg e Psalm 73:27, 28; James 4:4, 8.