Uw Rogon ni Ma Ayuwegdad e Pi Kenggin e Motochiyel nu Bible?

1. Mang fan nib t’uf ni ngan pow’iydad?

En ni Sunmiydad e ba gonop ngodad. Ir e Chitamangidad ni gad ba t’uf rok. De lemnag ni ngad pared rodad ndabi pow’iydad. (Jeremiah 10:23) Ba t’uf ni nge pow’iydad Got ni bod rogon e gallabthir nib t’uf ni ngar pow’iyed pi fakrad. (Isaiah 48:17, 18) Pi kenggin e motochiyel nu Bible e ba tow’ath ni yib rok Got ni nge pow’iydad.​—Mu beeg e 2 Timothy 3:16.

Pi motochiyel rok Jehovah e be fil ngodad e bin th’abi fel’ kanawoen e yafas e chiney, maku be dag ngodad rogon ni nge yog boch e tow’ath ngodad boch nga m’on. Bochan ni Got e ke sunmiydad, mab puluw ni ngad paged ni nge pow’iydad.​—Mu beeg e Psalm 19:7, 11; Revelation 4:11.

2. Mang e pi kenggin e motochiyel nu Bible?

Pi kenggin e motochiyel nu Bible e be tamilangnag e n’en ni baadag Got ni ngad rin’ed. Ma motochiyel e ba mudugil e n’en ni yima fanay ngay. (Deuteronomy 22:8) Thingar da fal’eged i lemnag rogon ni ngad fanayed e pi kenggin e motochiyel u reb e ban’en ngu reb. (Proverbs 2:10-12) Bod ni be yog e Bible ni yafas e ba tow’ath ni yib rok Got. Re kenggin e motochiyel ney e rayog ni nge pow’iydad u tabon e maruwel, ngu tabinaw, ngu nap’an ni gad be milekag. Re n’ey e ra ayuwegdad ni nge dab da rin’ed boch ban’en nra tay e yafas rodad nga thatharen e riya’.​—Mu beeg e Acts 17:28.

3. Mang l’agruw i kenggin e motochiyel nib ga’ fan?

I weliy Jesus murung’agen l’agruw i kenggin e motochiyel nrib ga’ fan. Bin som’on e be tamilangnag fan ni kan sunmiy e girdi’, ni aram e, ngar nanged Got, me t’uf rodad, mi yad pigpig ngak u fithik’ e yul’yul’. Re kenggin e motochiyel ney e ba t’uf ni ngad maruwelgad ngay u nap’an ni ngad dugliyed boch ban’en. (Proverbs 3:6) Piin ni yad ra fol ko re kenggin e motochiyel ney e ra fel’ e tha’ u thilrad Got, me yog e bin riyul’ e felfelan’ ngorad, nge yafas ndariy n’umngin nap’an.​—Mu beeg e Matthew 22:36-38.

Bin l’agruw i kenggin e motochiyel e rayog ni nge ayuwegdad ni ngaud pared nib gapas thildad e girdi’. (1 Korinth 13:4-7) Ra ngad folgad ko bin l’agruw i kenggin e motochiyel mab muun ngay ni ngad folwokgad u rogon ni ma ngongol Got ko girdi’.​—Mu beeg e Matthew 7:12; 22:39, 40.

4. Uw rogon nra yib angin e pi kenggin e motochiyel nu Bible ngodad?

Pi kenggin e motochiyel nu Bible e ma fil ngak chon e tabinaw rogon ni ngaur t’ufeged yad mu ur pared ni yad ba taareb. (Kolose 3:12-14) Thin rok Got e ku be ayuweg chon e tabinaw ko re kenggin e motochiyel ni baaray, ni aram e mabgol e nge par ni n’umngin nap’an e yafas.​—Mu beeg e Genesis 2:24.

Faan gad ra fol ko pi kenggin e motochiyel nu Bible, ma rayog ni nge ayuwegdad ko pi n’en nib t’uf ko par rodad, ma rayog ni nge par nib gapas lanin’dad ma gad ba felfelan’. Bod ni piin ni yad ba ga’ ko maruwel e yad baadag girdien e maruwel ni yad ma fol ko pi kenggin e motochiyel nu Bible ni be yog ni ngaun yul’yul’ ma ngaun tiyan’uy ko maruwel. (Proverbs 10:4, 26; Hebrews 13:18) Ku ma fil e Thin rok Got ngodad rogon ni ngad pared nib fel’ u wan’dad e tin ni bay rodad ban’en, ma gad m’oneg e tha’ u thildad Got ko salpiy nge chugum.​—Mu beeg e Matthew 6:24, 25, 33; 1 Timothy 6:8-10.

Gad ra fol ko pi kenggin e motochiyel nu Bible ma rayog ni nge ayuweg fithik’ i dowdad ko m’ar. (Proverbs 14:30; 22:24, 25) Bod ni, faan gad ra fol ko motochiyel rok Got u murung’agen e chingaw, ma rayog ni ngad ayuweged gadad ko m’ar nge maad’ad. (Proverbs 23:20) Ma pagdad Jehovah ni ngad unumed boch ban’en ni bay e alkul riy, machane dabi pag rogon. (Psalm 104:15; 1 Korinth 6:10) Ra yib angin e pi kenggin e motochiyel nu Bible ngodad, ya ma fil ngodad rogon ni ngad kol ayuwgad ko ngongol rodad nge pi n’en ni gad ma lemnag. (Psalm 119:97-100) Machane, tin riyul’ e Kristiano e gathi kemus ni yad ma fol ko pi motochiyel rok Got ni bochan e nge yib angin ngorad, ya ku yad ma rin’ ni fan e ngan pining e sorok riy ngak Jehovah.​—Mu beeg e Matthew 5:14-16.