Baadag Rebekah ni Nge Felfelan’nag Jehovah

Rebekah e reb e ppin nib t’uf Jehovah rok. Isak fithingan e pumoon rok, maku ba t’uf Jehovah rok. Uw rogon ni mada’ Rebekah nge Isak? Uw rogon ni dag Rebekah ni baadag ni nge felfelan’nag Jehovah? Ngad filed boch murung’agen e re ppin ney.

Gallabthir rok Isak e aram Abraham nge Sarah. Yad ma par u reb e binaw ni ka nog yu Kanaan ngay. Girdi’ u rom e darur pigpiggad ngak Jehovah. Machane, baadag Abraham ni nge mabgol fak nge reb e ppin ni ma pigpig ngak Jehovah. Ere, l’og reb e tapigpig rok ni nge yan i gay reb e ppin ni ngar mabgolgow Isak u reb e binaw ni ka nog yu Haran ngay. Re tapigpig nem e sana Eliezer. Re binaw nem ni yan ngay e aram e gin ni bay boch e girdi’ rok Abraham riy.

I milekag Eliezer nge yugu boch e tapigpig rok Abraham ko re binaw nem. Rib palog e gin ni ka ranod riy. Ke un ragag e kamel ngorad ni be fek e ggan nge boch e tow’ath. Ere, uw rogon me nang Eliezer e re ppin ni nge mel’eg ni ngar mabgolgow Isak? Nap’an ni taw Eliezer nge fapi tapigpig nga Haran, mi yad yan nga reb e luwed ni bochan e manang Eliezer ni bayi yib e girdi’ ngaram ni ngar l’inged e ran. Ere, ke meybil ngak Jehovah ni gaar: ‘Faan gu ra yog ngak reb e ppin ni nge pi’ boch e ran ni nggu unum, me pi’ e ran ngog nge kamel rog, ma aram e gu ra nang ni ireram e re ppin ni kam mel’eg.’

Ma aram me yib Rebekah ko fare luwed. Be yog e Bible ni ir be’ nrib fel’ yaan. Ere, nap’an ni ning Eliezer e ran ngak me yog ni gaar: ‘Gu ra pi’ e ran ni ngam unum, maku gu ra pi’ boch ni nge unum e kamel rom.’ Aygum lemnag, ya kamel e boor e ran ni ma unum. Ere, boor yay ni thingari sul Rebekah ko fare luwed ni nge l’ing e ran. Ga be guy ko sasing gelngin e maruwel ni be tay?​— Ke gin Eliezer nga rogon ni ke fulweg Jehovah taban e meybil rok.

I pi’ Eliezer boor e tow’ath ngak Rebekah nrib manigil. Ma aram me pining Rebekah Eliezer nge fapi tapigpig ni kar uned ngak ni nga ranod nga tafen. I weliy Eliezer fan ni ke yog Abraham ngak ni nge yan ngaram nge rogon ni ke fulweg Jehovah taban e meybil rok. Rib felfelan’ e tabinaw rok Rebekah ni ngar mabgolgow Isak.

Machane, ga be lemnag ni baadag Rebekah ni ngar mabgolgow Isak?​— Manang Rebekah ni Jehovah e ir e ke l’og Eliezer ni nge yan ngaram. Ere, nap’an ni fith girdien e tabinaw rok ngak ko baadag ni nge yan nga Kanaan ngar mabgolgow Isak, me fulweg ni gaar: ‘Arrogon, gu baadag ni nggu wan.’ Ka chi ngiyal’ nem me un ngak Eliezer nga ranow. Nap’an nra tawgow nga Kanaan, ma aram mi yow mabgol Isak.

Ke tow’athnag Jehovah Rebekah ni bochan e i fol rok. Boor e duw nga tomuren, me yib Jesus ko tabinaw rok. Faan ga ra felfelan’nag Jehovah ni bod ni rin’ Rebekah ma ra tow’athnagem.