Bay e Fager rok Josiah nib Fel’

Ga be lemnag mab mo’maw’ ni ngan rin’ e tin nib fel’, fa?​— Boor e girdi’ ni ma lem ni aram rogon. Be yog e Bible ni immoy reb e pagel ni Josiah fithingan ni aram rogon e n’en ni buch rok. Machane, immoy e fager rok nib fel’ ni kar ayuweged. Ngad filed boch ban’en u murung’agen Josiah nge pi tafager rok.

Amon ni pilung nu Judah e ir e chitamangin Josiah. Amon e ir be’ nrib kireb ma ma meybil ko liyos. Nap’an ni yim’ e chitamangin Josiah, ma aram me mang Josiah e pilung u Judah. Machane, ngiyal’ nem e ka fini gaman meruk e duw rok! Ga be lemnag ni ir be’ nib kireb ni bod rogon e chitamangin?​— Danga’!

Yugu aram rogon nri kab bitir Josiah, ma baadag ni nge fol rok Jehovah. Ere, ke dugliy ni nge m’ag fager ngak e piin nib t’uf Jehovah rorad. Ma kar ayuweged Josiah ni nge rin’ e tin nib fel’. Mini’ fithingan boch e fager rok Josiah?

Reb e fager rok Josiah e aram Zefaniah. Zefaniah e ir reb e profet ni i yog ko girdi’ nu Judah ni faanra ur meybilgad ko liyos ma bay boch ban’en nib kireb nra buch rorad. Ke fol Josiah rok Zefaniah ma aram me liyor ngak Jehovah, ma gathi pi liyos ni immoy e ngiyal’ nem.

Jeremiah e ku ir reb e fager rok Josiah. Ba chugur yangarrow Josiah, ma nap’an ni ka yow bbitir mab chugur e gin ni ur parew riy. Rib fel’ e thin rorow. Ere nap’an ni yim’ Josiah, me tunguy Jeremiah reb e tang ni be weliy riy gelngin ni kari tawrengnag. Jeremiah nge Josiah e ur ayuwegew yow ni ngar rin’ew e tin nib fel’ mar folgow rok Jehovah.

Mang e rayog ni ngam fil rok Josiah?​— Ki mada’ ko ngiyal’ ni kab bitir, ma baadag ni nge rin’ e tin nib fel’. Manang nthingari m’ag fager ngak e piin nib t’uf Jehovah rorad. Ere, um guy rogon ni ngaum mel’eg e piin nib t’uf Jehovah rorad nge piin nrayog ni ngar ayuweged gur ni ngam rin’ e tin nib fel’ ni ngar manged fager rom!