Rogon ni Ngaun Maruwel ko Salpiy

Gadad gubin nib t’uf ni nge yag e salpiy ngodad ya nge yag ni ngad pied e tin nib t’uf ko tabinaw rodad. (Proverbs 30:8) Bin riyul’ riy, e ma “ayuwegey” e salpiy. (Eklesiastes 7:12, BT) Yu ngiyal’ e sana ba mo’maw’ ni ngam weliyew e en mabgol rom murung’agen e salpiy, machane dab mu pagew e salpiy ni nge magawonnag e mabgol romew. (Efesus 4:32) Piin mabgol e thingari pagan’rad ngorad, ma ngar maruwelgad u taabang u nap’an ni yad be dugliy ko uw urngin e salpiy ni ngar maruwelgad ngay.

1 NGAN DUGLIY KO MANG E BA FEL’ NI NGAN RIN’

N’EN NI BE YOG E BIBLE: “Faanra ba’ bigimed ni be finey ni nge ngongliy ba wulyang ntafen e damit, ma som’on e ra par nga but’ nge tafinaynag rogon puluwon, nge guy ko ba gaman e salpiy rok nra mu’nag fare maruwel ngay fa danga’.” (Luke 14:28) Ba ga’ fan ni ngam puruy’nagew rogon ni ngam maruwelgow ko salpiy romew. (Amos 3:3) Mu dugliyew e pi n’en nib t’uf ni ngam chuw’iyew nge urngin e salpiy ni bay nrayog ni ngam chuway’gow ngay. (Proverbs 31:16) Ra bay e salpiy romew, ma aram e gathi be yip’ fan ni thingar mu chuway’gow. Mu guyew rogon ni nge dab um tew e malfith. Kemus ni ngam chuway’gow ko salpiy ni bay romew.​—Proverbs 21:5; 22:7.

N’EN NRAYOG NI NGAM RIN’:

• Faanra kam chuw’iyew e tin nib t’uf ni ngam chuw’iyew ma ke aw e salpiy, mi gimew dugliy ko mang e ngam rin’ew ngay

• Faanra de gaman e salpiy romew, mi gimew guy rogon ni ngam buchuuwnigew e n’en ni gimew be n’ag e salpiy ngay. Bod nrayog ni ngaum lumgow u tabinaw ko bin ni ngaun sachuchuway’ u kantin

2 UM YUL’YUL’GOW MA DAB UM LEMNAGEW BOCH BAN’EN NDABIYOG

N’EN NI BE YOG E BIBLE: “Nguum weliyed e tin riyul’ ngomed.” (Zekariah 8:16, BT) Dab um mithag ko en mabgol rom urngin e salpiy ni be yag ngom, nge urngin ni ga be chuway’ ngay.

U m’on ni ngam dugliy boch ban’en ni ngam fanay e salpiy ngay, ma nga mog ko en mabgol rom. (Proverbs 13:10) Faanra um puruy’nagew murung’agen e salpiy ma rayog ni ngaum parew nib gapas thilmew. Ra yag e salpiy ngom, ma dab mu lemnag ni yigoo gur e salpiy rom, ya ngam tay ni salpiy ko tabinaw romew.​—1 Timothy 5:8.

N’EN NRAYOG NI NGAM RIN’:

• Mu weliyew u taabang urngin e salpiy nrayog ni nge bigimew me chuway’ nga reb

• Dab mu songow nge taw ko ngiyal’ ni ke sum e magawon mfin mu weliyew murung’agen e salpiy