Mang e Gil’ilungun Got?

N’EN BE YOG E BIBLE

“Bayi sunumeg Got nu tharmiy reb e gagiyeg ndariy e rofen nra mus.”​—Daniel 2:44.

“Ka ni pi’ bochi pagel ngodad! Me ir e bayi mang pilung rodad.”​—Isaiah 9:6.

PI N’EN NRAYOG NGOM NFAANRA MICH U WAN’UM E RE N’EY

• Reb e am nib fel’ nra yib angin ngom.​—Isaiah 48:17, 18.

• Ra fel’ fithik’ i dowey, min par ni yib felfelan’ u lan e bin nib beech e m’ag.​—Revelation 21:3, 4.

RAYOG NI NGE MICH U WAN’DAD E N’EN NI BE YOG E BIBLE?

Arrogon, ya bay l’agruw i fan:

• Ke dag Jesus e n’en nra rin’ Gil’ilungun Got. I fil Jesus ngak pi gachalpen ni ngar yibilayed Gil’ilungun Got ni nge yib min rin’ e tin nib m’agan’ Got ngay u roy u fayleng. (Matthew 6:9, 10) Ke dag Jesus rogon ni yira fulweg taban e re meybil nem.

  Nap’an ni immoy Jesus u fayleng, mi i duruw’iy e piin ni kar m’ad ko bilig, ma be golnag e piin nib m’ar, ma be faseg e yam’! (Matthew 15:29-38; John 11:38-44) Bochan ni ir e Pilung u Gil’ilungun Got, ma aram fan ni i rin’ e pi n’em, ya nge dag e n’en nra rin’ e re Gil’ilungun nem ni fan ko piin ni yad ra par u tan e gagiyeg riy.​—Revelation 11:15.

• Pi n’en ni be buch u fayleng e be micheg ndab ki n’uw nap’an me yib Gil’ilungun Got. I yog Jesus nu m’on nra fek Gil’ilungun Got e gapas nga fayleng, ma ra gel e mahl, me yib e uyungol, nge durru’ u gubin yang.​—Matthew 24:3, 7.

  Ireray e pi n’en ni gad be guy ni be buch e ngiyal’ ney. Ere, rayog ni nge pagan’dad ndab ki n’uw nap’an me chuweg Gil’ilungun Got e pi magawon ney.