DEER 1

Mang e Bin Riyul’ i Rarogog?

FAN NIB GA’ FAN

Ga ra nang e bin riyul’ i rarogom nge n’en nib mich u wan’um, ma aram e ra ayuwegem ni ngam dugliy boch ban’en u fithik’ e gonop u nap’an ni ke yib e towasar ngom.

MANG E GA RA RIN’?

Mu susunnag e re n’ey: Dawori gaman ragag e minit ni ke taw Karen nga reb e abich, me rung’ag ba lam nga fiti keru’ ni gowa manang.

“Mang fan ni kay gum sak’iy u wur?”

Nap’an ni sap Karen nga wuriyel, me guy Jessica nreb e fager rok ni bay l’agruw i melor u pa’. Manang Karen ni alkul e bay riy. Ma aram me yib i sak’iy Jessica nga p’eowchen Karen me pi’ reb fa gal melor ngak, me gaar, “Chiney e kam piilal nrayog ni ngam un boch ko felfelan’.”

Baadag Karen ni nge siyeg e re n’ey, machane Jessica e fager rok. Dabun ni nge lemnag e fager rok ni ir be’ nder ma rin’ boch ban’en ni nge felfelan’ ngay. Maku reb e, Jessica e gathi ir be’ nib kireb. Ere faanra be unum e alkul mab mudugil nde kireb e re n’ey. Ere gaar Karen u wan’, ‘Kemus ni ngan unum e alkul, gathi bod ni ngan fanay boch e falay ni kireb.’

Faanra gur Karen, ma mang e ga ra rin’?

MU TAL NGAM LEM!

Faanra nge yag nim dugliy ban’en u fithik’ e gonop u nap’an ni ke buch ban’en ni aray rogon, mab t’uf ni ngam nang e bin riyul’ i rarogom. Re n’ey e be yip’ fan e tin nib ga’ fan mab mich u wan’um. Faanra ga manang e pi n’ey, ma aram e rayog ni ngam gagiyegnag rogon e n’en ni ngam rin’ ko bin ni ngam pag e girdi’ ni nge mang yad e ra gagiyegnaged gur.—1 Korinth 9:26, 27.

Uw rogon ni nge yag e biney e lem ngom? Som’on e ba fel’ ni ngam pi’ e fulweg ko pi deer ni baaray.

1 MANG E GUB GEL RIY?

Ga ra nang e tin nrayog rom nge pi fel’ngim, ma aram e rayog ni nge pagan’um ngom.

BE’ U BIBLE NRAYOG NI NGAN FOLWOK ROK: I yoloy apostal Paul ni gaar: “Sana da gu salap ko welthin, machane ba tamilangan’ug ko thin rok Got.” (2 Korinth 11:6) Bochan nib tamilangan’ Paul ko thin ni bay u lan fare Babyor nib Thothup, ma aram fan ni yag ni nge par nib mudugil u nap’an ni togopuluw boch e girdi’ ngak. De pag e thin nib kireb ni yad be yog ni nge warnag e pagan’ rok.—2 Korinth 10:10; 11:5.

MU FAL’EG I YALIY RAROGOM: Mu yoloy nga but’ ban’en ni gab salap riy.

Mu yoloy nga but’ reb e fel’ngin ni bay rom. (Gur be’ ni ga ma lemnag rarogon e girdi’, ara gab gol, ara rayog ni ngan pagan’uy ngom, ara ga ma taw nga bang nib tayim, fa?)

2 MANG E PI MEEWAR ROG?

Faan ga ra pag e pi meewar rom ni nge gagiyegnagem, ma aram e tin nib ga’ fan mab mich u wan’um e ra yan i aw nib m’ay fan, ni bod rogon ba yil’ i chen ni faanra bay bang riy nib war, ma aram e dariy gelngin fare yil’ i chen.

BE’ U BIBLE NRAYOG NI NGAN FOLWOK ROK: Manang Paul e pi meewar rok. I yoloy ni gaar: “Lanin’ug e ri ba adag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag—reb e motochiyel ni be togopluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen.”—Roma 7:22, 23.

MU FAL’EG I YALIY RAROGOM: Mang e pi n’en ni gab meewar riy nib t’uf ni ngam gel ngay?

3 MANG E GU BE NAMEG?

Ga ra af nga ba taxi ma gog ngak e cha’ ni be kol e yap’ riy ni nga i liyeg taabang i ban’en nge mada’ ko ngiyal’ ni ke m’ay e pensin ko fare karrow, fa? Gab balyang ni faan ga ra rin’ ban’en ni aray rogon, maku boor e salpiy ni ga ra n’ag ngay!

Mang e gad be fil ko re n’ey? Ga ra nameg boch ban’en, ma aram e ga ra nang e n’en ni ngam rin’ ko yafos rom. Ra ayuwegem ni ngam nang e gin ngam sor ngay, nge rogon ni ngam taw e ngaram.

BE’ U BIBLE NRAYOG NI NGAN FOLWOK ROK: I yoloy Paul ni gaar: “Gu be mil i yan nib k’iy kanawoeg ko gin ni nga ni mus riy.” (1 Korinth 9:26) Bay boch ban’en ni i nameg Paul miki guy rogon ni nge rin’ ko bin ni nga yigi par ndariy ban’en ni be nameg ni fan ko yafos rok.—Filippi 3:12-14.

MU FAL’EG I YALIY RAROGOM: Mu yoloy nga but’ dalip ban’en ni ga be nameg ni ga baadag ni ngam rin’ u lan reb e duw.

4 MANG E TIN NIB MICH U WAN’UG?

Ba ke gek’iy nib toar lik’ngin nga fithik’ e but’ e ke yag ni nge par nde thig u tan e nifeng nib gel — Faanra karim dugliy u wan’um ni ngam par ni gab mudugil ni fan ko tin nib ga’ fan mab mich u wan’um, ma aram e ga ra bod ba ke gek’iy nib toar lik’ngin nga fithik’ e but’ nrayog ni nge par ndabi thig u tan e lang nib gel

Faanra dariy ban’en nib mich u wan’um, ma aram e dabiyog ni ngam dugliy ban’en. Ra um thilthilyeg rarogom ni bochan e ngam m’ag ko pi taab yangar rom ni bod ba mit e atraw ni ka nog e chameleon ngay ni yugu ma thilthilyeg ramaen dow. Faanra aray rogom, ma aram e dariy ban’en nib ga’ fan mab mich u wan’um.

Ba thil e re n’ey ko bin ni ngam ngongol nib puluw ko tin nib mich u wan’um. Ga ra rin’ e re n’ey, ma aram e ga ra par ni gab mudugil ni fan ko tin nib ga’ fan mab mich u wan’um.

BE’ U BIBLE NRAYOG NI NGAN FOLWOK ROK: Nap’an ni kab fel’ yangaren Daniel ‘me dugliy u wan’’ ni nge fol ko pi motochiyel rok Got ni yugu aram rogon ni immoy u bang nib palog rok girdien e tabinaw rok. (Daniel 1:8) Bochan ni rin’ e re n’ey, ma aram me yag ni nge puluw e ngongol rok ko bin riyul’ i rarogon nge tin nib mich u wan’.

MU FAL’EG I YALIY RAROGOM: Mang e tin nib mich u wan’um? Ba mich Got u wan’um, fa? Faanra ba mich u wan’um, ma mang fan? Mang e be micheg ngom ni bay Got?

Ba mich u wan’um nra yib angin e pi motochiyel rok Got ngom, fa? Mang fan?

Bin ngan e ga baadag ni ngam bod? Ba gaf i yuwan e gek’iy ni ke mul nga but’ ni be un ko nifeng, fa ba ke gek’iy nrayog ni nge par ndabi thig u tan e lang nib gel? Faan ga ra dugliy ni ngam par ni gab mudugil ni fan ko tin nib ga’ fan mab mich u wan’um, ma aram e ga ra bod fare ke gek’iy. Ku ra ayuwegem ni ngam nang e fulweg ko fare deer ni, Mang e Bin Riyul’ i Rarogog?