DEER 7

Uw Rogon ni Faanra Yibe Towasariyeg ni Nggu Un ko Par ko Pumoon nge Ppin?

FAN NIB GA’ FAN

N’en ni ga ra dugliy u murung’agen e par ko pumoon nge ppin e rayog ni nge yib angin ara wenegan ngom boch nga m’on.

MANG E GA RA RIN’?

Mu susunnag e re n’ey: Ke gaman l’agruw e pul ni ke fel’ e thin rok Heather nge Mike, machane ra lemnag Heather ma gowa kari n’uw nap’an ni ke nang Mike. Gubin ngiyal’ ni yow ma text, maku boor e awa ni yow ma non u phone, ma ra dawori mu’ bagayow ko non ma ke nang bagayow e n’en ni be yan ni nge yog! Machane, chiney e baadag Mike ni gathi kemus ni ngaur sabethingow.

U lan fa gal pul ni ke yan, ma kemus ni ma kol Mike nge Heather pa’row ma yow be faray owcherow. Dabun Heather ni nge rin’ boch ban’en nib pag rogon. Machane, dabun ni nge kireb e thin rorow Mike. Dariy be’ ni ma t’ufeg ni aram rogon. Ere gaar u wan’, ‘Bin riyul’ riy e ri gamow baadagew gamow . . .

Faanra kam ilal nrayog ni nge fel’ e thin romew be’ ma ke buch rom e n’en ke buch rok Heather, ma mang e ga ra rin’?

MU TAL NGAM LEM!

Ba mad ni yima chuw ngay ni be fanay be’ ko klin — Par ko pumoon nge ppin e aram reb e tow’ath ni kemus ni fan ko piin mabgol. Faan gimew ra par be’ ndawor mu mabgolgow, ma aram e kam darifannagew e re tow’ath ney. Re n’ey e bod ni kam fek ba mad nrib fel’ ni ke pi’ be’ ngom kam fanay ni ngaum klinnag ban’en ngay

Faan ga ra tim’og u l’ugun ba ke gek’iy ni ga be guy rogon ni ngam changeg, ma ra yib wenegan ngom. Ku ireray e n’en nra buch rom ni faan ga ra darifannag fare motochiyel rok Got ni be gaar: “[Dabi] par be’ nge be’ ni gathi mabgol rok.”—1 Thessalonika 4:3.

Mang wenegan nra yib ngak be’ ni faanra dabi fol ko re motochiyel ney? Be gaar e Bible: “Cha’ nra ngongliy e ngongol ko darngal e ke denen nib togopluw ko birok e dowef.” (1 Korinth 6:18) Uw rogon nib riyul’ e re thin ney?

Bay boch e girdi’ ni yad ma gay murung’agen boch ban’en ni ka rogned ni piin fel’ yangaren ni yad ma un ko par ko pumoon nge ppin ndawor ra uned ko mabgol e ma buch reb ara boch e pi n’ey rorad.

KIREBAN’. Yooren e fel’ yangaren ni kar uned ko par ko pumoon nge ppin ndawor ra uned ko mabgol e ka rogned ni kar kalgadngan’rad u tomuren.
DABKI PAGAN’UY. Tomuren nra par l’agruw ni’ ma yow l’agruw nra bagayow ma ra gaar u wan’, ‘Gur, ka bay be’ nga bang ni kar parew boch e cha’ney?’
RA THIL LANIN’UY. Bin riyul’ riy e, boor e rugod e yad baadag be’ nra ayuwegrad, ma gathi nge rin’ ban’en ngorad ni ir e nge fel’ rogon riy. Ma boor e pagel ni ma war e adag rok ngak reb e rugod u tomuren ni kar parew.
N’en nib ga’ fan ni ngan lemnag: Gimew ra par be’ ndawor mu mabgolgow, ma aram e kam darifannag ban’en nrib manigil. (Roma 1:24) Kaygi pag feni ga’ fan e dowef rom ni ngam darifannag ni aray rogon!

Mu dag ni kam gelnag e tafinay rom ndab mu ‘parew be’ ni gathi mabgol rom.’ (1 Thessalonika 4:3) Ma faanra kam un ko mabgol boch ngaram, ma aram e rayog ni ngam un ko par ko pumoon nge ppin. Faan ga ra rin’ ni aray rogon, ma rayog ni ngam felfelan’ ko biney e tow’ath ndakuriy rogon ni nge magafan’um, ara mu kalngan’um, ara mu par ndakuriy e pagan’ rom, nib ga’ ni aram boch ban’en ni ma buch ko piin yad ma un ko par ko pumoon nge ppin ndawor ra uned ko mabgol.—Proverbs 7:22, 23; 1 Korinth 7:3.

MANG E GA BE LEMNAG?

Ga be lemnag ni faanra riyul’ ni gab t’uf rok e cha’nem ma ra rin’ ban’en ni nge magawonnag fithik’ i dowam nge lanin’um, fa?
Faanra riyul’ ni gab t’uf rok be’ ma gur, ra waliyem ni ngam rin’ ban’en nra magawonnag e tha’ u thilmew Got?—Hebrews 13:4.

FAN KO PIIN RUGOD

Boor e pagel ni ka rogned ndab ra leayed reb e rugod ni kar pared. Mang fan? Bochan e yad baadag be’ nib beech e ngongol rok!

Ga be gin ko re n’ey, fa be k’aring e damumuw ngom? Faanra aray rogon, ma dab mu pagtalin e re n’ey: Pi kachido nge boch ban’en ni yima pag u TV e yima n’igin ni nge m’ug riy nib fel’ ni nge un l’agruw e fel’ yangaren ko par ko pumoon nge ppin, maku yima n’igin ni nge m’ug nre n’ey e ban’en ni yima rin’ ni ngan felfelan’ ngay ndariy wenegan nra yib nga tomuren ara nge m’ug ni aram e bin riyul’ e t’ufeg.

Machane, dab mu ngongol ni bod be’ ndariy ban’en ni manang! Piin yad ra guy rogon ni ngar waliyed gur ni ngam un ko par ko pumoon nge ppin ndawor mu un ko mabgol e kemus ni yigoo yad e yad be lemnaged yad.—1 Korinth 13:4, 5.