DEER 9

Ba Puluw ni Nge Mich u Wan’ug ni Kad Sumgad ko Gamanman, Fa?

FAN NIB GA’ FAN

Faanra riyul’ fare machib ni ke sum e girdi’ ko gamanman, me ere dariy fan e yafos rodad. Faanra riyul’ ni bay be’ ni ke sunmiy urngin ban’en, ma aram e rayog ni ngad pirieged e fulweg u boch e deer ni bay rogon ko yafos nge par rodad boch nga m’on.

MANG E GA RA RIN’?

Mu susunnag e re n’ey: Ke balyangan’ Alex, ya kab kafram i yib nib mich Got u wan’ ma kub mich u wan’ ni bay be’ ni ke sunmiy urngin ban’en. Machane, daba’ e ke yog e sensey rok ko biology nriyul’ fare machib ni ke sum e girdi’ ko gamanman, ma re machib ney e be tor nga daken boch ban’en ni ke gay e piin llowan’ murung’agen nrayog ni ngan pagan’uy ngay. Dabun Alex ni ngan lemnag ni ke kireb lolugen. Ere gaar u wan’: ‘Bin riyul’ riy e, faanra ke micheg e piin llowan’ nriyul’ e re machib ney, me ere dariy tapgin ni nge maruwar e thin rorad u wan’ug.’

Faanra gur Alex, ma ra mich fare machib u wan’um ni ke sum e girdi’ ko gamanman ni bochan e aram rogon ni bay u lan e babyor ni yibe fil u skul, fa?

MU TAL NGAM LEM!

Piin yad ma yog ni bay be’ ni ke sunmiy urngin ban’en nge piin yad ma yog ni ke sum e girdi’ ko gamanman e ba ga’ ni yad ma gur nga rogned e n’en nib mich u wan’rad, machane bin riyul’ riy e dar nanged fan nib mich e pi n’em u wan’rad.

Bay boch e girdi’ nib mich u wan’rad ni bay be’ ni ke sunmiy urngin ban’en ni bochan e aram rogon e n’en ni kan fil ngorad u galesiya.
Bay boch e girdi’ nib mich u wan’rad fare machib ni ke sum e girdi’ ko gamanman ni bochan e aram e n’en ni kan fil ngorad u skul.

NEL’ E DEER NI NGAM LEMNAG

Be gaar e Bible: “Urngin e naun ma mmudugil ni ba’ be’ ni ir e toy—mi Got e ir e ke sunumeg urngin ban’en.” (Hebrews 3:4) Gur, ba puluw ni nge mich e re n’ey u wan’um?

Reb e pagel ni be yaliy ba naun — Ri de puluw ni nge yog be’ ndariy Be’ ni Ke Sunmiy urngin ban’en, ya faanra aram rogon me ere bod ni be yog ndariy be’ ni ke toy e re naun ney

N’EN YIMA YOG: Bay ban’en ni pil u lan e lang me sum urngin ban’en ni bay u palpalth’ib.

1. Mini’ ara mang e k’aring e re n’em ni nge pil?

2. Bin ngan e ba puluw? Nga nog ni gubin ban’en ni bay e ka yigi sum rok, fa bay be’ ni ke yib rok?

N’EN YIMA YOG: Ke sum e girdi’ ko gamanman.

3. Faanra ke yib e girdi’ ko gamanman, ni bod ni nga nog ni kar bad ko monkey, me ere mang fan ni kab gel e llowan’ ko girdi’ ko monkey?

4. Mang fan ni mus ko “tin th’abi achig” e yafos ni bay ma ri boor nochi ban’en u rarogon nib mo’maw’ ni ngan nang fan?

N’EN YIMA YOG: Fare machib ni ke sum e girdi’ ko gamanman e ban’en nriyul’ ni bay e mich riy.

5. En be weliy e re n’ey e gur ke fal’eg i gay e mich riy, fa?

6. Uw urngin e girdi’ ni ke mich u wan’rad fare machib ni ke sum e girdi’ ko gamanman ni bochan e ka nog ngorad ni urngin e girdi’ ni llowan’ nib mich e re n’ey u wan’rad?

“Faanra ga be yan u lan e loway i yan mag pirieg ba naun nrib fel’ yaan, ma gur ga ra gaar u wan’um: ‘Rib manigil e re n’ey, ya dabisiy ni ke thig yu ke gek’iy ke aw nga but’ nib fel’ rogon ke sum e re naun ney riy?’ Ba mudugil ni danga’! De puluw ni ngam lem ni aram rogon. Ere mang fan ni nge mich u wan’dad ni urngin ban’en ni bay u palpalth’ib e ka yigi sum rok?”—Julia.

“Mu susunnag ni ke yog be’ ngom ni ke pil reb e masin u bangi ban’en ni yima printnag e babyor riy ma ke wagey e ink nga dow e rungrung ngu tan e chig u lang ke sum ba ke dictionary riy nib ga’ ken. Gur, ra mich e re n’em u wan’um?”—Gwen.

MANG FAN NI NGE MICH GOT U WAN’UM?

Be pi’ e Bible e athamgil nga lanin’um ni ngam ‘sikengnag urngin ban’en.’ (1 Thessalonika 5:21) Re n’ey e be yip’ fan ni michan’ rom ngak Got e gathi kemus ni nge taga’ ko

N’EN GA BE LEMNAG (Gu be lemnag ni ka bay be’ nga bang nib gel gelngin)
LEM KO GIRDI’ (Gu ma par u bang ni girdi’ riy e yad ba m’ing ko teliw)
TOWASAR ROK BE’ NGOM (Ke chuguliyeg e gallabthir rog ni nge mich Got u wan’ug, ere dariy ban’en nrayog ni nggu rin’ ngay)

Bin riyul’ riy e, thingari puluw fan nib mich boch ban’en u wan’um.

“Ra yi ba’ u class ni be weliy e sensey rogon ni ma maruwel fithik’ i dowdad e girdi’, ma ri ma riyul’ u wan’ug ni bay Got. Ra bang u dowdad ma bay e n’en ma rin’, ngki mada’ ko tin th’abi achig riy, ma yooren e pi n’ey e ma buch ndarud nanged. Riyul’ ni yira ngat nga rogon ni ma maruwel fithik’ i dow e girdi’!”—Teresa.

“Nap’an ni gu ra guy reb e naun nib tolang, ara bbarkow nib ga’, ara ba karrow, mab ga’ ni gu ma fitheg ni ma lungug, ‘Mini’ e ke ngongliy e re n’ey?’ Riyul’ nib t’uf be’ nib llowan’ ni nge ngongliy ba karrow ni bochan e boor nochi yang riy nrib achichig nib t’uf ni ngan ayliy nib fel’ rogon ya nge yag ni maruwel fare karrow nib fel’ rogon. Faanra bay be’ ni ke ngongliy e karrow, me ere ku arrogodad e girdi’.”—Richard.

I yog Anthony ni gaar: “Nap’an ni be yoor ban’en ni gu be fil u murung’agen e science mfin aram e be war e pagan’ rog ko fare machib ni ke sum e girdi’ ko gamanman.” Ki yog nrogon u wan’ e kab mo’maw’ ni nge mich u wan’uy fare machib ni ke sum e girdi’ ko gamanman ko bin ni nge mich u wan’uy ni bay Be’ ni Ke Sunmiy urngin ban’en.

NGAN LEMNAG

Yugu aram rogon ni boor e duw ni ke fal’eg e piin llowan’ i gay murung’agen boch ban’en ni bay rogon ko fare machib ni ke sum e girdi’ ko gamanman, machane dawori yag ni ngar pirieged ban’en u murung’agen e re n’ey nrayog ni nge taareban’rad ngay ni yad gubin. Piin llowan’ e susun ni yad e boor ban’en ni yad manang. Ere faanra dabiyog ni nge taareban’rad ko fare machib ni ke sum e girdi’ ko gamanman, me ere ga be lemnag nib kireb ni nge maruwar e re machib ney u wan’um, fa?