BIN 14

Ngan Tamilangnag e Tin nib Ga’ Fan

Hebrews 8:1

N’EN NI NGAN RIN’: Mu ayuweg e piin be motoyil ni ngar nanged e n’en ni ga be weliy ko welthin rom, mag tamilangnag rogon nib peth e tin nib ga’ fan riy ko n’en ni ga be nameg ni nge tamilang u lan e welthin rom nge kenggin.

ROGON NI NGAN RIN’:

Mu nameg ban’en. Som’on e ngam lemnag ko kemus ni ngam weliy boch ban’en ko welthin rom ni ngan nang, ara ngam micheg ban’en nga laniyan’ e girdi’, ara ngam pi’ e athamgil nga lanin’rad, ngemu’ mag fal’eg e welthin rom nib puluw ngay. Mu guy rogon ni gubin ban’en nib ga’ fan ni kam mel’eg ni ngam weliy e rayog ni nge tamilangnag e re dalip i n’ey.

Mu fithem ni nge lungum: ‘Mang boch e deer ara boch ban’en u murung’agen e re n’ey nde puluw u wan’ e piin be motoyil? Uw rogon ni yad ra lemnag reb nge reb e pi deer ney ara pi n’ey nde puluw u wan’rad?’ Tomuren ma aram mag yarmiy e n’en ni ngam weliy nrogon nib puluw ko re n’ey ya nap’an ni ngam pi’ e welthin rom ma rayog ni nge motoyil e girdi’ nib fel’ rogon, mar nanged fan me m’agan’rad ko n’en ni ga be weliy.
Mu tamilangnag kenggin e welthin rom. Nap’an ni ga be pi’ e welthin rom mu um sul u daken kenggin e welthin rom. Rogon ni ngam rin’ e aram e ngam sul u daken boch e thin ni bay riy ara boch ni taareb fan ngay.
Mu tamilangnag e tin nib ga’ fan u rogon nib mom ni ngan nang fan. Mmel’eg boch ban’en nib ga’ fan ni bay rogon nga kenggin e welthin rom maku rayog ni ngam weliy u lan e tayim ni kan pi’ ngom. Mu gonopiy urngin ban’en nib ga’ fan ni ngam weliy, mag tamilangnag reb nge reb, ma nap’an ni ga ra mu’ i weliy reb e pi n’ey, mag fil e fan rom mfin kum ulul ko bin migid.

Rayog ni ngam tamilangnag e n’en nib ga’ fan ko welthin rom u tabolngin ya nge mom rogon ko piin be motoyil ni ngar nanged fan e n’en ni ga be weliy, fa reb e rayog ni ngam sul nga daken u tungun e welthin rom ya nge dab ra paged talin.