BIN 18

Ban’en Nra Yib Angin ko Girdi’

1 Korinth 9:19-23

N’EN NI NGAN RIN’: Mu k’aring e piin be motoyil ni ngar lemnaged e n’en ni ga be weliy, ya nge yag nra nanged ni bay ban’en nib ga’ fan ni kar filed.

ROGON NI NGAN RIN’:

Mu lemnag e n’en ni manang e piin be motoyil. Mu ayuweg e piin be motoyil ni ngar lemnaged e n’en ni ga be weliy u yugu reb e kanawo’ nib thil ko bin ni ngam sul u daken boch ban’en ni yad manang.

Yugu mman u daken e tin ni yimanang ban’en, mag fal’eg i weliy e tin ni kab beech u teliy.
Mu gay murung’agen boch ban’en mag fal’eg i lemnag. Mu uneg boch ban’en ko welthin rom ni gathi ri yimanang murung’agen ara boch ban’en ni be buch ni nge tamilangnag boch ban’en nib ga’ fan ko welthin rom. Mu fal’eg i lemnag e n’en ni ngam weliy ko welthin rom nge rogon nib peth e n’en ni ngam weliy riy ko pi n’ey ni kam gay murung’agen.

Nap’an ni ga be yaliy e n’en ni bay ko welthin rom, mag lemnag fapi deer ni ‘mang, mang fan, wuin, uw, mini’, nge uw rogon.’ Mu fith boch e pi deer ney u nap’an ni ga be pi’ e welthin rom mag weliy e fulweg riy, ya nge yag nim pi’ e welthin rom u fithik’ e pasig.
Mu tamilangnag angin e n’en ni ga be weliy. Mu weliy rogon nrayog ni nge yib angin e thin nu Bible ni kam fanay ngak e piin be motoyil. Mu weliy boch ban’en ni ma buch ni bay rogon ko piin be motoyil.