GURUY NI 51
Uw Rogon ni Ngam Felfelan’nag Jehovah u Rogon e Numon ni Ga Ma Tay?
Nap’an ni sunmiydad Jehovah me pi’ reb e tow’ath nrib manigil ngodad. Re tow’ath nem e aram e rayog ni ngaud nonad. Ere gur, ba ga’ fan u wan’ rogon ni gad ma fanay e re tow’ath ney fa danga’? Arrogon, rib ga’ fan u wan’! (Mu beeg e James 1:26.) Ere uw rogon nrayog ni ngaud nonad u reb e kanawo’ nib m’agan’ Jehovah ngay?
1. Uw rogon nsusun e ngad fanayed fare tow’ath ni kan pi’ ngodad ni aram e rayog ni ngaud nonad?
Be yog e Bible ni ‘nge bagadad mi i pi’ e athamgil nga laniyan’ bagadad, me bagadad mi i ayuweg bagadad.’ (1 Thessalonika 5:11) Bay boch e girdi’ ni ga be lemnag nib t’uf ni ngan pi’ e athamgil nga lanin’rad, fa? Uw rogon nrayog ni ngam fal’eg lanin’rad? Mog ngorad nib ga’ farad u wan’um. Sana rayog ni nga mog ban’en ni ga baadag u rarogorad. Bay reb e thin nu Bible ni ga be lemnag nra pi’ e athamgil nga laniyan’ be’ ni ga manang, fa? Boor e thin nu Bible ni bay. Ku dab mu pagtalin nrogon ni ga ra non e ku rayog ni ngari pi’ e athamgil nga laniyan’ yugu boch e girdi’. Ere mu guy rogon ni ngaum non u fithik’ e gol nge sumunguy.—Proverbs 15:1.
2. Ba miti mang thin e thingar da siyeged?
Be gaar e Bible: “Dab umogned e thin nib kireb ku be’.” (Mu beeg e Efesus 4:29.) Re n’ey e be yip’ fan ndab ud uned ko yaba’ ara dogned ban’en nib kireb ni ngad kirebnaged laniyan’ be’. Ku thingar dab ud gun’gun’naged be’ ara da t’ared e thin nga daken be’.—Mu beeg e Proverbs 16:28.
3. Mang e ra ayuwegdad ni ngaud nonad u reb e kanawo’ nra pi’ e athamgil nga laniyan’ be’?
Ba ga’ ni n’en gad ma weliy e be dag e n’en bay u gum’ircha’dad nge n’en gad be lemnag. (Luke 6:45) Ere ba t’uf ni ngad filed rogon ni ngaud sapgad nga fel’ngin ban’en ni aram e tin nib mat’aw, mab machalbog, mab manigil, ma dariy thibngin. (Filippi 4:8) Faanra ngaud lemnaged e pi n’ey, ma aram e thingar da gonopiyed e pi n’en gad ma chuweg e chalban rodad ngay nge piin gad ma mel’eg ni ngar manged fager rodad. (Proverbs 13:20) Kub fel’ ni ngad lemgad u m’on ni ngad nonad. Am lemnag e n’en nra rin’ e thin ni ga ma yog ngak yugu boch e girdi’. Be gaar e Bible: “Marog thin e rayog ni nge maad’ad nga laniyan’ be’ nib toar ni bod bangi sayden, machane thin nnog nib gonop e rayog ni golnagey.”—Proverbs 12:18, BT.
KUM FIL BOCH BAN’EN U MURUNG’AGEN
Mu fil rogon ni ngam non u reb e kanawo’ nib m’agan’ Jehovah ngay ma ra pi’ e athamgil nga laniyan’ e girdi’.
4. Mu gagiyegnag e numon ni ga ma tay
Gad gubin ni bay yu ngiyal’ ni gad ma yog boch ban’en me tomur riy mad kalgadngan’dad. (James 3:2) Mu beegew e Galatia 5:22, 23, mi gimew weliy e fulweg ko gal deer ni baaray:
Bin ngan ko pi fel’ngin ney e rayog ni ngam yibilay ni nge yag ngom ya nge ayuwegem ni ngam gagiyegnag e numon ni ga ma tay? Uw rogon nrayog ni nge ayuwegem e pi fel’ngin ney?
Mu beegew e 1 Korinth 15:33, mi gimew weliy e fulweg ko re deer ni baaray:
Mang e rayog ni nge rin’ e pi fager rom nge pi n’en ga ma chuweg e chalban rom ngay ko thin ni ga ma yog?
Mang e rayog ni nge rin’ ban’en nga rogon ni ga ma non?
Be yog e Eklesiastes 3:7 ni bay “ngal’an ni ngan th’ab gulungey nge ngal’an ni ngan welthin.”
Mingiyal’ e rayog nib fel’ ni ngad th’abed gulungdad ara ngad sonnaged e ngiyal’ nib fel’ ni nga dogned ban’en riy?
5. Mog fel’ngin yugu boch e girdi’
Uw rogon ni ngad siyeged ndab dogned e thin nra kirebnag laniyan’ yugu boch e girdi’? Mu yaliyew e re VIDEO ney, mi gimew weliy e fulweg ko gal deer ni baaray.
Mang fan ni baadag e re walag ney ni nge thilyeg rogon ni ma weliy murung’agen yugu boch e girdi’?
Mang e rin’ ya nge yag ni thilyeg e ngongol rok?
Mu beegew e Eklesiastes 7:16, mi gimew weliy e fulweg ko re deer ni baaray:
Mang e susun ni ngad lemnaged u nap’an ni gad be n’en ni nga dogned ban’en nib kireb u murung’agen be’?
Mu beegew e Eklesiastes 7:21, 22, mi gimew weliy e fulweg ko re deer ni baaray:
Uw rogon nrayog ni nge ayuwegem e gal verse ney ni nge dab mu damumuw u nap’an ni ke yog be’ ban’en nib kireb u murung’agem?
6. Mu non ngak chon e tabinaw rom u fithik’ e sumunguy
Baadag Jehovah ni ngaud nonad ngak chon e tabinaw rodad u fithik’ e sumunguy nge t’ufeg. Mu yaliyew e re VIDEO ney, mi gimew weliy e fulweg ko re deer ni baaray.
Mang e ra ayuwegem ni ngam non ngak chon e tabinaw rom u fithik’ e sumunguy?
Mu beegew e Efesus 4:31, 32, mi gimew weliy e fulweg ko re deer ni baaray:
Uw rogon ni ngaud nonad ngak chon e tabinaw rodad u reb e kanawo’ nra pi’ e athamgil nga lanin’rad?
I weliy Jehovah rogon Jesus ni Fak u wan’. Mu beegew e Matthew 17:5, mi gimew weliy e fulweg ko re deer ni baaray:
Uw rogon nrayog ni ngam folwok rok Jehovah u rogon ni ga ma non ngak chon e tabinaw rom?
Mu gay boch e kanawo’ nrayog ni nga mog e tin nib fel’ ni ke rin’ yugu boch e girdi’ riy
MA GAAR BOCH E GIRDI’: “Yug tin keb ngan’ug mu gog. Dariy fan u wan’ug ni faanra dabun be’ e n’en ku gog.”
Ba puluw e re n’ey u wan’um, fa? Mang fan ni ka mog ni arrogon?
N’EN KAN FIL
Bay gelngin e thin ni yima yog. Ere ba t’uf ni ngad kol ayuwgad ko n’en gad ma yog, nge ngiyal’ nge rogon ni gad ma non.
Ngan Sul u Daken
Mang boch e kanawo’ nrayog ni ngam ayuweg yugu boch e girdi’ riy u daken e numon ni ga ma tay?
Ba miti mang thin e ga baadag ni ngam siyeg?
Mang e ra ayuwegdad ni ngaud nonad u fithik’ e sumunguy ma gad be yog e thin nra pi’ e athamgil nga laniyan’ be’?
MU GAY MURUNG’AGEN
Mang e rayog ni nge ayuwegdad ni ngaud nonad u reb e kanawo’ nra pi’ e athamgil nga laniyan’ yugu boch e girdi’?
Mu fil e n’en nrayog ni nge ayuwegem ni ngam taleg e yaba’.
Mu guy rogon nrayog ni ngam siyeg ndab um gun’gun’nag yugu boch e girdi’.
Mu beeg rogon ni ayuweg Jehovah be’ nib pumoon ni nge tal i yog e thin nib kireb.
“I Began to Think Seriously About Where My Life Was Headed” (The Watchtower, August 1, 2013)