GURUY NI 57
Uw Rogon ni Faanra Kam Rin’ Reb e Denen nib Ubchiya’?
Yugu aram rogon nrib t’uf Jehovah rom ma ri ga ma guy rogon ndab mu rin’ ban’en nra kirebnag laniyan’, machane bay yu ngiyal’ ni ga ra oloboch. Yugu aram rogon, ma bay boch e denen nib gel e kireb riy nga boch. (1 Korinth 6:9, 10) Faanra kam rin’ reb e denen nib ubchiya’ ma dab mu pagtalin ni ka gab t’uf rok Jehovah, mab m’agan’ ngay ni nge n’ag fan rom me ayuwegem.
1. Mang e thingar da rin’ed ya nge yag ni n’ag Jehovah fan e denen rodad?
Piin nib t’uf Jehovah rorad e rib gel e kireban’ ni yad ma tay u nap’an ni yad ra nang ni kar rin’ed reb e denen nib ubchiya’. Machane n’en ni micheg Jehovah ko girdi’ rok e rayog ni nge fal’eg lanin’rad. I gaar: “Denen ni kam lukgad ngay e rib gagiyel nib ramaen row, machane bay gu maluknagmed ngam beechgad ni bod feni beech e ayis ni ma mul u lang nga but’.” (Isaiah 1:18) Faanra riyul’ ni kad kalgadngan’dad, ma ra n’ag Jehovah fan e denen rodad. Uw rogon ni ngad kalgadngan’dad? Aram e ngari kireban’dad ko n’en kad rin’ed, ma gad tal i rin’ e tin nib kireb ban’en, ma gad wenig ngak Jehovah ni nge n’ag fan rodad. Ngemu’ ma gad athamgil u rogon nrayog rodad ni ngad thilyeged e lem nib kireb ara ngongol nib kireb ni kad mechamgad ngay ni ir e waliydad i yan ko denen, ma gad guy rogon ni nge puluw e ngongol rodad ko pi motochiyel rok Jehovah.—Mu beeg e Isaiah 55:6, 7.
2. Uw rogon ni ma fanay Jehovah e piin piilal ni ngar ayuweged gadad u nap’an ni kad denengad?
Faanra kad rin’ed reb e denen nib ubchiya’ ma be yog Jehovah ngodad ni ngad ‘pininged e piin ni yad piilal’ ko ulung. (Mu beeg e James 5:14, 15.) Pi piilal ney e ba t’uf Jehovah nge pi saf rok rorad. Kan fil ngorad rogon ni ngar ayuweged gadad ni ngki fel’ e tha’ u thildad Jehovah bayay.—Galatia 6:1.
Uw rogon ni ma ayuwegdad e piin piilal u nap’an ni kad rin’ed reb e denen nib ubchiya’? Ra fanay l’agruw ara dalip e piilal e fonow u lan e Bible ni ngar yal’uweged gadad. Ku yad ra pi’ boch e fonow ni nge ayuwegdad ndab kud denengad bayay. Ku ra tharbog e piin piilal be’ ni be rin’ boch e denen nib ubchiya’ ma der kalngan’ ya nge dabi magawonnag e tin ka bay e girdi’ u lan e ulung.
KUM FIL BOCH BAN’EN U MURUNG’AGEN
Mu fil rogon ni ngari ga’ fan u wan’um rogon ni ma ayuwegdad Jehovah u nap’an ni kad rin’ed reb e denen nib ubchiya’.
3. Gad ra yog e denen rodad ma rayog ni ngki fel’ thildad Jehovah bayay
Gubin e denen ni gad ma rin’ ma ma kirebnag laniyan’ Jehovah, ere ir e bay rogon ni nga dogned e denen rodad ngak. Mu beegew e Psalm 32:1-5, mi gimew weliy e fulweg ko re deer ni baaray:
Mang fan nib fel’ ni nga dogned e denen rodad ngak Jehovah ko bin ngad guyed rogon ni ngad mithaged?
Nap’an ni gad ra ning e ayuw ko piin piilal u tomuren ni ka dogned e denen rodad ngak Jehovah ma ra baud boch lanin’dad. Mu yaliyew e re VIDEO ney, mi gimew weliy e fulweg ko re deer ni baaray.
Uw rogon ni ayuweg e piin piilal Canon ni nge sul ngak Jehovah?
Ba t’uf ni ngad weliyed gubin ban’en ngak e piin piilal u fithik’ e yul’yul’ ya yad e kan tayrad ni ngar ayuweged gadad. Mu beegew e James 5:16, mi gimew weliy e fulweg ko re deer ni baaray:
Faan gad ra yul’yul’ ko piin piilal, ma uw rogon nra mom ngorad ni ngar ayuweged gadad?
Mog e denen rom, ma gog e tin riyul’ ko piin piilal, me m’agan’um nga rogon nra ayuwegem Jehovah u fithik’ e t’ufeg
4. Ma Runguy Jehovah e Pi Tadenen
Faanra ke rin’ be’ reb e denen nib ubchiya’ me siyeg ni nge fol ko pi motochiyel rok Jehovah, ma aram e yira tharbog ko ulung ma dab kud chaggad ngak. Mu beegew e 1 Korinth 5:6, 11, mi gimew mi gimew weliy e fulweg ko re deer ni baaray:
Ri buchuuw e is me thownag ba flowa. Ere faanra un chag ngak be’ ni be denen nder kalngan’, ma uw rogon nra magawonnag e ulung?
Ma folwok e piin piilal u rogon ni ma dag Jehovah e runguy ko pi tadenen ndawor ra flontgad ni aram e yad ma ayuweg e piin kan tharbograd ko ulung. Boor i yad e ke sul ko ulung ni bochan e yugu aram rogon ni ke kireban’rad ni kan tharbograd, machane aram e n’en ke ayuwegrad ni ngar nanged nib kireb e n’en kar rin’ed.—Psalm 141:5.
Uw rogon ni be mʼug ko ngongol rok Jehovah ngak e pi tadenen nib puluw rogon ni ma lem, ma ma runguyey, maku ma tʼufegey?
5. Gad ra kalngan’dad ma ra n’ag Jehovah fan e denen rodad
I yog Jesus ba fanathin ni nge ayuwegdad ni nge tamilang u wan’dad rogon laniyan’ Jehovah u nap’an nra kal be’ ngan’. Mu beegew e Luke 15:1-7, mi gimew weliy e fulweg ko re deer ni baaray:
Mang e be fil e re n’ey ngom u murung’agen Jehovah?
Mu beegew e Ezekiel 33:11, mi gimew weliy e fulweg ko re deer ni baaray:
Mang e ba ga’ fan ni ngam rin’ ni ngam micheg ni karim kalngan’um ko denen rom?
Ri ma t’ufeg Jehovah e pi saf rok ni bod be’ ni ma gafaliy e saf
MA GAAR BOCH E GIRDI’: “Gu be rus ni nggog e denen rog ko piin piilal mar chuweged gag ko ulung.”
Mang e ga ra yog ngak be’ ni aray rogon e lem rok?
N’EN KAN FIL
Faanra kad rin’ed reb e denen nib ubchiya’ machane riyul’ ni kar da kalgadngan’dad ma kad dugliyed u wan’dad ni ngad taleged e n’en nib kireb ni gad be rin’, ma aram e ra n’ag Jehovah fan rodad.
Ngan Sul u Daken
Mang fan nib fel’ ni nga dogned ngak Jehovah e denen ni kad rin’ed?
Mang e ba t’uf ni ngad rin’ed ya nge yag ni ngan n’ag fan e denen rodad?
Faanra kad rin’ed reb e denen nib ubchiya’, ma mang fan nsusun e ngad ninged e ayuw ko piin piilal?
MU GAY MURUNG’AGEN
Mu guy rogon ni dag Jehovah e runguy ni kan weliy murung’agen ko Isaiah 1:18 ngak be’ nib pumoon.
Uw rogon ni ma guy e piin piilal rogon ni ngar ayuweged e piin kar ngongliyed reb e denen nib ubchiyaʼ?
“Rogon ni Ngan Dag e T’ufeg nge Runguy ko Piin Kar Denengad” (Fare Wulyang ko Damit, August 2024)
Mu beeg rogon ni yima dag e tʼufeg nge runguy ngak e piin kar denengad machane dar kalgadnganʼrad.
“Ayuw ni Fan ko Piin Kan Tharbograd ko Ulung” (Fare Wulyang ko Damit, August 2024)
Mu beeg fan ni lemnag be’ nib pumoon ni malog ko tin riyul’ ni Jehovah e ir e ke ayuweg ke sul ko ulung bayay.