Piin Gallabthir—Mu Ayuweged Pi Fakmed Ngar Filed Rogon i Gonopiy Ban’en
1. Mang e ke k’aring reb e fel’ yangaren ni 15 e duw rok ni nge tamagow, ma mang e ke ayuweg ni nge tal?
1 I tabab Robin ni ragag nge lal e duw rok ko tamagow ni gathi bochan e ba adag, ya bochan ni gubin e girdi’ ma be rin’. I gaar: “Boch nga tomur riy mug par nggu lemnag mug dabuy. ‘Mang fan ni gu be rin’ e re n’ey?’ Ere kug tal.” Bochan ni ke gonopiy rok nib fel’ rogon, ma ke yog ni nge tal ndabki fol ko pi taab yangar rok!—Proverbs 2:11, 12.
2. (a) Mang boch e deer ni nge fith e piin gallabthir yad riy? (b) Mang e ma gagiyegnag e ngongol rok boor e girdi’ u Micronesia?
2 Gimed e gallabthir, be fil pi fakmed rogon ni ngar lemnaged ban’en ni aray rogon, fa? Rayog rorad ni ngar fal’eged i lemnag e pi kenggin e motochiyel nu Bible mar turguyed rorad e n’en ni ngar rin’ed ni yugu demtrug e n’en nra rin’ e pi’ be’ rorad nge pi taab yangar rorad, fa? Girdi’ nu Micronesia nge tin ka bay e nam, e ra kab fel’ yangaren bagayad ma ke fil rogon ni nge folwok ko n’en ni yibe rin’ u charen. Yad ma folwok ko n’en ni ma rin’ e pi be’ rorad ara pi taab yangar rorad, ma darur lemnaged ban’en ni yad rorad mar dugliyed boch ban’en nrogon nib puluw ko pi kenggin e motochiyel nu Bible.
3. Mang fan ni nge ayuweg e gallabthir e bitir rorad ngar filed rogon i gonopiyed ban’en?
3 N’en ni Nge Rin’ e Gallabthir: Thingar ni fil ngak e bitir rogon ni ngar gonopiyed ban’en ni yad rorad. Ra yani taw nga ba ngiyal’ ma ra t’uf ni ngar dugliyed ban’en ni yad rorad, ma faanra ni fil rogon ngorad ni ka chiney ma ra ayuwegrad. Be yog e Bible ni ngan fil rogon i gonopiy ban’en, ma aray reb e ban’en nrib ga’ fan nrayog ni nge ayuweg e piin gallabthir pi fakrad riy. Thingar ni ayuweg e piin bitir ni ngaur gonopiyed ban’en nrogon nib puluw ko n’en be yog e Bible u murung’agen Jehovah nge pi kanawo’ rok. Be gaar e Proverbs 5:1, 2: “Fakag, mu tiyan’um ko gonop ni yib rog. Mu telim ko llowan’ ni yib rog, ya ra yororiy rogon ni ngam gonopiy ban’en. Ma l’iginam e nge ayuweg e tamilangan’.”
4. Mang kanawo’ e fanay Jesus ni nge fil ngak e girdi’ rogon ni ngar gonopiyed ban’en?
4 Bfel’ ni nge folwok e piin gallabthir rok Jesus u rogon ni i pi’ e athamgil nga laniyan’ e piin ni kar motoyilgad ngak ni ngar fal’eged i lemnag ban’en. I fith Jesus u Matthew 17:25 ni gaar: “Simon, uw rogon ni ga be finey? Mini’ e ma pi’ e tax ko chugum fa tax ko pi pilung nu roy u fayleng? Girdien e nam fa girdi’ ni yib u bayang ko fare nam?” Deer ni fith Jesus e ayuweg Peter nge yog ni nang rok e fulweg nib puluw u murung’agen e tax ko tempel. Rayog ni nge fanay e piin gallabthir e re n’ey nge yog nra ayuweged pi fakrad ngar nanged rogon i gonopiy ban’en.
5. Uw rogon ni nge folwok e gallabthir ko kanawo’ ni fanay Jesus?
5 Rayog ni nge mon’og e bitir u rogon i gonopiy ban’en u nap’an ni be ilal i yan. Mu pag fakam ni nge turguy boch ban’en nib achig. Mu fith ngak ni nge lungum, “Mang e ga be finey nib fel’ ni ngan rin’ ko re n’ey?” Sana ra m’ug ko fulweg rok ni kub t’uf boch e ayuweg rok. Mu fal’egew i lemnag fare n’em u taabang mag gay rogon ni nge puluw e lem rok. Dabi kankanan’um ara ngochngochan’um ngak. Mu ayuweg pi fakam nge yog nra gonopiyed ban’en ni yad rorad u nap’an ni kar ilalgad.
6. Mini’ e rayog ni nge sap e piin gallabthir ngak ni nge ayuwegrad u rogon ni ngar skulnaged pi fakrad, ma mang fan?
6 Ba mo’maw’ i ayuweg e bitir nge yog nra gonopiyed ban’en, machane rayog ni nge ning e gallabthir e ayuw ngak Jehovah. (1 Korinth 3:10-15) Bitir ni kan skulnag nib fel’ rogon e yad ma felfelan’nag e gallabthir rorad ma yad ma pining e sorok ngak Got. Arrogon, ba ga’ e felfelan’ riy ni ngan ayuweg e bitir ngar filed rogon i gonopiyed ban’en.