Be Fil e Bible u Morngaagen e Wol?

NGAN TAR E THIN NGA DAKEN! MIN GATHIBTHIBNAG! Faanra bay be’ ni yima tay fan ma kan tar e thin nga daken fithingan ara thin ya ke wereg e thin nde riyul’ ni morngaagen, ma aram e ra lemnag ni nge yal’uweg e magawon. Sana mus nra fek e girdi’ ni ke wereg e thin nde riyul’ ko court.

Faanra mich e wol u wan’uy ma aram bod ni kan tar e thin nga daken Got ni Gubin ma Rayog Rok. Ya machib ko wol e ma yog nib mil fan ngak Got urngin e gafgow nge magawon ni bay u fayleng. Faanra mich e wol u wan’um, sana ga be lemnag ni fa En ni Bay Mat’awun ni Nge Gagiyegnag e Palpal Thib e ke dugliy ban’en ni bod e n’en ni baaray: ‘Daba’, ra maad’ad John ko reb e karro nra chafin, ra af e m’ar ngak Fatou, ma ra puth e naun rok Mamadou ko reb e yoko’’! Rayog ni ngam pigpig ku reb e Got ni ke dugliy e pi n’en ney fa?

Ma fith e girdi’ nib mich e wol u wan’rad, ‘Machane faanra de sor fan urngin e gafgow ngak Got, mini’ e ba sor fan ngak?’ Reb e pumoon ni Osmon fithingan e ke lemnag e re n’ey. Machane de t’uf ni nge sananag ni nge nang e tin nriyul’. Ke tamilang u wan’ nde riyul’ e re machib nem ya ke yal’uweg e re magawon ney ko machib ni bay ko Thin Rok, ni Bible. (2 Timothy 3:16) Ere ngad lemnaged ko mang e be yog e Bible u morngaagen e re n’ey.

Mini’ e Ba Sor Fan Ngak?

Ran ni ma tharey e but’, yoko’, nge durru’​—aram boch e magawon ni yima yog ni be maruweliy Got. Machane de dag e Bible ni Got e ir tapgin e pi magawon nem. Amu lemnag reb e magawon ni buch u Middle East ni ke n’uw nap’an kakrom. Be weliy e Bible ni ke yog fa en ni go ir ni magay ko re magawon ney ni gaar: “Ke aw e nifiy rok Got [baga’ ni fan fare bugithin nthin nu Hebrew e dirra’] ngak fapi saf nge piin ni yad be gafaliy kar m’ad ni yad gubin.””​—Job 1:16.

Yugu aram rogon ni ke par fare moon nib tamdag ngay ma sana ke lemnag ni Got e ir tapgin e nifiy, machane be dag e Bible ni gathi ir tapgin. Nga mu bieg Job 1:7-12, ma ga nang nde yib e dirra’ rok Got, machane yib ko Toogor rok​—ni Satan ni Moonyan! Gathi gubin e magawon e aram e maruwel rok Satan. Machane ba tamilang ni dariy rogon ni nge sor fan e pi magawon ngak Got.

Bin riyul’ riy e baga’ ni be sor fan e pi magawon ngak e girdi’. Baga’ ni de yib angin nib fel’ u skul, tabon e maruwel, ara u thilin e girdi’ ni bochan ni dan athamgiliy ma dan fil rogon ara sana bochan ndan lemnag yugu boch e girdi’. Ku aram rogon boch e m’ar, maad’ad, nge yam’ e aram wenegan ni be yib ngak e girdi’ ni bochan ndar tedan’rad ngay. Faanra ga ra pethuy e seat belt ko karro ko ngiyal’ ni ngam man nga bang ma ra ayuwegem ndab mum’ ko ngiyal’ nra chafin e karro. Dariy fan e seat belt nfaanra be gagiyegnag e “wol” e par rok e girdi’. Maku tafalay ni bpuluw nge par nib biech e ra ayuweg boor e girdi’ ndabra m’ad. Mus ko boch e gafgow ni yima yog ni “ke maruweliy Got” e riyul’ ni aram e maruwel rok e girdi’​—ni dar ayuweged e fayleng nrogon.​—Mu taarebnag ko Revelation 11:18.

“Magawon nge Tayim ni Dan Lemnag”

Rriyul’, bay boor ban’en ni be buch u fayleng ni be k’aring e kireban’ ni dan nang tapgin. Machane amu lemnag e n’en ni be yog e Bible u Eklesiastes 9:11 ni be gaar: “Kug sul ni ngguy u tan e yal’ ni piin nib pay e dar uned ko sagreng, ma piin nib gel e dar chamgad, ma piin nib gonop e dariy e ggan rorad, ma piin ni manang fan ban’en e dariy e salpiy rorad, ma piin ni bay e tamilangan’ rorad e dar fel’gad u wan’uy; ya magawon nge tayim ni dan lemnag nra yib i m’ug ngorad.” Ere dariy rogon ni nge mich u wan’uy ni fa En ni Sunmiy gubin ban’en e ir tapgin e pi magawon ara yibe gechignag e girdi’ nib l’ag ngay.

Ke togopuluw Jesus Kristus ko girdi’ nib mich e wol u wan’rad. Ya i weliy Jesus u morngaagen reb e magawon nib lingagil ngak e girdi’ ni be motoyil ngak, me fith ni gaar: “Ba uw rogon fa ragag nge meruk i girdi’ nu Silam nra m’ad ni faani m’ing fare wulyang ntafen e damit nga dakenrad? Gimed be finey ma re n’ey e ke micheg ni kab gel farad kireb ngak urngin e tin ni ka bay e girdi’ ni yad be par u Jerusalem? Danga’!” (Luke 13:4, 5) Ba gagiyel ni be yog Jesus ni tapgin e de sum rok Got, machane sum ni bochan e “magawon nge tayim ni dan lemnag nra yib i m’ug ngorad.”

Wenegan ko Girdi’ ni De Flont

Machane uw rogon e yam’ nge m’ar ndan nang tapgin? Be weliy e Bible e re fulweg nib tamilang ney u morngaagen rarogon e girdi’ nu fayleng: “Rogon ni ma yim’ urngin e girdi’ ni bochan e yad taab girdi’ Adam.” (1 Korinth 15:22) Yam’ e ke gafgownag e girdi ni ka nap’an e ngiyal’ ni ke yan Adam ko kanawo’ ni nge dabi fol rok Got. Bod rogon ni yog Got, ke af e yam’ rok Adam ngak urngin e girdi’ rok. (Genesis 2:17; Roma 5:12) Ere, urngin e m’ar e sor ku Adam ni girdi’ rodad kakrom. Maku pi n’en ni be kireban’dad ngay ya de yib angin riy ko par rodad e ba m’ag ko tin nib meewar rodad ni ke af ngodad.​—Psalm 51:5.

Amu lemnag e magawon ko gafgow. Bochan nib mich e wol u wan’ e girdi’ ma yad ma lemnag ni aram rogon e par rorad ma dariy fan ni ngar athamgilgad ni ngar mon’oggad iyan ngay. Ke mich u wan’rad ni “Aram e wol rodad.” Machane be dag e Bible ni be tor ko girdi’ nde flont, ma gathi wol. Ke gafgow boch e girdi’ ni bochan e “mit i n’en ni yung e ir e ra t’ar wom’engin.” (Galatia 6:7; Proverbs 6:10, 11) Be par bokum i million e girdi’ ni yad ba gafgow ni bochan e be suweyrad e girdi’ nib siin. (Mu taarebnag ko James 2:6) Be yog e Bible: “Girdi’ e ke gagiyegnag e girdi’ kar gafgowgad.” (Eklesiastes 8:9) Dariy ban’en riy ni be micheg ni gafgow e be tor ku Got ara wol.

Wenegan Nrayog Rok e Girdi’ ni Ke Mich e Wol u Wan’rad

Ku ban’en ni yibe maluag thin riy ko wol e aram wenegan nrayog rok e girdi’ nib mich e wol u wan’rad. I gaar Jesus Kristus: “Ba ke gek’iy nib fel’ rogon e ra k’uf ma ba fel’ wom’engin, ma ba ken nde fel’ rogon e ra k’uf ma ba kireb wom’engin, ma ba ken nde fel’ rogon e dabiyog ni nge yib wom’engin nib fel’.” (Matthew 7:17) Ngad lemnaged reb i wom’engin e wol​—ni rogon ni be suruy laniyan’ e girdi’ ko pi n’en nib mil fan ngorad.

Baga’fan ni nge par e girdi’ ni manang nthingari maruweliy e pi n’en nib mil fan ngak. Ya aram ban’en ni be k’aring e piin ni gallabthir ni nguur piew e tin nib t’uf ko tabinaw rorow, ma ma k’aring e pi tamaruwel ni nguur rin’ed e pi n’en nib mil fan ngorad, ma ma k’aring e girdi’ ni ma ngongliy ban’en ni ngar rin’ed nib fel’ rogon. Ra nge mich e wol u wan’ e girdi’ ma rayog ni ngar pired nib naab ko pi n’en nib mil fan ngorad. Amu lemnag ni faanra ba kireb e yap ko karro. Faanra manang e girdi’ nib mil fan ngak nthingari fl’eg e magawon, ma ra fl’eg e karro ya ra lemnag e yafos rok nge girdi’ ni ma un ko re karro nem. Machane be’ nib mich e wol u wan’ e ra lemnag ni ke mus nra m’ing e yap ko karro rok nfaanra aram e ‘tin nib m’agan’ Got ngay’!

Arrogon, faanra mich e wol u wan’uy ma rayog ni nge k’aring ni nge aw ndariy fan ban’en u wan’uy, ma ra k’aring e ngongol nib malmal, nge lem nde mil fan ngak e girdi’ wenegan e pi n’en nra buch, nge yugu boch e lem nde puluw ngay.

Ra Mang Ba Yoror u Thildad Got Fa?

Bin nib kireb riy ni nge mich e wol u wan’uy e rayog ni nge kirebnag e lem rok e girdi’ ko pi n’en ni be mil fan ngak ni nge rin’ ara thingari rin’ ku Got. (Eklesiastes 12:13) Be pining e en ni yoloy e psalm ni gubin e girdi’ e ra “ri’ lamen me nang ni ba fel’ Jehovah.” (Psalm 34:8) Ke dugliy Got boch ban’en ko girdi’ nra falfalan’rad ko felngin.​—Psalm 15:1-5.

Ban’en riy e kalngan’. (Acts 3:19; 17:30) Ra ngad kalgadngan’dad ma ba l’ag ngay ni ngad nanged ni kad olobochgad ma gad ra athamgil ni ngad yal’uweged. Gad gubin e gathi gad ba flont, ere bay boor e oloboch rodad ni ba t’uf ni ngad kalgadngan’dad riy. Machane faanra par be’ ni be mich e wol u wan’, ma mmom’aw’ ni nge lemnag nib t’uf rok ni nge kalngan’ ko kireb rok ara nge lemnag nib mil fan urgin e kireb rok ngak.

Yog e en ni yoloy e psalm u morngaagen Got: “Rogon ni yig ga be par nib t’uf e girdi’ rom e kab fel’ ko yafos.” (Psalm 63:3) Machane, wol ni ke michan’uy ngay e ke n’igin ni nge lemnag bokum i million e girdi’ ni Got e ir e en ni ke yoloy rogon e gafgow rorad. Ma wenegan riy e be par boor e girdi’ ni yad ba damumuw ngak, me ere kan ning e mab ko kanawo’ ni ngar pired nib fel’ thilrad e En ni Tasunmiy. Uw rogon nrayog ni ngam par nib t’uf rom e en ni ga be lemnag ni ir tapgin urngin e magawon nge gafgow rom? Ere michan’uy ko wol e ma ubung e yoror u thilin Got nge girdi’.

Faani yoor e tamilangan’ nu Bible u wan’um, ga ra tay fan ni par nga m’on e dabi tor ko wol ni dabiyog ni ngam thiliyeg e n’en ni kan dugliy ngom. Ya bpuluw e pi thin ni yog Moses ngak piyu Israel kakrom ni ke gaar: “Chiney e kug taymed ni ngam dugliyed ko yafos e nge yib ngomed fa yam’, fa nge fl’eg Got waathmed fa nge bucheg waathmed. Nggu non ko tharmiy nge fayleng ni ngar mangew mich ko bin ni bay mu turguyed ni ngeb ngomed. Mu turguyed e yafos ni ir e nge yib ngomed. Nge t’uf romed Jehovah ni Got romed, um folgad rok ma gimed be par ni gimed ba yul’yul’ ngak.” (Deuteronomy 30:19, 20) Arrogon, rayog ni ngam dugliy e yafos rom nga m’on. Ya gathi be tor ko wol.

[Sasing ko page 5]

Pi gafgow ney e gathi ‘maruwel rok Got’

[Credit Line]

Sasing ko U.S. Coast Guard

WHO

UN PHOTO 186208/M. Grafman