Mang Fan ni Gad Gubin ma Susun ni Ngad N’ufed Got?

HALLELUJAH! Girdi’ ko Kristendom e goo yad manang e re bugithin nem. Boch i yad e ma tolulnag e re n’em u nap’an e muulung rorad ko Madenom. Machane in e girdi’ e ri yad manang ko mang fan e re thin nem? Ya bin riyul’ riy e aram e thin ni Hebrew ma fan e re thin nem e “Ngan N’uf Jah!” Aram ba thin ni yibe tolulnag u fithik’ e falfalan’ ni yibe pining e sorok ngak e Ani Tasunumiy, ni ir Jehovah.a

Boor yay ni kan nog fare bugithin ni “Hallelujah” u lan e Bible. Ko mang fan? Ya bay boor fan ni ngan n’uf Got. Jah (Jehovah) e ir e Ani Tasunumiydad ma ir e Ani be ayuweg e palpal th’ib ni gangin me par. (Psalm 147:4, 5; 148:3-6) Ir e ke tay fapi n’en ni kan nog e ecosystem ngay ni aram e rayog ni ngan par nib fas u fayleng. (Psalm 147:8, 9; 148: 7-10) Maku ma lemnag e girdi’. Faanra gad ra rin’ e tin nib m’agan’ ngay ma ma flaabnagdad ma ma ayuwegdad ko yafas rodad e chiney ma ku ra pi’ e par nib fel’ rogon ngodad nga m’on. (Psalm 148:11-14) Jah (Jehovah) e ir e ke thagthagnag e pi thin ney ni gaar: “Piin ni yad mmat’aw e bay ra pired u daken e fayleng u fithik’ e gapas, me par ni taferad ni dariy n’umngin nap’an.”​—Psalm 37:29, New World Translation.

Arrogon, yibe pining urngin e girdi’ ni ngar gaargad: “Hallelujah!” “Mu n’ufed Jah, gimed e girdi’!” (Psalm 104:35; footnote) Machane kan kireban’ ngay ya gathi gubin e girdi’ ni yad ba adag ni ngar yodoromgad. Ngiyal’ ney ma kari gafgow e girdi’. Boor e girdi’ e be yim’ ko bilig, fa yad mm’ar, fa kan gafgownagrad. Ma boch e girdi’ e kari gel e magawon rorad ni bochan e drug ara alkul ara wenegan e ngongol ndarngal ni kan un ngay ara bochan e togopuluw. Bay fan ko girdi’ ni aram rogon ni ngar n’ufed Got fa?

‘Kari Mus ni Jehovah e Ke Pi’ e Athap Ngog’

Arrogon, bay fan. Ma pining Jehovah gubin e girdi’ ndemtrug ko mini’ ni ngar chugurgad ngak, ngar filed ko mang e tin nib m’agan ngay, mar uned ko pi flaab ni ma k’aring e girdi’ rok ni ngar n’ufed. Ma boor e girdi’ e be fulweg e re pong nem. Adriana nu Guatemala e reb e ppin ni aram rogon. Nap’an ni ke medlip e duw rok me yim’ chitingin. Ma de n’uw nap’an nga tomren ma ke chuw e chitamangin u tabinaw me digey. Ma nap’an ni ke ragag e duw rok, ma ke un ko maruwel ni nge ayuweg ir. Ke yog e nina rok ngak faram ni nge pigpig ku Got nge galesiya, me ere ke un Adriana ko boch e ulung ko Katolik, machane nap’an ni ke 12 e duw rok, ma ke dabuy ma ke chag ko girdi’ ni ma yan yan u kanawo’ ni kan nog e street gang ngay. Ke un ko tamagow, nge drug, nge moro’ro’. Ere mang fan ni ra adag e re rugod nem ni aram rogon ni nge n’uf Got?

Walagen Adriana ni ppin e ke tabab ni nge fil e Bible ko Pi Mich Rok Jehovah, ma ke minmin Adriana ngak. Ma ke yim’ walagen chitingin Adriana. Ma nap’an e gum’eyag ma ke wagey laniyan’ Adriana ya boor e deer ni be magawonnag laniyan’. Ke yan walagen e chitngin ngan? Bay u tharmiy fa? Fa ke yan nga infierno ko nifiy? Kari maathukthuk laniyan’ me ere ke yan Adriana ko galesiya ni nge yibilay e ayuw me yog fithingan Got ni Jehovah ya arrogon ni ke yog walagen ngak.

De n’uw nap’an nga tomren ma ke fil e Bible ko Pi Mich Rok Jehovah ma be un ko pi muulung ko Kristiano. Ma aram ma kari puf laniyan’, ma de rus ni nge tal ndabki chag ko fapi girdi’ ni yad e street gang. Ma chiney ma ke 20 e duw rok Adriana ma begaar: “Kari mus ni bochan nib t’uf Jehovah rog ma ar fan ni kug chuw ko ngongol nib kireb. Ya kari mus ni Jehovah e rayog ni nge pi’ e athap ngog ko yafas ni manemus ni bochan e ke runguyey.” Ere yugu aram rogon ni ke mo’maw e par rok ko som’on machane chiney ma bay boor fan ni nge n’uf Adriana Got.

Ku mu lemnag salpen be’ ni kari kireb. U Ukraine ma bay fare pumoon u kalbus ni be sonnag e ngiyal’ nran thang e fan rok. Ma be par ni kari mus ni aram e n’en ni be lemnag fa? Ma ke m’ingan’ fa? Danga’ gathi aram rogon. Ya ke un ko machib ko Pi Mich Rok Jehovah ma ke fil boch u morngaagen Jehovah, ma aram me yog ngorad ni ngar guyed e chitingin. Ma ke yoloy e babyor ngorad ya ke rung’ag ni kar rin’ed e n’en ni ke ning ngorad. Begaar: “Kammagargad ni kam guyed e nina rog. Aram e bin th’abi fel’ e thin ni kug rung’ag ko fa binem e duw.”

Ma ke yoloy u morngaagen nge morngaagen e girdi’ ni yad u kalbus ni ke machibnagrad me gaar: “Chiney ma ke mich Got u wan’mad ma gamad be athamgil ni nggu ngongolgad nib puluw ngay.” Miki yoloy ni gaar: “Kammagargad kam ayuwegmad nggu nanged fan ko be mang e t’ufeg me yog e michan’uy ngomad. Faanra gu ra par nib fas ma gu ra ayuwegmed ko machib. Kari magar Got ni gimed ba’ ma gimed be ayuweg yugu boch e girdi’ nge t’uf Got rorad me mich u wan’rad.” De magawon laniyan’ e re moon ney ni kan turguy ni nge yim’. Machane demtrug ko ran thang e fan rok fa ra par u kalbus in e duw, ma bay fan ni nge n’uf Got.

‘Yugu Aram Rogon ni Gub Malmit, Machane Rayog ni Ngguy Ban’en’

Ma amu lemnag bochi rugod ni fel’ yangaren ni ke malmit nib tomgin. Aram e n’en ni buch ku Gloria nu Argentina. Kari tomgin ni ke malmit Gloria u nap’an ni ke 19 e duw rok, ma dawori sul e changar rok. Ma nap’an ni ke 29 e duw rok, ma ke mang mispil ku be’ ma de n’uw nap’an nga tomren me diyen. Me ere ke felan’ ngay ya ke lemnag ni bay fan e yafas rok. Machane ke yim’ e bitir rok ma aram ma boor boch e deer ni ke lemnag. Ke lemnag ko ‘Mang fan ni be buch e re n’ey ngog? Mang e kug rin ma aram wenegan? Rriyul’ ni bay Got fa?’

Ma aram me yib l’agruw e Pi Mich Rok Jehovah nga tafen. Kar filed e Bible u taabang ma ke fil u morngaagen fare fayleng nib biech ma piin malmit e bay ra guyed ban’en biyay. (Isaiah 35:5) Aram ban’en ni rib manigil ni rayog ni nge l’agan’ Gloria ngay! Kari falfalan’, ma ke gel e falfalan’ rok faani yog e pumoon rok ni rayog ni ngar mabgolgow u court. Nge mu’ ma ke maadad figirngin ma thingari par ko wheelchair. Ere chiney ma thingari maruwel e re ppin ney nib malmit ni nge ayuwegrow. Maku ma rin’ urngin e maruwel u tabinaw, ma ma ayuweg figirngin. Machane ma n’uf Gloria Jehovah! Pi walag ni Kristiano ni pumoon nge ppin e ma ayuweg ni nge poy e Bible ni Braille, ma pi muulung ko Kristiano u lan e Kingdom Hall e ma pi’ e athamgil nga laniyan’. Begaar: “Mo’maw rog ni nggu weliy, machane yugu aram rogon ni gub malmit, machane gowa gu be guy ban’en.”

Yu ngiyal’ ma yima gafgownag e girdi’ ni ma n’uf Got. Ke falfalan’ reb e ppin u Crotia u nap’an ni ke fil morngaagen Got, machane ke togopuluw figirngin ko michan’ rok me n’ag miki fek e bitir rorow ni ppin ni taareb e duw rok. Ere ke par ni dariy e naun rok, ma figirngin nge girdi’ rok e kar n’aged, ma dariy e maruwel rok, ma kan fek e bitir rok, ma aram me par ni kari gafgow. Machane rogon nib t’uf Got rok e ke ayuweg ni yugu aram rogon ni de yog ni nge guy e bitir rok u gubin ngiyal’ nge mada’ ko ngiyal’ ni ke ilal. Ke pirieg e re ppin ney fare “churuwo’ nu l’ugun e yar ntin nib fel’” ma ri dabi pag. (Matthew 13:45, 46) Uw rogon ni ke par nib falfalan’ u fithik’ e pi magawon nem? Begaar: “Falfalan’ e aram reb e waamangin e kan ni thothup rok Got. Rayog ni nge yog ku be’ ndemtrug salpen, ni bod rogon nrayog ni nge tugul e woldug u lan e naun ni greenhouse ndemtrug ko uw rogon e yafang u wuru’.”

U Finland ma bay reb e pagal ni Markus fithingan ni ke yib mmit e m’ar ko muscle rok ma dariy e falay riy. De n’uw nap’an ma thingari par ko wheelchair. Ma in e duw nga tomren ma chitingin e ke fek ni nge mada’nag be’ ni ir e Pentecostal ma ba gilbuguwan e cha’nem ni bochan ni be yog ni rayog ni nge golnag e girdi’. Machane de gol Markus. Ere ke mulan’ ma daki lemnag Got ma ke par ni be fil morngaagen e science nge yugu boch ban’en. Ma lal e duw faram, ma reb e ppin ni bay ko wheelchair nge reb e pumoon e kar bow nga tafen Markus. Yow e Pi Mich Rok Jehovah. Ma Markus e atheist ni be’ nde mich Got u wan’, machane ke fel u wan’ ni ngar weliyed morngaagen e teliw ma ke piningrow nga naun.

Munmun, ma ba wu’ i mabgol e kur bow nga tafen, ma kar filed e Bible u taabang. Ma aram ma gelngin e thin nriyul’ ko Bible e ke ayuweg Markus nge thiliyeg rogon ni be lemnag boch ban’en, ma ke tamilang u wan’ ni yugu aram rogon ni ke m’ar machane bay boor fan ni nge n’uf Got. Ke gaar: “Kari gu falfalan’ ya kugu pirieg e tin riyul’ nge fare ulung rok Jehovah. Ere chiney ma bay fan e yafas rog. Ere kan pirieg reb e saf ni ke malog nga bayang ma chiney ma dabun ni nge chuw ko ran’ i saf rok Jehovah!​—Mu taarebnag ko Matthew 10:6.

Nge Urngin e Girdi’ Mar “N’ufed Jah”

Ereram boch uw e thin nra yog ni rayog ni ngan weliy ni boor e girdi’ ko ngiyal’ ney e yad be dag ni yugu demtrug rogon salperad, ma bay fan ni rayog ni ngar n’ufed Got. Ke weliy apostal Paul ni gaar: “Yul’yul’ ku Got e baga’ fan u gubin ban’en ya baga’ fan ko biney e tamilang nge bin ni bayi yib.” (1 Timothy 4:8, NW) Faanra gad ra rin’ e tin nib m’agan Got ngay ma ra ayuwegdad ko “biney e tamilang.” Machane u lan e re m’ag ney ma dabi n’igin ngari yoor e salpiy ko piin nib gafgow ma dabi golnag e girdi’ ko m’ar. Machane ma pi’ e kan ni thothup ngak e piin ni ma pigpig ngak ni rayog ni ngar pared nib falfalan’ ndemtrug salperad. Arrogon, mus ko “biney e tamilang,” ma piin nib m’ar ara ba gafgow e bay fan ni ngar n’ufed Got.

Machane uw rogon fare tamilang ni “bayi yib”? Kari mus ni goo ngad lemnaged ma susun nge n’igin ngad n’ufed Got ni kari mus rogodad riy! Gad ba falfalan’ ko ngiyal’ ndabkun nang e par nib gafgow; ma “dariy be’ ni be par u lan e nam rodad ni bay ki yog nib m’ar” ma Jehovah Got e ra “n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Isaiah 33:24; Revelation 21:3, 4; Psalm 72:16) Uw rogon u wan’um e pi n’en ney ni micheg Got ni bay yib?

Bay reb e pumoon u El Salvador ni ke fek reb e tract ko Bible ni be weliy u morngaagen e pi n’ey. Ma ke yog ko fare Mich Rok Jehovah ni ke pi’ e re gi babyor nem ngak ni gaar, “N’en ni be weliy ko re gi babyor ney e kayigi fel’ ma dabiyog ni nge riyul’.” Boor e girdi’ e ma lemnag ni aram rogon. Machane aram e n’en ni be micheg fa En ni ke sunumiy e palpal th’ib, ma ke n’igin nge mithmith urngin e cycle ko re fayleng rodad ney, maku ma ayuweg e piin nib gafgow e par rorad nge piin nib m’ar ni ngar pared ni yad ba falfalan’. Rayog ni nge mich u wan’dad e tin ni ma yog. Fare pumoon ni kan weliy morngaagen faram e ke fil e Bible ko Pi Mich Rok Jehovah ma ke pirieg nib riyul’ e re n’em. Ma faanra dawor mu fil e Bible ma gamad be piningem ngam un ngay. Ma aram ma ga ra moy ko ngiyal’ nra chuw e re m’ag ney, ma urngin e tin kan sunumiy e ra un i tolulnag e: “Hallelujah!” “Ngam n’ufed Jah, gimed e girdi’!”​—Psalm 112:1; 135:1.

[Boch e Thin nra Tamilangnag Murung’agen]

[Sasing ko page 5]

Nge yog ni mu un ko par ko ngiyal’ ni bay nga m’on ni urngin e tin ni ke sunumiy e yad ra tolulnag ni gaar: “Hallelujah!”