Mang E Ba T’uf Ni Ngad Rin’ed Ku Got?
“Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw.”—1 JOHN 5:3.
1, 2. Mang fan ndabni gin ngay ni bay boch ban’en nib t’uf ku Got ni nge rin’ e piin ni ba adag ni ngar liyorgad ngak nrogon?
“BA FEL’ u wan’ug e teliw rog!” Ereram e n’en ni ma yog boor e girdi’ fa? Ma bin riyul’ riy e susun ni ngan fith e re deer ni baaray, “Ke felan’ Got ko teliw rog fa?” Arrogon, bay boch ban’en ni ba t’uf ku Got ni nge rin’ e piin ni yad ba adag ni ngar liyorgad ngak rogon nib m’agan’ ngay. Susun ngad gingad ko re n’em fa? Danga’. Susun, bay e tabinaw rom ni rib fel’ yaan, ma ka fin mu ngongliy boch ban’en riy kam biechnag mab tolang puluwon. Ere ga ra pag yugu be’ nge par riy fa? Sana danga’! Ya bay boch ban’en nib t’uf rom ni nge rin’ e en nra par riy.
2 Ku arrogon Jehovah Got ni ke pi’ e fayleng nge par e girdi’ riy. U tan e gagiyeg ko Gil’ilungun ma dabki n’uw nap’an ma yira “biechnag” e fayleng biyay ma ra mang ba paradis ni rib fel’ yaan. Jehovah e ra lebuguy e re n’ey. Kari pag fan ni nge yog e re n’em ya ke pi’ Fak ni maagirag rok. Ere dabi siy ni bay ban’en nib t’uf ku Got ni nge rin’ e piin ni yad ra par riy!—Psalm 115:16; Matthew 6:9, 10; John 3:16.
3. Mang e yog Solomon ko mang e ba t’uf ku Got ni ngad rin’ed?
3 Uw rogon ni gad ra nang ko mang e ba t’uf ni ngad rin’ed ku Got? I thagthagnag Jehovah nga laniyan’ Solomon ni Pilung nib gonop ni nge tamilangnag ko be mang e ba adag ni ngad rin’ed. Tomren ni ke fl’eg i lemnag urngin ban’en ni ke rin’—ni ke lek e par nib fel’ rogon, ma ke toy boch e naun, ma ke un ko musik, nge adag ni ba’ ko pumoon nge ppin—nge mu’ me yog Solomon ni gaar: “Nguum par ni ba’ madgun Got u wan’um ma ga be fol ko thin rok. Ya kari mus fan ni sunumiy Got e girdi’.”—Eklesiastes 12:13.
“Tin ni Ke Yog ni Ngad Rin’ed e Gathi Rib Mo’maw”
4-6. (a) Mang fan fare bugithin ni Greek nni piliyeg ni “tomal”? (b) Mang fan nrayog ni ngan nog ni pi motochiyel rok Got e de tomal?
4 “Nguum fol ko thin rok.” Aram e n’en nib t’uf ku Got ni ngad rin’ed. Aram ban’en kayigi mo’maw fa? Danga’. Weliy apostal John ban’en u morngaagen e pi motochiyel rok Got ni ma fl’eg lanin’dad. I yoloy ni gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw.”—1 John 5:3.
5 Fare bugithin nu Greek ni kan piliyeg ni “mo’maw” e ma sor fan ko “tomal.” Ma yima yog nga ban’en nib mo’maw ni ngan lubeg. U Matthew 23:4, ma re bugithin nem e be weliy u morngaagen e “bogi n’en nib tomal,” ni aram e pi motochiyel nge pi yalen ni ke tunguy e pi tamachib ko motochiyel nge pi Farise. Ga manang fan ko mang e be yog apostal John? Pi motochiyel rok Got e gathi ba gilab nib tomal, ma ku gathi kayigi mo’maw ni ngan fol riy. (Mu taarebnag ko Deuteronomy 30:11.) Gathi aram rogon ya faanra ba t’uf Got rodad ma gad ra falfalan’ ni ngad folgad rok. Aram rogon nrayog ni ngad daged ku Jehovah rogon fene t’uf rodad.
6 Ra ngad daged ni ba t’uf Got rodad ma thingarda nanged ko mang e ba t’uf ni ngad rin’ed. Gad ra weliy lal ban’en nib t’uf ku Got ni ngad rin’ed. Ma ngad lemnaged e n’en ni yoloy John ni gaar: ‘Tin ni ke yog Got ni ngad rin’ed e gathi rib mo’maw.’
Ngan Fil e Tamilangan’ Rok Got
7. Rogon ni gad ra thap ko yafas e ma tor ko mang?
7 Bin som’on e n’en nib t’uf ni ngan rin’ e ngan fil e tamilangan’ rok Got. Mu lemnag e thin rok Jesus ni bay ko John guruy ni 17. Aram fare balayal’ u tomren e yafas rok Jesus nib girdi’. Ke par Jesus ni be ayuweg e pi apostal rok ni be fl’eg rogorad ko ngiyal’ nra chuw rorad. Kari lemnag ko ra uw rogorad nga m’on, nge yafas rorad ni dariy n’umngin nap’an. Ke sap nga tharmiy me yibilayrad. Begaar ko verse 3: “Baara’ ira’ e yafos ndariy n’umngin nap’an: ni aram e ngari fil e girdi’ e tamilangan’ u morngaagem ni kari mus ni gur e bin riyul’ e Got nge morngaagen Jesus Kristus ni ir e kam l’og ke yib.” Arrogon yad ra thap ngak Got nfaanra yad ra “fil e tamilangan’” u morngaagen Jehovah nge Kristus. Re n’em e ku ma sor fan ngodad. Ra ngad thapgad ko yafas ni manemus ma thingarda filed e re tamilangan’ nem.
8. Mang fan fare thin ni ‘nguun fil e tamilangan’’ rok Got?
8 Mang fan fare thin ni ‘nguun fil e tamilangan’’ rok Got? Fare bugithin ni Greek nni piliyeg ni “fil e tamilangan’” e ma sor fan ko “ngan nang fan ban’en, ara ngan poy” fa “ngari tamilang u wan’uy.” Ku mu tiyan’um ngay ni be yog “nguun fil e tamilangan’” ere aram ban’en ni nguun rin’ iyan. Ere nguun fil e tamilangan’ rok Got e be yip’ fan ni ngan maruweliy ni ngan nang Got min fager ngak, ma gathi ke mus ni ngan nang boch morngaagen. Ra ulul e tha’ u thiliy nge Got ma ra yoornag e tamilangan’ u morngaagen. Re n’ey e rayog ni nge ulul iyan ndariy n’umngin nap’an, ya dabiyog ni ngad filed urngin ban’en u morngaagen Jehovah.—Roma 11:33.
9. Mang e rayog ni ngad filed ko fare babyor ni morngaagen e tin ke sunumiy Jehovah?
9 Uw rogon nrayog ni ngad filed e tamilangan’ rok Got? Bay l’agruw e babyor ni ra ayuwegdad riy. Reb e babyor ko tin ke sunumiy. Pi n’en ni sunumiy Jehovah—e tin ni ma mithmith nge tin der mithmith—e goo yad ma tamilangnagan’dad ko uw rarogon. (Roma 1:20) Mu lemnag boch ban’en. Lingan e thangol, nge rogon ni ma sum e n’ew nib elmirin u nap’an nib mayko’, nge yaan e pi t’uf u lan e lang ni nep’—pi n’ey gathi ma fil ngodad ni Jehovah e ir ba Got ni “ba gel gelngin”? (Isaiah 40:26) Ba bitir ni be minmin u nap’an ni be yaliy fak e pilis ni be lag pachan ara be guy fak e gatuw ni be fafel ko bat—pi n’em e gathi ma tamilangnag ni Jehovah e ir “fare Got ni ba falfalan’” ma ba adag ni nge minmin? (1 Timothy 1:11) Rogon fene fel’ lamen e ggan, nge rogon fene fel’ bon e pi floras u daken e ted, nge yaan e burag ni boor raen, nge laman e pi arche’ ni ma tang u ngalan’ e gawel, nge rogon e falfalan’ ni ngam gumuchmuchgow be’ nib t’uf rom—pi n’en nem e gathi ma tamilangnag ni Ani sunumiydad e ir ba Got ni ma t’ufegey, ma ba adag ni ngad pared nib falfalan’?—1 John 4:8.
10, 11. (a) Mang boch ban’en u morngaagen Jehovah nge tin nib m’agan’ ngay ndariy ko fare babyor ni ka nog e tin ni ke sunumiy ngay? (b) Mang boch e deer ni bay e fulweg riy u lan e Bible?
10 Machane bay e gin ni ma mus riy e tin rayog ni ngad filed u morngaagen Jehovah ko fare babyor ko tin ni ke sunumiy. Susun: Mini’ fithingan Got? Mang fan ni ke sunumiy e fayleng me tay e girdi’ ngay? Mang fan ni ma pag Got e kireb? Mang e bay nga m’on rodad? Ni ngad nanged e fulweg ko pi deer nem ma thingarda filed fa binem e babyor ni ma fil e tamilangan’ rok Got—ni Bible. U lan e re ke babyor nem ma ma dag Jehovah boch ban’en u morngaagen, nge ngochol rok, nge rarogon, nge tin nib m’agan’ ngay—aram e pi n’en ndabiyog ni ngad filed ko yugu reb e babyor.—Exodus 34:6, 7; Psalm 83:18; Amos 3:7.
11 Miki tamilangnag Jehovah u lan e Bible morngaagen boch e girdi’ nib t’uf ni ngad nanged fan. Susun, mini’ Jesus Kristus, ma mang e maruwel rok ni fan ko tin ni ke m’agan’ Jehovah ngay? (Acts 4:12) Mini’ Satan ni Moonyan’? Mang e kanawo’ ni ma wawliy e girdi’ riy? Uw rogon ni ngad siyeged ndabi chafegdad nga orel? (1 Peter 5:8) Fulweg ko pi deer ney e ra ayuwegey ni ngan thap ko yafas ni manemus ma goo Bible e bay riy.
12. Uw rogon ni ngam weliy ko mang fan ni de tomal ni nga un fil morngaagen Got nge tin nib m’agan’ ngay?
12 Aram ban’en nib tomal ni ngan fil e tamilangan’ rok Got nge tin nib m’agan’ ngay fa? Ri danga’! Ka ga manang e ngiyal’ ni kam fil ni Jehovah fithingan Got, ma u daken Gil’ilungun ma ra sulweg e fayleng nga rogon me Paradis, ma ke pi’ Fak ni rib t’uf rok ni nge biyuliydad ni nge chuweg e denen rodad nge ku yugu boch e thin riyul? Gathi bod ni kan chuweg e upong u daken e sap rom ko manan’ ma aram kari tamilang owchem ko yay nsom’on? De tomal ni ngan fil e tamilangan’ rok Got. Ya aram ban’en ni yira falfalan’ ngay!—Psalm 1:1-3; 119:97.
Ngan Fol ko Motochiyel Rok Got
13, 14. (a) Nap’an nra tamilangan’dad u morngaagen Got ma mang boch ban’en ni ba t’uf ni ngad thiliyeged ko yafas rodad? (b) Mang boch e ngongol nde klin ni ba t’uf ku Got ni dab kud rin’ed?
13 Nap’an ni gad be fil e tamilangan’ rok Got ma ra tamilang u wan’dad ni thingarda thiliyeged boch ban’en ko yafas rodad. Aram e bin l’agruw ban’en ni ba t’uf ni ngad rin’ed. Thingarda folgad ko pi motochiyel rok Got nib sor fan ko ngongol nib mat’aw ma gad fol ko thin riyul’. Mang e thin riyul’? Baga’ fan u wan’ Got ko n’en ni ke mich u wan’dad nge pi n’en ni gad ma rin’ fa? Boor e girdi’ ko ngiyal’ ney e ma lemnag ni danga’. Reb e report ni fl’eg fare Church of England ko 1995 e ke weliy riy ni faanra par l’agruw ni’ u taabang ma dar mabgolgow ma gathi yow be denen. Reb e bishof ko galesiya e ke gaar: “Fare thin ni yima yog ni ‘yibe par u fithik’ e denen’ e aram a thin ni susun ndab nog ko binem ya dabi ayuwegey.”
14 Ere dakuriy e denen riy ni ngan par ni aram rogon ni “par u fithik’ e denen” fa? Ma yog Jehovah ngodad ni rib tamilang ko uw rogon e re n’em u wan’. Begaar e Bible ni Thin Rok: “Mabgol e urngin e girdi’ ni nge ta’ fan, ma pumoon nge ppin ni kar uned ko mabgol e thingari ra bagayad mi i par nib yul’yul’ ngak bagayad. Ya ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.” (Hebrews 13:4) Boch e tayugang ko galesiya nge girdi’ rorad e ma lemnag ni dariy e kireb riy ni nge par l’agruw ni’ u m’on ni ndawora mabgolgow, machane aram e denen nib ubchiya u mit Got! Ku arrogon e ngongol ndarngal, nge par ku be’ ni girdi’ rom, nge pumoon ni ra par ko pumoon. (Levitikus 18:6; 1 Korinth 6:9, 10) Ba t’uf ku Got ni ngad siyeged e pi ngongol nem, ya ba golong.
15. Uw rogon ma pi n’en nib t’uf ku Got ni ngad rin’ed e ba muun ngay rogon e ngongol rodad ngak e girdi’ nge pi n’en ni ke michan’dad ngay?
15 Machane dabi gaman ni ke mus ni dabkun un ko boch e ngongol ndabun Got. Ya tin nib t’uf ku Got ni ngad rin’ed e kub muun ngay rogon ni gad ma ngongol ngak yugu boch e girdi’. Ma u lan tabinaw ma ba adag ni en figirngiy nge en leengiy e nge bagayow ma nge t’ufeg bagayow ma ra bagayow me tay fan bagayow. Ma ba t’uf ku Got ni nge ayuweg e gallabthir e bitir rorad ko tin nib t’uf rorad, tirok Got ban’en, ma ngar fl’eged lanin’rad. Ma yog ko piin bitir ni ngar folgad ko gallabthir rorad. (Proverbs 22:6; Kolose 3:18-21) Ma uw rogon e tin ni ke mich u wan’dad? Ba adag Jehovah Got ni ngad paloggad ko machib nge yalen ni sum ko liyor ni googsur fa ba togopuluw ko thin riyul’ ni bay ko Bible.—Deuteronomy 18:9-13; 2 Korinth 6:14-17.
16. Mu weliy ko mang fan ni de tomal ni ngan rin’ e tin nib m’agan’ Got ngay ko ngongol nib mat’aw ma ngan un ko tin riyul’.
16 Ere kayigi tomal ni ngan fol ko pi motochiyel rok Got ko ngongol nib mat’aw ma gad fanay e thin riyul’ fa? Danga’, ya bay angin riy—u lan e mabgol ni an figirngiy nge an leengiy e ra bagayow ma be t’ufeg ma be pagan’ ngak bagayow ma gathi ra bod rogon boch e mabgol ni ke dar ni bochan ni ke un bagayow ko ngongol darngal; ma u lan e tabinaw rorad ma pi bitir e manang ni yad ba t’uf ko gallabthir rorad ma gathi bod e pi tabinaw ni ma lemnag e bitir ni dar t’ufgad rok e gallabthir rorad, ma ka yug ni pagrad, ma yibe dariy fannagrad; maku bay e nangan’ nib fel’ dariy ban’en ni ke methan’ ngay ma ba fel’ fithik’ i dow ma gathi kireban’ ni bochan e kan rin’ ban’en nib kireb ma kan siyeg e m’ar ko AIDS fa yugu boch e m’ar ni ma af ko ngongol ndarngal. Pi n’en nib t’uf ku Jehovah ni ngad rin’ed e gathi be siyeg boch ban’en ni nge yog e falfalan’ ko yafas rodad!—Deuteronomy 10:12, 13.
Nge M’ug e Ta’ Fan ni Bay ko Yafas nge Racha’
17. Uw rogon u wan’ Jehovah e yafas nge racha’?
17 Nap’an ni ga be taarebnag e yafas rom ko pi motochiyel rok Got ma ga ra tay fan fene ga’ fan e yafas. Ngad weliyed e bin dalip e n’en nib t’uf ku Got ni ngad rin’ed. Thingari m’ug e ta’ fan ni bay ko yafas nge racha’. Yafas e ba thothup u wan’ Jehovah. Mab puluw e re n’em ya ir Tapgin e yafas. (Psalm 36:9) Mus ko bitir ni ka bay u meyal ma kub t’uf rok Jehovah! (Exodus 21:22, 23) Racha’ e be yip’ fan e yafas. Ere racha’ e ba thothup u wan’ Got. (Levitikus 17:14) Susun ndabni gin ngay ni ba adag Got ni nge taareban’dad ngak u rogon ni ma tay fan e yafas nge racha’.
18. Mang e ba t’uf ku Jehovah ni ngad rin’ed ni fan ko yafas nge racha’?
18 Uw rogon ni gad ra tay fan e yafas nge racha’? Gad e Kristiano e dabda kirebnaged e yafas rodad ni fan ko fafel ni dariy fan. Ma gad ma kol ayuwngin urngin ban’en ma ba mudugil lanin’dad ko karro nge tabinaw rodad. (Deuteronomy 22:8) Dabda tamagowgad ma dabda yengyenged e buw, ma dabda fanayed e drugs ko fafel ya ma thiliyeg lanin’uy. (2 Korinth 7:1) Gad ma fol rok Got faani yog ni ngan ‘palog ko racha’,’ me ere dabda paged ni ngan kuruf e racha’ ngodad. (Acts 15:28, 29) Gad ba adag ni ngad pared nib fas, machane dabda ayuweged e yafas rodad ko biney e tamilang nfaanra gad ra th’ab e motochiyel rok Got ma gad kirebnag e yafas ni manemus ni rayog ngodad!—Matthew 16:25.
19. Mu weliy rogon ni ma yib angin ngodad ni fan e ri gad ma tay fan e yafas nge racha’.
19 Ba tomal ni ngad ted fan e yafas nge racha’ nib thothup fa? Ri danga’! Mu lemnag. Ba tomal ni ngan par ni dariy e cancer ko worrum ni sum ko tamagow? Ma ba tomal ni ngan par ni dariy e magawon u fithik’ i dowey ngu fithik’ i laniyan’uy ni bochan ni dan fanay e drug ni ma kirebnagey? Ma ba tomal ni ngan siyeg e AIDS, nge hepatitis, nge yugu boch e m’ar ni ke af ko racha’ ni yima fanay fa? Rib tamilang ni ngan siyeg e pi n’en nem ni fan ni ngan ayuwegey.—Isaiah 48:17.
20. Mang angin ni ke yib ko fare tabinaw ni kar ted fan e yafas ni bod Got?
20 Mu lemnag e re thin ney. In e duw faram ma reb e ppin ni ir e Mich Rok Jehovah e ke diyen ni dalip e pul ma ke yib e m’ar ngak ke pil e nguchey ma ke molul ma aram kan fek nga aspital. Tomren ni kan skengnag ma ke rung’ag ni be yog reb e togta ngak reb e nurse ni thingarni chuweg fare tir u yin’. Ma manang e re ppin nem ko uw rogon u wan’ Jehovah e yafas ko bitir u mayal, me ere ke turguy ni dabni li’ e bitir rok me yog ko fare togta ni gaar: “Faanra kab fas fare tir, ma ga pag nge par!” Ma ka be gafgow ko molul, machane in e pul nga tomren ma ke gargeleg boch i tir ndawori man pulan’ machane ba fel’fel’ rogon ma chiney e ke 17 e duw rok mab fel’ fithik’ i dow. Ke weliy fare ppin ni gaar: “Kan weliy e pi n’ey ngak fakmow ma ke yog ni kari falfalan’ ni dan nin’ nga lan tafen e dow. Manang ni bochan ni ug pigpiggow ku Jehovah ma kari mus fan ni ba fas e chiney.” Rriyul’ ni, ngan lemnag e yafas ni bod rogon u wan’ Got ma de tomal ko re tabinaw nem!
Nge Maruwel u Taabang e Girdi’ Rok Jehovah ni Yad ba Yaram
21, 22. (a) Mini’ e ba adag Jehovah ni ngad pigpiggad ngak u taabang? (b) Uw rogon nrayog ni ngan poy e ulung rok Got?
21 Gathi goo gadad e thingarda thiliyeged boch ban’en ko yafas rodad ni nge puluw ko pi motochiyel rok Got. Ya bay e girdi’ rok Jehovah u fayleng, ma ba adag ni ngad uned ngorad ngad pigpiggad u taabang. Ereray e bin aningeg e n’en nib t’uf ni ngan rin’. Thingarda pigpiggad ku Jehovah u taabang ko ulung rok ni kan ni thothup e be pow’iy.
22 Uw rogon ni ngan poy e ulung rok Got? Rogon ni yog e Bible ma bay e bin riyul’ e t’ufeg u fithik’rad, ma yad ma ta’ fan e Bible, ma yad ma n’uf fithingan Got, ma yad ma machibnag morngaagen Gil’ilungun Got, ma gathi yad bang ko fayleng. (Matthew 6:9; 24:14; John 13:34, 35; 17:16, 17) Kari mus ni taareb e teliw u fayleng e ma fol ko urngin e pi n’em ni aram e pow ko tin riyul’ e Kristiano—aram e Pi Mich Rok Jehovah!
23, 24. Mang fanathin e ma tamilangnag ni de tomal ni ngan pigpig ku Jehovah u taabang ko ulung rok?
23 Kayigi tomal ni ngan pigpig ku Jehovah u taabang ko ulung rok fa? Ri danga’! Ya aram ba taw’ath ni rayog ni ngan un ko t’ufeg nge ayuw ko pi walag ni pumoon nge ppin ni yad e Kristiano u gubin yang u fayleng. (1 Peter 2:17) Mu lemnag ni ke pil e barkow ma kam magay nib fas ma ga bay u maday ni ga be athamgil ni ngam pes. Nap’an ni kam lemnag ni dabkiyog rom ni ngam athamgil mag guy pa’ be’ni ke k’iyag ngom ni ngam un nga reb e lifeboat. Arrogon, bay e piin ni ur magaygad nib fas! U lan e re barkow nem ma ra bigimed ma be maman iyan nga dap’e l’ay, mi gimed ayuweg e girdi’ ni ka yad bay u maday.
24 Gathi ba dake aram rogodad? Ya kad chuwgad u “maday” ko re fayleng nib kireb ney ma kad oggad nga lan fare “lifeboat” ni aram e ulung rok Jehovah u fayleng. Ma gad ma pigpig u taabang ni gad be sor iyan nga “dap’ e l’ay” ko reb e fayleng nib biech mab mat’aw. Faanra pi n’en ni ma diliiy lanin’dad e ma magarnagdad, ma ngad pininged e magar ngak e tin riyul’ e Kristiano ya yad ma ayuwegdad ma kar fl’eged lanin’dad!—Proverbs 17:17.
25. (a) Mang e thingarda rin’ed ni fan ko piin ni ka yad bay u “maday” ko re fayleng nib kireb ney? (b) Mang ban’en nib t’uf ku Got ni ngad rin’ed ni yira weliy ko bin migid e thin?
25 Ma uw rogon yugu boch e girdi’—ni yad ba yul’yul’ ma ka yad bay u lan fare “day”? Thingarda ayuweged yad ngar uned ko ulung rok Jehovah fa? (1 Timothy 2:3, 4) Ya ba t’uf rorad ni ngar filed ko mang e ba t’uf ku Got ni ngad rin’ed. Aram e bin lal e n’en nib t’uf ku Got ni ngad rin’ed. Thingarda yul’yul’gad nga ud weliyed morngaagen Gil’ilungun Got. Pi n’en nib l’ag ngay e yira weliy ko bin migid e thin.
Ka Ga Manang?
◻ Mang fan nde tomal e pi motochiyel rok Got?
◻ Uw rogon ni gad ma fil ban’en u morngaagen Got?
◻ Mang fan nde tomal ni ngan fol ko pi motochiyel rok Got ko ngongol nib mat’aw ma ngan un ko tin riyul’?
◻ Mang e ba t’uf ku Got ni ngad rin’ed ya ngan tay fan e yafas nge racha’?
◻ Mini’ e piin ni ba adag Got ni ngad pigpiggad ngak u taabang, ma uw rogon ni ngan poyrad?
[Sasing ko page 11]
Gad ma fil u morngaagen Jehovah ko fare ke babyor ni tin ni ke sunumiy nge fare Bible
[Credit Line]
Gayuch: By courtesy of Australian International Public Relations; bear: Safari-Zoo of Ramat-Gan, Tel Aviv