Ngan Yul’yul’ Ko Pigpig U Taabang Ko Ulung Rok Jehovah

“Ga ma yul’yul’ ngak e piin ni yad ba yul’yul’.”​—2 SAMUEL 22:26.

1, 2. Mang e gadad be guy ni be rin’ boch e girdi’ nib yul’yul’ u lan e ulung?

REB e rran ni kari nep’ ma be fl’eg be’ ni piilal rogon e welthin rok ko muulung. Ba adag ni nge tal nge toffan boch; machane ka be maruwel, ma be gay boch e thin ko Bible nge fanathin ni ra taw nga gumerchaen e girdi’ ma ra pi’ e athamgil nga lanin’rad. Ma nap’an ni taw ko rofen ni bay e muulung, ma bay ba wu’ i mabgol ni ke aw parowrow ni yow ba adag ni ngar parew u tabinaw ngar toffangow; machane yow ma athamgil ni ngar ayuwegew e bitir rorow ni ngar fl’eged rogorad ngar uned ko muulung. Tomren fare muulung ma be sabethin boch e Kristiano u morngaagen e welthin ni pi’ fare piilal. Reb e walag ni ppin e ba adag ni nge yog ni bay biyay ni re piilal nem e ke k’aring e kireban’ ngak; machane ke yog e sorok ngak ko n’en ni ke weliy. Ga ma guy ban’en ntaareb rogon ko urngin e pi n’en ney?

² N’en ni taareb rogon e yul’yul’. Fare piilal e ma yul’yul’ ni nge pigpig ko yu ran’ i saf rok Got; ma fagali gallabthir e yow ba yul’yul’ ni ngar unew ko urngin e pi muulung ko ulung; ma fare walag ni ppin e ba yul’yul’ ni nge tay tanggin e piin piilal. (Hebrews 10:24, 25; 13:17; 1 Peter 5:2) Arrogon, u urngin ban’en ko par ma gad ma guy e girdi’ rok Got ni ke mudugilan’rad ni ngar pigpiggad nib yul’yul’ u taabang ko ulung rok Jehovah.

3. Mang fan ni ri baga’ fan ni ngad pared nib yul’yul’ ko ulung rok Jehovah u fayleng?

³ Nap’an ni ma sap Jehovah nga but’ ko re fayleng ney nib kireb, ma ri buch uw e tin nib yul’yul’ ban’en ni ma guy. (Mikah 7:2) Ere kari falfalan’ u gumerchaen faani guy e girdi’ rok ni yad ba yul’yul’! Arrogon, rogon ni ga ma par nib yul’yul’ e ma falfalan’nagan’. Machane ma k’aring e damumuw rok Satan, ni ir e bin som’on e tatogopuluw, ya ma micheg ni ir e ta lifith l’ugun. (Proverbs 27:11; John 8:44) Thingar mu nang u wan’um ni ra guy Satan rogon ni nge kirebnag rogon ni ga be par nib yul’yul’ ku Jehovah nge ulung rok u fayleng. Ngad guyed boch e kanawo’ ni ma yodorom Satan. Ma aram e rayog ni ngad guyed ko uw rogon nrayog ni ngad pared nib yul’yul’ nge mada’ ko tomur.​—2 Korinth 2:11.

Ran Lemnag Thibngin e Girdi’ Ma Ra Kirebnag e Yul’yul’

4. (a) Mang fan nib mom ni ngan lemnag thibngin e piin ni baga’ lungurad? (b) Uw rogon ni de yul’yul’ Korah ko ulung rok Jehovah?

⁴ Nap’an ni ra ga’ lungun reb e walag ni pumoon u lan e ulung, ma sana ra gagiyel thibngin. Ere rib mom ni ngam gathibthibnag ‘ba tabyu’ ni bay u lan mit walagem, ma damur tiyan’um nga ba ley i gek’iy ni bay u lan owchem’! (Matthew 7:1-5) Ra ngan par ni yigoo thibngin be’ e ngan lemnag ma ra n’igin ndabkun yul’yul’. Mu lemnag, rogon nib thil thilin Korah nge David. Boor ban’en nib mil fan ngak Korah ma dabi siy ni ke par nib yul’yul’ u lan in e duw, machane ke adag ni nge ga’ lungun. Ere ke dabuy e liw ku Moses nge Aaron, ni gallabthir rorad e yow walag. Moses e en nth’abi sobut’an’ u fithik’ e girdi’ machane ke sap Korah ngak ni be gayiy thibngin. Ere sana ke guy thibngin Moses. Machane de mat’aw ni nge par Korah ndabi yul’yul’ ko ulung rok Jehovah ni bochan thibngin Moses. Kan thang e fan rok u p’eowchen fare ulung.​—Numbers 12:3; 16:11, 31-33.

5. Mang fan ni rayog ni nge lemnag David ni nge togopuluw ngak Saul?

⁵ I pigpig David u tan pa’ Saul ni Pilung. Immoy Saul ni ir ba pilung nib fel’ machane faani munmun me pig nge kireb. Thingari michan’ David ku Got, me k’adan’, ma thingari par nib gonop ni fan ni nge par nib fas ni bochan e ke awan’ Saul ngak ma be togopuluw ngak. Machane nap’an ni yog rok David ni nge fulweg taban e kireb rok Saul me yog ni faanra ra rin’ ma ‘ra kireb u p’eowchen Jehovah,’ ya ke rin’ ban’en nde yul’yul’ ngak fa en ni dugliy Jehovah.​—1 Samuel 26:11.

6. Mus ni gad ra guy thibngin e piin piilal nge pi n’en ni yad meewar riy, machane mang e susun ndabda rin’ed?

⁶ Nap’an ni ra oloboch e piin ni be lekag e ulung u boch ban’en ni kar turguyed, fa ba gel e thin rorad, fa be m’ug riy ni yad ba laniyan’, ma gad ra gun’gun’nagrad, ma gad ra un i thibthibnagrad u lan e ulung fa? Gad ra togopuluw ngay ma dabkuda uned ko pi muulung ko Kristiano fa? Ri danga’! Bod David, ma dabda paged thibngin be’ nge n’igin ndabkuda pared nib yul’yul’ ku Jehovah nge ulung rok!​—Psalm 119:165.

7. Mang boch e ngongol nib kireb ni kan rin’ u lan e tempel u Jerusalem, ma uw rogon e re n’ey u wan’ Jesus?

⁷ Fa en th’abi fel’ e kanawo’ ni tay ko par nib yul’yul’ e aram Jesus Kristus, ma be weliy e thin ko profet ni ir e “en nib yul’yul’” ngak Jehovah. (Psalm 16:10) Dabi siy nib mo’maw e par nib yul’yul’ ya ba kireb e pi n’en ni un rin’ u lan fare tempel u Jerusalem. I nang Jesus ni maruwel ko fare prist nib tolang nge pi maligach ni yima pi’ e be yip’ fan e maruwel rok nge yam’ ni bay tay, ma manang ni rib baga’ fan ni nge fil e girdi’ ban’en ko pi n’en ney. Ere kari damumuw rok faani guy ni fare tempel e ke mang “bangi ban’en ni ma mith e moro’ro’ riy.” Ke pi’ Got mat’awun ma l’agruw yay ni rin’ ban’en ni nge klinnag.a​—Matthew 21:12, 13; John 2:15-17.

8. (a) Uw rogon ni dag Jesus ni ke yul’yul’ ko yaram ko tempel? (b) Uw rogon nrayog ni ngad daged ni gad ma tay fan e liyor ku Jehovah u taabang ko ulung rok nib biech?

⁸ Machane i par Jesus ni be tay tanggin e yaram ko fare tempel. Nap’an ni kab bitir, me un ko pi madenom ko tempel ma boor yay ni ke machibnag e girdi’ u rom. Miki pi’ puluwon e tax ko tempel​—ni yugu aram rogon nde t’uf ni nge rin’. (Matthew 17:24-27) I pining Jesus e sorok ngak fare ppin ni kem’ figirngin ni ke pi’ “urngin e chi salpiy ni ba’ rok” nga lan tafen e salpiy u tempel. De n’uw nap’an nga tomren me n’ag Jehovah e re tempel nem. Machane u m’on riy me par Jesus nib yul’yul’ ngay. (Mark 12:41-44; Matthew 23:38) Fare ulung rok Got u fayleng e chiney e kab fel’ ko fa binem e m’ag ko yu Jew nge tempel rorad. Gathi ba flont; ma aram fan ni yu ngiyal’ ma ba t’uf ni ngan thiliyeg boch ban’en riy. Machane ku dariy e sasalap riy, ma dabi n’ag Jehovah Got e re ulung ney me tay reb nga luwan. Susun ndabda paged gadad ngad gathibthibnaged e ulung ni bochan boch ban’en riy nde flont. Ya ngad folgad rok Jesus Kristus ni ke par nib yul’yul’.​—1 Peter 2:21.

Bay Thibngidad

9, 10. (a) Uw rogon ni ma tamilangnag e m’ag rok Satan thibngidad ni nge wawliydad ndabda pared nib yul’yul’? (b) Mang e susun ni nge rin’ be’ ni ke denen nib ubchiya?

⁹ Ma guy Satan rogon ni nge n’igin ndabkud yul’yul’gad ya ma tamilangnag thibngidad. M’ag rok e ma waliydad ko pi n’en ni gad meewar riy, me k’aring ni ngad rin’ed e tin nde fel’ u wan’ Jehovah. Gubin e duw ma bokum biyu’ e girdi’ ni ma un ko ngongol ndarngal. Boch e girdi’ e ma gelnag e kireb ko re ngongol ney ya yad ma par ni l’agruw raba’ e yafas rorad, ma yad ma ul’ul’ ko kireb ni yad be rin’ ma yad ma dake modingniged yad ni gowa yad e Kristiano nib yul’yul’. Ke yoloy reb e ppin u morngaagen e thin ni bay ko Awake! ko “Young People Ask . . .” ni gaar: “Pi thin ney e be weliy morngaagen e yafas rog.” Ya ke mith, me chag ngak e piin fel’ yangaren ni de t’uf Jehovah rorad. Ma mang wenegan ni yib ngak? Ke yoloy ni gaar: “Ke sobut’ e yafas rog, ma kug un ko ngongol ndarngal ma ke fonownageg e piin piilal. Ke kireb thilmow Jehovah, ma gallabthir rog nge piin piilal e daki pagedan’rad ngog.”b

¹⁰ Ke ayuweg e piin piilal e re ppin ney ma aram me sul nge pigpig ku Jehovah nib yul’yul’. Machane boor e girdi’ e ke yib wenegan ngorad ni rib gel e gafgow riy, ma boch i yad e dar sulod ko ulung. Kab fel’ ni ngan par nib yul’yul’ min togopuluw ko pi n’en ni ma wawliy e girdi’ ko re fayleng ney! Ngam fol ko pi n’en ni ma ginangey u lan fapi babyor ni Watchtower nge Awake! u morngaagen e chag ko girdi’ nu fayleng nge fafel nib kireb. Dab mu un ko ngongol ni de yul’yul’. Machane faanra er rogon, ma dab mu dake modingnigem. (Psalm 26:4) Ya ngam gay e ayuw. Aram fan ni bay e gallabthir rom nge piin piilal ko ulung.​—James 5:14.

11. Mang fan nib kireb ni ngad lemnaged ni goo gad ba kireb, ma mang thin ko Bible ni ra yal’uweg e lem rodad u morngaagen e re n’ey nge puluw?

¹¹ Ka bay reb e kanawo’ ni ra wawliydad thibngidad. Boch e girdi’ ni ma rin’ ban’en nde yul’yul’ e ra guy rogon ni nge tal i felan’nag Jehovah. Mu lemnag, i rin’ David boch e denen ni rib ubchiya. Machane, de n’uw nap’an u tomren ni yim’ David me yog Jehovah ni ir reb e tapigpig nib yul’yul’. (Hebrews 11:32; 12:1) Mang fan? Ya der tal i athamgil ni nge felan’nag Jehovah. Proverbs 24:16 e be gaar: “Fa en nib mat’aw e rayog ni nge dol’ ni medlip yay machane rib mutrug ni ra sak’iy nga lang.” Arrogon, faanra gad ra rin’ boch e denen ni gathi rib ubchiya’​—biyay nge biyay​—ni bochan ni gad be chamnag ban’en ni gad ba meewar riy, machane ka gad ra par nib mat’aw u p’eowchen Jehovah nfaanra nguuda “sak’iygad nga lang”​—ni aram e kad kalgadngan’dad riy ma gad ul’ul’ i pigpig nib yul’yul’.​—Mu taarebnag ko 2 Korinth 2:7.

Ngan Ayuw ko Ngongol ni de Yul’yul’ ni Gathi Rib Gagiyel!

12. Uw rogon ni de yul’yul’ e pi Farise ni bochan ni kar pared ni rib mudugilan’rad?

¹² Ku bay boch e ngongol nde yul’yul’ ni gathi rib gagiyel. Ku rayog ni ngan lemnag ni aram e yul’yul’! Susun, pi Farise u nap’an Jesus e ur lemnaged ni yad e tin th’abi yul’yul’ u fithik’ e girdi’.c Machane dar guyed ko mang e ba thil u thilin e par nib yul’yul’ nge fol nib pag rogon ko motochiyel ko girdi’, ya yad ba gelan’ ma kayigi gel rogon ni yad ma turguy e kireb ko girdi’. (Mu taarebnag ko Eklesiastes 7:16.) Ere dar yul’yul’gad​—ngak e piin ni susun ni yad be ayuwegrad, nge ngak felngin fare Motochiyel ni aram e n’en ni ur rogned ni yad be machibnag, nge ngak Jehovah. Ma Jesus e ba math keru’ ko re n’em ya ke yul’yul’ nga felngin fare Motochiyel, ni tor ko t’ufeg. Ere ke ubing e girdi’ me pi’ e athamgil nga lanin’rad, ni bod ni kan yiiynag ko thin ko profet u mornaagen fare Messiah.​—Isaiah 42:3; 50:4; 61:1, 2.

13. (a) Uw rogon nrayog ni nge dabki yul’yul’ e gallabthir ni Kristiano? (b) Mang fan ni susun ni nge siyeg e gallabthir i puwan’ nib gel fa i gathibthibnag fa i gechignag e bitir rorad nib gel?

¹³ Pi Kristiano ni baga’ lungurad e faan yad ra folwok rok Jesus ma ra yib angin ngorad. Susun, pi gallabthir nib yul’yul’ e yad manang ni thingara llowan’naged e bitir rorad. (Proverbs 13:24) Machane yad ma guy rogon ni dabra k’aringed e chachalban’ ko bitir rorad mi yad gechignagrad nib pag rogon u fithik’ e damumuw ara yugu yibe gathibthibnagrad. Ra mulan e bitir ni yad ma lemnag ni dabiyog ni ngar felan’naged e gallabthir rorad ara yad ma lemnag ni teliw ko gallabthir rorad e yigoo be gayiy thibngirad ma be sap ko kireb ko girdi’, ma yad ra palog ko bin riyul’ e michan’.​—Kolose 3:21.

14. Uw rogon nrayog ko pi tachugol saf ko Kristiano ni ngar yul’yul’gad ko yu ran’ i saf ni yad be pigpig ni fan ngorad?

¹⁴ Ku arrogon e pi piilal ni Kristiano nge piin ni ma lekag e ulung ni yad ma tiyan’rad ko pi magawon nge riya’ ni ma yib ko yu ran’ i saf. Yad e pi tachugol saf nib yul’yul’ me ere yad ma pi’ e fonow u rogon nib t’uf, mi yad guy rogon ni ngar nanged fan urngin ban’en u m’on riy ma yad ma pi’ e fonow u daken e thin ko Bible nge pi babyor ko ulung. (Psalm 119:105; Proverbs 18:13) Ku yad manang ni be taga’ e pi saf nga dakenrad ni ngar ubinged yad mar duruw’iyed yad. Ere yad ma guy rogon ni ngar folwokgad rok Jesus Kristus ni ir fare Tachugol Saf nib Fel’. Yad ba yul’yul’ ni ngar pigpiggad ko pi saf u reb e wik nge reb ko pi muulung ko Kristiano​—ma gathi yad ma kirebnagan’rad ya yad ma ubingrad mi yad gelnag e michan’ rorad.​—Matthew 20:28; Efesus 4:11, 12; Hebrews 13:20, 21.

15. Uw rogon ni dag boch e girdi’ u nap’an bin som’on e chibog ni dar yul’yul’gad nib puluw?

¹⁵ Ku reb e ngongol nde yul’yul’ e aram e ngan yul’yul’ nde puluw. Bin riyul’ e yul’yul’ nib puluw ko Bible e der ma pag ni ngan yul’yul’ nga ban’en nib m’on ku Jehovah Got. Boor piyu Jew u nap’an e bin som’on e chibog ni ur pared nib yul’yul’ ko fare Motochiyel rok Moses u nap’an e m’ag rok piyu Jew. Machane ke taw ko ngiyal’ ni ke turguy Jehovah ni dabki flaabnag e re nam nem ni yad e ta togopuluw ya ra flaabnag fare nam nu Israel nib spiritual. Kari mus ni buch uw e girdi’ ni ur yul’yul’gad ku Jehovah mar uned ko re n’ey ni ke thil. Mus ko tin riyul’ e Kristiano ma boch piyu Jew e ur rogned ni ngar sulod ko “fapi n’en nib mmeewar ma dariy farad” ko fare Motochiyel rok Moses, ni ke m’ay i lebuguy u daken Kristus.​—Galatia 4:9; 5:6-12; Filippi 3:2, 3.

16. Uw rogon u wan’ e pi tapigpig rok Jehovah nib yul’yul’ e pi n’en ni yima thiliyeg ko ulung?

¹⁶ Pi Mich Rok Jehovah ko ngiyal’ ney e yad mmath keru’ ko re n’em ya yad ma par nib yul’yul’ ko ngiyal’ ni kan thiliyeg boch ban’en. Nap’an ni be ga’ iyan e tamilang ni be gal ko thin riyul’, ma yibe thiliyeg boch ban’en. (Proverbs 4:18) Ka fini tamilangnag “fare tapigpig nib yul’yul’ mab gonop” fan fare bugithin ni “mfen” ni bay ko Matthew 24:34 nge ngiyal’ ni yira pufthinnag “fapi saf” nge “fapi kaming” ni bay ko Matthew 25:31-46, nge rogon e n’en ni ngan lemnag u morngaagen e pigpig ko am. (Matthew 24:45) Dabi siy ni boch e piin ni apostate e ra falfalan’ nfaanra par e Pi Mich Rok Jehovah nib mudugil lanin’rad mi yad fol ko n’en ni ka nog ko som’on u morngaagen e pi n’en nem ma dar adaged ni ngar mon’oggad iyan. Machane gathi aram rogon. Mang fan? Ya girdi’ rok Jehovah e yad ba yul’yul’.

17. Uw rogon ni rayog ni ngan skengnag e yul’yul’ rodad ni bochan e girdi’ rodad nib t’uf rodad?

¹⁷ Machane ku rayog rodad ni ngad yul’yul’gad u ban’en nde puluw. Nap’an ni mel’eg e fager rodad ara girdi’ rodad e kanawo’ nib togopuluw ko motochiyel ko Bible, ma sana gad ra lemnag ni bay l’agruw ban’en ni be girngiydad ngad yul’yul’gad ngay. Dabi siy ni gad ma yul’yul’ ngak e girdi’ ko tabinaw rodad. Machane ri dabi gel e yul’yul’ rodad ngorad ko yul’yul’ rodad ku Jehovah! (Mu taarebnag ko 1 Samuel 23:16-18.) Ma dabda ayuweged e piin ni ur rin’ed ban’en nib kireb ni ngar mithaged e denen rorad ara ngad uned ko ba’ rorad nib togopuluw ko piin piilal ni yad be guy rogon ‘faanem nge sul nga rogon nge par ni ke mat’aw biyay; min rin’ u fithik’ e sumunguy.’ (Galatia 6:1) Ya faanra ngan yodorom ma aram e ngongol nde yul’yul’ ku Jehovah, nge ngak e ulung rok, nge ngak faanem nib t’uf rom. Ya faanra ran tel rok e en ke denen e fonow nib t’uf rok, ma aram e yibe tel rok e t’ufeg rok Jehovah ndabki taw ngak. (Hebrews 12:5-7) Ku mu lemnag ni “maadad ni ma tay e en nib t’uf rom ngom e ba yul’yul’.” (Proverbs 27:6) Fonow nib tamilang mab puluw ni bay ko Thin Rok Got e sana ra k’aring e kireban’ ko be’ nib t’uf rom, machane ku rayog ni nge ayuweg e yafas rok nga m’on!

Yul’yul’ e ma Par u Fithik’ e Togopuluw

18, 19. (a) Mang e ba adag Ahab ni nge pi’ Naboth ngak, ma mang fan ni de pi’? (b) Ba puluw e yul’yul’ ni tay Naboth fa? Mu weliy.

¹⁸ Yu ngiyal’ ma ma togopuluw Satan nib puluw ko yul’yul’ rodad. Mu lemnag Naboth. Nap’an ni be gel fen Ahab ni Pilung ngak ni nge pi’ e milay’ ko grapes rok nchuway’, me gaar: “Dabiyog ni nggu rin’ e re n’ey u p’eowchen Jehovah, ni nggu pi’ e binaw ko girdi’ rog nkakrom ngom.” (1 Kings 21:3) Gathi ba gelan’ Naboth; ya ba yul’yul’. Kan tay chilen ko fare Motochiyel rok Moses ni dariy reb e girdi’ nu Israel ni ra pi’ nchuway’ e binaw rok ni yib ko girdien e tabinaw rok kakrom. (Levitikus 25:23-28) Dabi siy ni i nang Naboth ni rayog ko re pilung nib kireb ney ni nge thang e fan rok, ya ke pag Ahab Jezebel ni ppin rok ni nge li’ ngem’ boor e profet rok Jehovah! Machane ke par Naboth nib mudugil.​—1 Kings 18:4.

¹⁹ Yu ngiyal’ ma ba’ ban’en nib kireb nra buch ni bochan ni kan yul’yul’. Jezebel, nge boch e “pumoon ni dariy ban’en ni yad ba fel’ ngay,” e ur t’ared liyben Naboth ni yugu aram rogon ndariy ban’en nib kireb ni ke rin’. Ma n’en ni buch riy e kan li’ Naboth kem’ nge pi fak. (1 Kings 21:7-16; 2 Kings 9:26) Ere de fel’ ni ke par Naboth nib yul’yul’ fa? Danga! Naboth e reb ko fapi pumoon nge ppin nib yul’yul’ ni yad ba ‘fas’ u wan’ Jehovah e chiney, ma ke mus ni yad be mol u lan e low ko yam’ nge mada’ ko ngiyal’ ni ran faseg e yam’.​—Luke 20:38; Acts 24:15.

20. Uw rogon nrayog ni nge ayuwegdad e l’agan’ rodad ni ngad pared nib yul’yul’?

²⁰ Re athap nem e ma pi’ e athamgil nga laniyan’ e girdi’ rok Jehovah ni yad ba yul’yul’ e ngiyal’ ney. Gad manang ni sana bay wenegan nib kireb ko yul’yul’ ni gad ma tay u lan e re fayleng ney. Puluwon ni pi’ Jesus Kristus ko yul’yul’ ni tay e yafas rok, ma ke yog ngak pi gachalpen ni dabki fel’ boch e n’en nran rin’ ngorad ko n’en ni kan rin’ ngak. (John 15:20) Ke par ni be l’agan’ ko n’en ni bay nga m’on rok, me ayuweg ni nge k’adan’, maku arrogon gadad ni l’agan’uy ko pi n’en ney ni bay nga m’on rodad e be ayuwegdad. (Hebrews 12:2) Ere rayog ni ngad pared nib yul’yul’ u fithik’ urngin mit e togopuluw.

21. Mang boch ban’en ni be micheg Jehovah ko piin ni ma par nib yul’yul’ ngak?

²¹ Rriyul’, boch uw i gadad ko ngiyal’ ney e ma yib e togopuluw ko yul’yul’ rodad nib elmirin. Machane rayog ni nge gel e togopuluw ngak e girdi’ rok Got u m’on nra taw ko tomur. Uw rogon nrayog ni nge mudugilan’dad ngad pared nib yul’yul’? Rayog nfaanra ngad pared nib yul’yul’ e chiney. Ke pi’ Jehovah ngodad e maruwel nib baga’ fan ​—ni aram e ngan machibnag e girdi’ min fil ngorad morngaagen Gil’ilungun. Nguuda yul’yul’gad ko re maruwel ney nib baga’ fan. (1 Korinth 15:58) Faan dabda paged thibngidad nge kirebnag e yul’yul’ rodad ko ulung rok Jehovah ma faanra ngad ayuwgad ko yu mit e ngongol nde yul’yul’ nge yul’yul’ nde puluw, ma aram e rayog ni ngad pared ni ke bung rogodad ko ngiyal’ nran skengnag e yul’yul’ rodad nib elmirin. Yugu demtrug ko mang, ma nguud pagedan’dad ni ra par Jehovah nib yul’yul’ ngak e pi tapigpig rok ni yad ba yul’yul’. (2 Samuel 22:26) Arrogon, ra matanagiy e piin nib yul’yul’ ngak!​—Psalm 97:10.

[Boch e Thin nra Tamilangnag Murung’agen]

Uw Rogon ni Ngam Fulweg?

◻ Uw rogon nrayog ni ngad siyeged i pag thibngin e girdi’ ni nge n’igin ndabkuda pared nib yul’yul’?

◻ Uw rogon nrayog ni ngad sorgad iyan ko ngongol nde yul’yul’ ni bochan thibngidad?

◻ Uw rogon nrayog ni ngad siyeged i yul’yul’ nga ban’en nde puluw?

◻ Mang e ra ayuwegdad ngad pared nib yul’yul’ u fithik’ e togopuluw?