Mini’ E Ra Magay Nib Fas Ko “Rran Rok Jehovah”?

“Miti mang girdi’ e susun ni ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Jehovah, mi gimed athamgiliy nrogon nrayog romed nge papey nge taw ngay!”​—2 PETER 3:11, 12, New World Translation.

1. Chon mini’ e kar maruwelgad ni bod rogon Elijah ni taareb gelngirad?

JEHOVAH GOT e ke mel’eg e girdi’ ni ra un ngak Fak ni Jesus Kristus ko gagiyeg u Gil’ilungun u tharmiy. (Roma 8:16, 17) Nap’an ni ka yad bay u fayleng, ma pi Kristiano ni kan dugliyrad e ur maruwelgad ni bod Elijah ni taareb gelngirad. (Luke 1:17) Kan weliy ko fa binem e article e pi n’en ni ur rin’ed ni taareb rogon ku Elijah ni profet. Machane uw rogon fare maruwel ku Elisha ni ir e ke yan nga luwan Elijah?​—1 Kings 19:15, 16.

2. (a) Mang e bin tomur e maang’ang ni i ngongliy Elijah ma bin som’on ni i ngongliy Elisha? (b) Mang e mich riy ni de yan Elijah nga tharmiy?

² Bin tomur e maangang ni ngongliy Elijah e ke ruw raba’nag e ran ko lul’ ni Jordan u nap’an ni ke toy wuru’ e mad rok nga daken e ran. Aram ma rayog ni nge yan Elijah nge Elisha nga baraba’ e lul’ u daken e but’ ndariy e ran riy. Ma nap’an ni yad be yan ko ba’ ni ngek ko fare lul’ me yib ba nanyor me fek Elijah nga lang me afuweg nga yugu bang u fayleng. (Mu guy fare kahol ni bay ko page 14 ni “Bin Ngan e Tharmiy ni ke Yan Elijah Ngay?”) Ma ke mul fare wuru’ e mad rok Elijah. Me toy Elisha fare mad nga daken fare lul’ ni Jordan, me ki biyay e ran me yan nga baraba’. Re maangang nem e ke tamilangnag ni kan dugliy Elisha ni nge yan nga luwan Elijah ni nge mon’ognag e bin riyul’ e liyor u Israel.​—2 Kings 2:6-15.

Ba T’uf ni Ngan Ngongliy e Pi N’en ni Felngin Got

3. Mang e yog Paul nge Peter u morngaagen e ngiyal’ ni bay Jesus nge “fare rran rok Jehovah”?

³ Bokum e chibog u tomren Elijah nge Elisha me taarebnag apostal Paul nge Peter e “rran rok Jehovah” ni bay yib ko ngiyal’ nra moy Jesus Kristus nge fa “bin nib biech e tharmiy nge bin biech e fayleng” ni dawori taw ko ngiyal’ nem. (2 Thessalonika 2:1, 2; 2 Peter 3:10-13) Ra ngan par nib fas ko rran rok Jehovah ni baga’​—ni aram e ngiyal’ nra thang Got e pi toogor rok ma ra ayuweg e girdi’ rok​—thingarda gayed Jehovah ma gad par nib sobut’an’ mab mat’aw. (Zefaniah 2:1-3) Machane ka bay boch ban’en nib fel’ nra lingagil faanra gad ra lemnag e pi n’en ni rin’ Elisha.

4. Mang fan ni ngan pasig i pigpig ku Jehovah?

⁴ Ba t’uf ni ngan passig ni ngan pigpig ku Got ni nge yog ni ngad magaygad nib fas ko fare “rran rok Jehovah.” Rib passig Elijah nge Elisha ko pigpig ku Jehovah. Ku arrogon e tin ni ka bay e Kristiano ni kan dugliyrad e yad ba passig ko pigpig ni yad ma tay ku Jehovah mar mon’eged i machibnag fare thin nib fel’.a Ka nap’an e 1930 iyib ngaray ma kar pininged urngin e piin ni kar uned ko fare thin ko Gil’ilungun Got ni yad be athapeg e par ni manemus u fayleng ni ngar ognaged yad ku Jehovah mi yad un ko taufe. (Mark 8:34; 1 Peter 3:21) Bokum milyon e girdi’ e ur uned ko re n’ey. Kafram ma ur moyed u fithik’ e lumor ko tirok Got ban’en mar pared ni bod e yam’ ni bochan e denen, machane chiney e kar filed e thin nriyul’ rok Got, ma aram mi yad athapeg e par ndariy n’umngin nap’an u paradis u fayleng ma yad ba passig ko pigpig ku Jehovah. (Psalm 37:29; Revelation 21:3-5) Yad ma pi’ e toffan ko pi walagen Kristus nib spiritual u fayleng ya yad ba passig, ma yad ma ayuwegrad, ma yad ba gol ngorad, ma yad ma ngongliy e tin nib fel’ ban’en ngorad.​—Matthew 25:31-46.

5. Mang fan ni baga’ fan ni ngan rin’ e tin nib fel’ ban’en ni fan ko “pi walagen” Jesus ma mang e gad be fil ko ngiyal’ i n’em nap’an Elisha?

⁵ Piin ni ma ngongliy e tin nib fel’ ngak “pi walagen” Jesus ni bochan e kan dugliyrad ko kan ni thothup e yad e piin ni be athapeg ni ngar magaygad nib fas ko “fare rran rok Jehovah.” Kan taw’athnag ba wu’ i mabgol u Shunem ya kar ayuwegew Elisha nge tapigpig rok. Ma dariy e bitir rorow, ma ke pillibthir fa en figirngin. Machane ke micheg Elisha ngak fare ppin nu Shunem ni ra gargeleg bochi tir ni pumoon, ma ke riyul’ e re n’em. In e duw nga tomren me yim’ e re pagal nem, ma aram me yan Elisha nga Shunem me faseg ko yam’. (2 Kings 4:8-17, 32-37) Rib fel’ e taw’ath ni kan pi’ ni bochan ni kan gol ngak Elisha!

6, 7. Mang kanawo’ ni tay Naaman, ma uw rogon nib peth e re n’ey ko rogon ni ngan magay nib fas ko “fare rran rok Jehovah”?

⁶ Ba t’uf e sobut’an’uy ni ngan fol ko fonow ko Bible ni ma yib u daken “pi walagen Kristus” ni ran ayuwegey ni ngan par nib fas u fithik’ e rran rok Jehovah. Naaman ni ir e pilung ko pi salthaw nu Syria e ba daraw ma thingari sobut’an’ ni nge fol ko n’en ni yog ba buliyel nu Israel ni kan kol ke mang sib ni yog ngak ni nge yan nga Israel ni nge gayiy Elisha ma aram me gol ko m’ar rok. Ma de yib Elisha nga wuru’ e naun rok ni ngar nonow Naaman ya ke pi’ e thin ni baaray ni ngan nog ngak ni gaar: “Thingari yan i maluk nga lan e lul’ ni Jordan ni medlip yay, me chuw e daraw u downgin nge sul nga rogon.” (2 Kings 5:10) Ke damumuw Naaman, machane munmun me sobut’an’ me yan i maluk nga lan fare lul’ ni Jordan ni medlip yay ma aram me “chuw e daraw rok nge par downgin ni gowa downgin bochi tir.” (2 Kings 5:14) U m’on ni ke sul ko binaw rok me yan Naaman nga Samaria ni nge pining e magar ngak fare profet rok Jehovah. Ke mudugilan’ Elisha ni dabi fek e win ko pi n’en ni ma ngongliy Got u pa’, me ere kar mada’gow Naaman machane de fek e taw’ath. Ma aram me yog Naaman ku Elisha u fithik’ e sobut’an’ ni gaar: “Chiney iyan ngaram e dab kug pi’ e maligach fa gamanman ni kan urfiy ni maligach ngak yugu reb e kan, ya ke mus ni Jehovah e nggu pi ngak.”​—2 Kings 5:17, NW.

⁷ Ngiyal’ ney ma bay bokum milyon e girdi’ ni yad ba taw’ath ya yad ma fol ko fonow ko Bible ni ma pi’ e piin ni kan dugliyrad. Maku pi girdi’ ney e ke michan’rad ko maligach ni pi’ Jesus ni biyul’, me ere kan biechnagrad ko tirok Got ban’en. Yad ba taw’ath ya kar m’aged fager ku Jehovah Got nge Jesus Kristus. (Psalm 15:1, 2; Luke 16:9) Ma bochan ni kar pared nib yul’yul’ ku Got mar pigpiggad ngak ma aram ma yira taw’athnagrad mi yad magay nib fas ko fare magothgoth ni ra yib ko piin tadenen ni yad ba tolangan’ ma dar kalgadngan’rad u nap’an fare “rran rok Jehovah” ni be chugur iyib.​—Luke 13:24; 1 John 1:7.

“Mini’ e Bay ko Ba’ Rog? Mini’?”

8. (a) Uw rogon u wan’rad e piin nra magay nib fas ko “fare rran rok Jehovah” ni ngar rin’ed e tin nib m’agan’ Got ngay? (b) Mang e kan tay chilen ku Jehu? (c) Mang e ra buch ku Jezebel?

⁸ Piin ni be athapeg ni ngar magaygad nib fas ko “fare rran rok Jehovah” e thingara dugliyed lanin’rad ni ngar rin’ed e tin nib m’agan’ Got ngay. De rus Elijah ni nge yiiynag ni ran thang e fan ko tabinaw rok Ahab ni Pilung ya ur thanged e fan ko girdi’ ma ur liyorgad ku Baal. (1 Kings 21:17-26) Machane u m’on ni ke lebug e re n’em ma Elisha ni en ni yan nga luwan Elijah e thingari lubeg reb e maruwel. (1 Kings 19:15-17) Nap’an ni ke taw ko ngiyal’ ni turguy Jehovah, me yog Elisha ko tapigpig rok ni nge yan i liyef lolugen Jehu ni ga’ ko salthaw ko gapgep ni ir e ra mang pilung nu Israel me gaar fare mol’og ngak: “Ereray e n’en ni yog Jehovah ni Got nu Israel, ‘Gu be dugliyem ni ngam mang pilung ko girdi’ rok Jehovah ni piyu Israel. Ma thingar mu thang e fan ko girdi’ ko tabinaw rok Ahab ni pilung rom, ma aram min fulweg taban rachaen e pi tapigpig rog ni yad e pi profet nge urngin e pi tapigpig rok Jehovah ni kar m’ad u pa’ Jeze_bel. Ma thingari yim’ urngin e girdi’ ko tabinaw ku Ahab.’” Ma Jezebel ni Pilung ni ppin ni rib kireb e rok e ran n’ag me longuy e pilis ma dabni k’eyag.​—2 Kings 9:1-10.

9, 10. Uw rogon ni ke lebug e n’en ni yog Elijah u morngaagen Jezebel?

⁹ Pi pumoon u tan pa’ Jehu e kar nanged nib riyul’ ni kan dugliy ni nge mang pilung nu Israel. Ke ngongol Jehu nib mudugil me yan nga Jezreel nib machreg ni nge tabab i gechignag e piin ni ur mon’eged e liyor ku Baal ni yad e apostate. Jehoram ni Pilung ni fak Ahab e en nsom’on ni ke pag Jehu e gan e gat’ing ngak. Ke yan nga wuru’ fare mach ni ngar mada’gow Jehu ni nge nang ko faanra ke yib ni fan ko gapas fa danga’. I fulweg Jehu ni gaar: “Uw rogon nrayog e gapas nfaanra be un e chitiningim i Jezebel ko ngongol ndarngal nge pig?” Ma aram me pag Jehu gan e gat’ing rok nga gum’ercha’en Jehoram.​—2 Kings 9:22-24.

¹⁰ Piin ppin ni bay madgun Got u wan’rad e susun ni ngar siyeged i ngongol ni bod Jezebel ara yugu be’ ni bod ir. (Revelation 2:18-23) U m’on ni taw Jehu nga Jezreel, me guy Jezebel rogon ni nge m’ug ni be’ nib pidorang. Ke sap nga but’ u langan e winda, me yog ban’en ni be moning ara be ginang Jehu. I fith Jehu ko pi tapigpig rok Jezebel ni gaar: “Mini’ e bay ko ba’ rog? Mini’?” Chi ngiyal’ nem me sap l’agruw ara dalip e tayugang ko am nga but’. Yad bay ko ba’ rok Jehu fa? Ke gaar ngorad: “Mon’ed nga but’!” Me rin’ e pi pumoon nem ban’en nib mudugil ya ka ron’ed Jezebel ni be’ nib kireb nga but’. Pi os e kar yityited daken. Ma nap’an ni yib e girdi’ ni ngar k’eyaged, ma ur gayiyed ma ‘dakuriy ban’en rok ni ur pirieged ni kari mus ni lo’ u lolugen nge yil u ay nge pa’.’ Ere ke lebug e n’en ni yiiynag Elijah ni gaar: “Pi pilis e ra longuy ufin Jezebel”!​—2 Kings 9:30-37.

Ngan Tay Tanggin e Bin Riyul’ e Liyor u Polo’ i Gum’ercha’ey

11. Mini’ Jehonadab, ma uw rogon ni ke dag ni ke tay tanggin e bin riyul’ e liyor?

¹¹ Piin ni yad be athapeg ni ngar magaygad nib fas ko “fare rran rok Jehovah” mi yad par ndariy n’umngin nap’an u fayleng e thingara ted tanggin e bin riyul’ e liyor u polo’ i gum’ercha’’rad. Thingara boded Jehonadab, ara Jonadab, ni be’ ni ke liyor ku Jehovah ma gathi girdi’ nu Israel. Nap’an i yan Jehu ni nge lebuguy e n’en ni ka nog ngak ni nge rin’ ma ba adag Jehonadab ni nge dag ni ke fel’ u wan’ ma be tay tanggin. Ere ke yan i mada’nag e bin biech e pilung nu Israel, ni be yan nga Samaria ni nge gechignag e tin ni ka bay e girdi’ ku Ahab. Faani guy Jehu Jehonadab, me fith ni gaar: “Ba yul’yul’ gum’ercha’em ngog ni bod rogon nib yul’yul’ gum’ercha’eg ngom?” Ke fulweg Jehonadab ni arrogon ma aram me kiyag Jehu pa’ ngak me pining ni nge un ko karro rok ni ma girngiy e os ni be gaar: “Moy nga darow ma gguy ni dab gu pag ni ngan tagenging ngak Jehovah.” De toruruw Jehonadab me un ko re taw’ath nem ni ngan tay tanggin e en ni dugliy Jehovah ni nge pi’ e gechig.​—2 Kings 10:15-17.

12. Mang fan ni bay mat’awun Jehovah ni nge yog ni ngan liyor ngak ni yigoo ir?

¹² Bpuluw ni ngan tay tanggin e bin riyul’ e liyor u polo’ i gum’ercha’ey ya Jehovah e ir e An Tasunmiy urngin ban’en me ir e Pilung ko Palpal Th’ib, ma bay mat’awun ni nge yog ni ngan liyor ngak ni yigoo ir. Ke tay chilen ko piyu Israel ni gaar: “Dab mu ngongliy ba liyos ara yaan ban’en ni bay u tharmiy, ara bay u fayleng, ara bay u fithik’ e ran u tan e but’ ngam ta’ fan ara mmeybil ngay. Dab mu siro’ ko liyos ni ma meybil boch e girdi’ ngay ara mu ta’ fan fa mmeybil ngay, yi gag Jehovah ni Got rom, mi gag ba Got ni dabug yugu reb e kan ni nge tagenging ngog. (Exodus 20:4, 5) Piin ni yad be athapeg ni ngar magaygad nib fas ko “fare rran rok Jehovah” e thingara liyorgad ngak ni yigoo ir, ngu fithik’ e tin riyul’.” (John 4:23, 24) Thingari mudugilan’rad ko bin riyul’ e liyor ni bod Elijah, nge Elisha, nge Jehonadab.

13. Bod rogon ni ke taareb laniyan’ Jehonadab nge Jehu, ma chon mini’ e ke taareb lanin’rad fare Pilung ni Messiah, ma uw rogon ni yad ma dag e re n’ey?

¹³ Tomren ni kan pi’ e gechig ko tabinaw ku Ahab me rin’ Jehu ni Pilung boch ban’en ni nge nang ko mini’ e piin ni ma liyor ku Baal me chuweg e re teliw nem ni googsur u Israel. (2 Kings 10:18-28) Ngiyal’ ney ma kan dugliy fare Pilung ni Jesus Kristus ni nge gechignag e pi toogor rok Jehovah me yog e sorok ko gagiyeg rok Got. Bod rogon ni ke taareb lanin’row Jehonadab nge Jehu ma ku arrogon fare “ulung ni baga’” ko “yugu boch e saf” rok Jesus ko ngiyal’ ney ni yad ma tay tanggin Kristus ni ir fare Messiah ni Pilung ma yad ma ayuweg pi walagen nib spiritual u fayleng. (Revelation 7:9, 10; John 10:16) Yad ma micheg e re n’ey ya yad ma un ko bin riyul’ e liyor ma yad ba passig i un ko machib ko Kristiano, mi yad ginang e pi toogor rok Got ni ke chugur iyib fare “rran rok Jehovah.”​—Matthew 10:32, 33; Roma 10:9, 10.

Boch Ban’en ni Yira Ngat Ngay e Ke Chugur Iyib!

14. Mang e bay nga m’on rok e pi yuraba’ i teliw ni googsur?

¹⁴ I rin’ Jehu ban’en ni nge taleg e liyor ku Baal u Israel. Ngiyal’ ney ma Got e ra thang Babylon nib Gilbuguwan ni aram e pi yuraba’ i teliw ni googsur u daken Jesus Kristus ni ir e Bin Baga’ e Jehu. Dabki n’uw nap’an ma gad ra guy ni ra lebug e pi thin ni yog reb e engel ku apostal John ni gaar: “Ma fa ragag i gagey ni kam guy nge fare gamanman e bay ra fanenikayed fare ppin [Babylon nib Gilbuguwan] ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’. Ya ke ta’ Got nga lan gum’ircha’rad ni ngar ngongliyed e tin i be finey, ni nge taareban’rad ngar pied gelngirad ngak fare gamanman ni nge yib gelngin nge gagiyeg nge yan i mada’ ko ngiyal’ nra yib i m’ug ni ke riyul’ e thin rok Got.” (Revelation 17:16, 17; 18:2-5) “Fa ragag i gagey” e be yip’ fan e pi am ni yad ba gel ko mahl ni yad be gagiyegnag e fayleng. Aram rogon e chiney bod rogon ni yad be un ko ngongol ndarngal rok Babylon nib Gilbuguwan, machane ke ngoch nap’an ni nge par. Ya pi am nu fayleng e ra thang mit e pi yuraba’ i teliw ni googsur ma “fare gamanman ni maloboch”​—ni fare United Nations​—e ra yog e thin ku “fa ragag i gagey” ni nge gothey.b Aram ba ngiyal’ ni yira yog e sorok ku Jehovah!​—Revelation 19:1-6.

15. Mang e ra buch u nap’an ni yira guy rogon ni ngan thang e ulung rok Got u fayleng?

¹⁵ Tomren ni ke togopuluw Jehu ni Pilung ko liyor ku Baal, me tiyan’ ko pi nam ni yad e toogor rok piyu Israel. Ku aram e n’en nra rin’ Jesus Kristus ni Pilung. Ya ra magay e pi nam u tomren ni ran thang e pi yuraba’ i teliw ni googsur ni yad bod Baal. Ma ra k’aring Satan ni Moonyan’ e pi toogor rok Jehovah ney ni ngar togopuluwgad ngak e ulung rok Got u fayleng. (Ezekiel 38:14-16) Machane ra pag Jehovah Jesus Kristus ni Pilung ni nge thang owcherad u nap’an Har–​Magedon, ni aram “fare mahl ni fan ko fare rran ni baga’ fan, ni Rran rok Got ni Gubin ma Rayog Rok,” ma aram min micheg nib sorok Jehovah nge gagiyeg rok.​—Revelation 16:14, 16; 19:11-21; Ezekiel 38:18-23.

Ngan Pasig ko Pigpig ni Bod Elisha

16, 17. (a) Uw rogon ni gad manang ni ke pasig Elisha nge yan i mada’ ko ngiyal’ ni kem’? (b) Susun mang e ngada rin’ed ko pi gan e gat’ing ko thin riyul’?

¹⁶ Ra par e pi tapigpig rok Got ni yad ba pasig ma dabra rusgad ni bod Elisha nge yan i mada’ ko ngiyal’ ni ran thang e m’ag nib kireb rok Satan u nap’an “fare rran rok Jehovah.” I maruwel Elisha ni ir e tapigpig rok Elijah, miki pag 50 e duw ni i pigpig ni kari mus ni ir e profet rok Jehovah! Me yul’yul’ Elisha ko maruwel rok nge mada’ ko ngiyal’ ni yim’ mab n’uw n’umngin nap’an e yafas rok. U m’on ni yim’ me yib Jehoash ni Pilung ni ir fak be’ ni fak Jehu. Yog Elisha ngak ni nge yon’ gan e gat’ing nga wuru’ e winda. Ma faani yon’ gan e gat’ing me kan, me gaar Elisha: “I gur gan e gat’ing rok Jehovah ni bay maruwel ngay nge gel ngak yu Syria! Bay mu mahl ngak yu Syria u Aphek ngam gel ngorad.” Me yog Elisha ngak Jehoash ni nge fek fa tinem e gan e gat’ing ni ke magay nge toy nga but’. Machane de rin’ nib pasig, ya kari mus ni dalip yay ni toy nga but’. Ma aram me yog Elisha ngak ni aram fan ni ke mus ni dalip yay ni ra gel Jehoash ngak yu Syria, ma ri aram e n’en ni buch. (2 Kings 13:14-19, 25) De “mudugil ni ngari gel” Jehoash ni Pilung ngak yu Syria.

¹⁷ Tin ni ke magay ni kan dugliyrad e yad ba pasig ni bod Elisha ni yad be ul’ul’ ko cham ngak e pi yuraba’ i teliw ni googsur. Ma pi girdi’ ni be un ngorad ni yad be athapeg e par u fayleng e ku yad be yodor. Maku urngin e piin ni be athapeg ni ngar magaygad nib fas ko “fare rran rok Jehovah” e bfel’ ni ngar lemnaged e n’en ni yog Elisha u morngaagen rogon ni ngan toy nga but’. Ngad feked fapi gan e gat’ing ni fan ko thin riyul’ ma gad passig i toy nga but’​—biyay nge biyay​—arrogon, nge mada’ ko ngiyal’ ni ra yog Jehovah ni ke m’ay e maruwel rodad.

18. Susun uw rogon ni ngad ngongolgad nib puluw ko pi thin ko 2 Peter 3:11, 12?

¹⁸ “Fare rran rok Jehovah” e ra chuweg e re m’ag nib kireb ney. Ere nguuda paged ni nge k’aringdad e pi thin rok apostal Peter ni ke gaar: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Jehovah, mi gimed athamgiliy nrogon nrayog romed nge papey nge taw ngay!” (2 Peter 3:11, 12) Nap’an ni ra m’ay urngin ban’en nib bang ko re m’ag ney u daken e nifiy ko damumuw rok Got ni ra yib u pa’ Jesus Kristus, ma ke mus ni piin ni ba mat’aw e ngongol rorad ma yad ma pigpig ku Got e yad ra magay nib fas. Ba t’uf ni ngan par nib machalbog e gafarig ko tirok Got ban’en. Maku ba t’uf ni ngan t’ufeg yugu boch e girdi’, min ayuwegrad ko tin nib t’uf rorad, ma baga’ ni ngan ayuwegrad ko tirok Got ban’en u daken e machib ko Kristiano.

19. Mang e thingarda rin’ed ni ngad magaygad nib fas ko “fare rran rok Jehovah”?

¹⁹ Thin rom nge ngongol rom e ma micheg ni gur e tapigpig rok Got nib yul’yul’ mab pasig fa? Faanra er rogon, ma rayog ni ngam athapeg ni ngam par nib fas ko “fare rran rok Jehovah” ngam thap ko bin nib biech e fayleng rok Got. Arrogon, rayog ni ngam magay nib fas nfaanra ngam rin’ e tin nib fel’ ban’en ngak pi walagen Kristus nib spiritual ya yad pi gachalpen ni bod ni rin fa wu’ i mabgol nu Shunem ni kar golgow ngak Elisha. Ma faanra ngam magay nib fas ma thingar mu bod Naaman ni ke sobut’an’ me fol ko n’en ni yog Got me mang be’ ni ma liyor ku Jehovah. Faanra ri ga ba adag ni ngam par ni manemus u paradis u fayleng, ma thingar mu dag ni ga be tay tanggin e bin riyul’ e liyor, ni bod ni rin’ Jehonadab. Ma aram ma rayog ni ngam un ko pi tapigpig rok Jehovah ni yad ba yul’yul’, ma yad ra guy ni ra lebug e pi thin ney rok Jesus ni gaar: “Mired, ngan pi’ e gin nsuwon Got ngomed, ni kan ngongliy rogon kan tay ni fan ngomed ni ka nap’an e ngiyal’ nsunmiy e fayleng riy.”​—Matthew 25:34.

[Boch e Thin nra Tamilangnag Murung’agen]

Uw Rogon ni Ga Ra Fulweg?

◻ Mang boch pi felngin Got nib t’uf ni ngan magay nib fas ko “fare rran rok Jehovah”?

◻ Mang kanawo’ ni tay fa wu’ i mabgol nu Shunem u nap’an Elisha?

◻ Mang e rayog ni ngad filed rok Naaman?

◻ Uw rogon nrayog ni ngad folwokgad rok Jehonadab?

◻ Susun uw rogon u wan’dad e pi thin ko 2 Peter 3:11, 12?