Ulung Rok Jehovah E Ma Ayuwegem Ngam Lubeg E Machib Ni Ga Ma Tay

“Mu gguy yugu reb e engel ni be changeg nib tolang u fithik’ e nifeng, ni ba’ rok e thin ndabi math biid, ni thin nib fel’ ni nge weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.”​—REVELATION 14:6.

1. Uw rogon ni kan skengnag e Pi Mich Rok Jehovah, ma mang fan ni kar gelgad?

MANG FAN ni baga’ fan ni ngan nang ni ulung rok Jehovah u tharmiy e be tay tanggin e machib ko Kristiano? Rayog ko Pi Mich Rok Jehovah ni ngar wereged fare thin nib fel’ ko Gil’ilungun Got u fithik’ e togopuluw ni dariy e ayuw ko pi salthaw rok Jehovah riy u tharmiy fa? Ma ke rin’ e Pi Mich Rok Jehovah e re n’ey u lan reb e chibog ni ra be’ ma nam rok e be pagan’ ngay, ma bay boor e am nib totalitarian ma bay mahl ni ke un ga’ngin e fayleng ngay, nge yugu boch e gafgow. Ra dariy e ayuw rok Jehovah rorad ma dabiyog ko Pi Mich Rok ni ngar pared nib mudugil u fithik’ e pi magawon ney ni laniyan’ ko girdi’ nge tolangan’uy, nge togopuluw nib elmirin ni yibe ta’ ngorad fa?​—Psalm 34:7.

Kan Par nib Mudugil u Fithik’ e Togopuluw u Ga’ngin e Fayleng

2. Uw rogon nib taareb rogon e tin riyul’ e Kristiano u nap’an e bin som’on e chibog nge ngiyal’ ney?

² Chiney u lan e bin 20 e chibog, ma pi toogor ni girdi’ ko teliw nge am, e kar rin’ed urngin ban’en ni ngar taleged e maruwel rok Jehovah ni mus ni fekrad nga ranod ko court. Kan gafgownag e pi Kristiano ni pumoon nge ppin, ma kan wereg e thin ni googsur u morngaagrad ma kan t’ar e thin nga dakenrad​—boor i yad e kan li’rad kar m’ad​—ma baga’ ni pi tayugang ko Babylon nib Gilbuguwan e kar k’aringed ni ngan rin’. Rayog ni ngan nog e n’en ni kan nog u morngaagen e tin som’on e Kristiano ni gaar “gamad manang ni urngin yang ma be non e girdi’ riy nib togopuluw ko re raba’ i girdi’ nem.” Bod rogon e pi tayugang ko yu Jew u nap’an Kristus ni kar chamgad nib elmirin ni ngar taleged e machib ni be tay, ma ku arrogon e pi tayugang ko teliw nge piin ni yad e apostate nge pi tayugang ko am nib fel’ thilrad, e kar guyed rogon ni ngar taleged e machib ni be tay e girdi’ rok Jehovah.​—Acts 28:22; Matthew 26:59, 65-67.

3. Mang e rayog ni ngad filed rok Henryka Żur ya ke par nib yul’yul’?

³ Mu lemnag e n’en ni buch u Poland ko March 1, 1946. Henryka Żur ni reb e rugod ni 15 e duw rok me ir e Mich Rok Jehovah ma be’ nu bang nib chugur nga Chełm e kar ranow reb e Mich ni pumoon ni ngar guyew boch e girdi’ ni ba adag e machib u yugu reb e binaw. Ma ke kolrow e girdi’ ko Katolik ni yad e salthaw ni ka nog Narodowe Siły Zbrojne (National Armed Forces) ngorad. Kan li’ fare walag ni pumoon nib elmirin machane ke magay nib fas. Machane gathi aram rogon Henryka. Kan li’ nib elmirin u lan boor e awa mi yad guy rogon ni ngar towarsariyed ni nge n’igin fare pow ko kuruth ko Katolik. Yog bagayad ngak ni gaar: “Mu lemnag e n’en ni ga ba adag, machane mu fl’eg yaan fare pow ko kuruth ko Katolik. Ya ra dab mu rin’ ma yira boyochnagem!” Ere ke war ndaki par nib yul’yul’ fa? Danga’. Ere pi girdi’ nem ko teliw ni yad ba kireb e ur koled mar feked nga fithik’ e gerger mar boyochnaged. Machane ke gel fachi rugod! Ya de m’ing ngorad.a​—Roma 8:35-39.

4. Uw rogon ma pi tayugang ko am nge teliw e kar guyed rogon ni ngar taleged e maruwel ko machib ko Gil’ilungun Got?

⁴ Kan gafgownag min dariy fannag e pi tapigpig rok Got u boor ko raay e duw ko ngiyal’ ney. Pi Mich Rok Jehovah e gathi yad bang ko pi yuraba’ i teliw rok Satan ma dubrad ni ngar uned ngay, ma aram e yibe thibthibnagrad ma yibe togopuluw ngorad. Ke togopuluw e pi am ngorad. Kan li’ boor e Pi Mich Rok Jehovah kar m’ad ni bochan e michan’ rorad. Mus ko pi binaw ni democratic ma ur guyed rogon ni ngar taleged fare machib ko thin nib fel’. Ma ka nap’an e 1917 u Canada ngu Meriken ma pi tayugang ko teliw e ur k’aringed e togopuluw ko pi Bible Student ni aram e ngochol ko Pi Mich Rok Jehovah e ngiyal’ nem. Kan kalbusnag e piin ni baga’ lungurad ko fare Watch Tower Society ni dariy tapgin, machane munmun min nog ni dariy e kireb rorad.​—Revelation 11:7-9; 12:17.

5. Mang boch e thin ni ke pi’ e athamgil nga laniyan’ e pi tapigpig rok Jehovah?

⁵ Ke rin’ Satan urngin ban’en nrayog rok ni nge taleg fare maruwel ko machib ni be tay pi walagen Kristus nge piin ni be un ngorad. Machane dariy ban’en ni ke th’ab gulungan e Pi Mich Rok Jehovah ni yugu demtrug e pi n’en ni kan gareg ngorad, ma kan diliiy lanin’rad, ma kan cham ngorad, ma kan kalbusnagrad, ma kan nin’rad nga concentration camp, ma kan li’rad kar m’ad. Ma aram rogon n’umngin nap’an chepin e girdi’. Boor yay ni kan sul nga daken e thin rok Elisha ni be pi’ e athamgil nga lanin’uy ni gaar: “Dab mu rus, ya kab pire’ e piin ni bay u ba’ rodad ko piin ni bay u ba’ rorad.” Aram rogon ya kab boor e pi engel nib yul’yul’ ko tirok Moonyan’!​—2 Kings 6:16; Acts 5:27-32, 41, 42.

Ma Flaabnag Jehovah e Machib nib Passig

6, 7. (a) Uw rogon ni kan machibnag fare thin nib fel’ kafram? (b) Mang boch ban’en ni kan thiliyeg ka nap’an e 1943 iyib ngaray?

⁶ U lan e bin 20 e chibog ma ke fanay e Pi Mich Rok Jehovah e technology ni ngar ga’naged e maruwel rorad ko machib min paynag u m’on nra taw ko tomur. Nap’an e 1914, ma Pastor Russell, ni ir e bin som’on e president ko fare Watch Tower Bible and Tract Society, e ke mon’ognag e slides nge kachido, ni be yan u puluwon e phonograph record ni be yog e thin ko Bible, ni meruk e awa n’umngin nap’an ma ka nog “The Photo-Drama of Creation” ngay. Girdi’ u boor e nam ko ngiyal’ nem e ur ngatgad ngay. Ma munmun u nap’an e duw ko 1930’s nge 1940’s, ma ke lingagil e Pi Mich Rok Jehovah ni bochan e machib ni ur ted u mit e tabinaw iyan ni yad be fanay e phonograph ni laman J. F. Rutherford ni be pi’ boch e welthin, ni ir e bin l’agruw e president ko fare Society.

⁷ Nap’an e 1943 ma fa bin dalip e president ko fare Society ni Nathan H. Knorr, e ke rin’ ban’en nib thil ya ke turguy ni ngan dugliy e skul ko pi tamachib u lan ra reb e ulung. Ya ran skulnag e Pi Mich Rok Jehovah ni ngar machibnaged e girdi’ u mit e tabinaw iyan ni dariy e phonograph recording. Ka aram ma kan dugliy yugu boch e skul ni ngan ayuweg e pi missionary nge piin ni pioneer nge pi piilal ko ulung, nge piin ni be yog e thin ko pi branch ko fare Watch Tower Society. Ma mang wenegan ni yib riy?

8. Uw rogon ni dag e Pi Mich Rok Jehovah nib gel e michan’ rorad u nap’an e 1943?

⁸ Nap’an e 1943, ma immoy fare mahl ni World War II, ma ke mus ni 129,000 e Pi Mich Rok Jehovah ni be machib u 54 e binaw. Machane rib mudugil lanin’rad mab gel e michan’ rorad ni ra lebug e thin ko Matthew 24:14 u m’on nra taw ko tomur. Ke mich u wan’rad ni ra wereg Jehovah fare thin nib baga’ fan ni be ginang e girdi’ u m’on nra tabab e pi n’en nra yibnag e tomur ko re m’ag nib kireb ney. (Matthew 24:21; Revelation 16:16; 19:11-16, 19-21; 20:1-3) Kan taw’athnag e athamgil ni kar ted fa?

9. Mang boch ban’en ni be micheg ni ke yib angin ko fare maruwel ko machib?

⁹ Chiney ma boor ko 13 e binaw mab pag 100,000 e Pi Mich Rok Jehovah riy. Ma boch e pi binaw ney e ke suwey e Galesiya ko Katolik. Machane, mu lemnag e re n’ey. U Brazil ma 450,000 e girdi’ ni yad e publisher ko fare thin nib fel’, ma boor ko 1,200,000 e girdi’ ni kar uned ko fare Puguran ko yam’ ni tay Kristus ko 1997. Ku aram rogon yu Mexico ni boor ko 500,000 e girdi’ ni yad e Pi Mich Rok Jehovah mab boor ko 1,600,000 e girdi’ ni kar uned ko fare madenom ko Puguran. Ma yugu boch e binaw ko Katolik e Italy (gonapan 225,000 e Pi Mich), nge France (gonapan 125,000), nge Spain (boor ko 105,000), nge Argentina (boor ko 115,000). U Meriken ma boor e girdi’ ni yad e Protestant, nge Katolik, nge Jew, ma bay 975,000 e Pi Mich Rok Jehovah ma boor ko 2,000,000 e girdi’ ni kar uned ko fare Puguran. Dabi siy ni bokum e girdi’ e be chuw rok Babylon nib Gilbuguwan ni aram e pi yuraba’ i teliw ni googsur, ya de tamilang e machib rorad, me ere kar chelgad ngak Got nge n’en ni ke micheg u morngaagen e “bin nib biech e tharmiy nge bin nib biech e fayleng.”​—2 Peter 3:13; Isaiah 2:3, 4; 65:17; Revelation 18:4, 5; 21:1-4.

Ngan Thiliyeg Ban’en Nge Puluw ko Tin nib T’uf ko Girdi’

10. Uw rogon ni ke thil boch ban’en u boch e binaw?

¹⁰ U daken e machib u mit e tabinaw iyan ma kan ayuweg boor e girdi’ ni ngar chelgad ngak Jehovah u daken Jesus Kristus. (John 3:16; Acts 20:20) Machane ka bay yugu boch e kanawo’. Ya ke thil e par ko girdi’, ma bochan ni ke gel e magawon ko salpiy ma boor e ppin ni ma un ko maruwel. Ere baga’ ni dariy be’ u tabinaw u lan e wik. Ere ke thiliyeg e Pi Mich Rok Jehovah boch ban’en nge puluw ko re n’em. Ya bod Jesus nge pi gachalpen, ma yad ma yan nga yu gin ni bay e girdi’ riy.​—Matthew 5:1, 2; 9:35; Mark 6:34; 10:1; Acts 2:14; 17:16, 17.

11. Taman yang ni be machib e Pi Mich Rok Jehovah riy e chiney, ma mang angin ni yib?

¹¹ Be lemnag e Pi Mich Rok Jehovah ko mang e rayog ni ngar rin’ed ma yad machibnag e girdi’ ko gin ni yima tay e karro riy, nge pi shopping mall, nge pi factory, nge pi ofis nge business, nge skul, nge police station, nge gas station, nge hotel, nge tafen e damunmun, nge u kanawo’. Ma riyul’ ni yad ma machibnag e girdi’ u gubin yang nrayog ni ngan piriegrad riy. Ma nap’an ni bay e girdi’ u tabinaw, ma ma yib e Pi Mich i guyrad. Ere yad ma thiliyeg e machib ni yad ma tay ma aram me yoor e babyor ko Bible ni yibe wereg. Ma yibe pirieg e piin ni yad bod e saf. Ma yibe tababnag e Bible study nib biech. Boor ko lal nge baley i milyon e girdi’ e yad be un ko bin th’abi ga’ e maruwel u chepin e girdi’ ni yibe skulnag e girdi’! Gur bagayad ma ga be un ko re taw’th nem fa?​—2 Korinth 2:14-17; 3:5, 6.

Mang e Ma K’aring e Pi Mich Rok Jehovah Ngar Mon’oggad?

12. (a) Uw rogon ni be machibnag Jehovah e girdi’ rok? (b) Mang angin ni ke yib ko re machib ney?

¹² Uw rogon ni be un fare ulung nu tharmiy ko pi n’en ney? I yiiynag Isaiah ni profet ni gaar: “Pi fakam ni yad gubin e bayi machibnagrad Jehovah, ma ra yoor e gapas rorad.” (Isaiah 54:13, NW.) Be machibnag Jehovah e pi walag u ga’ngin e fayleng u daken e ulung rok u fayleng​—u lan e pi Kingdom Hall, nge nap’an e pi convention, nge nap’an e pi assembly. Ma angin ni yib riy e ke taareb laniyan’ e girdi’ ma ba gapas lanin’rad. Ba lingagil e girdi’ rok Jehovah ni bochan ni be machibnagrad, ya kan skulnagrad ni ra bagayad me t’uf rok bagayad ma yad ma t’ufeg e en ni migid ngorad ni gowa yad, ma gathi ngar fanenikayed e en ni migid ngorad, ndemtrug ko taman yang u fayleng ni yad ma par riy u lan e re fayleng ney ni ke yoor raba’.​—Matthew 22:36-40.

13. Uw rogon nrayog ni nge mich u wan’dad ni pi engel e be pow’iy e maruwel ko machib?

¹³ T’ufeg e ma k’aring e Pi Mich Rok Jehovah ni nguur wereged e machib ndemtrug ko dariy fan u wan’ e girdi’ ara yibe togopuluw ngorad. (1 Korinth 13:1-8) Yad manang ni maruwel rorad e ma ayuweg e yafas ko girdi’ ma gelngin e maruwel rorad e be yib u lang, ya arrogon ni yog Revelation 14:6. Ma mang fare thin ni be yog e pi engel ni ngan wereg? “Nge yib madgun Got ngomed, mi gimed ta’ fan nga feni sorok! Ya ke taw nga nap’an ni nge pufthinnag e girdi’. Ere mu siro’gad mi gimed meybil u p’eowchen Got ni ir e sunmiy e tharmiy, nge but’, nge day, nge pi alublub.” Fare machib ko thin nib fel’ ko Gil’ilungun Got e ma n’uf fithingan Jehovah. Yibe pining e girdi’ ni ngar pininged e sorok ngak e An Tasunmiyrad ni ir Got ma gathi yugu ban’en ara evolution. Ma mang fan ni baga’ fan fare maruwel ko machib? Ya ke taw ko ngiyal’ ko pufthin​—nib togopuluw ko Babylon nib Gilbuguwan nge urngin ban’en ni bang ko m’ag rok Satan.​—Revelation 14:7; 18:8-10.

14. Mini’ e ba l’ag ko re maruwel ney ko machib?

¹⁴ Dariy reb e Kristiano ni ke ognag ir ku Got ni rayog ni nge siyeg e re maruwel ko machib ney. Pi piilal nib spiritual e yad ma pow’iy fare ulung ya yad ma un ko girdi’ ko ulung ko machib. Ma pi pioneer e be un ko re maruwel nem nib fulltime. Piin publisher e yad ba passig i wereg fare thin nib fel’ ndemtrug ko ke mus ni buch uw e awa ni rayog ni ngar uned ko machib fa boor, ya yad be wereg fare thin nga gubin yang u fayleng.​—Matthew 28:19, 20; Hebrews 13:7, 17.

15. Mang e be dag ko uw fene gel e maruwel ni be tay e Pi Mich Rok Jehovah ko machib?

¹⁵ Ere ke yib angin ko fayleng ni bochan e athamgil ni kar ted fa? Ban’en ni be micheg e re n’em e ke yoor yay ni yibe weliy morngaagen e Pi Mich Rok Jehovah ko TV nge shimbung. Ma kan tamilangnag ni gad ba pasig ma ke mudugilan’dad ni ngad mada’naged urngin e girdi’. Arrogon, ri ma pug laniyan’ e girdi’ rogon ni gad ma rin’ e maruwel rodad u fithik’ e pasig u gubin ngiyal’ ni yugu aram rogon ni boor e girdi’ e dubrad e thin ni gad be wereg ma dubrad dakendad!

Gad Ba Pasig ni Ngan Mu’nag Fare Maruwel ko Machib

16. Susun uw rogon e lem rodad e chiney ya ke buch uw e tayim ni ka bay?

¹⁶ Dada nanged ko uw urngin e tayim ni ka bay ko re m’ag ney, ma de t’uf ni ngad nanged nfaanra gad be pigpig ku Jehovah u rogon nib puluw. (Matthew 24:36; 1 Korinth 13:1-3) Ma goo gad manang ni thingarni wereg fare thin nib fel’ “u m’on” riy ya aram rogon nra tamilangnag e t’ufeg rok Jehovah, nge gelngin, nge ngongol nib mat’aw. (Mark 13:10) Ere demtrug ko uw urngin e duw ni kad sonnaged e ngiyal’ ntomur ko re m’ag nib kireb ney ni de mat’aw, mab sug ko cham, machane thingarda pasiggad ni ngad lubeged e maruwel rodad u rogon nib m’ag nga salpedad. Sana kad pillibthirgad fa gad ba m’ar, machane yugu demtrug ma rayog ni ngad pigpiggad ku Jehovah u fithik’ e pasig ni bod rogon nap’an ni daworda pillibthirgad fa daworda m’argad. Sana dabkiyog ni ngad uned ko machib ni boor ni bod faram, machane rayog ni ngad pared nib taareb rogon fene fel’ e maligach ni gad be pi’ ku Jehovah ni gad be pining e sorok ngak.​—Hebrews 13:15.

17. Mweliy reb e experience ni ra pi’ e athamgil nga lanin’dad.

¹⁷ Ere demtrug ko gad e piin pillibthir fa piin fel’ yangaren, ma ngad pasiggad ma ngad wereged fare thin ko fa bin nib biech e fayleng ngak urngin e girdi’. Ngad boded fachi buliyel ni medlip e duw rok u Australia ni ke un ko chitingin nga reb e kantin. U Kingdom Hall ma ke rung’ag ni kan nog ni ri baga’ fan ko urngin e girdi’ ni ngar wereged e machib, me ere ke tay l’agruw ken e babyor ko Bible nga lan e way rok. Nap’an ni be rin’ fare chitingin ban’en me yan fachi buliyel nga bang. Ma ke gay chitingin fare tir, me pirieg ni be pi’ e babyor ngak reb e ppin! Ke yan fare chitingin ngak fare ppin me siro’ ngak ya sana ke wageynag fare buliyel laniyan’. Machane ke felan’ fare ppin ni nge fek fare babyor. Nap’an ni goo yow fare chitingin nge fak, me fith ko uw rogon nder rus ni nge non ku be’ nde nang. “Ku gog u lanin’ug, Mu fl’eg rogom, mu tay talpem, Mman! Ma kug wan!”

18. Uw rogon nrayog ni ngad pasiggad?

¹⁸ Ba t’uf rodad ni ngad lemgad ni bod e re buliyel nem nu Australia, ya mo’maw ni ngan non ko girdi’ ndad nanged, fa ngan non ko piin nib tolang ngad weliyed fare thin nib fel’ ngorad. Sana gad be rus ni ran dabuy dakendad. Dabda paged talin e n’en ni yog Jesus ni gaar: “Dabi magafan’med nga rogon ni ngam ayuweged gimed ko thin ara n’en ni ir e nga mogned. Ya fare kan ni thothup e bayi fil ngomed e re ngiyal’ nem e n’en ni ir e nga mogned.​—Luke 12:11, 12.

19. Uw rogon u wan’um e maruwel ko machib?

¹⁹ Ere mu pagan’um ngak fare kan ni thothup rok Got u nap’an ni ngam non ko girdi’ u rogon nib manigil ngam weliy fare thin nib fel’ ngorad. Bokum milyon e girdi’ e yad ma pagan’ ko piin pumoon nge ppin ni ba’ e chiney ma ra gabul ma dar moyed. Gad ma pagan’ ku Jehovah nge ulung rok u tharmiy​—Kristus Jesus nge pi engel, nge pi Kristiano ni kan dugliyrad min fasegrad ko yam’ ​—mi yad par nib fas ndariy n’umngin nap’an! Ere dabda paged talin e pi thin ney ni gaar: “Kab pire’ e piin ni bay u ba’ rodad ko piin ni bay ko ba’ rorad”!​—2 Kings 6:16.

[Boch e Thin nra Tamilangnag Murung’agen]

Mang e Fulweg Rom?

◻ Uw rogon ni ke ayuweg e ulung rok Got u tharmiy e girdi’ rok Jehovah mar pared nib gel?

◻ Uw rogon ni ke togopuluw e am nge teliw ko Pi Mich Rok Jehovah u lan e bin 20 e chibog?

◻ Uw rogon ni ke thiliyeg e Pi Mich Rok Jehovah e machib rorad nge puluw ko tin nib t’uf ko ngiyal’ ney?

◻ Mang e ma k’aringem ngam un ko machib?

[Sasing ko page 9]

Henryka Żur

[Sasing ko page 10]

Sapan

Martinique

Meriken

Kenya

Meriken

Ma machibnag e Pi Mich Rok Jehovah e girdi’ u gubin yang ni bay e girdi’ riy

[Sasing ko page 12]

Nap’an e tin som’on e duw ko re chibog ney ma kan fanay e phonograph ni ngan wereg fare thin nib fel’ ko Gil’ilungun Got