Nge Par E Gafarig Rom Nib Biech

“Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed.”​—1 JOHN 5:3.

1. Mang ngongol ni de taareb rogon nrayog ni ngan guy ko girdi’ e ngiyal’ n’ey?

KAKROM, e kan thagthagnag ngak Malaki ni profet ni nge yiiynag ni bay ba ngiyal’ ni bayib ni ngari gagiyel e n’en nib thil ko ngongol ko girdi’ rok Got nge girdi’ ni der ma pigpig ngak. I yoloy fare profet ni gaar: “Girdi’ rog e bay kur guyed bayay e n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngog nge en nder pigpig ngog.” (Malaki 3:18) Ke yib i m’ug nib riyul’ e re yiiy ney e chiney. Ran fol ko motochiyel rok Got, nib l’ag ngay e motochiyel u murung’agen e gafarig, me ir e kanawo’ nib gonop mab fel’. Machane, gathi gubin ngiyal’ nib mom e re kanawo’ ney. Arfan ni bay fan, fare n’en ni yog Jesus ni piin Kristiano e thingara athamgilgad nib elmerin ni fan e ngar thapgad ngak Got.​—Luke 13:23, 24.

2. Mang ban’en u fithik’ey ni ma suruy lanin’uy ma arfan nib mo’maw’ ku boch e girdi’ ni ngar pired nib machalbog e gafarig rorad?

² Mang fan nib mo’maw’ ni ngan par nib biech e gafarig? Reb i fan, e bay boch ban’en u fayleng ni ma suruy laniyan’uy. Fare entertainment industry e ma dag ni ngongol ni darngal e aram e n’en nib fel’ yaan ni ma unan’ e girdi’ ngay, ma ma yib e falfalan’ riy, ya aram e n’en ni ma rin’ e piin ni kar ilalgad, machane danir ma lemnag e tin kireb ni ra yib riy. (Efesus 4:17-19) Baga’ ni yad ma dag yaan e pumoon nge ppin ni kar parew ni dawora unew ko mabgol. Boor u fithik’ e pi kachido nge television e be dag rogon e par ko pumoon nge ppin ni dar lemnagew. Ma baga’ ni dariy e t’ufeg nge tayfan rorow. Ma boor e girdi’ ni yad ma yaliy e kachido ni aram rogon ni ka nap’an ni ka yad ba bitir. Maku, baga’ ni taab yangar e ri ma towasariy yugu boch i yad ni ngar uned ko re ngongol ney, ma piin ni dabra uned ngorad e yima moningnagrad ara un dariy fannagrad.​—1 Peter 4:4.

3. Mang fan ni boor e girdi’ nu fayleng ni kara uned ko ngongol ni de yalen?

³ Maku n’en ni bay u fithik’ey e be mo’maw’nag rogon ni ngan par nib machalbog e gafarig. I sunmiy Jehovah e girdi’ ni bay e arar rorad ni yad baadag e par ko pumoon nge ppin, ma rayog ni nge gel e re arar ney. Arar e boor ban’en ni ma rin ni ba m’ag ko n’en ni gad be lemnag, ma ngongol ni darngal e de m’ag ko lem rok Jehovah. (James 1:14, 15) Ni bod rogon e n’en ni ke yog boch e girdi’ ni kan fithrad ma thin ni ka rogned e kan ta’ nga babyor ni British Medical Journal ndawori n’uw nap’an, ni be weliy ni boor e piin ni kara uned ko par ko pumoon nge ppin ko yay ni som’mon ya kemus ni yad baadag ni ngar nanged ko uw rogon. Boch i yad e kar lemnaged ni piin ni taab yangarrad e ka yad ba pasig ni ngar uned ko re ngongol ney, ere yad ba adag ni ngara alitnaged dowrad. Ma boch i yad e ka rogned ni de yog ni ngara tar’ed laniyan’rad ara “kar chingnaged buchuw ko ngiyal’ nem.” Faanra gad baadag ni ngad fel’gad u wan’ Got, ma susun ngad pared ni gad ba thil. Mit i mang e lem ni ra ayuwegdad ni ngad pared ko gafarig nib biech?

Nga rin’ Gelnag e Pagan’

4. Mang e thingar da rin’ed ma rayog ni ngada pared nib machalbog e gafarig rodad?

⁴ Thingarda nanged ni rib fel’ e yafas ni yibe par ni ba machalbog e gafarig, ma aram rogon e miti yafas ni ngada leked ya bay fal’ngin. Mab puluw e re n’ey ko thin ni i yoloy Paul ni apostal ni fan ko piin Kristiano u Roma ni gaar: “Ngam micheged ko ngongol romed e tin nib fel’ mab fel’ u wan’ e girdi’ ni aram e tin nib m’agan’ Got ngay.” (Roma 12:2) Ra nge tamilang u wan’uy fal’ngin ma dabi gaman ni kemus ni ngan nang ni ngongol ni de yalen ba kireb nrogon ni yog e Thin rok Got. Ya ba l’ag ngay ni ngan nang ko mang fan nib kireb e re ngongol ney ma mang angin ni ra yib ngodad nfaanra ngada paloggad riy. Ma boch e pi n’en ney e kan weliy ko fare article ni ke yan.

5. Ri mang fan ni thingari par ni machalbog e gafarig ko piin ni Kristiano?

⁵ Machane riyul’, ni tapgin nib ga’ ni ma siyeg e piin Kristiano e ngongol ni de yalen e gad be ayuweg ni nge par nib fel’ thildad Got. Kad nanged ni manang Got e tin th’abi fel’ ni fan ngodad. T’ufeg rodad ngak e ra ayuwegdad ni ngad fanenikayed e tin kireb. (Psalm 97:10) Got e ir e Ma Pi’ “urngin e taw’ath nib fel’ ni ma yib u tharmiy ngodad.” (James 1:17) Gadad ba t’uf rok. Faanra gad ma fol rok, ma aram e gad be dag ni ba t’uf Got rodad mab fel’ u wan’dad urngin ban’en ni ke rin’ ni fan ngodad. (1 John 5:3) Dabda th’abed e motochiyel rok Jehovah nib mat’aw ya aram e n’en ni dabun ma ma amithnag laniyan’. (Psalm 78:41) Dabda rin’ed boch ban’en ni ereram tapgin ma boch e ma dariyfannag e liyor nib thothup mab mat’aw. (Titus 2:5; 2 Peter 2:2) Faan gad ra par nib machalbog e gafarig rodad, ma ra falfalan’ e En Th’abi Tolang ngodad.​—Proverbs 27:11.

6. Uw rogon ni ra ayuwegdad e tin ni baaray ni nga dogned ngak yugu boch e girdi’ e lem rodad u murung’agen e gafarig?

⁶ Nap’an ni kada dugliyed ni nge par nib machalbog e gafarig rodad, ma n’en nrayog ni nge ayuwegdad e aram nga dogned ngak yugu boch e girdi’ e michan’ rodad. Ngam mog ngak e girdi’ ni gur e ga be pigpig ku Jehovah Got ma ke mudugil lanin’um ni ngam fol ko motochiyel rok. Ereray e yafas rom, nge dowam, nge tin ni kam mel’eg. Mang riya’en? Bay e riya’ ni nge kireb thilmew e en Chitamam u tharmiy. Ere mog ngorad ndariy ban’en ni nge thiliyeg e lem rom. Mu par ni gab falfalan’ ni ngam dag ngorad ni ga be pigpig ku Got u daken e fol ko motochiyel rok. (Psalm 64:10) Dabmu tamra’ ni ngam weliy ngak e girdi’ e tin ni ke mich u wan’um nib m’ag ko gafarig. Ra ngam non ma ra gel e michan’ rom, ma ra ayuwegem, ma ga be pi’ e athamgil nga laniyan’ e girdi’ ni ngar folgad ko wok rom.​—1 Timothy 4:12.

7. Uw rogon ni nge par nib mudugil lanin’dad ni gad ra par nib machalbog e gafarig rodad?

⁷ Bin migid, e aram bochan ni kad dugliyed ni ngad folgad ko motochiyel nib fel’ u murung’agen e gafarig ma ka dogned ngak e girdi’ e michan’ rodad, ma aram e thingar da rin’ed boch ban’en nra ayuwegdad ni ngada pared nib yul’yul’ ko tin ni kada dugliyed. Reb e kanawo’ e ngam mu ayuw u nap’an ni ga ra mel’eg e fager rom. Be weliy e Bible ni gaar, “Mpachegem ngak e piin ni yad ba gonop me yog e gonop ngom.” Ngam chag ngak e piin ni taab lanin’med u fal’ngin e gafarig; ma ra gelnaged e michan’ rom. Re thin nu Bible ney e ku be gaar: “Mm’agem ngak e girdi’ ni balyang ma ga kireb.” (Proverbs 13:20) Rogon nrayog rom, ngam palog ko girdi’ nra warnag lanin’um.​—1 Korinth 15:33.

8. (a) Mang fan ni thingarda suguyed lanin’dad ko tin nib fel’? (b) Mang e thingarda paloggad riy?

⁸ Maku, ba t’uf ni ngada suguyed lanin’dad ko fapi n’en nib fel’, ni yira yog e fel’ ngay: ni n’en ni riyul’, nge n’en nib yal’uw, ma mmat’aw, ma mmachalbog, ma manigil, nge tin ndariy thibngin. (Filippi 4:8) Ma gad ra rin’ e re n’ey nfaanra gad ra mel’eg e tin ni gad ra yaliy nge tin ni gad ra bieg nge musik ni gad ra rung’ag. Ra nga nog ni pi babyor ni be dag e ngongol nib kireb e dabi kirebnag lanin’uy ma taab rogon ko nga nog ni pi babyor nib fel’ e dabi yib angin. Dabmu pagtalin, ni girdi’ ndawori flont e ba mom ni nge aw ko ngongol ni de yalen. Ere pi babyor, nge pi magazine, nge kachido, nge musik nra k’aring e arar ko ngongol ni puwlag e ra pow’iyey ko lem nib kireb, ma tomur riy e denen. Thingar da suguyed e lem rodad ko gonop nib fel’.​—James 3:17.

Boch Ban’en nra Pow’iy Be’ ko Ngongol ni Puwlag

9-11. Rogon ni yog Solomon, mang boch ban’en ni ra pow’iy reb e pagal i yan nge aw ko ngongol ni puwlag?

⁹ Baga’ ni, bay boch ban’en ni ma pow’iy e girdi’ ko ngongol ni puwlag ni manang e girdi’. Yu yay ni yira yif’ em i yan e ra mo’maw’ ni ngan sul nga tomur. Ngam guy ko uw rogon ni be weliy e thin ni bay ko Proverbs 7:6-23, New World Translation. Be weliy Solomon u roy murung’agen reb e pagal “ni kari t’uf rok ban’en,” ara de gaman e tin nib fel’ ko lem rok. Fare pagal e “be yan ko kanawo’ nib chuchugur ko gin ni ma par fare ppin [ni ma pi’ ir ni chuway] riy, me yan nga naun rok, u nap’an ni kefin ni yigi aw e lumor, ya ke nep’.” Ereram e oloboch rok ni som’mon. Nap’an ni kefin ni aw e lumor ma “lem rok” e ke pow’iy, me yan nga kanawo’ ni gathi yugu demtrug e pa’ i kanawo’, ya manang e kanawo’ nrayog ni ngan pirieg reb e ppin ni ma pi’ ir ni chuway riy.

¹⁰ Bin migid e be gaar: “Am sap! bay reb e ppin ni keb i mada’nag e cha’ nem, ni ke chuw nga reb e mad ko ppin ni ma pi’ ir ni chuway mab sasalap lugun’.” Chiney e ke guy fare ppin! Rayog ni nge chel nge sul nga tabinaw rok, machane ke mo’maw’ e chiney ko kafram, ya bochan ke meewar laniyan’. Me yan i gumuchmuch ngak fare pagal nge faray owchen. Bochan ni fare ppin e ke faray owchen, ma aram e ke par ni be motoyil ko thin ni be wawliy laniyan’ ni be yog fare ppin ngak ni gaar: “Kug pi’ e gamanman ni maligach e daba’ ”. “Kug lebuguy e daba’ e n’en ni kug micheg.” Fare maligach ni communion e ba muun ngay e ufin, nge flowa, nge gapgep, nge rrum. (Leviticus 19:5, 6; 22:21; Numbers 15:8-10) Bochan ni ke yog fare ppin ngak ni aram urngin, e sana baadag ni nge lemnag fare pagal ni be par nib gel ko tirok Got, maku reb e baadag ni nge nang fare pagal ni bay boor e ggan nib fel’ nge garbod u tabinaw rok. Me wenignag ngak ni gaar, “Moy,” me wenig ngak ni gaar, “nga darow ngad molow nge mada’ ko kadbul ngad falfalan’gow; Ya gadow ra falfalan’ ni ke par bagadow nga ngorongoren bagadow.”

¹¹ Tin ni ra buch nga tomren e de mo’maw’ ni ngan nang. “Me pag fare pagal ir ngak ni bochan e thin rok nrib sumunguy.” Me un ngak nga ranow ni bod ba garbaw ni pumoon ni ke yan ni ngan li’ ngem’ ” nge “bod ba arche’ ni be sor i yan nga lan ba nug.” Ma tomur riy me yog Solomon e thin ni rib tamilang ni gaar: “De nang ni yaal rok e ba l’ag ngay.” Yafas ara yaal rok e ba l’ag ngay ya “ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.” (Hebrews 13:4) Re n’ey e ri be skulnag e pi pumoon nge ppin! Thingar da paloggad ko fa bin som’mon e oloboch ni dab darod ko kanawo’ nra powiy’dad ko gin ni ra kireb thildad Got riy.

12. (a) Mang fan fare bugithin ni “kari t’uf rok ban’en”? (b) Uw rogon ni nge par e gafarig rodad nib mudugil?

¹² Mu lemnag ni fare pagal ni kan weliy faram e “kari t’uf ban’en rok.” Re bugithin ney e be dag ni lem rok, nge arar rok nge tin ni baadag, nge adag rok, nge thamtham rok, nge tin ni be nameg ko yafas rok e de puluw ko tin ni baadag Got. Ma bochan ni ba meewar laniyan’ ma aram ma ke magawon. Ngiyal’ n’ey ni ka nog “tin tomren e rran ngay,” mab t’uf ni ngan athamgiliy ni nga un par nib mudugil mab biech e gafarig. (2 Timothy 3:1) Ke pi’ Got boch ban’en ni ra pow’iydad. Ke pi’ e pi e muulung ni fan ko Kristiano ni nge pi’ e athamgil nga lanin’dad ni nga darod ko kanawo’ nib mat’aw ma aram rogon e rayog ni ngada chaggad ngak yugu boch e girdi’ ni taab rogon e n’en ni gad be nameg. (Hebrews 10:24, 25) Bay e piin ni piilal ni be ayuwegdad ni yad ma fil ngodad rogon ni nga darod ko kanawo’ nib mat’aw. (Efesus 4:11, 12) Ma bay e Thin rok Got, fare Bible, ni ma pow’iydad. (2 Timothy 3:16) Ma gubin ngiyal’, ma rayog ni ngada yibilayed ni nge yog ngodad gelngin Got ni ra ayuwegdad.​—Matthew 26:41.

Ngan Fil Ban’en ko Denen Rok David

13, 14. Uw rogon ni ke l’ag David ni Pilung ko denen nib ubchiya?

¹³ Machane bay e kireban’ riy, ya musko piin ni tapigpig rok Got nib gilbuguwan ma kura awgad ko ngongol ni puwlag. Ma bagayad e David ni Pilung, ni ir e en ni ke pigpig ku Jehovah u lan boor e duw u fithik’ e yul’yul’. Ma dariy e maruwar riy nrib t’uf Got rok. Machane, ke aw ko kanawo’ nib kireb. Taab rogon ko fare pagal ni i weliy Solomon murung’agen, ni bay boch ban’en ni i rin’ ni bod e n’en ni ke pow’iy David ko kireb me gel i yan e kireb ngay.

¹⁴ Ke ilal David ko ngiyal’ nem, sana ke 50 e duw rok. Nap’an ni immoy u daken e chigiy ko naun rok, me guy Bath-sheba ni ir reb e ppin nib pidorang ni be maluk. Me yan i fith ko mini’ fare ppin me nang. Ka nog ngak ni Uriah e figirngin, ni ke yan ko mahl u Rabbah, ni reb e mach nu Ammon. I tay David chilen ngak be’ ni nge fek fare ppin nga naun rok mar parew. Ma munmun, ma ke magawon boch ban’en​—me pirieg fare ppin ni ke diyen rok David. I athapeg David ni nge par Uriah ko ppin rok reb e nep’, ma aram i pining David Uriah ni nge sul nga tabinaw. Ma aram rogon, e ra m’ug ni Uriah e ir e chitamangin fare tir rok Bath-sheba. Machane de yan Uriah nga tabinaw rok. Bochan ni be lemnag David ni ke mo’maw’ ni nge mith e denen rok, ma ke l’og Uriah nge sul nga Rabbah me pi’ e babyor ngak fare ga’ ko salthaw ni be gaar ni susun ni ngan tay Uriah nga mit e mal ko gin ra yim’ riy. Ere ke yim’ Uriah, me leengiy David leengin u m’on ni nge nang e girdi’ ni ke diyen.​—2 Samuel 11:1-27.

15. (a) Uw rogon ni ke tamilang e kireb rok David? (b) Uw rogon u wan’ David ni ke puwan’ Nathan ngak u fithik’ e gonop?

¹⁵ Gowa ke yib angin ngak David fare n’en ni baadag ni nge upunguy e denen rok. Ke yan boch e duw nga tomren ni kan gargelnag​—fare tir—​ni pumoon. Faanra be lemnag David e n’en ni ke rin’ u nap’an ni yoloy fare Psalm 32, mab tamilang ni n’en ni rin’ e ke magawonnag e nangan’ rok. (Psalm 32:3-5) Machane, manang Got e re kireb rok nem. Fare Bible e be gaar: “Machane de fel’ u wan’ Somol e re n’em ni ke rin’ David.” (2 Samuel 11:27) I l’og Jehovah Nathan ni profet, ni nge yan ngak David nge weliy e n’en ni ke rin’ u fithik’ e gonop. Chi ngiyal’ nem me yog David e n’en ni ke rin’ me wenignag ni nge n’ag Jehovah fan. Bochan ni kari kalngan’ ma ke fel’ thilrow Got biyay. (2 Samuel 12:1-13) De damumuw David ko gechig ni kan pi’ ngak. Ya n’en ni rin’, e aram i dag e lem rok nrogon ni weliy e Psalm 141:5 ni gaar: “Faanra toyeg e en nib mat’aw, ma aram e runguy rok; ma faanra llowannageg, ma aram e gapgep nga daken lolugeg, ma ri baadag lolugeg e re n’ey.”

16. Mang e thin rok Solomon ni be ginangey nge fonow u murung’agen e denen?

¹⁶ Solomon, ni ir e bitir rok David nge Bath-sheba ni bin l’agruw, e sana i fal’eg i lemnag e n’en ni ke buch ko yafas rok e chitamangin nib kireb. Tomur riy me yoloy ni gaar: “En ni ma mithag e denen rok e dabi fel’ rogon, machane yira dag e runguy ngak e en ni ma yog e kireb rok.” (Proverbs 28:13, NW) Faanra kada rin’ed e denen ni rib gel, ma thingar da folgad ko re fonow ney ni kan thagthagnag, ni aram e thin ni be ginangey ma be fonownagey. Ba t’uf ni nga dogned ngak Jehovah ma ngada ninged e ayuw ko piin ni piilal u lan e ulung. Fare maruwel ko piin ni piilal ni baga’ fan e aram e ngara ayuweged e piin ni kara rin’ed e tin kireb ma ngar sulweged yad nga rogon.​—James 5:14, 15.

Ngan Kadan’uy ni Bochan Wenegan e Denen

17. Yugu aram rogon ni ma n’ag Jehovah fan e denen ko girdi’, ma mang e n’en ni dabi taleg?

¹⁷ I n’ag Jehovah fan e kireb rok David. Mang fan? Ya bochan ni David e ir be’ nib yul’yul’, ma ir e en ni ta runguy e girdi’, ma riyul’ ni ke kalngan’. Yugu aram rogon, ma dan ayuweg David ni nge dabi yib wenegen ngak nbochan e n’en ni ke rin’. (2 Samuel 12:9-14) Ma taareb rogon ko ngiyal’ n’ey. Yugu aram rogon ni dabi gafgownag Jehovah e piin ni kar kalgadngan’rad, machane dabi ayuwegrad ni nge dabi yib ngorad e magawon nbochan e kireb ni kara rin’ed. (Galatia 6:7) Boch e magawon nra yib nbochan e ngongol ni darngal e sana ra dar ba wu’ i mabgol, ma ra diyen be’ ni dan lemnag, ma ra af e m’ar ngak be’, ma ra m’ay e pagan’ nge tayfan.

18. (a) Mang e ke yog Paul ngak fare ulung nu Korinth ko uw rogon ni ngan ayuweg e magawon nib m’ag ko ngongol ni darngal? (b) Uw rogon ni ke dag Jehovah e t’ufeg nge runguy ngak e piin ni ta denen?

¹⁸ Faan gadra rin’ e kireb nib gel, ma ra kireban’dad nbochan e gafgow ni keb ngodad ni ir wo’omngin e kireb ni kada rin’ed. Yugu aram rogon, ma dabda paged ban’en nra talegdad ni ngad kalgadngan’dad me gapasnag thildad Got biyay. Nap’an fa bin som’mon e chibog, me yol Paul ngak piyu Korinth ni thingara chuweged u lan e ulung e en ni ma un ko ngongol ni darngal ni ka nog e incest ngay. (1 Korinth 5:1, 13) Tomren ni kari kalngan’ e cha’ nem, me yog Paul ngak girdien e ulung ni gaar: “Ere chiney e ngam n’iged fan u wun’med e tin ni ke rin’ mi gimed pi’ e athamgil nga laniyan’, ya ri gel e kireban’ rok nge pag ir. Ere ri gu be wenig ngomed ni ngam guyed rogon [nge] nang nri kab t’uf romed.” (2 Korinth 2:5-8) Rayog ni ngad guyed ko re fonow ney e t’ufeg nge runguy rok Jehovah ngak e piin ni ke kalngan’ ko denen. Ra falfalan’ e pi engel u tharmiy nfaanra ke kal be’ ni ta denen ngan’.​—Luke 15:10.

19. Faanra riyul’ ni ke kireban’dad ko kireb ni kada rin’ed ma mang angin ni ra yib ngodad riy?

¹⁹ Yugu aram rogon ni ke kireban’dad ya kad folgad ko kanawo’ nib kireb, ma re n’ey e ra ayuwegdad ni ‘ngada ayuweged gadad ni dabkuuda sulod u daken e ngongol nib kireb.’ (Job 36:21) Riyul’, ni wenegan ni ke yib ngodad ni bochan e kireb ni kada rin’ed e ra ayuwegdad ni dabkud rin’ed biyay e tin kireb. Maku, i fanay David e gafgow ni ke yib ngak ya bochan ni ke un ko ngongol nib kireb nga i fonownag yugu boch e girdi’. I yog ni gaar: Ma aram e “bay gu fil ngak e pi ta denen e kanawo’ rom, mi yad sul ngom.”​—Psalm 51:13.

Yib e Falfalan’ ko Pigpig Ku Jehovah

20. Mang angin nra yib nfaan ran fol ko motochiyel rok Got nib mat’aw?

²⁰ “Ri kab falan’ e piin ni kar rung’aged e thin rok Got ma kar pired ni yad be fol riy!” aram e n’en ni yog Jesus. (Luke 11:28) Ran fol ko motochiyel rok Got nib mat’aw ma ra yibnag e falfalan’ e chiney nge gabul nge langleth ndariy n’umngin nap’an. Faan manga kad pired ni gad ba biech ko gafarig rodad, ma yibe athapeg ni gad ra par ko re kanawo’ ney ma gad fanay urngin ban’en ni ke fal’eg ni fan e nge ayuwegdad. Faan manga kada uned ko ngongol ni de yalen, ma yibe athapeg ni ngeb e falfalan’ ngodad ni bochan e kad nanged ni ra n’ag Jehovah fan rok e piin ni ke kalngan’, ma ngada turguyed ni dabkuuda rin’ed e re kireb nem biyay.​—Isaiah 55:7.

21. Mang fonow rok Peter nfaan gad ra fol riy ma rayog ni ngad pired ni gad ba machalbog?

²¹ Dabki n’uw nap’an ma ra m’ay e re fayleng nib kireb ney, nib muun ngay e lem nge ngongol nib m’ag ko ngongol ni darngal. Faan gad ra par nib machalbog e gafarig rodad, ma rayog ni ngeb angin ngodad e chiney i yan e nga ram ni dariy n’umngin nap’an. Peter ni apostal e i yoloy ni gaar: “Pi tafager rog, n’umngin nap’an ni gimed be par ni gimed be sonnag e re Rran nem e nguum athamgiliyed ngam pired ni gimed mmachalbog ma dariy thibngimed u p’owchen Got ma ngam pired nib aw e gapas u thilmed Got. . . . Ere mu gonopiyed gimed, nge dabiyog ni wawliymed nga bayang e oloboch ni be tay e piin ndariy fan e motochiyel u wun’rad ngam thaygad ko gin kan pired riy ndabi buch ban’en romed.”​—2 Peter 3:14, 17.

Rayog ni Ngam Weliy?

• Mang fan ni mo’maw’ ni ngan par nib machalbog e gafarig?

• Mang boch e kanawo’ nra ayuwegdad ni ngad turguyed lanin’dad ni ngad folgad ko pi motochiyel u murung’agen e gafarig?

• Mang e kada filed ko kireb ni i rin’ fare pagal ni weliy Solomon?

• Mang e ke rin’ David ni ke fil ngodad rogon e kalngan’ nib gel?

[Picture on page 13]

Reb e ayuw ngom ni nga mog ngak yugu boch e girdi’ ko uw rogon u wan’um e gafarig nib biech

[Pictures on page 16, 17]

Bochan ni riyul’ ni kari kal David ngan’ ma ke n’ag Jehovah fan