Mang Fan Ni Thingar Mu Meybil?

“GA ma ning, machane danir pi’ ngom, ya ga be ning ban’en nib kireb fan . . . Mu chuchugur ku Got, me chuchugur ngom.” (James 4:3, 8, New World Translation) Pi thin rok James nem ni apostal rok Jesus e ma nga yigi k’aringdad ngad lemnaged fan ni gadad ma meybil.

Meybil e gathi kemus ni nga dogned ku Got e n’en nib t’uf rodad. Fare machib rok Jesus nib ga’ fan ni tay u daken e burey, e gaar: “Got ni chitamangimed e manang e n’en nthingari yog ngomed u m’on ndawor mu ninged ngak.” Machane, ki gaar Jesus: “Mu ninged, me yog ngomed.” (Matthew 6:8; 7:7) Ere Jehovah e baadag ni nga dogned ngak e n’en ni gad be lemnag nib t’uf rodad. Machane ka bay boch ban’en ni boor ni yima yibilay gathi kemus aram.

Pi tafager ni rib riyul’ e gathi kemus ni goo ngiyal’ ni ke t’uf ban’en e yow ma non. Ya ra bagayow ma baadag ni nga i nang salpen bagayow, ma ma gel e fel’ ko fager rorow ni faanra u rognew rogon lanin’row ngorow. Ku e ri tay, e meybil ni ku bay boch ni ga ma ning nib ga’ ko baaray ni kemus ni nga uni ning e pi n’en ni ke t’uf. Ku ma mon’ognag kanawo’en me gelnag e fel’ u thildad Jehovah ni faan gad ra dag e runguy nib yul’yul’ u fithik’ i gum’ercha’dad ngak.

Arrogon, Got e ke pi’ ngodad mat’awdad ko meybil ni nge yog ni da chuchugurgad ngak. Re n’ey e rayog ni nge buch ni kemus ni faan gad ra dag rogon e lem rodad ku Got ko bin baaray ni nga udi sulod u daken bogi meybil ni kan fil ke mit nga lolugey. Ere uw gelngin e falfalan’ ni ngan non ku Jehovah u fithik’ e meybil! Maku boch e ba fonow u Bible e gaar: “Meybil ko piin nib yal’uw mab mat’aw e ba falfalan’ ngay.”​—Proverbs 15:8.

“Machane gag e kari falan’ug, ya gu be par u tooben Got,” aray e tang ni wun’ Asaph ni be’ nib tamatang. (Psalm 73:28) Machane ra ngan chuchugur ku Got, ma ka bay boch ban’en ni thingarda rin’ed gathi goo meybil. Mu gu’ e tin baaray ni bay fini weliy ko mang e n’en ni be weliy:

“Bay reb e pi gachalpen [Jesus’] ni gaar ngak: ‘Somol, mu fil rogon e meybil ngomad.’ ” Me gaar Jesus ngorad: “Baaray rogon ni ngam meybilgad ni nge lungumed, ‘Chitamangimad, ngan tay fan fithingam nib thothup. Ma ga par ni gur e ga be gagiyegnagmad.’ ” (Luke 11:1, 2) Rayog ni nge yib angin e meybil rodad ni aray rogon ni faanra dad filed ko som’mon ko mang fithingan Got nge uw rogon ni ngan thothupnag? Ma rayog ni ngad meybilgad nib puluw nga rogon ni yog Jesus ni faanra dada nanged fan ko mang Gil’ilungun Got? Rogon i nang fan e pi n’en ney e rayog ni faan gadad ra fal’eg i poy e Bible nib fel’ rogon. Tamilangan’ ni rayog riy e ra ayuwegdad ngad nanged Got ma gadad nang fan e pi kanawo’ rok. Maku arrogon, ni faan gadad ra mecham Jehovah Got ma ra guy rogodad ngad chugurgad ngak ma gad yul’yul’ ngak. Ma n’en ni ra yib riy e aram e rayog ni nga uda nonod ngak ko meybil ni ke puf rogodad.

Meybil e Rayog ni nge Ayuweg i Pithig e Pi Magawon

Gad ra fal’eg e tha’ u thildad Jehovah ngad chuchugurgad ngak ma ra ayuwegdad i pithig e pi magawon rodad. A mu guy rogon ni buch boch e pi n’en ney yu ngiyal’ ku boch e girdi’. Yad be dag ni pi meybil nem e yog ni gelnag e tha’ u thilrad Jehovah.

U Brazil e immoy reb e ppin riy ni Maria fithingan ni meybil ku Got ni ngan ayuweg. Ke adag ni nge togopuluw nga rogon yalen pumey nib fel’ ni reb i fan e re n’ey e bochan ni ke guy rogon e sabanban nge malulfith ni be tay e girdi’ u lan binaw. Maria e ke digey e pumoon rok, nge bitir rok, nge tabinaw rok. Ki tababnag i fanay boch fapi falay ni kireb. Machane nap’an ni de pirieg e falfalan’, me bing gum’ercha’en ku Got nge meybil ni ngan ayuweg.

De n’uw nap’an, meb l’agruw e Pi Mich rok Jehovah ra guyew Maria mar tayew rok baken e babyor ni Fare Wulyang Ntagil’ e Damit ni bay riy boch ban’en ni murung’agen fani ga’ fan ni ngan fol ko pi fonow rok Got. Mi ri bit nga gum’ercha’en, me tabab i fil e Bible ni yad e Pi Mich rok Jehovah ni ka rorran nem. Tomuren e re n’en ney mi ki sul e tabinaw rok nga rogon. Nap’an ni fil murung’agen Jehovah, me adag ni nge yog rogon e runguy rok ngak. “Me gaar, kugu thiliyeg boch ban’en ni bochan ni nge fel’.” “Pumoon rog nge chon e tabinaw rog ko som’mon e u ra togopuluwgad ko fol Bible ni gu be tay. Machane faanra guyed rogon e thil ni gu be tay, ma aram ma ra tayed yad ngog ni nggu athamgil.” De n’uw nap’an, me ognag Maria e yafas rok ngak e ani Tamotoyil ko meybil ni bochan ni nge pigpig ngak.

Yugu aram rogon, ni bay e ppin rok José ni ba pidorang ma bay e siyobay rok nib ga’ u Bolivia, ma ba kireban’. Ma reb e ngongol u wuru’ e mabgol rok ni de puluw e k’aring leengin nge chuw rok. Me tabab ko unum nib elmerin ma ke lemnag ni kari m’ay fan. Ma aram me gaar José: “Mug tabab ko meybil u polo’ i gum’ercha’eg, ni gu be fith ko mang e thingar gu rin’ m’ug falan’nag Got. De n’uw nap’an me yib e Pi Mich rok Jehovah ko gini bay e maruwel rog riy ni yad be ognag e fol Bible u tabinaw ni dariy puluwon, machane mu gu siyegrad. I buch e re n’en ney ni dalip yay. Gubin ngiyal’ ni gu ra meybil ni gu be ning e ayuw, mar bad. Ma aram, mu gu turuguy u wan’ug ni nga gu motoyil ngorad ko yay ni migid. Kugu bieg e Bible ma bay e deer rog ni boor, ma gubin ngiyal’ ma yad ma pi’ e fulweg riy nib puluw u lanin’ug. Fil ni gu fil murung’agen Jehovah e pi’ reb i fan e yafas ngog nib biech, ma pi fager rog u fithik’ e pi Mich rok Jehovah e ku yad be dag e ngongol ni ku be pi’ gelngiy! Mu gu pag fare pin ni ku u gu chag gow nge piin ni gamad ma chag ko unum. Ma de n’uw nap’an, mu gu sul ko ppin rog nge bitir rog. Ni taufe nageg u tobolngin e duw ni 1999.”

U Italy, ma mabgol rok Tamara e magawon, ma aram me meybil ni ngan pi’ e gonop ngak. Ma ke yib reb e ngongol ngak ni ke par nib malalangan’, ni bochan nni li’ ngemu’ min tharbog u taferad ni nap’an e 14 e duw rok. Ere gaar Tamara: “Gu pirieg bake Bible mu gu tabab i poy. Me reb e manungel’, mu gu bieg riy ni ga ra ‘pirieg e gonop ma bod ni kam pirieg e machaf ni felel’ ni kan mithag.’ Mu gu meybil ni fan ko re gonop nem. (Proverbs 2:1-6) Me kakadabul riy, me yib e Pi Mich rok Jehovah. Ma gamad tabab ko fol Bible, machane ba n’uw nap’an boch fin ni yog ni urngin e pi n’en kugu fil. Ya munmun, mu gu lemnag ni nga gu lek kanawo’en e yafas ko Kristiano, ma aram mu gu taufe. Ere chiney, e ke un figirngig ngog, gu be ayuweg boch e girdi’ nge yib angin e gonop rok Got ngorad.”

Beatriz e ir be’ ko gin ba tolang ara baga’ lungun u Caracas, Venezuela. Machane, kar wergow figirngin ma be par nib kirkireban’. Kaygi par nib chalban ma ba kankanan’, ere bay ba ngiyal’ ni parnag e meybil ni bokun e awa. Faani reb e rran riy ni kadbul, me chub e bel ko mab. Ma be kankan’an, me yani sap u bochi magufen e mab ni yima sap riy me guy l’agruw ni’ ni bay e kabang u pa’row. Me dake demoy u tabinaw, machane u m’on ni yan fa gali cha’, ma ra thuruyew bangi babyor u tan e mab nga naun ni bay riy ni gaar, “Mu nang e Bible rom.” Me marwaruwan’ ko re wub ni ke tay e gali cha’ nem e bay rogon nga angin fare meybil ni i tay ko fare nep u m’on riy? Me piningrow ni ngar sulow. De n’uw nap’an me tabab i fil e Bible, me taaboch me taufe. Ere ka fini falfalan’ ko tomur, Beatriz e chiney e be fil ngak boch e girdi’ rogon ni ngan pirieg e falfalan’.

Carmen e i meybil ni fan ko gafgow rok. Ragag e bitir rok ma figirngin e ba tachingaw’, ni aram Rafael. I gaar, “U guy rogon ni nga gu yognag boch e salpiy ko maluk mad,” ma fare chingnag ni ma tay Rafael e gel ko kafram. “Ma de thil nge taw ko ngiyal’ ni kugu tababgow i fil e Bible ni gamad e Pi Mich rok Jehovah mi fini tabab figirngig ni nge thil. Gu filew murung’agen e pi n’en ni kan micheg ko fare Gil’ilungun​—ni aram Jehovah e dab ki n’uw nap’an me chuweg e gafgow nge bugel nge togopuluw u fayleng. Pi meybil rog ku Got e kani fulweg taban!” Nap’an nni fil murung’agen e pi kanawo’ rok Jehovah me ayuweg Rafael nge taleg e unum, me yin’ nga daken “fa bin nib biech e pangin.” (Efesus 4:24) Ma ir nge tabinaw rok e yog ni mon’og e par rorad. I gaar Rafael: “Gathi ban’en ni kari fel’ rogomad, ma gathi gamad be par u bang ni kugu tafanayed, machane tin ba t’uf ko yafas e ke yog ngomad, ma gamad ba falfalan’.”

Ngiyal’ ni Yira Fulweg Taban Urngin e Meybil

Yib angin e meybil rok e pi cha’ ney nib fel’? Ba mudugil ni yib! Ma kam tay fanamiyen riy ni baga’ ni yibe fulweg taban e meybil rorad ni nap’an ni ra ayuwegrad be’ ko ulung ni Kristiano ni ngar chuchugurgad ngak Jehovah Got ko fol Bible ni yad be tay?​—Acts 9:11.

Ere bay fan nib fel’ ni nga udi meybilgad. Chiney e, dabki n’uw nap’an, ma fare meybil ni ngeb Gil’ilungun Got ma ngan rin’ e tini ba magan’ ngay u roy u but’ e bay ni fulweg taban. (Matthew 6:10) Tomuren ni ke klinnag Got e re fayleng rodad ney ko piin ni be togopuluw ngak, “ma girdi’ ko nam e ri bayi tamilangan’rad u murung’agen Jehovah.” (Isaiah 11:9) Ma aram e urngin e piin ba t’uf Jehovah rorad e ri yad ra falan’ nga fel’ngin “mi yad un ko flaab rok pi fak Got”​—ma pi meybil rorad e ri bay ni fulweg taban.​—Roma 8:18-21.

[Picture on page 7]

Ga manang ko mang fan ni susun ngada meybilgad, fa?