Mi Gimed Puthuy Ko K’adan’ Romed E Yul’yul’ Ku Got
“Mi gimed puthuy ko michan’ romed . . . e k’adan’, mi gimed puthuy ko k’adan’ romed e yul’yul’ ku Got.”—2 PETER 1:5, 6, New World Translation.
1, 2. (a) Miti ni ngan e piilal e yibe athapeg ni nge rin’ reb e bitir? (b) Uw feni ga’fan ni ngan ilal ko tirok Got?
BAGA’ FAN ku reb e bitir ni nge ilal i yan, machane gathi kemus ni dowef rok ya ku yibe athapeg ni nge ga’. Maku yibe athapeg ni nge ilal e lem rok. Bay ngal’an, ni nge n’ag fare tir e ngongol rok ni kafram nrogon be’ ndawori ilal me mang reb e pumoon ara ppin ni ke ilal. Paul ni apostal e i weliy e re n’en ney u nap’an ni yoloy ni gaar: “Ngiyal’ ni ku gub bitir e welthin rog, nge lanin’ug, nge rogon e lem rog e rogon e tin ni ma rin’ bbitir. ma chiney ni kug piilal e dakuriy rogon ni ngug ngongol nrogon e bitir.”—1 Korinth 13:11.
2 I gagiyelnag Paul e n’en nib ga’ fan u murung’agen e ngan ilal ko tirok Got. Piin Kristiano ni ka yad bbitir ko tirok Got e ba t’uf ni ngar manged e piin ni ngar “lemgad nrogon e piilal.” (1 Korinth 14:20) Thingara athamgilgad ma ngar maruweliyed “ma aram mi yad ilal i yan nge mus rogorad ngar boded mam’ungun Kristus.” Ma aram e dabkuura pired ni yad bod e “bitir, ni be fekrad e n’ew i yan, ma be fekrad e nifeng i yan ni gubin yay nra n’ag e nifeng gil’ ni aram e machib rok e girdi’ ni yad be bannag e girdi’.”—Efesus 4:13, 14.
3, 4. (a) Mang e thingarda rin’ed ma gad ra ilal ko tirok Got ni polo’? (b) Mang e pi felngin Got ni ngada daged, ma uw feni ga’ fan e pi’ nem?
3 Uw rogon ma gad ra ilal ko tirok Got? Yugu aram rogon ni dowey e yugu ma ilal rok u tan e par nib fel’ rogon, ma rogon ni ngan ilal ko tirok Got e ba t’uf ni ngan maruweliy. Ma tabab ni ngan fek e tamilangan’ ko Thin rok Got nib puluw min maruweliy nrogon nib puluw ko tin ni kan fil. (Hebrews 5:14; 2 Peter 1:3) Ma ra ayuwegdad e re n’en ney ni ngad daged e pi felngin Got. Taab rogon ko dowef ni be ilal i yan nib muun ngay boch ban’en riy, ma ku arrogon ni ngan mon’og ko pi felngin Got nib thil thil e baga’ ni ma buch ni taa ba ngiyal’. I yol Peter ni apostal ni gaar: “Bochan ni kam pied e ayuw ya ke fel’ u wan’med urngin e maruwel ni kan ta’ ma aram e ngam puthuyed ko michan’ romed pangimed nib fel’, ma ngam puthuyed pangimed nib fel’ ko tamilangan’ romed, ma ngam puthuyed ko tamilangan’ romed e t’ar laniyan’, ma ngam puthuyed ko t’ar laniyan’ e kadan’, ma ngam puthuyed ko kadan’ romed e yul’yul’ ku Got, ma ngam puthuyed ko yul’yul’ ku Got e runguy ngak e pi walag, ma ngam puthuy ko runguy ngak e pi walag, e t’ufeg.”—2 Peter 1:5-7, NW.
4 Ra reb i felngin ni yoloy Peter ma baga’ fan, ma dariy ban’en riy nrayog ni ngan chuweg. Me ulul ngay ni gaar: “Ereray e pi n’en ni nge yog ngomed, ya rayog ngomed ni pire’ ma gimed ra pasig me yib fan murung’agen e Somol rodad i Jesus Kristus ni kam nanged.” (2 Peter 1:8) Ngad tedan’dad ko fare n’en nib t’uf ni ngan puthuy e yul’yul’ ku Got ko kadan’’ rodad.
Ba T’uf ni Ngan K’adan’uy
5. Mang fan nib t’uf ni ngad kadedan’dad?
5 I puthuy Peter nge Paul fare yul’yul’ ku Got ko kadan’. (1 Timothy 6:11) Ngan kadan’ e gathi ke mus ni ngan par nib mudugil lanin’uy ma dabi war e lem ko ngiyal’ ni keb e gafgow. Ba l’ag ngay e gum’an’, lem nib gel, nge yul’yul’, ma dabi war e athap u nap’an ni yibe mada’nag e skeng, boch ban’en ni be magawonnagey, nge pi n’en ni be wawliyey ko tin kireb, ara keb e gafgow. Bochan gad be par ni gad be dag ni gad ba “yul’yul’ ku Got ni gadad ba chag ngak Kristus Jesus,” ma gad manang nrayog ni ngeb e togopuluw ngodad. (2 Timothy 3:12) Thingarda kadedan’dad ma aram rayog ni ngad daged e t’ufeg rodad ngak Jehovah ma ngad ubinged boch e felngin nib t’uf ni fan ni ngad thapgad ngak Got. (Roma 5:3-5; 2 Timothy 4:7, 8; James 1:3, 4, 12) Ra dariy e kadan’ rodad, ma dabiyog ni nge yog ngodad e yafas ni manemus.—Roma 2:6, 7; Hebrews 10:36.
6. Ngan kadan’uy nge mada’ ko tomur e be yip’ fan ni ngan rin’ e mang?
6 Yugu demtrug rogon feni fel’ ni kad tababgad, ma tin ni rib ga’ fan e gad ra kadan’. I yog Jesus ni gaar: “Machane en nra athamgil nge mada’ ko tomur e ra yog e yafas ngak.” (Matthew 24:13) Arrogon, thingarda kadedan’dad nge mada’ ko tomur, ndemtrug ko ireray e tomur ko yafas rodad e chiney ara tomur ko re m’ag n’ey nib kireb. Demtrug ko bin ngan, ma thingarda pared nib yul’yul’ ku Got. Machane, faanra dabda puthuyed e yul’yul’ ku Got ko kadan’ rodad, ma aram dabiyog ni ngad felfelan’naged Jehovah, ma dabiyog ni nge yog ngodad e yafas ndariy n’umngin nap’an. Machane mang fare yul’yul’ ku Got?
Mang Fan e Yul’yul’ ku Got
7. Mang e yul’yul’ ku Got, ma mang e ra k’aringdad ni ngad rin’ed?
7 Kenggin i fan e yul’yul’ ku Got u lan e Bible e tayfan nib gel, nge liyor, nge pigpig ngak Jehovah Got nbochan ni yibe par nib yul’yul’ ko gagiyeg rok ntha’bi tolang u palpalthib. Rogon ni ngan yul’yul’ ku Got nib muun ngay e tayfan, e ba t’uf rodad e tamilangan’ u murung’agen nge pi kanawoen. Ba t’uf ni ngad nanged Got nrib fel’ rogon. Ireray e n’en nra k’aringdad ni ngad maruweliyed ni ngari fel’ thildad Got, nra m’ug ko ngongol rodad nge kanawoen e yafas rodad. Ba t’uf ni ngad nameged ni ngad boded Jehovah nrogon nrayog rodad—ni ngad folgad u kanawoen ma ra m’ug e pi felngin nge wok rok ko yafas rodad. (Efesus 5:1) Riyul’ ni, yul’yul’ ku Got e ra k’aringdad ni ngad felfelan’naged Got ko urngin ban’en ni gad ra rin’.—1 Korinth 10:31.
8. Uw rogon ni rib peth e yul’yul’ ku Got nge ngan yul’yul’ ni polo’?
8 Rogon ni nga un yul’yul’ ku Got nib riyul’, e thingarda liyorgad ngak Jehovah ni goo ir, ma dabda paged ban’en ni nge yan nga luwan u lan gum’irchadad. Bochan ni ir e ke Sunmiydad, ma bay mat’awun ni nge tay chilen ngodad ni ngarda yul’yul’gad ngak. (Deuteronomy 4:24; Isaiah 42:8) Yugu aram rogon, ma dabi towasariydad Jehovah ni ngad pigpiggad ngak. Baadag ni nge m’agan’dad ngay ni ngad yul’yulgad ngak. Ireray e t’ufeg rodad ku Got, ni keb nbochan e tamilangan’ rodad ngak, e ke k’aringdad ni ngad biechnaged e yafas rodad ma kad ognaged gadad ngak nde maruwaran’dad me par ni gad be dag e pi n’ey ko yafas rodad.
Ngan Ubung e Th’a u Thiliy nge Got
9, 10. Uw rogon ni ngad ubunged thildad Got me par nib fel’?
9 Tomren ni kad daged ni kad ognaged gadad ngak Got u daken e taufe, ma kub t’uf ni ngad ubunged ni ngarda chuchugurgad ngak. Ere tafinay rodad ni gad baadag ni ngad rin’ed e re n’en ney ma gad baadag ni ngad pigpiggad ku Jehovah u fithik’ e yul’yul’ ma ke k’aringdad ni ngad ululgad ni ngad filed e Thin rok ma ngad fal’eged i lemnag. Ngiyal’ ni gad be pag ni nge maruwel fare kan ni thothup u lanin’dad nge gum’irchadad, ma nge toar e t’ufeg rodad ngak Jehovah. Nge par ni thildad Got e ir e n’en ni th’abi ga’ fan ko yafas rodad. Nge mudugil u lanin’dad ni Jehovah e ir e th’abi fel’ ko Fager rodad ma gad baadag ni ngad felfelan’naged ni gubin ngiyal’. (1 John 5:3) Felfelan’ rodad nbochan thildad Got nib fel’ e ra gel, ma gad be pining e magar ya ma fil ngodad ban’en ma ma yal’uwegdad ko ngiyal’ nib t’uf.—Deuteronomy 8:5.
10 Faanra dabda athamgilgad ni ngad gelnaged thildad Jehovah, ma rayog ni war. Faanra buch ni aram rogon, ma gathi kireb e rok Got, ya “dariy bagadad nib mal’af Got rok nga orel.” (Acts 17:27) Ri gad ba felfelan’ ya de mo’maw’ ni ngad chuchugurgad ngak Jehovah! (1 John 5:14, 15) Riyul’ ni, thingarda maruweliyed ni nge par nib fel’ thildad Jehovah. Yugu aram rogon, ma ma ayuwegdad ni fan ni ngad chuchugurgad ngak ma ma pi’ ngodad urngin ban’en nib t’uf rodad ni fan ni ngad ubunged ma gadad par ni gad ba yul’yul’ ngak. (James 4:8) Uw rogon ma rayog ni ngarda fanayed urngin e pi n’en ney ni kan pi’ ngodad u fithik’ e t’ufeg?
Ngan Par nib Mudugil ko Tirok Got
11. Mang boch e kanawo’ ni ngan dag e yul’yul’ ku Got riy?
11 T’ufeg rodad ku Got ni bay likngin nib toar e ra k’aringdad ni ngad daged ni ri gad ba yul’yul’ ku Got, nrogon nib puluw ko fonow rok Paul ni gaar: “Mu athamgiliy u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.” (2 Timothy 2:15) Ngan rin’ e n’en ni aram rogon e ba t’uf ni nge par ni bay e tayim rodad ni kan dugliy nib fel’ ni fan ko fol Bible ni gubin ngiyal’, min un ko muulung, min un i wereg e machib. Maku ‘ngada meybilgad ni gubin ngiyal’’ ma aram e rayog ni ngad pared ni gad ba chuchugur ngak Jehovah.’ (1 Thessalonika 5:17) Ri gad ma dag riy ni gad ba yul’yul’ ku Got. Yira pag reb riy ma ra yib e m’ar ko tirok Got ma ra mom ni nge gel Satan ngodad.—1 Peter 5:8.
12. Uw rogon ni ngad gelgad ko fapi skeng?
12 Ngan par nib gel ma yib pasig ko tirok Got e ku ra ayuwegdad u nap’an ni gad ra mada’nag e skeng ni keb ngodad. Fapi skeng e rayog ni ngeb u bang nib thilthil nrayog ni nge skengnagdad nrib gel. Fare ngongol ni danir tiyan’uy nga ban’en, nge togopuluw, nge ngan k’aring e gafgow, e rib mo’maw’ ni ngan kadan’uy riy nfaanra sum ko girdi’ u lan e tabinaw, ara pi be’ rodad, ara buguli yoror. Ngongol nib sasalap ni ra towasariydad ni ngad th’abed kenggin e motochiyel ni fan ko Kristiano e rayog ni nge m’ug u tabon e maruwel ara skul. Mulan’, nge m’ar, nge mochuch e rayog ni nge warnag dowdad ma bochan e pi n’ey ma ra mo’maw’ rogon ni ngad gelgad ko skeng ko michan’ rodad. Machane rayog ni ngad gelgad ko urngin e skeng nfaanra ngad ululgad i rin’ e “pi ngongol nib thothup nge boch e ngongol ni be dag ni gad ba yul’yul’ ku Got riy, ni gad be sonnag ma gad be tay nga lanin’dad fare rran rok Jehovah.” (2 Peter 3:11, 12, NW) Ma ra par ni gad ba felfelan’ nfaan gad ra rin’ e n’en ni aram rogon, ya ke mudugil lanin’dad nra taw’athnagdad Got.—Proverbs 10:22.
13. Mang e thingarda rin’ed ma rayog ni ngad ululgad ni nguud pigpiggad ku Got?
13 Yugu aram rogon ni be tiyan’ Satan ko piin ni yad be dag ni yad ba yul’yul’ ku Got ni nge skengnagrad, ma de t’uf ni ngada rusgad. Mang fan? Ya bochan “manang Jehovah rogon ni nge ayuweg e girdi’ nib yul’yul’ ngak ko skeng ni keb ngak.” (2 Peter 2:9) Rogon ni ngada kadan’dad ko fapi skeng ma nge yog ngodad e re ayuw ney, e thingarda “paged pangidad nge ngongol rodad nde m’agan’ Got ngay nge chogowen urngin ban’en u fayleng . . . ma gadad be par ni ba fel’ lanin’dad mab mat’aw ma ngad yul’yul’gad ngak Got u fithik’ e re m’ag ney.” (Titus 2:12, NW) Gadad ni piin Kristiano, e thingarda koled ayuwngidad ma urngin ban’en ni gad ba meewar riy nib l’ag ko ar’ar nib kireb nge boch e maruwel ni dabi magawonnag ma dabi kirebnag e yul’yul’ rodad ku Got. Gad ra weliy e chiney boch ban’en ko pi n’en ney ni bay e riya’ riy.
Ngan Kol Ayuw ko Pi N’en nra Magawonnag e Yul’yul’ ku Got
14. Mang e ba t’uf ni ngad lemnaged nfaanra ke gel ngodad e lem ko chogowen e chugum?
14 Chogowen e chugum e ke mang wup ngak boor e girdi’. Rayog ni ku ngada banniged gadad, ni ngad “lemnaged ni ngan yul’yul’ ku Got e ireray reb e kanawo’ ni nge yog boch e [chugum] chugum.” Ma aram, ra k’aringdad ni ngad rin’ed ban’ed ngak e pi’ walag ni be pagan’dad ngorad ni fan ni nge yog boch ban’en ngodad. (1 Timothy 6:5) Rayog ni ngad olobochgad ni ngad lemnaged nde kireb ni ngad towasariyed reb e Kristiano nib fel’ rogon ni nge pi’ boch e salpiy ngodad ni baga’ ni dabiyog ni ngad sulweged ngak. (Psalm 37:21) Machane yul’yul’ ku Got, ma gathi rogon ni nge yog boch e chugum, e “be micheg murung’agen e yafas e chiney nge yafas ni bay yib.” (1 Timothy 4:8, NW) Bochan ‘dariy ban’en ni kad feked i yib ko biney e tamilang ma ku dariy ban’en nrayog ni ngad feked nge un ngodad ko ngiyal’ ni ngad chuwgad ko biney e tamilang,’ ma aram ngarda dugliyed ni nguuda daged ni “gadad ba yul’yul’ ku Got ni ke gaman’dad” ma nge ‘gaman e ggan nge mad’ ni nge yog ngodad.—1 Timothy 6:6-11.
15. Mang e rayog ni ngad rin’ed nfaanra lem ni ngan adag ni ngan lek e fafel e ke chuchugur ni nge gel ko yul’yul’ rodad ku Got?
15 Yira lek e falfalan’ ma ra chuweg e tafinay ni ngan yul’yul’ ku Got. Gathi ba t’uf ni ngad yal’uweged boch ban’en riy nib pey? Ngad ted ni, ba’ angin ni buchuw ko ngan un ko chamag nge fafel. Machane, re taw’ath ney e kab achichig ni ra ngan taarebnag ko yafas ndariy n’umngin nap’an. (1 John 2:25) Ngiyal’ ney, e boor e girdi’ nib “t’uf e fafel rorad me tomur Got u wan’rad, ma yad be dake yad ba yul’yul’ ku Got, machane yad be pi’ keru’rad nga gelngin,” mab t’uf ni ngad paloggad rok be’ ni aram rogon. (2 Timothy 3:4, 5) Piin ni ri yad ba yul’yul’ ku Got e yad be “kunuy e flaab ni fan ngorad ni ir e bay mang def rorad nib gel ni fan ngorad e chiney i yan nga ram. Ma aram e ra yog ngorad e yafas ni ir e bin riyul’ e yafas.”—1 Timothy 6:19.
16. Mang e ar’ar ko denen ni be taleg yugu boch e girdi’ ni ngar pared nrogon nib puluw ko tin nib mat’aw ni baadag Got ni ngara rin’ed, ma uw rogon ni ngad gelgad ko pi ar’ar nem?
16 Ngan unum e alkul min fek e drug nib pag rogon, nge ngongol ni darngal, nge ar’ar nib kireb e rayog ni nge thang e yul’yul’ rodad ku Got. Ra ngada paged ni nge gel ngodad e pi n’en ney ma dabkuuda pared nrogon nib puluw ko tin ni baadag Got ni ngad rin’ed. (1 Korinth 6:9, 10; 2 Korinth 7:1) Mus ku Paul ma ba t’uf ni ngi i cham ko dowef rok ni ta denen. (Roma 7:21-25) Ngan rin’ ban’en nib mudugil e ba t’uf ma rayog ni ngan chuweg e ar’ar nib kireb. Reb, e thingarda turguyed u lanin’dad ni gad ra par nib klin ko gafarig rodad. Be yog Paul ngodad ni gaar: “Ere thingar mu lied ngem’ e ar’ar nu fayleng ni be maruwel u fithik’ i dowmed, ni aram e darngal, nge puwlag, nge ar’ar nib kireb ni ma wawliy e girdi’ ko denen, nge chogow (ya chogow e mmit e ta’ fan nge meybil ni yibe tay ngak e liyos ni ma meybil boch e girdi’ ngay.”) (Kolose 3:5) Ngan li’ e ar’ar ni be maruwel u fithik’ i dowdad e ba t’uf e lem nib mudugil ma rayog ni ngan chuweg e pi n’em. Ngan yibilay e ayuw rok Got u fithik’ e yul’yul’ ma ra ayuwegdad ni ngad n’aged e lem nib kireb ma ngad ululgad ko kanawo’ nib mat’aw ma ngad yul’yul’gad ku Got u lan e re m’ag ney nib kireb.
17. Uw rogon u wan’dad e gechig ni ma yal’uwegey?
17 Nge mulan’ e rayog ni nge warnag e kadan’ rodad me kirebnag e yul’yul’ rodad ku Got. Boor u fithik’ e pi tapigpig rok Jehovah e kar pirieged e mulan’ yu ngiyal’. (Numbers 11:11-15; Ezra 4:4; Jonah 4:3) Mulan’ e ra kirebnagdad nfaanra ba l’ag ngay e damumuw ya bochan ni de ga’ fadad ara kan yal’uwegdad fa kan gechignagdad nib gel. Machane, yal’uweg nge gechig e be micheg ni ma lemnagdad Got ma gadad ba t’uf rok. (Hebrews 12:5-7, 10, 11) Gechig e susun ni ngan lemnag ni gathi kemus ni gechig ni ngan gafgownag ya aram reb e kanawo’ ni nge skulnagdad ko kanawo’ nib mat’aw. Faanra ba sobut’ lanin’dad, ma ngad ted fan ma ngad folgad ko fonow, ya gad manang ni “thin ni be yal’uwegey ma be gechignagey e ireray kanawoen e yafas.” (Proverbs 6:23) Rayog ni nge ayuwegdad e re n’en ney ni ngarda mon’oggad ko tirok Got ko tin ni gad be nameg ni ngad yul’yul’gad ku Got.
18. Mang e ba mil fan ngodad u nap’an ni kad olobochgad ya kad kireban’naged be’?
18 Fare magawon ni de taareban’uy nge kireb ni ke rin’ be’ ngak yugu be’ e rayog ni nge magawonnag e yul’yul’ rodad ku Got. Rayog ni nge k’aring e magafan’ ara ra k’aring boch e girdi’ ni ngar rin’ed e tin de mat’aw ni ngar paloggad rok pi walagrad ni Kristiano ni pumoon nge ppin. (Proverbs 18:1) Machane susun dabda paged talin ni ra ngad chaariyed e lem nib kireb ni fan ngak yugu boch e girdi’ ara ngad paged ni gad be damumuw ma ra kirebnag thildad Jehovah. (Leviticus 19:18) Ma riyul ni, “dabiyog ni nge t’uf Got rok, ni be’ nder guy nfaanra de t’uf rok walagen ni girdien Kristus ni be’ ni be guy.” (1 John 4:20) Welthin rok Jesus u daken fare Burey, e kari tamilangnag riy ni dabni sagaal ni ngan rin’ ban’en ni ngan pithig e magawon ni kefin sum. I yog ngak e piin ni yad be motoyil ngak ni gaar: “Ere faanra mman ni ngam pi’ e n’en ni ngam pi’ ngak Got u altar me yib ngan’um ni bay ban’en nib togopuluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chi ngiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi’ ngak Got.” (Matthew 5:23, 24) Ngan wenignagey e ra golnag e maadad ni ke sum nbochan e thin nib gel ni ka nog ara tin kan rin’. Rogon ni kan kirebnag thiliy nge girdi’ e rayog ni ngan sulweg nga rogon ma ra aw e gapas u thildad biyay nfaanra ngada weniggad ngorad ma nga dogned ni kad olobochgad u rogon ni kad rin’ed ban’en. Maku ke pi’ Jesus e fonow ko uw rogon ni ngan pithig e magawon. (Matthew 18:15-17) Ri gad ba felfelan’ nfaanra keb angin fare maruwel ni kad ted ni fan ni ngad pithiged e magawon!—Roma 12:18; Efesus 4:26, 27.
Ngan Fol ko Tin ni Rin’ Jesus
19. Mang fan nib ga’ fan ni ngad folwokgad rok Jesus ko tin ni i rin’?
19 Ba mudugil ni ra yib ngodad e skeng, machane dabda paged ni nge wagey lanin’dad ma dabkuuda tedan’dad ko sagreng ko yafas. Dabda paged talin nrayog rok Jehovah ni nge ayuwegdad ngad gelgad ko skeng. Ra ngad “paged urngin ban’en ni be magawonnagdad” ma “ngad milgad ngad tawgad ko gin ni gad be nameg,” ma “thingarda sapgad ngak Jesus ni Pilung rodad ma ir e en ma Ayuweg nge gel e michan’ rodad.” (Hebrews 12:1-3) Ra ngan yaliy nib fel’ rogon e tin ni rin’ Jesus ma ngan athamgil ni ngan folwok rok ko thin nge ngongol ma ra ayuwegdad ni ngad mon’oggad ni ngad daged ni gad ba yul’yul’ ku Got ma ngad rin’ed e pi n’en ney nrogon nrayog rodad.
20. Mang taw’ath nra yib ya kan athamgil ni ngan kadan’uy min dag e yul’yul’ ku Got?
20 Kadan’ nge yul’yul’ ku Got e be maruwel u taabang ni nge ayuwegdad ni nge mudugil ni nge yog ngodad e yafas. Ra ngad daged e pi felngin ney ni tin baga’ fan, ma rayog ni ngad ululgad ko pigpig ku Got u fithik’ e yul’yul’. Mus nga nap’an ni ra yib e skeng ngodad, ma bay e felfelan’ rodad ko ngiyal’ ni kad thamiyed e runguy nge flaab rok Jehovah nbochan e kad kadedan’dad ma kad daged ni gad ba yul’yul’ ngak. (James 5:11) Maku, Jesus e ir e ke micheg ngodad ni gaar: “Gimed ra guman’ ma rayog e yafas ngomed.”—Luke 21:19, NW.
Uw Rogon ni Ngam Pi’ e Fulweg?
• Mang fan nib ga’ fan ni ngan kadan’uy?
• Be mang e yul’yul’ ku Got, ma uw rogon ni ngan dag e re n’en ney?
• Uw rogon ni ngan maruweliy nge par nib fel’ thildad Got?
• Mang boch ban’en nrayog ni nge magawonnag e yul’yul’ rodad ku Got, ma uw rogon ni ngad siyeged e pi n’em?
[Pictures on page 6, 7]
Yul’yul’ ku Got e kan dag u boor e kanawo’
[Pictures on page 8]
Mu kol ayuw ko pi n’en nra magawonnag e yul’yul’ rom ku Got