Jehovah E Ma Lemnagmed

“Mpaged fan urngin e magafan’ romed ngak [Got], ya be lemnag rogomed.”​—1 PETER 5:7.

1. Mang e n’en nib ga’ fan ni Jehovah nge Satan e ri yow ba thil riy?

JEHOVAH nge Satan e ri yow ba thil. En baadag daken Jehovah e nge dabuy fare Moonyan’. Pi thin ney ni be dag e n’en nrib thil riy e bay u reb e babyor ni goo yimanang. Murung’agen e maruwel rok Satan ni kan weliy u lan e Bible ko fare babyor ku Job, ma fare Encyclopædia Britannica (1970) e be yog ni gaar: ‘Maruwel rok Satan e yug be yan yan u fayleng i yan ni be gay e ngongol ara girdi’ ni fan ni nge turguy e kireb nga dakenrad; ma maruwel rok ni aram rogon e rib thil u “owchen fare Somol,” ni yug be yaliy e fayleng ni polo’ ni be pi’ e gel nga laniyan’ e piin nib fel. (II Chron. xvi, 9). Satan e ma gathibthibnag ma be maruwaran’ ko tin nib fel’ ni ma dag e girdi’ ma kan pag ni nge skengnagrad u tan mat’awon Got nge gagiyeg rok ngu tan boch e motochiyel ni ke ta’ Got.’ Arrogon, ri yow ba thil!​—Job 1:6-12; 2:1-7.

2, 3. (a) Uw rogon ma fan fare bugithin ni “Moonyan” e kan dag nrib puluw ko tini buch rok Job? (b) Uw rogon ni be dag e Bible ni ka be ulul Satan i yog e thin nib togopuluw ngak pi tapigpig rok Jehovah u fayleng?

² Fare bugithin ni “Moonyan’” e ni fek ko reb e thin nu Greek ni be yip’ fan ni “be’ ni ma yog e thin nde riyul’ u murung’agen be’,” nge “tagathibthib.” Fare babyor rok Job e be dag ni i non Satan ngak Jehovah u murung’agen e tapigpig rok nib yul’yul’ ni Job ni be pigpig ngak ni ke mus nbochan ni ma yib e fel’ riy ngak, ere yog ni gaar: “Gur ra i par Job ni ba’ madgum u wan’ ni faanra der yib e fel’ riy ngak?” (Job 1:9) Fare chep u lan fare babyor rok Job e be dag nyugu demtrug gelngin e skeng nge gafgow ni keb ngak, ma be par Job ni rib chugur ngak Jehovah. (Job 10:9, 12; 12:9, 10; 19:25; 27:5; 28:28) Tomren e skeng ni keb ngak, me yog ngak Got ni gaar: “Ug par ni ke mus ni ug rungaag murung’agem, ma chiney e kug guyem nga owcheg.”​—Job 42:5, NW.

³ Gur ka nap’an Job me tal Satan i yog e thin nib togopuluw ko tapigpig rok Got nib yul’yul’? Danga’. Fare babyor ni Revelation e be dag ni ngiyal’ ney ni tin tomren e rran, ma ka be ulul Satan i yog e thin nib togopuluw ngak pi walagen Kristus ni kan dugliyrad mab mudugil ni ku be rin’ ni aram rogon ngak e piin nib yul’yul’ ni ba chag ngorad. (2 Timothy 3:12; Revelation 12:10, 17) Arfan, ni gadad gubin e tin riyul’ e Kristiano e rib t’uf ni ngad pied gadad nga pa’ Got, ni Jehovah ni ri ma lemnagdad, mi gad pigpig ngak nbochan e rib t’uf rodad ma aram ra m’ug ni tin ni yog Satan e de riyul’. Gad ra rin’ ni aram rogon, ma gad be fel’felan’nag gum’irchaen Jehovah.​—Proverbs 27:11.

Be Gay Jehovah Rogon ni Nge Ayuwegdad

4, 5. (a) U rogon nib togopuluw e tin ma rin’ Satan, ko n’en ni ma yaliy Jehovah u fayleng? (b) Mang e gad ra rin’ ni fan ni ngad felgad u wan’ Jehovah?

⁴ Fare Moonyan’ e be yan u daken e fayleng i yan, ni be gay be’ ni nge pirieg e kireb rok nge longuy. (Job 1:7, 9; 1 Peter 5:8) N’en nib thil riy, e Jehovah e be gay e kanawo’ ni nge ayuweg e piin nib t’uf gelngin rorad. Hanani ni profet e yog ngak Asa ni Pilung ni gaar: “Rarogon Jehovah, e lan owchen e be yaliy daken e fayleng i yan ni fan ni nge dag gelngin ngak e piin ni be pagan’rad ngak u polo’ i gum’ircharad.” (2 Chronicles 16:9, NW) Rib gel e thil u thilin Satan ni be yaliy e girdi’ u fithik’ e fanenikan nge Jehovah ni ri ma lemnag rarogon e girdi’!

⁵ Jehovah e der ma yaliydad nib mith ni fan ni nge nang urngin e kireb rodad. Fare psalmist i yoloy ni gaar: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab ni gechignag?” (Psalm 130:3) Fulweg riy nni dag e: dariy. (Eklesiastes 7:20) Faan gad ra chugur ngak Jehovah u polo’ i gum’ircha’dad, ma ra sap ngodad, ni gathi bochan e nge turguy e kireb rodad, ya nge yaliy e athamgil ni gad ma tay ma nge fulweg taban e meybil rodad ni nge ayuwegdad me n’ag fan e kireb rodad. I yoloy Peter ni apostal ni gaar: “Ni fan e Somol e ke yiluy e changar rok ngak e piin ni yad mmat’aw ma gubin ngiyal’ ni ma rung’ag e meybil rorad; machane ma togopuluw ngak e piin ni ma ngongliy e tin nib kireb.”​—1 Peter 3:12.

6. Uw rogon ma pi n’en ni ke buch rok David e ra fal’eg lanin’dad ma ku be ginangdad?

⁶ David e ir be’ ndawori flont me ngongliy reb e denen nib ubchiya. (2 Samuel 12:7-9) Machane i puog urngin e tin bay u gum’irchaen ngak Jehovah me chugur ngak u daken e meybil ni p’eyn’uy. (Psalm 51:1-12, superscription) Me rung’ag Jehovah e meybil rok me n’ag fan e denen rok, ni yugu aram rogon ni keb wenegan ngak David nbochan e denen ni ke rin’. (2 Samuel 12:10-14) Gali n’ey e fan ngodad ni susun nge ayuwegdad ma nge ginangdad. Ra pagan’dad ni gad ra nang nib m’agan’ Jehovah ngay ni nge n’ag fan e denen rodad nfaanra riyul’ ni kad kalgadngan’dad ko kireb rodad, machane ku bay e kireban ni ra yib ngodad ni bochan ni baga’ ni denen e bay wenegan nib e kireb. (Galatia 6:7-9) Faanra gad baadag ni ngad chugurgad ngak Jehovah, mab t’uf ni ngad paloggad ko urngin ban’en ni ra kirebnag laniyan’ ni rogon nrayog rodad.​—Psalm 97:10.

Ma Pow’iy Jehovah e Girdi’ Rok ni Ngar Chuchugurgad Ngak

7. Miti mang e girdi’ ni be changarnag Jehovah, ma uwrogon ni be k’aringrad ngak?

⁷ Reb ko fapi tang rok David e i yoloy ni gaar: “Jehovah e ba tolang, machane rayog ni nge guy e en nib sobut’; ma en nib tolngan’ e rayog ni nge poy ni kab palog.” (Psalm 138:6) Maku, yugu reb e psalm e be yog ni gaar: “Mini’ e bod rogon Jehovah ni Got rodad, ni ma par u tagil nib tolang? Me sobutnag laniyan’ ni fan ni nge guy e tharmiy nge fayleng, ni be n’uf e en nib sobut’ ni kan ngongliy ko fiyathiy nge nga fayleng, ma suwoneg e piin ba sobut ni bay u fithik’ fiyath.” (Psalm 113:5-7, NW) Arrogon, En ke Sunmiy fare palpalthib ni gubin ma rayog rok e ke sobut’nag laniyan’ ni nge changar nga daken e fayleng, be guy e “en nib sobut’,” nge “en ke gafgow’,” ni girdi’ ni “kari kireban’rad ma be gel’gel’ ko amith nbochan e tin nib kireb ni yibe rin’.” (Ezekiel 9:4) Ke pow’iy e picha’ nem ni ngar chugurgad ngak u daken Fak. Nap’an ni immoy u fayleng, e yog Jesus ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub . . . Dariy be’ nrayog ni nge yib ngog ni faanra gathi en ni Chitamangiy e ayuweg nge yog ni yib ngog.”​—John 6:44, 65.

8, 9. (a) Mang fan nib t’uf ni ngad bad ngak Jesus ni gad gubin? (b) Mang e rib fel’ ko fare yaram ko biyul?

⁸ Urngin e girdi’ e thingara bad ngak Jesus ma nge mich e biyul ni pi’ u wan’rad ya bochan e kan gargelnagrad ni yad e tadenen, kar paloggad rok Got. (John 3:36) Ba t’uf ni nge fel’ thilrad Got biyay. (2 Korinth 5:20) Got e de sonnag e piin ta denen ni ngar weniggad ngak ni nge ngongliy boch e yaram ni fan ni nge aw e gapas u thilrad Got. I yoloy Paul ni apostal ni gaar: “Machane Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad! . . . . Ud moyed ni gadad e toogor rok Got, machane ngongliydad Got kad manged pi tafager rok u daken e yam’ ni ke ta’ Fak. Kad manged pi tafager rok Got e chiney, ere ri bay ud thapgad ngak Got u daken e fas ko yam’ ni ke tay Jesus!”​—Roma 5:8, 10.

⁹ I micheg John ni apostal e thin nth’abi ga’fan ni Got e ra fal’eg rogon e girdi’ ngar manged fager rok, i yoloy ni gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafas ngodad u daken. Baaray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’og Fak nge yib, nu daken Fak e nge n’ag Got fan e denen rodad riy.” (1 John 4:9, 10) Got e ir e ke rin’ ban’en som’mon, ma gathi girdi’. Gathi ga baadag ni ngam chugur ngak ba Got ni i dag e t’ufeg rok nib gel ni gathi ke mus ni fan ko piin “tadenen,” ya kub muun ngay e “piin toogor”?​—John 3:16.

Ba T’uf ni Ngad Gayed Jehovah

10, 11. (a) Mang e thingarda rin’ed ni fan ni ngad gayed Jehovah? (b) Susun nge uw rogon fare m’ag rok Satan u wan’dad?

¹⁰ Rogon ni kad nanged, e dabi towasariydad Jehovah ni ngad bad ngak. Thingarda gayed, “mi gad pirieg ko ngiyal’ ni gad be gayiy. Machane bin riyul’ riy e dariy bagadad nib mal’af Got rok nga orel.” (Acts 17:27) Thingarda ted fan mat’awun Jehovah ni be ning chilen ngodad ni ngad pared u tan pa’. I yoloy James ni reb i gachalpen ni gaar: “Ere mpied gimed nga pa’ Got ngam paged famed ngak. Mi gimed togopuluw ngak fare moonyan’, me mil romed. Mu chugurgad ngak Got, me chugur ngomed. Pi tadenen, mmalukniged pa’med! Gimed e piin ni gimed be dake modingniged gimed, mu klinniged lanin’med!” (James 4:7, 8) Ere dabda siyeged ni nguud pared ni gadad ba mudugil ma gadad togopuluw ngak fare Moonyan’ ni fan ngak Jehovah.

¹¹ Fan e re n’en ney e ngada paloggad ko fare m’ag nib kireb rok Satan. Maku i yoloy James ni gaar: “Da mu nanged ni faanra mfagergad ko fayleng ma aram e kam manged toogor rok Got? Cha’ nra finey ni nge mang fager rok e fayleng e aram e ke tay ir ni ir e toogor rok Got.” (James 4:4) N’en nib thil riy, e faanra gad baadag ni nge mang Jehovah e fager rodad, ma aram e thingarda ted nga lanin’dad ni fayleng rok Satan e ra fanenikaydad.​—John 15:19; 1 John 3:13.

12. (a) Mang thin e ra fal’eg lanin’uy ni yoloy David? (b) Mang e thin be ginangey ni i yog Jehovah u daken Azariah ni profet?

¹² Nap’an nra togopuluw e fayleng rok Satan ngodad u boch e kanawo’, ma rib t’uf ni ngad meybilgad ngak Jehovah, ngad ninged e ayuw ngak. David, ni ir be’ ni ke ayuweg Jehovah ni boor yay, e ke yoloy e pi n’ey ni fan ni nge baudnag lanin’dad ni gaar: “Jehovah e ba chugur ngak urngin e piin ni yad ma pining, ni piin yad be non ngak u fithik’ e yul’yul’. Piin ni bay madgun u wan’rad e ma pi’ ngorad e tin ni nge yog ngorad; ma rung’ag e tin ni yad ma wenignag ngak me ayuwegrad. Ma yoror rok urngin e piin nib t’uf rorad, machane ra thang e pogofan rok urngin e piin nib kireb.” (Psalm 145:18-20) Re psalm ney e be dag ni rayog ni nge ayuwegdad Jehovah u nap’an ni ke yib e skeng ngodad ni tataabe’ maku ra ayuweg e girdi’ rok ni reb e ulung nge reb u m’on ni nge yib fare “gafgow ni baga’.” (Revelation 7:14) Ra par Jehovah nib chugur ngodad ni faan gad ra par ni gad ba chugur ngak. Azariah ni profet ni “fare kan ni thothup rok Got” e be pow’iy, e i yog ko mang e n’en ni rayog ni ngad lemnaged ni urngin e tin riyul’ boor ban’en nib l’ag ngay ni gaar: “Jehovah e ba’ romed ni n’umngin nap’an ni gimed ba’ rok; ma faan gimed ra gay, ma ra pag ni ngam pirieg, machane faan gimed ra digey e ku ra digeymed.”​—2 Chronicles 15:1, 2, NW.

Bat’uf ni Nge Riyul’ Jehovah u Wan’dad

13. Uw rogon ni ngad daged ni ba riyul’ Jehovah?

¹³ Paul ni apostal e ke yoloy murung’agen Moses ni i par nib mudugil ni “bochan e gowa ke guy fare Got ndab ni guy nga owchey.” (Hebrews 11:27) Riyul’, ni Moses e dabiyog ni nge guy Jehovah. (Exodus 33:20) Machane ri ba riyul’ Jehovah u wan’ ma arfan ni gowa ke guy. Maku arrogon Job, ni bod ni kari tamilang Jehovah nga owchen u tomren ni ke yib e skeng ngak, mi ir ba Got ni ma pag ni ngeb e gafgow ngak e pi tapigpig rok nib yul’yul’ machane ri dabi pagrad. (Job 42:5) Ka nog ni Enoch nge Noah e ‘u ranod Got u taabang.’ Kar yodoromgow ya bochan kar athamgilgow ni ngar felfelan’agew Got mi yow be fol rok. (Genesis 5:22-24; 6:9, 22; Hebrews 11:5, 7) Faanra ba riyul’ Jehovah u wan’dad ni bod feni riyul’ u wan’ Enoch, nge Noah, nge Job, nge Moses, ma ra “pagan’dad ngak” ko urngin ban’en ni nguuda rin’ed, ma ra “yal’uweg e kanawo’ [rodad].”​—Proverbs 3:5, 6, NW.

14. Mang e be yip’ fan ni ngan “chichiiy paey rok” Jehovah?

¹⁴ Nap’an ni dawori taw piyu Israel nga lan fare Binaw ni kan Micheg, mi fonownagrad Moses ni gaar: “Um rin’ed e tin ni baadag Somol mu um pired ni ba’ madgun u wun’med. Um folgad rok mu um tiyed nga tagil’ e tin ke yog ni nguum rin’ed; um tiyed fan ma gimed be meybil ngak ma gimed be par ni gimed ba yul’yul’ ngak.” (Deuteronomy 13:4) Thingara leked Jehovah, ni bay madgun u wan’rad, ma yad be fol rok, mi yad chichiyed pa’rad. Murung’agen fare bugithin ni kan thiliyeg ni “kan chichiiy paey” u roy, e reb Bible scholar e be yog ni “re thin ney e bod feni chuchugur thilin e tafager.” I yog fare psalmist ni gaar: “Somol e tafager rok e piin ni yad be fol rok.” (Psalm 25:14) Re tha’ u thiliy ney nge Jehovah nib ga’ fan e rayog ni nge yog ngodad ni faanra rib riyul’ u wan’dad mab t’uf rodad ma dubdad ni ngad kireban’naged.​—Psalm 19:9-14.

Kam Guy e Runguy Rok Jehovah?

15, 16. (a) Uw rogon ni dag ko Psalm 34 ni Jehovah e ri ma lemnagdad? (b) Mang e gad ra rin’ nfaanra be magawon rogon ni ngeb ngan’dad e tin ni ke rin’ Jehovah ngodad nib fel’?

¹⁵ Reb e kanawo’ ni ma sasaliyebnagdad Satan riy e nge maruweliy ni nge dab kud guyed e tin riyul’ ni ma rin’ e Got rodad, i Jehovah, ni ma ayuweg e pi tapigpig rok nib yul’yul ni gubin ngiyal’. David ni Pilung e ri manang ni ri ma pi’ Jehovah e ayuw ni baga’ u nap’an ni ke mada’nag be’ e magawon ni kari magawon e yafas rok riy. Nap’an ni ke guy ni thingari m’ug i ni bod yaan be’ ni ke aliliy u p’eowchen Achish ni Pilung nu Gath, me fal’eg reb e tang, ni ireray e tang nrib fel’, nib muun ngay e pi thin ko michan’ rok nem ni gaar: “Mu uned ngog ngad weliyed ngak e girdi’ feni sorok Somol; marod ngad pininged e sorok nga fithingan! Gu meybil ngak Somol me fulweg taban e meybil rog; i chuweg urngin e marus rog. Engel rok Somol e ma ma matanagiy e piin ni bay madgun Somol u wan’rad, me chuwegrad ko riya’. I Somol e ba chuchugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy. En nib mat’aw e boor e gafgow ni ma yib ngak, machane i Somol e ma chuweg u fithik’ ni gubin.”​—Psalm 34:3, 4, 7, 8, 18, 19; 1 Samuel 21:10-15.

¹⁶ Karim pagan’um nga gelngin Jehovah nra ayuwegey fa? Kam guy e ayuw ni ma pi’ u daken e engel rok? Kam limlimiy ma kam guy ko yafas rom ni Jehovah e ri ba fel’? Wuin e yay ni tomur ni karim guy feni gol Jehovah ngom? Mu guy rogon ni ngeb ngan’um. Gathi fa bin tomur e tabinaw ni kam man ngay u nap’an ni yibe yan ko machib, ma ga thamiy rom ni dakuriy ban’en nrayog ni ngam rin’? Sana rib fel’ rogon ni kam nonad girdien e re tabinaw nem. Keb ngan’um ni ngam pining e magar ngak Jehovah ya bochan ke pi’ gelngim ni aram e n’en nib t’uf rom ma ke taw’athnagem? (2 Korinth 4:7) Ma reb, sana mo’maw’ ni ngeb ngan’um ban’en nib fel’ ni ke rin’ Jehovah ngom. Sana bat’uf ni ngam lemnag e tin ni buch rom u lan taareb e wik ni ke yan, ara reb e pul, ara reb e duw, ara keb n’uw boch nap’an. Faanra aram rogon, mang fan ni dabmu athamgil ni ngam chugur ngak Jehovah ma nguum guy rogon ni ngam guy ko u rogon ni be pow’iyem? Peter ni apostal e i fonownag fapi Kristiano ni gaar: “Ere mu sobut’niged laninmed u tan pa’ Got nib gel gelngin . . . Mpaged fan urngin e magafan’ romed ngak, ya be lemnag rogomed.” (1 Peter 5:6, 7) Riyul’, ni ga ra gin nga rogon feni gel e runguy rok ngom!​—Psalm 73:28.

Nga Yug Un Gay Jehovah

17. Mang e ba t’uf rodad nfaanra nguuda gayed Jehovah?

¹⁷ Ba t’uf ni nge par nib fel’ thildad Jehovah i yan. Nap’an e meybil rok Jesus ngak e Chitamangin e yog ni gaar: “Baara’ ira’ e yafas ndariy n’umngin nap’an: ni aram e nge nangem e girdi’ ni kari mmus ni guy e bin riyul’ e Got, mi yad nang ko mini’ Jesus Kristus ni ir e kam l’og ke yib.” (John 17:3) Rogon me yog nni fek e tamilangan’ u murung’agen Jehovah nge Fak e ba t’uf ni nguud maruweliyed e tin ba mil fan ngodad. Ba t’uf rodad e ayuw u daken e meybil nge kan ni thothup ni ngad nanged fan e “tin nib toar fan e thin rok Got.” (1 Korinth 2:10, NW; Luke 11:13) Kub t’uf ni nge pow’iydad “fare tapigpig nib yul’yul’ mab gonop” ngar duruiyed lanin’dad ko ggan nib spiritual ni ma pi’ ngodad “u ngal’an.” (Matthew 24:45) U daken e re kanawo’ ney, me fonownagdad Jehovah ni ngad beeged e Thin rok ni gubin rran, ma ngad uned ko muulung ko Kristiano u gubin ngiyal’, ma ngad uned i wereg fare “thin nib fel’ u murung’agen fare gil’ilungun.” (Matthew 24:14) Gad ra rin’ e pi n’en ni aram rogon, ma aram e gad be gay Jehovah ni Got rodad nib tarunguyey.

18, 19. (a) Mang e thingarda duguliyed u lanin’dad ni ngad rin’ed? (b) Ra ngad pared nib mudugil ni gad be togopuluw ngak fare Moonyan’ ma nguuda gayed Jehovah, ma uw rogon ni yira taw’athnagdad?

¹⁸ Satan e be rin’ urngin e tin rayog u gelngin ni rok ni nge fek e gafgow, nge togopuluw i yib ngak e girdi’ rok Jehovah ma be gagiyegnag ni ngan diliiy lanin’rad ko urngin ban’en. Ma ma guy rogon ni nge kirebnag e gapas ni bay rodad nge tha’ u thildad Got. Dabun ni nguud ululgad ko maruwel rodad ni ngan gay e girdi’ nib yul’yul’ min ayuwegrad ni ngar bad nga ba’ rok Jehovah ko fare magawon ni sum ni murung’agen fare gagiyeg rok ni th’abi tolang u palpalthib. Machane thingarda turguyed u lanin’dad ni ngad pared nib yul’yul’ ngak Jehovah, ma ngad pagan’dad ngak ni nge ayuwegdad rok faanem nib kireb. Ngan pag ni Thin rok Got e ra pow’iydad min par nib pasig ko maruwel u lan e ulung rok ni rayog ni ngan guy, ma rayog ni nge pagan’dad ni gubin ngiyal’ ni bay rodad ni be ayuwegdad.​—Isaiah 41:8-13.

¹⁹ Ere, yibe athapeg ni gad gubin e ngad pared ni ri gad ba togopuluw ngak fare Moonyan’ nge sasalap ni ma ta’, ma gubin ngiyal’ ni ngad gayed Got nib t’uf rodad, i Jehovah, ni mmtrug ni ra ayuwegdad nge par nib ‘mudugil lanin’dad me gelnagdad.’ (1 Peter 5:8-11) Ma aram e ngad ‘pired ni gadad ba t’uf rok Got, u nap’an ni gadad be sonnag e Somol rodad i Jesus Kristus ni nge pi’ e yafas ndariy n’umngin nap’an ngodad ni bochan e ri be runguydad.’​—Jude 21.

Uw Rogon ni Ngam Pi’ e Fulweg?

• Mang fan fare bugithin ni “Moonyan’”, ma uw rogon ni be par fare Mooyan’ nib puluw nga fithingan?

• Uw rogon nib thil Jehovah nge fare Moonyan’ u rogon ni yow ma yaliy e girdi’ nu fayleng?

• Mang fan ni thingari mich fare biyul u wan’ be’ mfini chugur ngak Jehovah?

• Mang e be yip’ fan ni ngan “chugur” ngak Jehovah, ma uw rogon ni nguuda gayed ni gubin ngiyal’?

[Picture on page 15]

Yugu demtrug rogon ni yib ngak Job boch e skeng, ma manang ni ri ma lemnag Jehovah

[Pictures on page 16, 17]

Ngan beeg e Bible ni gubin e rran, min un ko muulung ko Kristiano ni gubin ngiyal’, min un i wereg e machib u fithik’ e yul’yul’ ma ra puguran ngodad ni ri ma lemnagdad Jehovah