Fare Bible E Rayog ni Nge Ayuweg e Mabgol Rom
MABGOL—boch girdi’ e yad be lemnag, ni fare thin e aram ban’en ni be k’aring e felfelan’. Ma boch e girdi’ e be lemnag, ni ireray e n’en ni ma yibnag e kireban’. “Rogon ni gu be thamiy e gowa kug dargow e pumoon rog,” be kireban’ reb i leengiy. “Gu be thamiy ni dakir lemnageg ma gu be tawreng ni gubin ngiyal’.”
Mang e ke k’aring l’agruw ni’ ni kar micheg kafram ni yow ba t’uf rorow ma ngaur runguyew yow ma ke war e t’ufeg rorow? Reb i tapgin e gathi ri yow manang ko mang e pi n’en nib l’ag ko mabgol. “Kad uned ko mabgol ni dan skulnagdad ko som’mon,” ireray e n’en ni yog reb e medical journalist.
Reb e study ni tay fare n’en ni ka nog e The National Marriage Project ngay, ni girdi’ riy e yad ma fal’eg i gay ban’en u Rutgers University u New Jersey, U.S.A. e m’ug riy ni kemus ni buchuw e girdi’ e bay e tamilangan’ rorad ni aram rogon. “Boor e girdi’ ko re study ney ni kar ilalgad ni gallabthir rorad e dariy e felfelan’ ko mabgol rorad ara kar dargad,” ireray e n’en ni yoloy e piin ni director ko fare project. “Ri yad manang e mabgol nib kireb, machane ba maruwaran’rad ko uw rarogon e mabgol nib fel’. Boch e girdi’ e kemus ni ma yog ni fare mabgol nib fel’ e aram e mabgol ‘nib math keru’ ko mabgol ko gallabthir rog.’”
Dariy e magawon ko mabgol ko Kristiano fa? Danga’ ya ba’. Tin riyul’ riy, e boch e Kristiano ko fa bin som’mon e chibog e ba t’uf rorad e fonow nib puluw ni “dabra guyed rogon ni ngar n’aged” e ani mabgol rorad. (1 Korinth 7:27) Ba tamilang, ni l’agruw ni’ ni dawora flontgow e ra i yib e magawon ngak, machane bay e ayuw rodad. Piin ni figirngiy nge leengiy e rayog ni ngar maruweliyed nge fel’ e tha’ u thilrad nfaan yad ra fol ko kenggin e motochiyel u Bible.
Riyul’, ni Bible e gathi urngin e thin riy e fan ko mabgol. Machane, bochan ni En ni Ir e tabolngin ni yarmiy e mabgol e ir e ke thagthagnag, ma rayog ni ngad athapeged ni kenggin e motochiyel riy e ra ayuwegey. U daken Isaiah ni profet, i yog Jehovah Got ni gaar: “I gag Jehovah ni Got rom, ma gag e En ni be fil ngom ni nge fel’ rogom riy, ma gag e En ni be pow’iyem ko kanawo’ ni ir e gin ni susun ni ngam man riy. A faan manga ram fol ko motochiyel rog! Ma gapas rom e ra bod ba lul’, ma ngongol rom nib mat’aw e ra bod e n’ew u maday.”—Isaiah 48:17, 18, New World Translation
Fare t’ufeg ni immoy u thilmew e ani mabgol rom e be war i yan fa? Ga be lemnag ni kam aw ko wup ni aram e mabgol rom e dariy e t’ufeg riy? En ni leengiy ni ke un ko mabgol u lan 26 e duw e ke yog ni gaar: “Fare amith ni kan pirieg ko mit ney e mabgol e mmo’maw’ ni ngan weliy fan. Yugu be par ni gubin ngiyal’-ni ba’.” Dabmu lemnag ni kayog ngan pag e mabgol ni aram rogon ni dariy e felfelan’ riy, ya kab fel’ ni ngam rin’ ban’en ni ngan pithig e magawon? Bin migid e article e ra dag ngak e piin figirngiy nge leengiy ko uw rogon ni nge ayuweg kenggin e motochiyel u Bible e mabgol rorad u reb e kanawo’—ni aram e n’en kar micheged ko mabgol rorad.