Piin Ni Ppin Ni Ma Falfalan’nag Gum’irchaen Jehovah

“I Somol e bayi pi’ puluwom ko tin ni kam rin’; i Somol ni ir Got nu Israel, ni ir e ka mub ni ngam af nga tan pa’ e bayi pi puluwom ni polo’.”​—Ruth 2:12.

1, 2. Uw rogon ni nge fel’ rogodad riy nfaan gad ra fal’eg i lemnag e tin ni rin’ fapi ppin u Bible ni kar falfalan’naged gum’irchaen Jehovah?

BOCHAN e bay madgun Got u wan’ e gali ppin ney ma kar togopuluwgow ngak reb e Farao. Michan’ e k’aring reb e ppin ni ma pi’ ir ni chuway me ta’ e yafas rok nga thatharen e riya’ ni bochan ni nge ayuweg l’agruw e spy nu Israel. Bochan e gonop nge sobutan’ rok reb e ppin me yog rok ni nge ayuweg e yafas rok boor e girdi’ miki taleg be’ ni ke dugliy Jehovah ni nge dabi li’ boch e girdi’ u nap’an ni keb e magawon. Michan’ ngak Jehovah Got nge feni gol e k’aring reb e matin ni kem’ figirngin nge pi’ e chuuw ntomur ko ggan rok ngak reb e profet rok Got. Pi n’eney e kemus ni boch u fithik’ boor e ngongol ko ppin ni ba’ u Bible.

² Ngongol ni dag Jehovah ngak fapi ppin nge taw’ath ni ke pi’ ngorad e be dag ni tin ri ma falfalan’nag Got e aram e pi felngin nib spiritual, ni ireray e pi felngin ni rib ga’ fan ndemtrug ko ir be’ ni pumoon ara be’ ni ppin. Fayleng e chiney, ni kari tiyan’ ko tin ni dariy rogon ko tirok Got ban’en, ma ke mo’maw’ ni ngan m’oneg e tirok Got u wan’uy. Machane rayog ni ngan gel ko re magawon ney, nrogon ni ke dag bokum million e ppin ni bay madgun Got u wan’rad ni yad boor u fithik’ e girdi’ rok Got e ngiyal’ ney. Pi Kristiano nem ni ppin e kar folwokgad ko michan’, nge gonop, nge gol, nge yugu boch e pi felngin nib fel’ ni ke dag fapi ppin ni bay madgun Got u wan’rad nrogon ni weliy Bible. Ma riyul’, ni pi Kristiano ni pumoon e ku yad baadag ni ngar folwokgad ko fapi felngin ni ke dag fapi ppin kakrom. Rogon ni ngan nang ko uw rogon ni ngada rin’ed e re n’ey ni polo’, e ngada tedan’dad nga boch e thin nu Bible ni be weliy murung’agen fapi ppin ni kan weliy aram ko tabolngin.​—Roma 15:4; James 4:8.

Gali Ppin ney ni Kar Togopuluwgow Ngak Reb e Farao

3, 4. (a) Mang fan ni Shiphrah nge Puah e dar folgow rok Farao u nap’an ni ke yog ni ngan li’ urngin e bitir ni pumoon nu Israel ni kefin gargeleg? (b) Uw rogon ni ke taw’athnag Jehovah fa gali yarif ni bochan dar rusgow ma bay madgun Got u wan’row?

³ Boch e pufoloboch ko court u Nuremberg, ni un tay u Germany u tomren e bin II e Mahl ko fayleng, ma boor e girdi’ ni kan guyrad ni kar lied boch e girdi’ kar m’ad ma kar weliyed boch e thin ni fan ni nge mang towey rorad ko oloboch ni kar rin’ed ni lungurad bochan e kar folgad ko tin ni ka nog ngorad. Chiney e ngan taarebnag e pi girdi’ ney ngal’agruw e ppin nu Israel ni yarif, ni Shiphrah nge Puah fithingrow, ni ur parew u Egypt kakrom u nap’an reb e Faarao ni da nog fithingan ma be’ nib kireb rogon ni ma gagiyegnag e girdi’. Ke rus Farao ya be yoor i yan e piin ni Hebrew, me pi’ e motochiyel ngak e gali yarif nem ni ngar guyew rogon ni ngar liew urngin e bitir ni pumoon ni Hebrew ni kabran. U rogon ni rin’ e gali ppin ney fare motochiyel ni rib kireb? “Dar folgow ko fare pilung, mi yow ta’ fapi bitir ni pumoon nge par nib fas.” Mang fan ni de pag e gali ppin nem ni ngar rusgow ko girdi’? Bochan ni “bay madgun e bin riyul’ e Got u wan’row.”​—Exodus 1:15, 17; Genesis 9:6.

⁴ Arrogon, gali ppin nem ni yarif e kar nabgow ngak Jehovah, me m’ug ni ke mang “bang fapi n’en ni ma fek e salthaw nge mith nga fon ko mahl” ngorow, me yororiyrow rok Farao ni kari damumuw. (2 Samuel 22:31; Exodus 1:18-20) Machane gathi kemus u rom e flaab ni ke pi’ Jehovah ngorow. I taw’athnag Shiphrah nge Puah me yog boor e bitir ngorow. Me gagiyegnag ni ngan yoloy fithingrow ko Thin rok ni ke thagthagnag ni fan ko tin bay fini yib e mfen ni bay u ra bieged mini tayfarow, ma fithingan fare Farao e kan pagtalin.​—Exodus 1:21; 1 Samuel 2:30b; Proverbs 10:7.

5. Uw rogon ni dag e piin ni ppin ni Kristiano e ngiyal’ ney e ngongol ni bod rogon Shiphrah nge Puah, ma uw rogon ni taw’athnagrad Jehovah?

⁵ Bay boch e ppin e ngiyal’ ney ni bod Shiphrah nge Puah? Arrogon, ba’! Gubin e duw, ma bokum biyu’ e ppin ni aram rogon ni yad ma machibnag e thin nu Bible ni yad be ayuweg-e yafas ko girdi’ ni dara rusgad ko “thin ni ma yog e pilung” ni dab kun machib, ma aram e kar ted e puf rogon rorad nge yafas rorad nga thathren e riya’. (Hebrews 11:23; Acts 5:28, 29) Bochan e t’ufeg rorad ku Got nge piin buguli yoror rorad, ma pi ppin nem ni dara rusgad e dar paged be’ ni nge talegrad i wereg e thin nib fel ko Gil’ilungun ngak yugu boch e girdi’. Ma arfan ni, boor e ppin ni Kristiano ni kan togopuluw ngorad ma yibe gafgownagrad. (Mark 12:30, 31; 13:9-13) Ni bod Shiphrah nge Puah, ri manang Jehovah e ngongol rorad nib fel’, ma dar rusgad, ra dag e t’ufeg rok ngorad me chaariy e ngochol rorad nge tay nga “babyoren e yafas,” ni faan yad ra guman’ mar pare nib yul’yul’ ndariy n’umngin nap’an.​—Filippi 4:3; Matthew 24:13.

Reb e Ppin ni Ma Pi’ Ir ni Chuway Kafram e Ke Falfalan’nag Gum’irchaen Jehovah

6, 7. (a) Mang e tin manang Rahab u murung’agen Jehovah nge girdi’ rok, ma mang e ke rin’ e re tamilangan’ ney ngak? (b) Uw rogon ni ke tay e Thin Rok Got fan Rahab?

⁶ Lan fare duw ni 1473 B.C.E., ma reb e ppin ni ma pi’ ir ni chuway ni Rahab fithingan e ma par u reb e mach u kanaan ni Jericho fithingan. Ba tamilang, ni Rahab e reb e ppin ni-boor ban’en ni manang. Nap’an nib l’agruw e spy nu Israel ra gayew bang u tabinaw rok, ni ngar par riy me yog rok ni nge weliy ngorow nib tamilang murung’agen rogon ni ke Chuw piyu Israel u Egypt, u fithik’ e maangang ni yugu aram rogon ni ke buch e re n’em ni ke yan 40 e duw! Maku manang ni dawori n’uw nap’an ni ke gel piyu Israel nga l’agruw e pilung nu Amorite ni Sihon nge Og fithingrow. Mu ta’ fanam i yan riy ko mang e ke rin’ e re tamilangan’ nem ngak e cha’nem. I yog ngak fa gali spy, ni gaar: “Gu manang ni Jehovah e ba mudugil ni nge pi’ ngomed fare binaw, . . . ya Jehovah ni Got romed e Got nu tharmiy ngu but’.” (Joshua 2:1, 9-11) Arrogon, tin ni ke nang Rahab u murung’agen Jehovah nge tin ni ke rin’ ni fan ngak piyu Israel e ke bit nga gum’irchaen me mich Got u wan’.​—Roma 10:10.

⁷ Michan’ rok Rahab e ke k’aring ni nge rin’ ban’en. I ayuweg fa gali spy nu Israel “u fithik’ e gapas,” me fol ko thin ni ka rognew ngak u rogon ni nge ayuweg-e yafas rok u nap’an ni ra yib piyu Israel ni ngar chamgad ngak piyu Jericho. (Hebrews 11:31; Joshua 2:18-21) Dariy e maruwar riy ni tin ni rin’ Rahab nbochan e michan’ rok e ke falfalan’nag gum’irchaenn Jehovah, ya kan ni thagthagnag ngak James ni reb e Kristiano ni gachalpen Jesus ni nge ta’ fithingan nge un nga fithingan Abraham, ni fager rok Got, ni fan ni nge folwok e piin Kristiano rorow. I yoloy James ni gaar: “Taareb rogon gathi ku aram rogon Rahab ni ma chuway ngak i mat’aw ngak Got ni bochan e ngongol rok ni faani fek fa gal mol’og nu Israel nga naun rok nib fel’ u wan’ nge ayuwegrow ngar sulow u yugub pa’ e kanawo’?”​—James 2:25, NW.

8. Uw rogon ni ke taw’athnag Jehovah Rahab ni bochan e michan’ rok ma ir be’ ni ma fol?

⁸ I taw’athnag Jehovah Rahab u boor e kanawo’. Reb e ayuweg e yafas rok nge urngin e girdi’ ni yan nga tabinaw rok​—ni aram e, “girdi’ ko chitamangin nge urngin e girdi’ rok” ngar magaygad nib fas u fithik’ e maangang. Me pag nguur pired “u fithik’ piyu Israel,” ni nga un ngongol ngorad ni bod rogon ni yad piyu Israel. (Joshua 2:13; 6:22-25; Leviticus 19:33, 34) Machane ka bay boch e taw’ath ni kan pi’ ngak. Miki taw’athnag Jehovah Rahab me mang reb e ga’ rok Jesus Kristus. Rib pag rogon ni kan dag e t’ufeg-nib yul’yul’ ngak fare pin ni be’ nu Kanaan ni kakrom e ma pigpig-ko liyos!a​—Psalm 130:3, 4.

9. Uw rogon ma lem rok Jehovah ngak Rahab nge boch e ppin ni Kristiano ko fa bin som’mon e chibog e ri be pi’ e athamgil nga laniyan’ boch e ppin e ngiyal’ ney?

⁹ Ni Bod Rahab, boch e ppin ni Kristiano, ni ka nap’an fa bin som’mon e chibog ke mada’ko ngiyal’ ney, e kar pied keru’rad ko ngongol ni darngal ni fan ni nguura falfalan’naged Got. (1 Korinth 6:9-11) Dariy e maruwar riy ni boch i yad e kar ilalgad ko gin’en ni girdi’ ni ma par riy e taareb rogon ko girdi’ nu Kanaan kakrom, ni fare ngongol ni darngal e ba yoor riy maku yima lemnag ni ba yalen. Yugu aram rogon, ma ka ra thiliyeged wo’en e yafas rorad, ya bochan e michan’ rorad nib puluw ko tamilangan’ ko fare Babyor nib thothup. (Roma 10:17) Ere, ku rayog ni ngan weliy murung’agen e pi ppin nem ni “de tamra’ Got ngorad ni nga rogned ni ir e Got rorad.” (Hebrews 11:16) Re n’ey e riyul’ nib ta’ fan!

Kan Taw’athnag ni Bochan e Gonop Rok’

10, 11. Mang magawon u thilin Nabal nge David e ke k’aring Abigail ni nge rin’ ban’en?

¹⁰ Boor e piin ni ppin kakrom e ra daged e gonop rorad nib pag fene fel’, ma bochan e re n’em ma keta’ rad ni boch e girdi’ ni rib ga’ fan ngak e girdi’ rok Jehovah. Bagayad e pi ppin nem e Abigail, ni leengin Nabal ni be’ nib fel’ rogon u Israel nib ga’ e binaw rok. Bochan e gonop rok me ayuweg e pogofan rok boor e girdi’ miki ayuweg David, ni ir e ra mang pilung nu Israel ba ngiyal’, ni nge dabi puog e racha’. Rayog ni ngad bieged murung’agen Abigail ko thin ni kan yoloy ko 1 Samuel chapter 25.

¹¹ Rogon ni tabab fare chep, e David nge pi gachalpen e ur pired ko gin’en nib chuchugur ko fa ulung i gamanman rok Nabal, ngaur ayuweged ni rran nge nep’ ndariy puluwon ni bochan e ri yad ba gol ngak Nabal ni walagrad ni be’ nu Israel. Nap’an ni ke buchuw e ggan rok David, me l’og ragag i pagel nge yan ngak Nabal ni ngar ninged boch e ggan. Chiney e aram e ke mab e kanawo’ ngak Nabal ni nge dag ni be falfalan’ ko n’en ke rin’ David ma nge dag ni be tayfan ya ir e en ke dugliy Jehovah. Machane ba mat’h keru’ ke n’en ni ke rin’ Nabal. U fithik’ e damumuw nib gel, me yog e thin nib gel ni fan ngak David me tuluf fapi pagel nde pi’-ban’en ngorad. Nap’an ni rungaag David, me ulunguy 400 e girdi’ rok ni bay talin e cham rorad ma ranod ni ngar fulweged taban. Ma ke nang Aabigail e n’en ni ke rin’ figirngin nib kireb me papey ni nge rin’ ban’en u fithik’ e gonop ni fan ni nge gapasnag e damumuw rok David ni aram e ke pi’ e ggan u fithik’ e gol ngak ni boor. Me ir rok e yan ngak David.​—Verses 2-20.

12, 13. (a) Uw rogon ni micheg Abigail ni ba gonop mab yul’yul’ ku Jehovah nge ngak e en ni ke dugliy? (b) Mang e ke rin’ Abigail u nap’an ni sul nga tabinaw, ma mang e ke buch rok?

¹² Nap’an ni mada’nag Abigail David, ma n’en ni rin’ u fithik’ e sobutan’ ni be wenig ni ngan runguy e be m’ug riy ni ri be tayfan e en ke dugliy Jehovah. “Ke mudugil ni bayi toy Jehovah reb e naun nra par ni manemus ni fan ko somol rog, ya bochan pi mahl rok Jehovah e ir n’en be cham e somol rog nbochan,” i yog ni aram rogon, me ulul ngay ni gaaar ni bayi dugliy Jehovah David ni nge gagiyegnag piyu Israel. (Verses 28-30) Maku re ngiyal’ i n’em, ma de rus Abigail ni nge yog ngak David e tafinay rok ni baadag ni nge fulweg taban, e kireb e faanra dabni fal’eg i lemnag, ma ra aw ko denen. (Verses 26, 31) Bochan ke dag Abigail e sobutan’, nge tayfan nib gel, nge lem nib tamilang ngak David me sul laniyan’ ngak. Me fulweg ni gaar: “Ngan pining e magar ngak Jehovah ni ir e Got rok piyu Israel, ni ke l’ogem e daba’ kamub mu guyeg! Ma ngan pining e magar nbochan e gonop rom, ma ngan pining e magar ngom ya gur e kam talegneg e daba’ ni dabgu puog e racha’.”​—Verses 32, 33.

¹³ Nap’an ni ke sul Abigail ke taw nga tabinaw rok, ma de rus ni nge yog ngak figirngin e taw’ath ni ke pi’ ngak David. Machane, nap’an ni ke pirieg ma “rib chingaw.” Ere ke son nge mada’ko ngiyal’ ni ke tar me weliy ngak. Mang e ke rin’ Nabal? Kari gin ngay meb reb e m’ar ngak ni sana ba mit e m’ar ni yaf. Ragag e rran nga tomuren me yim’ u pa’ Got. Nap’an ni ke rungaag David ni kem’ Nabal, me yog ngak Abigail ni baadag ni ngar mabgolgow, nib tamilang ni ir be’ ni rib falan’ ngak ma ri ma tayfan nib gel. Ma ke fanay Abigail e thin ni ke yog David.​—Verses 34-42.

Rayog ni Ngam Bod Abigail?

14. Mang e pi felngin Abigail ni ri gad baadag ni nge gel i muruwliy rodad?

¹⁴ Yugu demtrug ko gur reb e pumoon ara gur e ppin, bay boch felngin Abigail ni ri ga baadag ni ngam maruweliy nib elmerin nge yog ngom? Sana ga baadag ni ngam ngongol u fithik’ e gonop u nap’an ni ra yib e magawon. Ara ga baadag ni ngam non nib fel’ rogon ma dab mu damumuw u nap’an n ra damumuw boch e girdi’ u toobem nib gel. Faanra aram rogon, ma mang fan ni dabmu meybil ngak Jehovah ni nge ayuwegem riy? Be micheg ni nge pi’ e gonop, nge gelngin i nang fan ban’en, nge gelngin laniyan’ ngak urngin e girdi’ ni “ma ning ban’en ngak u fithik’ e t’ufeg.”​—James 1:5, 6; Proverbs 2:1-6, 10, 11.

15. U tan e mang magawon ko piin ni ppin ni Kristiano e rib ga’ fan ni ngar daged riy fapi felngin ni dag Abigail?

¹⁵ Pi felngin ney nib fel’ e ri baga’ fan ngak reb e ppin ni figirngin e de michan’ ma gathi ri ma tiyan’ ko kenggin e motochiyel u Bible. Sana ir be’ ni ta muun rrum. Yibe athapeg, ni ra thiliyeg e pi pumoon nem e ngongol rorad. Boor e pumoon ni kar thilgad​—e baga’ ni bochan e ngongol nib sumunguy, nge tayfan nib gel, nge ngongol nib machalbog ni ma rin’ pi leengirad.​—1 Peter 3:1, 2, 4.

16. Yugu demtrug e magawon ni bay u tabinaw rok reb e kristiano ni ppin, ma uw rogon u thilrow Jehovah ni nge nib tuf rok e tha ko urngin ban’en?

¹⁶ Yugu demtrug e magawon u tabinaw ma susun ni ngam kadan’um riy, ma dabmu pagtalin ni gubin ngiyal’ ni ba’ Jehovah ni be pi’ e ayuw ngom. (1 Peter 3:12) Ere ngam mu athamgil ni ngam gelnagem ko tirok Got. Ngam yibilay ni nge yog ngom e gonop nge gum’ircha’ nib mocha’. Arrogon, ngan chuchugur ku Jehovah u daken e fol Bible ni gubin ngiyal’, nge meybil, nge ngan fal’eg i lemnag ban’en, nge ngan chag ngak e pi walag ni Kristiano. T’ufeg rok Abigail ngak Got nge lem rok u murung’agen e tapigpig rok Got ni kan dugliy e de kireb ni bochan e lem ko pumoon rok ni de puluw. I ngongol ni rogon nib puluw ko kenggin e motochiyel nib mat’aw. Kura ba tabinaw ni en figirngiy e reb e tapigpig rok Got nib fel’ rogon ni ma rin’ ban’en, maku faren leengiy ni Kristiano e manang nib t’uf rok’ ni ir e nga i ma maruweliy ni nge gel ko tirok Got. Riyul’, ni pumoon rok e bay e maruwel rok nib puluw ko Thin ni yog e Bible ni nge ayuweg leengin ko tirok Got nge tin nib t’uf nga downgin, machane ra ngan sumarnag, ma thingari maruweliy ni nge “yog e yafas ngak ni bay madgun Got u wan’.”​—Filippi 2:12; 1 Timothy 5:8.

Ke Yog Ngak Reb e “Taw’ath ko Profet”

17, 18. (a) Fare pin nu Zarephath ni kem’ figirngin e keb ngak e mang skeng ko michan’ nib mo’maw’? (b) Mang e ke rin’ fare pin ni kem’ e pumoon rok ko n’en ni ke wenignag Elijah ngak, ma uw rogon ni ke taw’athnag Jehovah?

¹⁷ Rogon ni i ayuweg Jehovah reb e ppin ni kem’ figirngin u nap’an Elijah ni fare profet e be dag ni rib ga’ fan u wan’ e piin ni ma ayuweg e liyor nib riyul’ ni yad ma pi’ e yafas rorad nge boch ban’en rorad. Bochan ni de aw e n’uw nib n’uw nap’an u nap’an Elijah, ma boor e girdi’ ni kar gafgowgad, nib muun ngay reb e ppin ni kem’ figirngin nge fak nib pagel ni yow ma par u Zarephath. Nap’an ni kari mus ni ka napan taab yay e abich e ggan rorow ni kaba’, me taw be’ ni nge guyrow​—ni aram fare profet ni Elijah. Me ning ban’en ni rib mo’maw’. Yugu aram rogon ni manang ni ke gafugou fare pin, me wenig ni nge fal’eg “reb e flowa nib achichig mab tululbuy” nge yog ngak, ni nge fanay e chuuw ni tomur ko gapgep nge merikengko rok. Machane me ulul ngay ni gaar: “Ya baaray e n’en ke yog Jehovah fare Got nu Israel ni ke gaar, ‘Fare rume’ nib ga’ ko falowa e dabi m’ay e flowa riy, ma fa re rume’ ko gapgep nib achig e dabi m’ay e gapgep riy nge taw ko fare rran ni nge pii Jehovah map’ nga but e n’uw nge.’”​—1 Kings 17:8-14, NW.

¹⁸ Faan mang e gur mang e ga ra rin’ nbochan e n’en ni kan ning ngom nib mo’maw’? Fare pin nu Zarephath ni kem’ e pumoon rok, e rib tamilang ni ke poy Elijah ni ir fare profet rok Jehovah, “me yan i rin’ e tin ke yog Elijah.” Mang e ke rin’ Jehovah ni bochan e baadag ni ma ayuweg be’ ni keb ngak? U daken e maangang me pi’ e ggan ngak fare pin, nge fak ni pagel, nge Elijah u nap’an ni daki aw e n’uw. (1 Kings 17:15, 16) Arrogon, i pi’ Jehovah reb e “taw’ath ko profet” ngak fare pin ni kem’ figingin ni be’ u Zarepath ni yugu aram rogon ni gathi ir be’ nu Israel. (Matthew 10:41) Maku ani Fak Got e ke ta’ fan e re ppin ney ni kem’ e pumoon rok u nap’an ni faani tay ni nge fol e girdi’ rok ni de michan’rad ni girdi’ ko binaw rok nu Nazareth.​—Luke 4:24-26.

19. Mang boch e kanawo’ ni piin ni ppin ni Kristiano e ngiyal’ ney e kar daged e ngongol ni dag fare pin nu Zarephath ni kem’ e pumoon rok, ma uw rogon e pi ppin ney u wan’ Jehovah?

¹⁹ Ngiyal’ ney, ma boor e ppin ni Kristiano e be dag e lem ni taareb rogon ko ngongol rok fare pin ni kem’ figirngin nu Zarephath. Ni bod ni, gubin e wik, ma pi walag ni ppin ni yad ba gol​—e boor i yad e ba gafgow ma bay e tabinaw rorad ni nguura ayuweged—​e ku yad ma ayuweg e piin piilal ni ma lekag e ulung nge pi leengirad. Boch e girdi’ e ma pi’ e ggan ngak e piin pioneer ko binaw rorad, nge piin nib gafgow, ara u reb e kanawo’ e yad ma pi’rad nge boch e chugum rorad ni fan ni ngar ayuweged e maruwel ni fan ko fare Gil’ilungun. (Luke 21:4) Gur be naab Jehovah nga gelngin e pi maruwel nem nge ayuw fa? Dariy e maruwar riy! “Got e gathi ba laniyan’. Gathi bayi pagtalin e maruwel ni kam ngongoliyed, ara rogon nib t’uf romed ni kam daged ni bochan ayuw ni kam pied ma ki gimed be pi’ ngak e piin ni gimed ni girdien Kristus.”​—Hebrews 6:10.

20. Mang e yira weliy ko bin migid e article?

²⁰ Nap’an e bin som’mon e chibog, ma boor e ppin ni bay madgun Got-u wan’rad e kar taw’athgad ni kar pigpiggad ngak Jesus nge fapi apostal rok. U lan e bin migid e article, ma gad ra weliy ko uw rogon ni ke falfalan’nag fapi ppin gum’irchaen Jehovah, ma gad ra weliy e tin ni rin’ e pi ppin ko ngiyal’-ney ni kar pigpiggad ku Jehovah u polo’ i gum’ircharad, ni mus ko ngiyal’ ni keb e magawon nib mo’maw’ ngorad.

[Footnote]

Ngan Sul Nga daken

• Uw rogon ni rin’ e pi ppin ni baaray ban’en ni ra falfalan’naged gum’irchaen Jehovah?

• Shiphrah nge Puah

• Rahab

• Abigail

• Fare pin nu Zarephath ni kem’ figirngin

• Ra ngan fal’eg i lemnag e tin ni rin’ e pi ppin ney ma uw rogon ni nge ayuwegdad ni be’ nge be’? Mu weliy.

[Pictures on page 9]

Boor e ppin nib yul’yul’ e kar pigpiggad ku Got nyugu demtrug e “n’en ni be yog e pilung”

[Picture on page 10]

Mang fan ni Rahab e ba fel’ wokon ni nge fol e piin bay e michan’ rorad riy?

[Picture on page 10]

Mang e pi felngin ni dag Abigail ni ga baadag ni ngam folwok riy?

[Picture on page 12]

Boor e ppin ni Kristiano e ngiyal’ ney ni kar daged e ngongol ni dag fare pin nu Zarephath ni kem’ figirngin