Jehovah E Rib Ni Ma Dag E T’ufeg Nib Yul’yul’

“Jehovah e ri . . . ma dag e t’ufeg nib yul’yul’.”​—PSALM 145:8, NW.

1. T’ufeg rok Got e ma dag ngak mini’?

“GOT e t’ufeg.” (1 John 4:8) Pi thin nem ni ma fal’eg lanin’uy e be dag ni ma gagiyeg Jehovah u daken e t’ufeg. Ya, mus ko girdi’ ni der ma fol rok ma ku ma fel’ rogon ko yal’ nge n’uw ni ma pi’ u fithik’ e t’ufeg! (Matthew 5:44, 45) Bochan girdi’ nu fayleng ni urngin e yad ba t’uf rok Got, mus ko piin toogor rok ma rayog ni ngar kalgadngan’rad, ngar chelgad ngak, me yog ngorad e yafas ni manemus. (John 3:16) Machane, dabi n’uw nap’an, me Jehovah e ra gothey e piin nib kireb ni dabra kalgadngan’rad ma girdi’ nib t’uf Got rorad e rayog ni nge yog ngorad e yafas ni manemus u lan fa bin nib biech e fayleng nib mat’aw.​—Psalm 37:9-11, 29; 2 Peter 3:13.

2. Mit i mang e t’ufeg nib thil e ma dag Jehovah ngak e piin ni kara ognaged yad ngak?

² Ma dag Jehovah e t’ufeg ni fan ko piin ma liyor ngak nib riyul’ u kanawo’ ni bay fan, ma dariy n’umngin nap’an. Fan e re t’ufeg ney e aram fare bugithin ni Hebrew ni kan thiliyeg ni “t’ufeg nib yul’yul’.” David ni pilung nu Israel kakrom e kari tayfan e t’ufeg rok Got nib yul’yul’. Bochan e tin ni ke buch rok ma ke fal’eg i lemnag ko u rogon ni ke ayuweg Got yugu boch e girdi’, me yon’ David e tang u fithik’ e pagan’ ni gaar: “Jehovah e ri . . . ma dag e t’ufeg rok nib yul’yul’.”​—Psalm 145:8, NW.

Rogon ni Ngan Nang e Piin nib Yul’yul Ku Got

3, 4. (a) Uw rogon ma Psalm 145 e ra ayuwegdad ngad poyed e girdi’ rok Jehovah nib yul’yul’? (b) Uw rogon ma girdi’ rok Got nib yul’yul’ e ra “pining e sorok’ ngak?

³ Rogon murung’agen Jehovah Got, Hannah ni chitingin Samuel ni profet e yog ni gaar: “Rifrifen ay e girdi’ rok nib yul’yul’ e ma matanagiy.” (1 Samuel 2:9) Mini e “girdi’ rok nib yul’yul’”? Ke pi’ David e fulweg riy. Tomren ni ke tolangnag e pi felngin Jehovah ni yira ngat ngay, me yog ni gaar: “Girdi’ rom nib yul’yul’ e ra pining e sorok ngom.” (Psalm 145:10, NW) Sana ga ra lemnag ko uw rogon ni nge pining e girdi’ e sorok ngak Got. Yad ra rin’ ni aram e nga rogned e sorok ngak ma ura weliyed e thin nib fel’ u murung’agen.

⁴ Piin nib yul’yul’ ku Jehovah e rayog ni ngan nang ni aram e girdi’ ni ma pining e sorok ngak. Nap’an ni yad be un ko mur nge muulung ko Kristiano, mang e yad ma weliy murung’agen? Riyul’ ni, yad ma weliy murung’agen Gil’ilungun Jehovah! Pi tapigpig rok Got nib yul’yul’ e yad be lemnag ni bod rogon David, ni yon’ e tang ni gaar: “Bay u ra weliyed murung’agen e felfelan’ ko gagiyeg rom [Jehovah], ma bay ra weliyed murung’agen gelngim.”​—Psalm 145:11, NW.

5. Uw rogon ni ngad nanged ni ma motoyil Jehovah u nap’an ni girdi’ rok nib yul’yul’ e ra pining e sorok ngak?

⁵ Ma motoyil Jehovah u nap’an ni girdi’ rok nib yul’yul’ ngak e be pining e sorok ngak? Arrogon, ma motoyil ko mang e yad be yog. U lan reb e yiiy murung’agen e liyor nib riyul’ ko ngiyal’ ney, I yoloy Malaki ni gaar: “Ma girdi’ ni bay madgun Jehovah u wan’rad e ur welthingad rorad, mi i motoyil Jehovah ngorad me rung’ag e thin ni yad be yog. Bay ba ke babyor rok ni kan yoloy ngay murung’agen e piin ni bay madgun Somol u wan’rad ma yad be lemnag fithingan.” (Malaki 3:16, NW) Ra felfelan’ Jehovah u nap’an ni girdi’ rok nib yul’yul’ e ra pining e sorok ngak, ma ri dabi pagtalrad.

6. Mang maruwel e ra ayuwegdad ni ngada poyed e girdi’ rok Got nib yul’yul’?

⁶ Maku rayog ni ngan nang e piin nib yul’yul’ ku Jehovah ya bochan dara rusgad ma yad ma gay e kanawo’ ni ngar nonad ngak e girdi’ riy ni gathi tapigpig ko bin riyul’ e Got. Riyul’, girdi’ rok Got nib yul’yul’ e ra maruweliy ni “nge nang urngin e girdi’ feni sorok ko tin ni ke rin’, nge gagiyeg ni be tay.” (Psalm 145:12) Ga ma gay e tayim ni ngam non ngak e en ni gathi girdien e ulung rodad u murung’agen e gagiyeg rok Jehovah fa? De taareb rogon ko am ko girdi’, ni dabki n’uw nap’an ma ra m’ay, ma gagiyeg rok Got e ra par ni manemus. (1 Timothy 1:17) Girdi’ e ngar gurgurgad ngar nanged murung’agen e gagiyeg rok Jehovah ni manemus ma ngar pared u tanggin ni be ayuwegrad. I yon’ David e tang ni gaar, Gagiyeg rom e bay i par ndariy n’umngin nap’an, ma bay um par ni gur e pilung ndariy n’umngin nap’an.”​—Psalm 145:13.

7, 8. Mang e ke buch ko duw ni 1914, ma mang e mich riy ni Got e be gagiyeg e chiney u daken fare Gil’ilungun Fak?

⁷ Ka nap’an e duw ni 1914, ma kan uneg boch i fan ni ngan weliy murung’agen e gagiyeg rok Jehovah. Re duw nem, i sunmiy Got fare Gil’ilungun u tharmiy ni Jesus Kristus ni Fak David e nge mang Pilung riy. Ere i lebuguy Jehovah e tin ke micheg ni gagiyeg rok David e bay ni sunmiy me par nib mudugil ni dariy n’umngin nap’an.​—2 Samuel 7:12, 13; Luke 1:32, 33.

⁸ Tin be micheg ni Jehovah e be gagiyegnag e chiney u daken Gil’ilungun Fak, i Jesus Kristus, e kan guy ko pow ni ba’ Jesus ni be lebuguy e chiney. Bang ko re pow nem ni rib fel’ e aram fare maruwel ni i yiiynag Jesus ni nge rin’ urngin e girdi’ nib yul’yul ku Got ko ngiyal’ ni yog ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:3-14) Bochan piin nib yulyul’ ku Got e yad ba pasig ni ngar lebuguyed e re yiiy nem, ke pag nel’ million i girdi’ ni pumoon, nge ppin, nge bitir ni yad be un ko re maruwel ney ndab kun sulod daken biyay. Dabki n’uw nap’an ma ra m’ay urngin e piin tatogopuluw ko Gil’ilungun Jehovah.​—Revelation 11:15, 18.

Nge Fel’rogoy ko Gagiyeg Rok Jehovah ni Th’abi Tolang

9, 10. Mang e bathil u thilin Jehovah nge fapi pilung ni girdi’?

⁹ Faanra gadad e Kristiano ni kad ogniged e yafas rodad, ma tha’ u thildad Jehovah ni Somol ni Th’abi Tolang e ra yognag boor e flaab ngodad. (Psalm 71:5; 116:12) Bochan bay madgun Got u wan’dad ma gad ma rin e tin nib mat’aw, ma aram kada fel’gad u wan’ ma gad ba chuchugur ngak ko tirok Got. (Acts 10:34, 35; James 4:8) Tin nib thil riy, e fapi pilung nib girdi’ e baga’ ni yima guyrad ni yad be chag ngak e girdi’, ni bod e pi ga’ ko salthaw, nge girdien e siobay ni rib fel’ rogorad, ara piin nib gilbuguwrad ko gosgos nge entertainment. Rogon ni yog ko reb e shimbung nu Africa ni Sowetan, reb e girdien e am nib tolang e liw rok e yog u murung’agen e pi binaw nib gafgow ko nam rok ni gaar: “Gu manang ko mang fan ni oren i gadad e dubun ni nga darod ko pi binaw nem. Ya bochan gad baadag ni ngada paged talin ni ka be par ni bay e magawon ni aram rogon. Ra magawonnag e nangan’ rodad ma gad ra tamra’ ya bochan gad ma kol e yap ko karo nib tolang puluwon.”

¹⁰ Riyul’ ni, boch e pilung nib girdi’ e ri yad ma lemnag rogon ni nge fel’ rogon e girdi’ rorad. Machane mus ko en th’abi tolang e liw rok u fithik’rad ma gathi ri manang salpen e girdi’ rok. Riyul’, ngada fithed ni ra gaargad: Bay e pilung ni ri ma lemnag rarogon urngin e girdi’ rok ma ma yib papey ni nge ayuweg e girdi’ rok ni be’ nge be’ u nap’an ni keb e magawon ngak? Arrogon, ba’. I yoloy David ni gaar: “Jehovah e be ayuweg urngin e piin ni kar dol’gad kar awgad nga but’, ma be suwonnag urngin e piin ni kar dol’gad.”​—Psalm 145:14, NW.

11. Mang skeng e ra yib ngak e girdi’ rok Got nib yul’yul’, ma mang ayuw e bay rorad?

¹¹ Boor e skeng nge riya’ e ra buch rok e piin nib yul’yul’ ku Jehovah Got ni bochan dawora flontgad nge bochan yad be par u fayleng ni “faen nib kireb” e be gagiyegnag. (1 John 5:19; Psalm 34:19) Ma yib e togopupulw nge gafgow ngak e piin Kristiano. Boch e kar gafgowgad nbochan e m’ar nib mo’maw’ ni nge gol ara kem’ be’ nib t’uf rok. Yu ngiyal’, bochan ke oloboch e piin nib yul’yul’ ku Jehovah e kar ‘dolgad’ ya ke mulan’rad. Machane, demtrug e skeng ni ngeb ngorad, ba’ Jehovah ni gubin ngiyal’ e ba m’agan ngay ni nge fal’eg laniyan’uy ma ma pi’ gelngin ngorad ko tirok Got ni be’ nge be’. Jesus Kristus ni Pilung e kub t’uf e girdi’ rok nib yul’yul’ ko tirok.​—Psalm 72:12-14.

Ggan ni Rib Fel’ u Ngal’an

12, 13. Uw feni fel’ rogon ni ma pi’ Jehovah e tin nib t’uf ko “urngin ban’en nib fas”?

¹² Bochan e t’ufeg rok nib yul’yul’, ma ke pi’ Jehovah urngin ban’en nib t’uf rok e pi tapigpig rok. Ba muun ngay ni ngan pi’ e ggan nge gamaneg e tin nib t’uf rorad ko ggan nra ayuweg fithik’ i dowrad. David ni Pilung e yoloy ni gaar: “Yad urngin e yad be sap ngom ni ke l’agan’rad ngom [Jehovah], ma ga ma pi’ e ggan rorad u ngal’an. Kam pithig paam ma ga be pi’ nge gaman e tin baadag urngin ban’en ni bay e yafas rok.” (Psalm 145:15, 16, NW) Mus u nap’an ni keb e riya’, ma rayog ni nge gagiyegnag Jehovah nge yog ngorad e “ggan ni fan nga reb e rran nge reb.”​—Luke 11:3; 12:29, 30.

¹³ I yog David ni “urngin ban’en nib fas” e ra gaman e tin nib t’uf rorad. Ma ba muun ngay e pi gamanman. Faanra gathi bochan ri boor e woldug u fayleng ngu maday, ma tin nib fas u fithik’ e ran, pi arche’ nge pi gamanman u but’ e dariy e oxygen ngar pogofangad riy ara ggan ni ngar ked. (Psalm 104:14) Machane, ke gagiyegnag Jehovah ni urngin ban’en nib t’uf rorad e ra gaman.

14, 15. Uw rogon ni yima pi’ e ggan nib spiritual e ngiyal’ ney?

¹⁴ De taareb rogon ko pi gamanman, ma girdi’ e ba t’uf rorad e tirok Got ban’en. (Matthew 5:3) Kari gamaneg Jehovah e tin nib t’uf rok e girdi’ rok nib yul’yul’ ni yira ngat ngay! Nap’an ni ke chuchugur ni nge yim’, i micheg Jesus ni nge pi’ ngak “fare tapigpig nib yul’yul’ mab gonop” e ggan nib spiritual ko “ngiyal’ nib puluw.” (Matthew 24:45) Tin ni ka ba’ ko fa 144,000 e girdi’ ni kan dugliyrad e yad bang ko re ulung nem e ngiyal’ ney. Riyul’ nu dakenrad e ma pi’ Jehovah e ggan nib spiritual riy ni boor.

¹⁵ Ni bod ni, oren e girdi’ rok Jehovah e ngiyal’ ney e kar taw’athgad ko Bible ni kan thiliyeg ko thin rorad. Fare Bible ni New World Translation of the Holy Scriptures e reb e flaab ni yira ngat ngay! Maku, bokum milyon e babyor ni yima fanay ko fol Bible e ka yima ngongliy ko thin ni ke pag 300 mit e thin. Urngin e pi ggan nib spiritual ney e reb e taw’ath ko piin ma liyor ku Got nib riyul’ u ga’ngin yang e fayleng. Mini’ e bay rogon ni ngan pining e sorok ni bochan? Jehovah Got. Bochan e t’ufeg rok nib yul’yul’, i gagiyegnag ni piin tapigpig e rayog rorad ni ngar pied e “ggan ko ngiyal’ nib puluw.” U daken e pi n’en ney, “tin ni baadag urngin ban’en nib fas” u lan fare paradis nib spiritual e ngiyal’ ney e yira gamaneg. Ma ri ba felfelan’ e pi tapigpig rok Jehovah ko athap rorad ni ngara guyed fare fayleng ni ngan thiliyeg nge mang paradis nib riyul’!​—Luke 23:42, 43.

16, 17. (a) Mang e ggan nib spiritual ni ba’ ni keb ko ba ngiyal’ nib puluw? (b) Uw rogon ni be dag fare Psalm 145 e n’en ni be lemnag e girdi’ rok Got nib yul’yul’ u murung’agen fare kenggin e magawon ara issue ni ke k’aring Satan?

¹⁶ Mu lemnag reb e ggan nib spiritual nrib fel’ ni kan pi’ ko ngiyal’ nib puluw. Nap’an e duw ni 1939, me tabab e Mahl ko Fayleng ni bin II u Europe. Mu lan e re duw nem, ma fare The Watchtower ni November 1 immoy reb e article riy ni bay e kenggin ni “Neutrality.” Ma bochan e thin riy ni rib tamilang, Pi Mich Rok Jehovah u ga’ngin yang u fayleng e kar guyed nib t’uf ni ri nguur pared u mathilin ko tin ni be rin’ e pi nam ni yad be mahl. Bochan e re n’em ma ke damumuw e gali am u l’agruw raba’ ko re mahl nem ni nel’ e duw n’umngin nap’an. Machane, yugu aram rogon ni kan talegrad min togopuluw ngorad, piin nib yul’yul’ ku Got e kar ululgad i machibnag fare thin nib fel’ ko fare Gil’ilungun. Ka nap’an 1939 nge mada’ ko 1946, ma kar taw’athgad ke mun 157 pasent ngorad ni yira ngat ngay. Maku, yul’yul’ ni kar daged u nap’an e re mahl nem e i par ni be ayuweg e girdi’ ngar nanged e bin riyul’ e teliw.​—Isaiah 2:2-4.

¹⁷ Fare ggan nib spiritual ni ma pi’ Jehovah e gathi kemus ni ma yib ko tayim nib puluw ya ku ri yima gamaneg e tin nib t’uf. Nap’an ni pi nam e kar chamgad nib gel u nap’an e Mahl ko Fayleng ni bin II, ma girdi’ rok Jehovah e kan ayuwegrad ni nguur tedanrad ko n’en ni kab ga’ fan ko yafas rorad. I ayuwegrad Jehovah ni ngar nanged fan ni kenggin e magawon ara issue, e ba muun ngay e palpalthib ni polo’, ni bay rogon ko gagiyeg rok Jehovah ni th’abi tolang. Rib fel’ u wan’dad ni kad nanged ni bochan e yul’yul’ rok e Pi Mich Rok Jehovah ma yad ni be’ nge be’ e kar ayuweged boch e girdi’ ni nge tamilang e gagiyeg rok ni th’abi tolang u wan’rad ma kar daged ni fare Moonyan’ e ma lifith ligin! (Proverbs 27:11) De taab rogon ku Satan, ni ma t’ar e thin nga daken Jehovah nge rogon ni ma gagiyeg, ma piin nib yul’yul’ ku Jehovah e yad be ulul i wereg e thin ni gaar: “Jehovah e ba mat’aw ko urngin e kanawo’ rok.”​—Psalm 145:17, NW.

18. Mang ggan nib spiritual ni kan wereg ni dawori n’uw nap’an kafram nib puluw ko tayim ma ri ma felfelan’nagey?

¹⁸ Reb e ggan nib spiritual nib puluw ko tayim ma rib fel’ u wan’uy e fare babyor ni Draw Close to Jehovah, ni kan wereg u nap’an e pi District Convention ni “Zealous Kingdom Proclaimers” fithingan ni kan ta’ u ga’ngin yang e fayleng ko duw ni 2002/03. Re babyor ney, ni fare “tapigpig nib yul’yul’” e ke ngongliy ma Pi Mich Rok Jehovah e kar yoloyed, e ri be weliy murung’agen e pi felngin Jehovah Got ni yira ngat ngay nib muun ngay e pi n’en ni bay ko Psalm 145. Re babyor ney nib fel’ e ba mudugil ni ra ayuweg e piin nib yul’yul’ ku Got ngara chuchugurgad ngak.

Ngiyal’ ni Ngan Chuchugur Boch Ngak Jehovah

19. Mang ba ngiyal’ nib ga’ fan e ke chuchugur, ma uw rogon ni ngad sabaliyed?

¹⁹ Ba ngiyal’ nib ga’ fan ni ngan pithig fare magawon fa issue murung’agen e gagiyeg rok Jehovah Got ni th’abi tolang e ke chuchugur. Rogon ni yog ko Ezekiel guruy ni 38, ma ra gagiyegnag ni polo’ ni ir fare “Gog ko fare binaw ni Magog.” Ba muun ngay ni ngan cham ngak e girdi’ rok Jehovah u ga’ngin yang e fayleng. Ireray ba ngiyal’ ni ngari guy Satan rogon ni nge kirebnag e yul’yul’ rok e girdi’ nib yul’yul’ ku Got. Ireray e tayim ni pi tapigpig rok Jehovah e rib t’uf rorad ni ngar pininged Got nib gel, ngar yorgad ngak ni nge ayuwegrad. Gur ra aw nib m’ay fan madgun Got u wan’rad nge t’ufeg rorad ngak? Danga’, ya fare Psalm 145 e be yog ni gaar: “Ma ba chugur ngak urngin e piin ni yad ma non ngak, ni yad be non ngak u fithik’ e yul’yul’. Piin ni bay madgun u wan’rad e ma pi’ ngorad e tin ni nge yog ngorad; ma rung’ag e tin ni yad ma wenignag ngak me ayuwegrad. Ma yoror rok urngin e piin nib t’uf rorad, machane ra thang e pogofan rok urngin e piin nib kireb.”​—Psalm 145:18-20.

20. Uw rogon ma fapi thin ko Psalm 145:18-20 e ra m’ug nib riyul’ boch nga ram?

²⁰ Rib fel’ ni ngan chuchugur ngak Jehovah nge gelngin ni ma ayuwegey u nap’an ni ra thang urngin e piin nib kireb! U nap’an e re ngiyal’ i n’en nib ga’ fan ni ke chuchugur, ra motoyil Jehovah ni kemus ni goo piin ni “yad ma non ngak u fithik’ e yul’yul’.” Ba mudugil ni dabi motoyil ngak e piin ni de yul’yul’. Thin rok Got e be dag nib tamilang ni ra pining e piin nib kireb fithingan Got u bang ko tomur ni dakuriy e tayim ma ra aw nib m’ay fan.​—Proverbs 1:28, 29; Mikah 3:4; Luke 13:24, 25.

21. Uw rogon ni nge dag e piin nib yul’yul’ ku Jehovah ni yad ba felfelan’ ni ngar fanayed fithingan Got?

²¹ Chiney e ba t’uf ni nge gurgur e piin ni bay madgun Jehovah u wan’rad ngar “pininged Got u fithik’ e yul’yul’.” Piin nib yul’yul ngak e yad ba felfelan’ ni ngar fanayed fithingan ko meybil rorad nge nap’an ni ra pi’ e fulweg ko muulung rorad. Yad ma fanay fithingan Got u nap’an e sabathin rorad ni goo yad. Ma dar rusgad ni yad ma machibnag fithingan Jehovah u nap’an ni yad ra machibnag e girdi’.​—Roma 10:10, 13-15.

22. Mang fan nib ga’ fan ni nguun togopuluw ko lem nu fayleng nge tin ni yad baadag?

²² Rogon ni ngii fel’ rogon e tha’ u thildad Jehovah nib chuchugur, e ku baga’ fan ni nguuda ululgad ngad togopuluwgad ko pi n’en ni ra kirebnag lanin’dad ni bod chogowen e chugum, nge fafel ara entertainment nib kireb, nge lem ni der ma n’ag fan e kireb ko yugu boch e girdi’, ara ma dariy fannag e piin nib gafgow. (1 John 2:15-17; 3:15-17) Ra dabni yal’uweg, e re lem ney nge ngongol ma ra aw ni denen nib ubchiya ma tomur riy ma ra n’agrad Jehovah. (1 John 2:1, 2; 3:6) Ba’ e gonop riy ni ngan lemnag ni ra ulul Jehovah i dag ngodad e t’ufeg rok nib yul’yul’ ni kemus nfaan gad ra par nib yul’yul’ ngak.​—2 Samuel 22:26.

23. Mang e tin nib fel’ ni bay yib ngak urngin e girdi’ rok Got nib yul’yul’?

²³ Ere nguuda tedan’dad ko tin nib fel’ ni bay yib ngak e piin nib yul’yul ku Jehovah. Gad ra rin’ e n’en ni aram rogon, rayog ni nge yog e athap ngodad ni rib fel’ ni gad ra mang bang ko piin ni ma tolangnag, ma ma pining e sorok ngak Jehovah u “reb e rran ni polo’” ma “dariy n’umngin nap’an.” (Psalm 145:1, 2) Ere yibe athapeg ni nguud ‘pared ni gadad ba t’uf rok Got ni gad be lemnag e yafas ni dariy n’umngin nap’an.’ (Jude 20, 21) Gadad be par ni ke fel’ rogodad ko pi felngin e Chitamangidad u tharmiy ni rib fel’, ma ba muun ngay e t’ufeg nib yul’yul’ ni dag ngak e piin nib t’uf Got rorad, e yibe athapeg ni gad ra thamiy e n’en ni ke yog David ko bin tomur ko Psalm 145 ni gaar: “Bay ug pining e sorok ngak Somol ni gubin ngiyal’; urngin e tin ni ke sunmeg e nguur pininged e sorok nga fithingan nib thothup ndariy n’umngin nap’an!”

Uw Rogon ni Ngam Pi’ e Fulweg?

• Uw rogon ni nge ayuweg fare Psalm 145 ngan poy e girdi’ rok Got nib yul’yul’?

• Uw rogon ni ma gamaneg Jehovah e ‘tin baadag urngin ban’en nib fas’?

• Mang fan nib t’uf ni ngarda chuchugurgad ngak Jehovah?

[Picture on page 15]

Pi tapigpig rok Jehovah e darur rusgad ni ngar ayuweged e piin gathi girdi’ ko ulung rorad ngar nanged murung’agen e felfelan’ ko gagiyeg rok

[Picture on page 16]

Jehovah e ke pi’ gelngin ma ma pow’iy e girdi’ rok nib yul’yul’, ni be ning e ayuw rok u daken e meybil