Bpuluw Ni Ngam Tay Ni Baga’ Fan E Yafas Ni Kan Pi’ Ngom Nib Taw’ath

“Rachaen Kristus e ra beechnag lanin’dad ko ngongol ndariy fan, nge yog nda pigpiggad ngak fare Got ni be par nib fos.”​—HEBREWS 9:14.

1. Mang mich ni bay ni gad ma tay ni ri baga’ fan e yafas u wan’dad?

FAAN MANGA e ni fithem ko in puluwon e yafas rom, ma ga ra tay ni in puluwon? Gad ma tay ni ri baga’ fan e yafas​—ni yafas rodad nge yafas rok yugu boch e girdi’. Ma m’ug ni aram rogon ya faan ra yib e m’ar ngodad ma gad ra guy e togta ara gad ma yan nga aspital yu ngiyal’ ni fan ko skeng. Gad ba adag ni nguuda pared ni gad ba fas ma ba fel’ fithik’ i dowef rodad. Mus ko girdi’ ni kar pilibthirgad ara ba gel e m’ar rorad e dubrad ni ngar m’ad; ya yad ba adag ni nguur pared nib fas.

2, 3. (a) Mang motochiyel e bay ko Proverbs 23:22? (b) Rogon e thin ni bay ko Proverbs 23:22, mang fan nib mil fadad ngak Got?

² Rogon thilmed yugu boch e girdi’ e ra yan u rogon fene t’uf e yafas u wan’um. Susun, be gaar e Thin Rok Got: “Mu telim ngak e chitamam, ya faan mang e de moy ma da mmoy. Ra pilibthir e chitinam, ma ngam dag ko ngongol rom ni ga be pining e magar ngak u wun’um.” (Proverbs 23:22) “Mu telim” e gathi ke mus ni ngam rung’ag e thin; ya fan e re proverb ney e ngam rung’ag ma ga fol ngay. (Exodus 15:26; Deuteronomy 7:12; 13:18; 15:5; Joshua 22:2; Psalm 81:13) Mang fan ni be yog e Thin Rok Got ni ngam “telim”? Gathi ke mus ni bochan e ba ilal e chitamam nge chitinam ngom ara boor ban’en ni yow manang. Mu “telim” ni bochan e “faan manga de moy ma da mmoy.” Kan pilyeg e re thin ney u yugu boch e Bible ni gaar: “Mmotoyil ngak e chitamam ya ir e ke pi’ e yafas ngom.” Ere faanra baga’ fan e yafas u wan’um ma ga ra tay nib mil fam ngak e ani yib e yafas rom rok.

³ Ma faanra gur reb e Kristiano ma ga manang ni Jehovah e ir e ani yib e yafas rom rok. Ya bochan Jehovah e “bay e yafas rom”; ma rayog ni ngam “mithmith” ara ngam ngongol ni gur be’; ma ga “bay” ma rayog ni ngam lem ara midilnag ban’en ni fan ko gabul nge langleth. (Acts 17:28; Psalm 36:9; Ecclesiastes 3:11) Rogon e thin ni bay ko Proverbs 23:22 e bpuluw ni ngada “motoyilgad” ngak Got ngada folgad rok ya gad ba adag ni ngada nanged fene ga’ fan e yafas u wan’ ma gathi ngada ngongolgad u rogon e yafas u wan’ yugu boch e girdi’.

Mu Tay Fan E Yafas

4. Kakrom u nap’an Adam ma mang magawon e ke sum u morngaagen e tay fan ko yafas?

⁴ Kab kakrom ni ka nap’an e girdi’ ma ke tamilangnag Jehovah ni de mil fan ngak e girdi’ ni ngar fanayed (ara ngar dariy fannaged) e yafas. Kari gel e awan’ rok Cain me thang e fan rok Abel ni walagen ni dariy ban’en ni ke bucheg. Ga be lemnag ni bay mat’awen Cain ni ni turguy ban’en ko yafas rok be’? I tay Got ni dariy mat’awen Cain. I pufthinnag Cain ni gaar: “Mang ni kam ngongliy e binir e pa’ ni rib gel e kireb riy? Rachaen walagem e be tolul ngog u fithik’ e but’, ni bod ba lam ni be pong ni ngan fulweg taban e kireb ni kan rin’ ngak.” (Genesis 4:10) Mu tay fanam iyan riy ni rachaen Abel ni kan puog nga daken e but’ e be yip’ fan e yafas rok ni kan thang, ma be pong ngak Got ni nge fulweg taban e kireb ni kan rin’ ngak.​—Hebrews 12:24.

5. (a) Mang e ke tay Got chilen u nap’an Noah, ma chon mini’ e bay u tan e re motochiyel nem? (b) Mang fan ni baga’ fan e re motochiyel nem?

⁵ Tomren e Day Ko Noah ma ke tabab e girdi’ biyay ya ke mus ni meruk e girdi’ ni ke magay nib fas ko re Day nem. I pi’ Got reb e motochiyel ni fan ko urngin e girdi’ me tamilangnag riy fene ga’ fan e yafas nge racha’ u wan’. I yog Got ni rayog ni nge kay e girdi’ e ufin ko gamanman, machane bay e re motochiyel ney ni ke tay ni gaar: “Chiney e aram e rayog ni ngam longuyed urngin e gamanman mi gimed kay ni ku bod rogon e woldug ni gimed be kay; kug pi’ ngomed ni gubin ni nge mang ggan ngomed. Ri taa ban’en e ba’ ndab mu koyed: ufin ni ba’ e racha’ u fithik’ e dab mu koyed, ya racha’ e ba’ e yafos u fithik’.” (Genesis 9:3, 4) Boch e girdi’ nu Jew e ma tay ni fan e re thin nem e dabi kay e girdi’ e ufin ara rachaen e gamanman ni kab fas. Machane ke tamilangnag Got ni be tay chilen ni nge dab ni fanay e racha’ ni fan e ngii par be’ ni kab fas. Maku motochiyel rok Got u daken Moses e ke tamilangnag e n’en nib m’agan’ Got ngay ni fan ko racha’​—mab m’agan’ ngay ni nge yog e yafas ni manemus ngak e girdi’.

6. Uw rogon ni ke tamilangnag Got rogon e yafas u wan’ u daken e re motochiyel nem ngak Noah?

⁶ I ul’ul Got ngay ni gaar: “Ma faanra thang be’ e pogofan rok bigimed, ma bay gu pi’ e gechig rok ni yam’. Ma yugu demutrug be’ nra li’ bigimed nge yim’, e bay gu thang e fan rok ma bay gu gechignag e en nra thang e pogofan rok be’. En ra thang e pogofan rok reb e girdi’ e ku bayi chel be’ nge thang e pogofan rok. Ya girdi’ e ni ngongliy ni bod yaan Got.” (Genesis 9:5, 6) Ba tamilang ko re motochiyel ney ngak urngin e girdi’ ni rachaen e girdi’ e be yip’ fan e yafas rok u wan’ Got. Ani Tasunmiy e ke pi’ e yafas ngak e girdi’ ma dariy be’ e bay mat’awen ni nge thang e re yafas nem ma rachaen e be yip’ fan e yafas rok faanem. Ma faanra thang be’ e yafas rok yugu be’ ni bod rogon ni rin’ Cain, ma bay mat’awen e Ani Tasunmiy ni nge “thang e fan” rok faanem ni ke li’ be’ ngem’.

7. Mang fan ni susun e ngada adaged ni ngada nanged e motochiyel u morngaagen e racha’ ni ke pi’ Got ngak Noah?

⁷ U lan e re motochiyel nem e ke tay Got chilen ngak e girdi’ ni nge dab ra fanayed e racha’ ni yugu demutrug rogon. Kam lemnag ko mang fan ni tay Got ni aram rogon? Arrogon, mang tapgin e motochiyel rok Got u morngaagen e racha’? Fulweg ko re deer ney e ke l’ag ko reb e machib ni th’abi ga’ fan u lan e Bible. Re machib nem e kenggin e machib ko Kristiano, ni yugu aram rogon ni ke dariy fannag e pi yurba’ i teliw e re machib nem. Mang e re machib nem, ma uw rogon ni ke l’ag e yafas rom, ara tin ni ga be lemnag, ara ngongol rom ko re machib nem?

Racha’​—Uw Rogon Ni Ngan Fanay?

8. Rogon e thin rok Jehovah u lan e Motochiyel ma ke mus ni mang e ngan fanay e racha’ ngay?

⁸ Ke tamilangnag Jehovah boor ban’en u morngaagen e yafas nge racha’ u lan fare Motochiyel ni ke pi’ ngak piyu Israel. Ma ke rin’ boch ban’en ya nge lebug e pi n’en nib m’agan’ ngay. Sana ga manang ni bay ko Motochiyel ni ngan pi’ e maligach ngak Got ni yima ognag e woldug, nge gapgep nge wain. (Leviticus 2:1-4; 23:13; Numbers 15:1-5) Maku bay e pi maligach ni gamanman. I weliy Got u morngaagen e pi maligach nem ni gaar: “Fare yafas ko ufin e bay ko rachaen, ma gag e kug tay e racha’ nga daken e altar ya nge n’ag fan e pi denen romed ya racha’ ara fare yafas riy e ma n’ag fan e denen. Aram fan ni ku gog ngak piyu Israel ni lungug: ‘Dariy bagamed nra kay e racha’.’” Ki yog Jehovah ni faanra be’ ni tamakol e gamanman ara be’ ni ma chuguliy e gamanman e ra li’ e gamanman ni fan e nge longuy ma thingari puog rachaen nga but’ me tay e but’ nga daken. Gowa ma gif Jehovah ay nga daken e fayleng, ere be’ ni ke puog e racha’ nga daken e but’ e gowa be fulweg fare yafas ni bay riy ngak e Ani Ke Pi’ e Yafas.​—Leviticus 17:11-13; Isaiah 66:1.

9. Rogon e Motochiyel, mang taa ban’en ni ke mus ni ngan fanay e racha’ ngay, ma mang fan ni ngan fanay ni aram rogon?

⁹ Re motochiyel nem e gathi ke mus ni ban’en ni yugu ma rin’ barba’ i teliw ni dariy fan ngodad e ngiyal’ ney. Kam guy ko re motochiyel nem fan ni ka nog ngak yu Israel ni nge dab ra ked e racha’, fa? Be gaar Got: “Aram fan ni ku gog ngak pi fak Israel ni lungug: ‘Dariy bagamed e nge kay e racha’.’” Mang fan? “Ya kug tay e racha’ nga daken e altar ni nge n’ag fan e pi denen romed.” Kam guy riy fan ni ke yog Got ngak Noah nge piin nra kol e gamanman ni dab ra ked e racha’, fa? Ya ani Tasunmiy e ke tay ni baga’ fan e racha’, ma ke mus ni taab ban’en e ngan fanay e racha’ ngay ni aram e nge ayuweg e yafas rok boor e girdi’. Baga’ fan e racha’ ya yira n’ag fan e denen riy. Ere u lan fare Motochiyel e ke pi’ Got mat’awen piyu Israel ni ngan fanay e racha’ u daken e altar ni ngan n’ag fan e denen rok piyu Israel ni yad ba adag ni nge n’ag Jehovah fan e denen rorad, ma ke mus e kanawo’ ni ngan fanay e racha’ ngay.

10. Mang fan ni dabiyog rok rachaen e gamanman ni nge n’ag fan e denen, machane pi maligach nem ni pi’ nrogon e Motochiyel e ma puguran e mang ngodad?

¹⁰ Re thin ney e ke chugur ni ba taareb rogon ko machib ko Kristiano. I weliy apostal Paul ni ir reb e Kristiano morngaagen e re Motochiyel rok Got ney ni gaar: “Rriyul’, nrogon ko fare Motochiyel e oren ban’en e yibe biechnag ko racha’; ma denen e be n’ag Got fan rok e girdi’ ni ke mus ni faanra ni puog e racha’.” (Hebrews 9:22) I tamilangnag Paul ni de yog rok fapi maligach ni nge pingeg e girdi’ nu Israel ni ngar manged e girdi’ nib flont ni dariy e denen rorad. I yol ni gaar: “Machane fan e pi maligach nem e nge puguran ko girdi’ e denen rorad u reb e duw ngu reb. Ya rachaen e garbaw ni pumoon nge kaming e ri dabiyog ni nge fek e denen nge chuw.” (Hebrews 10:1-4) Machane bay fan e pi maligach nem. Ya ke puguran ngak piyu Israel ni yad ba tadenen ma kub t’uf rorad ban’en ni ngari n’ag fan e denen rorad. Ma faanra dabiyog rok rachaen e gamanman ni be yip’ fan e yafas rok fare gamanman ni nge n’ag fan e denen rok e girdi’, bay ba racha’ ni rayog ni nge n’ag fan e denen rok e girdi’, fa?

Ani Ma Pi’ E Yafas E Ke Pithig E Re Magawon Nem

11. Mang fan ni gad manang ni rachaen e pi gamanman nni pi’ ni maligach e be yip’ fan ban’en?

¹¹ Fare Motochiyel e ke yip’ fan ban’en ni kab ga’ angin ni ra rin’ e n’en nib m’agan’ Got ngay. I fith Paul ni gaar: “Ere mang ni pi’ Got fare Motochiyel? I puthuy ko n’en ni ognag ni nge pi’ ngak Abraham ni fan e nge dag ko mang e ngongol nib kireb, me finey Got ni nge par e re Motochiyel nem nge yan i mada’ ko ngiyal’ ni bay yib i m’ug riy faanem ni ir e owchen Abraham, ni ir faanem ni ognag Got. Ma fare Motochiyel e pi’ Got ngak e pi engel nra bad ra pied ngak e girdi’, ni ba’ be’ nib moon [Moses] ni ir e mang maaf ko re Motochiyel ney u thilin e pi engel nge girdi’.” (Galatia 3:19) Ki yol Paul ni gaar: “Fare Motochiyel rok piyu Israel e gathi ri yaan ni polo’ e tin nri ir ban’en, ke mus ni yaan e pi n’en nib fel’ ni bay fini yib ni kab samathmath.”​—Hebrews 10:1.

12. Uw rogon ni ke tamilangnag Got ni buchuw nge buchuw e n’en nib m’agan’ ngay u morngaagen e racha’?

¹² Kada weliyed ni ke pi’ Got e thin ngak Noah ni rayog ni nge longuy e girdi’ e ufin ko gamanman ni fan ni nguur pared nib fas, machane dabiyog ni ngar ked e racha’. Munmun me yog Got ni “yafas e bay ko racha’.” Arrogon, ke tay Got ni racha’ e be yip’ fan e yafas me gaar: “Kug tay e racha’ nga daken e altar ni fan e nge n’ag fan e denen romed.” Machane ka bay ban’en ni ku ra tamilang u morngaagen e pi n’en nib m’agan’ Got ngay. Ya fare Motochiyel e yaan e pi n’en nib fel’ ni bay fini’ yib. Aram e mang?

13. Mang fan ni baga’ fan e yam’ ni tay Jesus?

¹³ Bin nri ir e bay ko yam’ ni tay Jesus Kristus. Ga manang ni kan gafgownag Jesus min li’ u daken baley i ren. I yim’ ni gowa ir be’ ni ke th’ab e motochiyel. Be gaar Paul: “Ya ngiyal’ ni ba aram ni ka gadad be par ndabiyog ni ngad ayuweged gadad, me yim’ Kristus ni fan ngak e girdi’ nib tagan ko ngiyal’ ni turguy Got. . . . Machane Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad.” (Roma 5:6, 8) Nap’an ni yim’ Kristus ni fan ngodad, ke pi’ e biyul ni nge n’ag fan e pi denen rodad. Re biyul nem e ir kenggin e machib rok e pi Kristiano. (Matthew 20:28; John 3:16; 1 Korinth 15:3; 1 Timothy 2:6) Uw rogon ni ke l’ag e re thin ney ko racha’ nge yafas, ma uw rogon ni ke l’ag e yafas rom ngay?

14, 15. (a) Uw rogon ni kan gagiyelnag e yam’ ni tay Jesus u rogon ni kan pilyeg e thin u Efesus 1:7? (b) Mang thin e dariy ko pi thin nem nrogon ni kan pilyeg Efesus 1:7?

¹⁴ Boch raba’ i teliw e ma gagiyelnag e yam’ ni tay Jesus ma girdien e pi yurba’ i teliw nem e ma yog ni “Ke yim’ Jesus ni fan ngog.” Amu lemnag rogon ni kan pilyeg e thin u Efesus 1:7: “Kada thapgad ni bochan Jesus nge bochan e yam’ ni tay, ma aram rogon ni kan n’ag fan e pi denen rodad.” (The American Bible, by Frank Scheil Ballentine, 1902) “Bochan e yam’ ni tay Kristus e kan pithigdad ma kan n’ag fan e pi denen rodad.” (Today’s English Version, 1966) “Kan pithigdad u daken Kristus nge yafas rok ni ke pi’ ni maligach, ma kan pithigdad ya kan n’ag fan e pi denen rodad.” (The New Testament, by William Barclay, 1969) “Kan n’ag fan e pi denen rodad ni bochan e yam’ ni tay Kristus ma kan pithigdad.” (The Translator’s New Testament, 1973) Kam guy ni pi thin ney e ma gagiyelnag e yam’ ni tay Jesus. Ma sana ra gaar boch e girdi’: “Ri baga’ fan e yam’ ni tay Jesus. Ere mang ni de puluw rogon ni kan pilyeg e re thin nem?”

¹⁵ Faan ga ra pagan’um ko pi thin nem ma bay ban’en ni baga’ fan ni dariy ko pi thin nem ma bay reb e machib ko Bible ni dab mu nang fan. Rogon ni kan pilyeg Efesus 1:7 e ma mithag ni bay bugithin nu Greek ni be yip’ fan e “racha’” ko re thin nem. Ere boor e Bible nge fare New World Translation, e ba chugur boch ko bin kakrom e thin ya kan pilyeg ni aray rogon: “Bochan Kristus e kan pithigdad u daken e biyul rok ngu daken rachaen, arrogon, kan n’ag fan e pi denen rodad ni bochan e rib gel e runguy rok.”

16. Fare thin ni “rachaen” Kristus e ma puguran e mang nga lanin’dad?

¹⁶ Re bugithin nem ni “rachaen” e ma tamilangnag boor ban’en. Ya gathi ke mus ni thingari yim’ Jesus ni ir be’ nib flont. Ya thingari lebuguy e n’en ni bay ko Motochiyel, ni baga’ ni fare Motochiyel u morngaagen e Rorran ni Biyul. Rorran nem e kan pi’ e pi gamanman ni maligach nrogon e Motochiyel. Ma aram me fek e prist nib tolang rachaen e pi gamanman nem nga lan e senggil ni Th’abi Thothup u lan e tabernacle ara tempel me ognag ngak Got ya gowa bay u p’eowchen Got.​—Exodus 25:22; Leviticus 16:2-19.

17. Uw rogon ni ke lebguy Jesus e n’en ni be yip’ fan fare Rorran ni Biyul?

¹⁷ I weliy Paul ni ke lebuguy Jesus e n’en ni be yip’ fan e Rorran ni Biyul. Somm’on me weliy Paul ni ke yan e prist nib tolang nu Israel nga lan e senggil ni Th’abi Thothup ni taa biyay u reb e duw ni ke fek e racha’ ngay ni ke ognag ngak Got ni “fan ko denen rok nge fan ko denen ni ke ngongliy e girdi’ ndar nanged ni yad be denen.” (Hebrews 9:6, 7) Me fol Jesus ko n’en ni rin’ e prist ya tomren ni ke fas ko yam’ ni ke ngal’ ni ba kan me yan nga tharmiy. Bochan e ir ba kan ma dariy downgin ni bod downgin e girdi’ nib ufin nge racha’, ere rayog ni nge “m’ug nga p’eowchen Got ni fan ngodad.” Mang e ke ognag ngak Got? Gathi ban’en ko re tamilang ney ya ban’en ni ka baga’ fan. Ke ulul Paul ngay ni gaar: “Machane Kristus e ke yib ni ir e prist nib th’abi tolang . . . ma de fek rachaen e kaming nge rachaen pi fak e garbaw i yan ni nge pi’ ni maligach ngak Got; machane rachaen e fek i yan nge bayuliy e denen rodad ni aram e ka ni fanay e binem e bayul ndariy n’umngin nap’an. Rachaen e kaming nge garbaw ni pumoon . . . e ma biechnagrad ni aram e kan chuweg e kireb rorad, ni kireb rorad u yalen e motochiyel. Ere faanra ereray rogon nib riyul’ e re bugithin ney, me ere ka ba ga’ e tin ni ngongliy rachaen Kristus! Ya fare kan ni thothup ni bay i par ndariy n’umngin nap’an e ayuweg nge pi’ ir ni maligach nib fel’ ngak Got. Rachaen e ir e ra biechnag lanin’dad ko ngongol ndariy fan nge yog nda pigpiggad ngak fare Got ni be par nib fos.” Arrogon, ke ognag Jesus felngin rachaen ngak Got.​—Hebrews 9:11-14, 24, 28; 10:11-14; 1 Peter 3:18.

18. Mang fan ni baga’ fan e thin ko Bible u morngaagen e racha’ u wan’ e p Kristiano e ngiyal’ ney?

¹⁸ Re machib rok Got ney e ma ayuwegdad ni ngada nanged e n’en ni ma yog e Bible u morngaagen e racha’​—nge fan ni baga’ fan e racha’ u mit Got, nge rogon e racha’ u wan’dad, nge fan ni ngada folgad ko motochiyel rok Got u rogon ni ngan fanay e racha’. Nap’an ni ga ra bieg e pi babyor nu Bible nyoloy nthin nu Greek ma ga ra pirieg riy boor e thin u morngaagen rachaen Kristus. (Mu guy fare thin ni “Mang Racha’ E Ma Ayuweg E Yafas?”) Ba tamilang riy ni thingari mich “rachaen Jesus” u wan’ e pi Kristiano. (Roma 3:25) Ma rayog ni ngan n’ag fan e denen rodad ma nge yog e gapas rok Got ngodad “u daken rachaen Jesus ni ke map’ nga but’.” (Kolose 1:20) Riyul’ e re thin ney ngak e piin ni ke micheg Jesus reb e m’ag ngorad ni ngar uned ngak ko gagiyeg u tharmiy. (Luke 22:20, 28-30; 1 Korinth 11:25; Hebrews 13:20) Ma kub riyul’ ni fan ngak fare “ulung ni baga’” ni yad ra magay nib fas u nap’an fare “gafgow ni baga’” me yog e yafas ni manemus ngorad u lan e paradis u fayleng. Ma gowa kar “lukniged e mad rorad nga rachaen fare Fak e Saf.”​—Revelation 7:9, 14.

19, 20. (a) Mang fan ni ke turguy Got ni nge tay chilen e racha’, ma uw rogon e motochiyel rok u wan’dad? (b) Mang e gad ba adag ni ngada nanged?

¹⁹ Ere ba tamilang ni baga’ fan e racha’ u mit Got. Maku arrogodad ni susun ni baga’ fan e racha’. Ani Tasunmiy e ma tay ni baga’ fan e yafas ere bay mat’awen ni nge tay chilen e racha’. Ma bochan e baga’ fan e yafas rodad u p’eowchen Got ma ke tay ni ke mus ni taareb e kanawo’ ni ngan fanay e racha’ ngay ni fan e nge yog e yafas ni manemus ngodad. Ma ke l’ag rachaen Jesus ko re kanawo’ nem. Ri gad ma pining e magar ngak Jehovah Got ni be maruwel ni fan e nge fel’ rogodad riy ma ke fanay e racha’​—ni aram rachaen Jesus—​ya nge yog e yafas ngodad! Maku gad be pining e magar ngak Jesus ya ke puog rachaen ni fan ngodad! Gad manang fan e thin rok apostal John ni gaar: “Gadad ba t’uf rok ma ke pithigdad ko denen rodad u daken rachaen ni map’, ke ngongliydad kad manged ba nam i prist ni ngad pigpiggad ngak e Got rok ni Chitamangin. Ngan ta’ fan mi nog e sorok ngak Jesus Kristus, me ir e ba’ rogon ni nge mil suwon urngin ban’en ngak ndariy n’umngin nap’an! Amen.”​—Revelation 1:5, 6.

²⁰ Got rodad ni ir e ke pi’ e yafas ngodad e ir ba gonop ma ke dugliy ni kab kakrom ni nge ayuweg e yafas rodad. Ere rayog ni ngada fithed: “Uw rogon ni ke l’ag e ngongol rodad nge tin ni gad ra turguy ni bochan e re machib ney?” Gad ra weliy e fulweg ko re deer ney ko bin migid e thin.

U Rogon Ni Ga Ra Fulweg?

• Mang e gad ra fil u rogon e racha’ u wan’ Got ko fare thin u morngaagen Abel nge Noah?

• Mang e ke tay Got chilen u lan e Motochiyel u morngaagen e racha’, ma mang fan?

• Uw rogon ni ke lebguy Jesus e n’en ni be yip’ fan e Rorran ni Biyul?

• Uw rogon nra ayuweg rachaen Jesus e yafas rodad?

[Box on page 12]

MANG RACHA’ E MA AYUWEG E YAFAS?

“Mu ayuweged gimed nge fare ulung i saf ni fare kan ni thothup e ke taymed ni nguum ayuweged. Gimed e ngam pired ko galesiya rok Got ni bod e piin ni ma ayuweg e saf, ya girdien e galesiya rok Got e ra manged girdien Got u daken rachaen Fak.”​—Acts 20:28.

“Rachaen e ir e ke mat’awnagdad riy ngak Got; ere rib mudugil nra ayuwegdad ko damumuw rok Got.”​—Roma 5:9.

“Um pired u roy u fayleng dariy ban’en ni ke l’agan’med ngay ma de moy Got romed! Machane chiney e kam taab girdi’gad Jesus Kristus, ni gimed e piin ni um moyed ni gimed mmal’af rok Got e kam bad ngak u daken rachaen Kristus.”​—Efesus 2:12, 13.

“Yi Got e turguy ni nge sulweg urngin ban’en ngak u daken Fak. Mi Got e ngongliy e gapas u thilin e girdi’ nge ir u daken rachaen Fak.”​—Kolose 1:19, 20.

“Machane faanra ud pired u fithik’ e tamilang​—ni bod ir ni ba’ u fithik’ e tamilang—​ma aram e kad taab girdi’gad ni ke taareban’dad, ma rachaen Jesus ni Fak e ir e be beechnagdad u urngin e denen rodad.”​—1 John 1:7.

“Pi walageg ni girdien Kristus, kari puf e kanawo’ ngodad ni nga darod nga lan fa Gin’en nib Th’abi Thothup u daken rachaen Jesus.”​—Hebrews 10:19.

“Ya gimed manang e n’en ni kan pi’ nga puluwmed ni fan e ngan pithigmed u pangimed nib m’ay fan ni af ngomed rok pi chitamangimed ni kakrom. Gathi ban’en nrayog ni nge kireb . . . ya rachaen Kristus ni map’ ni ba ga’ fan e ir e ke pithigmed u pangimed nib m’ay fan, ni pi’ ir ni bod ba pifak e saf ndariy bang u dow nib kireb ara ba alit.​—1 Peter 1:18, 19.

“I gur e ba’ rogom ni ngam fek fare gi babyor ni kan bachiy ngam guchthuy fapi hang riy. Ya nliem nga mum’, ma rachaem ni map’ e ir e mu chuw’iy e girdi’ ngay ni ngar manged girdien Got ni girdi’ u urngin e ganong, nge thin, nge gubin mit e girdi’ nge nam.”​—Revelation 5:9.

“Ya faanem ni ma egnag pi walagdad ni ma yib i sak’iy nga p’eowchen Got ngi i thibthibnagrad ni rran nge nep’ e ka nin’ nga wuru’ e tharmiy. Ke gel pi walagdad ngak u daken rachaen fare Fak e Saf, ngu daken e thin nib riyul’ ni ur wereged.”​—Revelation 12:10, 11.

[Picture on page 10]

Ke tamilangnag Got u daken e Motochiyel ni bay rogon e racha’ ni nge n’ag fan e denen

[Picture on page 11]

Ran ayuweg e yafas rok boor e girdi’ u daken rachaen Jesus