“Nge Bigimed Me T’uf Bigimed Rok”

“Nge bigimed me t’uf bigimed rok nrogon e walag ni girdien Kristus.”​—ROMA 12:10.

1, 2. Uw rogon thilin e pi walag ni ke falfalan’ reb e missionary nge apostal Paul ngay?

BA GIL buguwan be’ ni missionary u Far East ni Don fithngan ni bochan e t’ufeg ni dag ngak e piin ni ke pigpig ngorad ni 43 e duw. Ma nap’an ni kari ubchiya’ Don ni bochan e m’ar rok ma be n’en ni nge yim’ me yib e piin ni ke fil Don e machib ngorad ni boch i yad e kar milekaggad ni bokum biyu’ e mayel. Be lungurad ngak, “Kamsahamnida, kamsahamnida!”​—ara “Kam magar, kam magar!” nthin nu Korea. T’ufeg rok Don e kari rich nga gumercha’rad.

² Gathi goo Don e ke buch e re n’en ney ngak. U nap’an e bin somm’on e chibog e kari t’ufeg apostal Paul e piin ni be machibnagrad. Kari pag Paul fan ir. Yugu aram rogon ni ir be’ nib gel e michan’ rok maku ir be’ nib munguy ma ma runguy e girdi’ “ni bod fene munguy ba matin ngak pi fak ni be ayuwegrad.” I yol ngak e ulung nu Thessalonika ni gaar: “Bochan e gimed ba t’uf romad ma gamad fal’eg rogomad ni gathi ke mus ni Thin Nib Fel’ ni yib rok Got e nggu bad gu pied ngomed, machane ngkug pied gamad nga pa’med nggu ayuweged gimed. Ya ri gimed ba t’uf romad!” (1 Thessalonika 2:7, 8) Boch nga tomren u nap’an ni yog Paul ngak e pi walagen u Efesus ni dabki guyrad biyay, ma “yad gubin ni yad be yor ma yad be gumuchmuch ngak Paul ma yad be faray owchen ni yad be fingichiy.” (Acts 20:25, 37) Ba tamilang nib fel’ e thin u thilin Paul nge pi walagen ma gathi goo bochan e ke taareb e michan’ rorad. Ya nge bagayad e kari t’uf bagayad rok.

Runguy Nge T’ufeg

3. Uw rogon nib peth yu bugithin nu Bible ni be yip’ fan e runguy nge t’ufeg?

³ U lan e Bible e bay e runguy, nge sumunguy mab peth e pi n’en ney ko t’ufeg—ni aram e bin th’abi fel’ u fithik’ e pi felngin e Kristiano. (1 Thessalonika 2:8; 2 Peter 1:7) Pi felngin e Kristiano ney e bod e malang nib tolang puluwon ni diamond ni boor yu yang riy ma pi felngin ney e ma maruwel u taabang. Ma pi felngin ney e ma chugurnag e pi Kristiano nga taabang nge taareban’rad maku ma chugurnagrad ngak e Chitamangirad nu tharmiy. Ere i yog apostal Paul ngak e piin nib mich u wan’rad ni gaar: “Rogon nib t’uf e girdi’ rodad e thingari yan i aw nib riyul’ . . . Nge bigimed me t’uf bigimed rok nrogon e walag ni girdien Kristus.”​—Roma 12:9, 10.

4. Mang fan fare bugithin ni kan pilyeg ni “t’ufeg”?

⁴ Fare bugithin nu Greek ni ke fanay Paul ni kan pilyeg ni “t’ufeg” e bay l’agruw yang riy, ma bang riy e be yip’ fan e thin nib fel’ u thilin e piin ni tafager ma bang riy e be yip’ fan e runguy ni bay u tabinaw. Ere be’ ni ma fil e Bible e be yog ni fan e re bugithin nem e “bay e t’ufeg rok e pi Kristiano ni bod e t’ufeg ara runguy ni bay u lan e tabinaw ni girdi’ riy e ma ayuweged yad.” Arrogon e pi walagem ni Kristiano u wan’um, fa? Thingari moy e t’ufeg u lan e ulung ni Kristiano ni girdi’ riy e yad be lemnag ni yad taab girdi’. (Galatia 6:10) Ere fare Bible ni The New Testament in Modern English, ni yoloy J. B. Phillips, e kan pilyeg e Roma 12:10 ni aray rogon: “Nge bagadad e nge runguy bagadad ni bod e piin ni walag.” Ma The Jerusalem Bible e be gaar” “Ngada t’ufeged gadad ni bod rogon e t’ufeg rok e piin ni walag.” Arrogon, fare t’ufeg ni bay u fithik’ e piin ni Kristiano e gathi ke mus ni bochan e machib ara bochan e thingar ni rin’. Thingar da pared ni “rib t’uf rodad e piin ni gadad ni ke mich Kristus u wun’rad ni bod gadad, ma ra bagadad ma ngari t’uf rok bagadad u polo’ i gumercha’dad.”​—1 Peter 1:22.

“Ke Dag Got Nogdad Rogon Ni Nge Bagadad Ma Nge T’uf Bagadad Rok”

5, 6. (a) Uw rogon ni ke fil Jehovah ngak e girdi’ rok rogon e t’ufeg u nap’an e international convention? (b) Uw rogon ni ma gel e t’ufeg u thilin e piin ni walag?

⁵ Yugu aram rogon ni “ke meewar rogon nib t’uf be’ rok be’” u lan e re fayleng ney, be fil Jehovah ngak e girdi’ rok ni “nge bagayad e nge t’uf bagayad rok.” (Matthew 24:12; 1 Thessalonika 4:9) Ma skulnag Jehovah e girdi’ rok ni ngar filed e t’ufeg u nap’an e international convention rok e Pi Mich Rok Jehovah. U nap’an e pi convention nem e ma muulung e Pi Mich Rok Jehovah ni kar bad u boor e nam, ma Pi Mich Rok Jehovah ko fare nam ni yibe muulung riy e yad ma bing e tabinaw rorad ni fan ko pi walagrad nra bad u yugu boch e nam. U nap’an reb e pi convention nem e ke muulung boch e girdi’ rodad nra bad u reb e nam ni gathi ri yad ma dag rogon lanin’rad. Reb e Kristiano ni ke ayuweg e pi girdi’ nem ni ngar gayed bang ni ngar pared riy e ke gaar: “Nap’an ni fini yib e pi girdi’ rodad nem ma yad ba satamra’. Machane tomren nel’ i rran ma ke taw nga nap’an ni ngan fingich ma yad be gumuchmuch e piin ni kar pared u tabinaw rorad ma yad be yor. Dabiyog ni ngar paged talin e t’ufeg rok e piin ni Kristiano.” Ngada ayuweged e girdi’ rodad u yugu reb e binaw ni yugu demutrug rarogorad ma ra fel’ rogon e piin ni yad be pi’ e ayuw maku ra fel’ rogon e piin ni yibe ayuwegrad.​—Roma 12:13.

⁶ Ba fel’ e pi convention nem, machane ku ra chugur e pi Kristiano ngorad ni faan yad ra pigpig ku Jehovah u taabang nib n’uw boch nap’an. Gad ra nang e pi walagdad ma gad ra tay farad ni bochan pi fel’ngirad​—ni ba riyul’ e thin rorad, ma rayog ni ngan pagan’uy ngorad, ma yad ba yul’yul’, ma yad ba gol, ma yad ba tay fan e girdi’ ma yad ma runguy e girdi’ ma yad ma pag farad. (Psalm 15:3-5; Proverbs 19:22) Mark ni ir be’ ni i missionary u East Africa e ke gaar: “Kug maruwelgad e pi walagdad u taabang ma ke sum e thin nib fel’ u thilmad ni dabiyog ni nge kireb.”

7. Mang e ba t’uf rodad ni faanra gad ba adag ni ngada falfalan’gad ko fare t’ufeg rok e Kristiano u lan e ulung?

⁷ Faanra sum e thin nib fel’ ni aram rogon ma thingari chugur girdien e ulung ngorad. Faan gad ra un ko gubin e muulung ko Kristiano ma rayog ni nge gel fare thin nib fel’ u thildad e pi walagdad ni pumoon nge ppin. Gad ra un ko pi muulung ma gad ma non u m’on ko muulung nge nap’an e muulung nge tomren e muulung ma arrogon ni nge bagadad e nge pi’ e athamgil nga laniyan’ bagadad ni “ni ngada t’ufeged gadad ma ngada rin’ed e tin nib fel’.” (Hebrews 10:24, 25) Be gaar reb e piilal nu Meriken: “Ka gu manang ni nap’an ni m’ay e muulung ma girdien e tabinaw rog e yad e piin ni tomur nra chuw ko Kingdom Hall ya ri kug falfalan’gad ko sabathin u lan e ulung.”

Me Gur, Thingar “Dab Mu Mithag Lanin’um,” Fa?

8. (a) Mang fan e thin rok Paul ni ke yog ngak piyu Korinth ni nge “dab ra mithaged lanin’rad”? (b) Mang e rayog ni ngada rin’ed ya nge gel e t’ufeg u lan e ulung?

⁸ Faan gad ra un ko t’ufeg ni aram rogon, ma thingar “dab da mithaged lanin’dad.” I yol apostal Paul ngak fare ulung nu Korinth ni gaar: “Dawor gu mitheged lanin’mad romed: gimed e kam mitheged lanin’med romad.” Me ere yog Paul ngorad ni “dab ra mitheged lanin’rad.” (2 Korinth 6:11-13) Me gur, rayog ni ngki yoor e girdi’ ni ngam t’ufegrad, fa? Dab mu sonnag yugu boch e girdi’ ni ngar t’ufeged gur. Nap’an ni yoloy Paul e babyor rok ngak piyu Roma, ke yog Paul ni thingar ra t’ufeged e girdi’ me gaar: “Nge pasigan’med ngay ni nge bigimed mi i ta’ fan bigimed.” (Roma 12:10) Rayog ni ngam tay fan e girdi’ u nap’an ni ga ra non ngorad u nap’an e muulung. Maku rayog ni ngam piningrad ngar uned ngom ko machib u mit e tabinaw ara ngam filew e thin ko muulung u taabang. Ga ra rin’ ma ra gel e t’ufeg romed ngomed.

9. Mang e rin’ boch e girdi’ ya ngar tafagergad yugu boch e Kristiano? (Ku rayog ni ngam weliy ban’en ko nam rom.)

⁹ Girdien e tabinaw ara yugu boch e girdi’ u lan e ulung e rayog ni nge “yoor e girdi’ ni ngar t’ufeged” ni ra bagayad e nge yan nga tafen bagayad ngar sabathin gad ara ngar abichgad u taabang ara ngar rin’ed boch ban’en u taabang. (Luke 10:42; 14:12-14) Be’ ni Hakop fithngan e ma fl’eg e abich ni fan ko buchuw e girdi’ yu ngiyal’. Be gaar: “Gu ma pining e girdi’ ni demutrug yangarrad. Gu ma pining e llabthir ni goo ir e llabthir u tabinaw. Ra chuw e girdi’ ma kar falfalan’gad ma kar chugurgad nga taabang.” Gad e Kristiano e gathi ke mus ni taareb e michan’ rodad ya ku gad e pi tafager.​—3 John 14.

10. Mang e rayog ni ngada rin’ed ni faanra sum e magawon u thildad yugu boch e girdi’?

¹⁰ Yu ngiyal’ ma bay e magawon rodad ni nge fel’ e thin rodad ara ngada t’ufeged gadad ni bochan e gadad tadenen. Mang e rayog ni ngada rin’ed? Somm’on, ma rayog ni ngada yibilayed ni nge fel’ e thin rodad e pi walagdad. Mm’agan’ Got ngay ni nge fel’ e thin rodad e pi walagdad, ere ra fulweg taban e pi meybil rodad nem. (1 John 4:20, 21; 5:14, 15) Maku thingar da ngongolgad nrogon e meybil rodad. Ric ni ir reb e girdi’ rodad ni ma lekag e pi ulung u East Africa e ke weliy morngaagen reb e walagdad ni ba gel boch e thin rok ma gathi rib fel’ e thin u thilrad yugu boch e girdi’. Be gaar Ric: “Gathi kugu palog rok faanem, ya kug turguy ni nge fel’ e thin u thilmow. Kugu pirieg ni chitamangin faanem e ku ba gel boch e thin rok. Nap’an ni ke tamilang u wan’ug fene mo’maw’ rok faanem ni bochan rogon ni kan chuguliy ma ke tamilang u wan’ug ni ke gel e mon’og ni ke tay ma kugu adag daken. Ma aram e ke fel’ e thin u thilmow.”​—1 Peter 4:8.

Mu Bing Gumerchaem!

11. (a) Mang e ba t’uf ni fan e ngki gel e t’ufeg u lan e ulung? (b) Mang fan nde fel’ ni ngada paloggad rok e girdi’?

¹¹ Boor e girdi’ ko ngiyal’ ney ni dariy be’ ni ke fel’ e thin rorad. Kar gafgowgad! Ma susun gathi aram rogon u lan e ulung ni Kristiano. Bin riyul’ e t’ufeg u thilin e piin walag e gathi ke mus ni sabathin nib fel’ ara ngongol ni ba yalen; maku gathi thin nib fel’ ni ke pag nga rogon. Danga’, ya thingar da binged gumercha’dad ni bod ni rin’ Paul ngak piyu Korinth, ni gad be dag ngak e piin ni gadad ni ri gad be lemnagrad. Yugu aram rogon ni gathi gubin e girdi’ ni ri ma m’ug e t’ufeg rorad, maku de fel’ ni nge gel e satamra’ rodad. Be gaar e Bible: “Be’ ni ke par ni goo ir u bang e goo tirok e ra lemnag. Ma ra togopuluw ko llowan’ nge gonop.”​—Proverbs 18:1.

12. Mang fan nib t’uf ni nge non girdien e ulung ngorad ya nge fel’ e thin rok girdien e ulung?

¹² Ra puf e thin u thilin e piin ni tafager mab yul’yul’ e thin rorad. (John 15:15) Gad gubin mab t’uf rodad e piin ni tafager rodad ni rayog ni ngada weliyed lanin’dad ngorad. Maku ra mom boch ni ngada ayuweged gadad ni faanra nge bagadad me nang rarogon bagadad. Ma faanra m’on u lanin’dad e tirok yugu boch e girdi’ ma ra gel e t’ufeg u thildad ma gad ra pirieg nib riyul’ e thin rok Jesus ni faani gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35; Filippi 2:1-4.

13. Mang e rayog ni ngada rin’ed ya ngada daged nib t’uf pi walagdad rodad?

¹³ Faanra nge yib angin e t’ufeg rodad ma thingar da daged e t’ufeg ko ngongol rodad ara thin rodad. (Proverbs 27:5) Faanra ba riyul’ e t’ufeg rodad ma ra m’ug ko owchedad, ma ra n’igin gumerchaen yugu boch e girdi’ ni nge fulweg fare t’ufeg. I gaar reb e moon nib gonop: “Ra falfalan’ gumerchaen be’ ni faanra ba falfalan’ lan owchen.” (Proverbs 15:30) Rayog e t’ufeg ni faan yira pi’ e ayuw. Riyul’ ni dabiyog ni ngan chuw’iy e t’ufeg, machane bay angin reb e taw’ath ni kan pi’ u fithik’ e yul’yul’. Ku rayog ni nge m’ug e t’ufeg u lan e babyor nni pi’ u Post ara “bugithin nnog ko ngiyal’ ni nga nog riy.” (Proverbs 25:11; 27:9) Nap’an nra fel’ e thin rodad yugu boch e girdi’ ma thingar da ayuweged e re thin nem ngii par nib fel’ ma rayog ni faan gad ra dag e t’ufeg. Nap’an nra gafgow e pi tafager rodad ma thingar da ayuweged yad. Be gaar e Bible: “Bin riyul’ e tafager e ra dag e t’ufeg ni gubin ngiyal’ ma ir e walag ko ngiyal’ ni bay e gafgow riy.”​—Proverbs 17:17.

14. Mang e rayog ni ngada rin’ed ni faanra gathi rib fel’ e thin rodad yugu boch e girdi’?

¹⁴ Bin riyul’ riy e dabiyog ni ngari fel’ e thin rodad gubin e girdi’ u lan e ulung. Ra moy boch e girdi’ ni kab fel’ e thin rodad ngak yugu boch e girdi’. Ere faanra kam pirieg ni gathi ri ba adag be’ nga dakenam ma dab mu tay ni ba ban’en nib kireb rom ara bay ban’en nib kireb rok faanem. Ma dab mu guy rogon ni ngam towasariy faanem nge fel’ e thin romew. Ya faan ga ra tay ni ke mus thilmew nrogon ni ba adag faanem ma ke par fare kanawo’ nib mab ma rayog ni nge ngki fel’ boch e thin romew ba ngiyal’.

“Kari Fel’an’ug Ngom”

15. Mang angin ni ngan pining e sorok ngak yugu boch e girdi’, ma mang angin ni faanra dan pining e sorok ngorad?

¹⁵ Kari falfalan’ Jesus u nap’an ni kan taufenag me rung’ag fare lam u tharmiy ni gaar: “Kari fel’an’ug ngom!” (Mark 1:11) Re thin ney e ke ayuweg Jesus ni ngari pagan’ ngay ni kari t’uf rok e ani Chitamangin. (John 5:20) Ba gafgow ya boch e girdi’ e dar rung’aged e thin rok e piin ni yad ba t’uf rok ni yibe pining e sorok ngak. Be gaar be’ ni Ann fithngan: “Boor e piin nib fel’ yangaren ni bod gag ni girdien e tabinaw romad e dar uned ko machib. Goo gathibthib e gamad ma rung’ag u tabinaw. Rib gel e kireban’ug.” Machane nap’an nra uned ko fare ulung ma kar manged girdien e tabinaw rok Got ma bay e t’ufeg riy ni yib rok e pi matam nge pi matin nge pi walag ni pumoon nge ppin ni taareb e michan’ rorad.​—Mark 10:29, 30; Galatia 6:10.

16. Mang fan ni de fel’ ni ngan gay thibngin e girdi’?

¹⁶ Pi gallabthir nge piin ni pilibthir nge pi sensey u boch e nam e gathi ri yima pining e sorok ngak e piin nib fel’ yangaren ni bochan e yad ma lemnag ni ra tolang lanin’rad ara dab ra athamgilgad boch ni faan yira pining e sorok ngorad. Rayog ni nge af e re lem nem nga lan e tabinaw ko pi Kristiano ara ulung rorad. Ra welthin reb e fel’ yangaren u lan e ulung ma sana ra gaar reb e pilibthir: “Manigil e welthin rom, machane rayog ni ngki fel’ boch!” Ara rayog ni nga rogned ni de fel’ be’ nib fel’ yangaren u yugu reb e kanawo’. Yad ra yodor ni bochan e yad be lemnag ni yad be k’aring e piin nib fel’ yangaren ni ngar athamgilgad boch. Machane rayog ni nge kireban’ e piin nib fel’ yangaren ni yad be lemnag ni dabiyog rorad ni ngar rin’ed e tin nib fel’ mi yad palog ko ulung.

17. Mang fan ni ngada gayed e kanawo’ ni ngan pining e sorok ngak yugu boch e girdi’?

¹⁷ Machane gathi ke mus ni ngan pining e sorok ngak be’ u m’on ni ngan yal’uweg. Ra gel e t’ufeg u lan e tabinaw ara u lan e ulung ni faan yira pining e sorok nrogon, ma piin nib fel’ yangaren ni kan pining e sorok ngorad e yad ra gay e fonow rok e piin ni yad ba ilal ni pumoon nge ppin. Ere gathi yalen ko nam rodad e ra gagiyegnag rogon e ngongol rodad ngak yugu boch e girdi’, ya “thingar don’ed nga dakendad e bin nib beech i gadad ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngodad.” Ere ngada pininged e sorok ngak yugu boch e girdi’ ni bod rogon ni ma rin’ Jehovah.​—Efesus 4:24.

18. (a) Gimed e piin nib fel’ yangaren, susun uw rogon e fonow rok e piin ni yad ba ilal u wan’med? (b) Mang fan ni ma fl’eg i lemnag e piin ni yad ba ilal rogon ni yad ma pi’ e fonow?

¹⁸ Ma gimed e piin nib fel’ yangaren, dab mu lemnag ni dani adag dakenam ni faan yira yal’uwegnem ara fonownagem. (Ecclesiastes 7:9) Danga’! Ya yira non ngom ni bochan e gab t’uf rorad ma yibe tay fam. Faan manga gathi arrogon, ma mang ni yira non ngom. Manang e piin ni yad ba ilal fene ga’ angin e fonow​—ere piin ni piilal ko ulung e yad ma fl’eg i lemnag e thin rorad ma yad ma meybil u m’on ni ngar fonownaged e girdi’ ya yad ba adag ni nge fel’ angin e thin rorad.​—1 Peter 5:5.

“Jehovah E Ri Ma T’ufeg E Girdi’”

19. Mang fan ni rayog rok e piin ni ke kireban’rad ni ngar sapgad ngak Jehovah ni nge ayuwegrad?

¹⁹ Ke dag boch e girdi’ e t’ufeg mar gafgowgad ni bochan, ere yad ma lemnag ni faan yad ra dag e t’ufeg biyay maku ra kireban’rad biyay. Ba t’uf ni ngar gelnaged lanin’rad ma nge gel e michan’ rorad ni fan e ngar daged e t’ufeg ngak yugu boch e girdi’ biyay. Susun dab ra paged talin ni “dariy bagadad nib mal’af Got rok nga orel.” Ma piningdad Jehovah ni ngada chugurgad ngak. (Acts 17:27; James 4:8) Manang Jehovah fadad ni dubdad ni ngada kireban’gad ere ma micheg ngodad ni ra ayuwegdad. Ke micheg David ngodad u lan e psalm ni gaar: “I Somol e ba chugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy.”​—Psalm 34:18.

20, 21. (a) Ke diin ma gad manang nrayog ni nge fel’ e thin u thildad Jehovah? (b) Mang e ba t’uf ni fan e nge fel’ thildad Jehovah?

²⁰ Bin th’abi ga’ fan e ngari fel’ e thin u thildad Jehovah. Rriyul’ ni rayog ni nge fel’ thildad Jehovah, fa? Rayog. Ma tamilangnag e Bible ni ke fel’ thilin e Chitamangidad nu tharmiy nge piin nib mat’aw ni pumoon nge ppin. Bay e thin rorad u lan e Bible ni fan e nge pagan’dad ngay ni ku rayog rodad ni ngada chugurgad ngak Jehovah.​—Psalms 23, 34, 139; John 16:27; Roma 15:4.

²¹ Rayog rok gubin e girdi’ ni ngar folgad ko pi motochiyel rok Jehovah ni fan e nge fel’ thilrad Got. Be gaar David: “Somol, mini’ e rayog ni nge par u lan e tempel rom? Cha’ ni ma fol rok Got u fithik’ urngin ban’en, ma gubin ngiyal’ ni ma rin’ e tin nib mat’aw.” (Psalm 15:1, 2; 25:14) Gad ra pirieg ni bay angin e pigpig ni gad be tay ngak Got ma ma ayuwegdad Got maku ma matanagiydad, ma aram e gad ra nang ni “ri ma t’ufeg Jehovah e girdi’.”​—James 5:11.

22. Uw rogon e thin u thilin e girdi’ rok Jehovah ni m’agan’ Jehovah ngay?

²² Ri gad ba taw’ath ni bochan e ba adag Jehovah ni nge fel’ thildad e girdi’ ni tadenen! Ere susun ni nge bagadad ma nge t’uf bagadad rok, fa? Ra ayuwegdad Jehovah ma rayog ni ngada t’ufeged e pi walagdad ma ngada falfalan’gad ko t’ufeg rorad ngodad. Ma re t’ufeg nem e ban’en nib gagiyel ko fare ulung i walag ni gad e Kristiano. Nap’an nra gagiyeg Gil’ilungun Got ma gubin e girdi’ u fayleng nra un ko re t’ufeg nem ni manemus.

Rayog Ni Ngam Weliy Fan, Fa?

• Susun uw rogon thilin e girdi’ u lan e ulung ni Kristiano?

• Uw rogon nrayog ni nge bagadad e nge ayuweg e t’ufeg ni bay u lan e ulung?

• Uw rogon ni rayog ni nge gel e t’ufeg ni bochan e yira pining e sorok ngak yugu boch e girdi’?

• Uw rogon ni ma ayuwegdad e t’ufeg rok Jehovah ngodad?

[Picture on page 23]

T’ufeg u thilin e pi Kristiano e gathi ke mus ni bochan e ka nog ni ngan rin’

[Pictures on page 24, 25]

Rayog ni ngki “yoor e girdi’” ni ngam t’ufegrad, fa?

[Picture on page 26]

Ga ma gay thibngin e girdi’ fa ga ma pining e sorok ngorad?