‘Marod Ngam Pingeged Yad Ngar Manged Pi Gachalpeg, Mi Gimed Taufenagrad’
“Mmarod ngak girdien e pi nam u gubin yang ni ngam pingeged yad ngar manged pi gachalpeg, mi gimed taufenagrad . . . , mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”—MATTHEW 28:19, 20.
1. Mang e ke turguy e nam nu Israel u enggin e Burey ni Sinai?
GONAP’AN 3,500 e duw e chiney ni ke micheg girdien reb e nam ban’en ngak Got. I muulung piyu Israel u m’on ko Burey ni Sinai, me lungurad: “Bay gu rin’ed urngin e tin ni ke yog Somol.” Ka nap’an e ngiyal’ i nem me mang piyu Israel e girdi’ ni kan ognagrad ngak Got mar manged e “girdi’ ni ke mel’egrad Got.” (Exodus 19:5, 8; 24:3) Rayog ni ngar athapeged ni nge ayuwegrad Got mu ur pared u lan fare binaw ni ‘rib flaab mab yong’ol.’—Levitikus 20:24.
2. Mang e tha’ nrayog u thilin Got nge girdi’ e ngiyal’ ney?
2 Machane i yog Asaph ni ir e en ni yoloy reb e psalm ni “dakur folgad ko fare m’ag ni kar micheged ngak Got, ma dakur ngongolgad nrogon e motochiyel rok.” (Psalms 78:10) Dar folgad ko fare n’en ni ke micheg e pi chitamangirad ngak Jehovah. Munmun ma da ki fel’ thilrad Jehovah. (Eklesiastes 5:4; Matthew 23:37, 38) Ere “ke dag Got nib t’uf rok e piin ni gathi yad piyu Israel, ni fan e ke fek e girdi’ u fithik’rad ni ngar manged girdien.” (Acts 15:14) Ma ngiyal’ ney ko tin tomren e rran e be kunuy Got e “girdi’ ni pire’ ni pire’ ndariy be’ nrayog ni nge theegrad, nra bad u gubin e nam, nge ganong, nge gubin mit e girdi’, ngu gubin e thin” ni be lungurad: “Kanawoen ma gamad thap ngak Got e yib rok e Got romad ni ir e ke par nga tagil’, ma ki yib rok fare Fak e Saf!”—Revelation 7:9, 10.
3. Mang e thingari rin’ be’ ya nge fel’ thilrow Got?
3 Faanra ba adag be’ ni nge un nga fithik’ e piin nib fel’ thilrad Got ma thingari ognag ir ngak Jehovah me un ko taufe ya nge m’ug riy ni ke ognag ir. Nge rin’ ya nge fol ko fare thin ni ke tay Jesus chilen ngak pi gachalpen ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) I motoyil piyu Israel ngak Moses ni i beeg “babyoren fare m’ag u thilin Got nge piyu Israel.” (Exodus 24:3, 7, 8) Ere yad manang e n’en nib mil fan ngorad ni ngar rin’ed ni fan ngak Jehovah. Ere ku arrogon e ngiyal’ ney ni thingari nang be’ e tin nib m’agan’ Got ngay ni bay ko Thin Rok ni Bible u m’on ni nge un ko taufe.
4. Mang e ra rin’ be’ ya nge bung rogon ni nge un ko taufe? (Ba muun ngay e thin u lan ko kahol.)
4 Ba tamilang ni ba adag Jesus ni nge gel e michan’ rok pi gachalpen u m’on ni ngar uned ko taufe. I yog ngak pi gachalpen ni gathi ke mus ni ngar ayuweged yugu boch e girdi’ ni ngar manged pi gachalpen, ya nguun fil ngorad “rogon ni nguur folgad u gubin e tin ni ke yog ngorad ni nguur rin’ed.” (Matthew 7:24, 25; Efesus 3:17-19) Ere piin ni ke bung rogorad ni ngar uned ko taufe e kar filed e Bible ni bokum e pul ara reb fa l’agruw e duw. Ere gathi ban’en ni kan gurgur ngay, ara de nang e n’en ni be rin’. Ma nap’an ni ra un be’ ko taufe ma yira fith l’agruw e deer ngak me yog e arrogon ngay. I yog Jesus ni ‘ke mus ni nge lungum Er rogon fa reb e nge lungum Dangay.’ Ere thingar da fal’eged i lemnag fene ga’ fan e gali deer nem ni yira fith u nap’an e taufe.—Matthew 5:37.
Kalngan’uy nge Ngan Ognagey
5. Mang l’agruw ban’en nib ga’ fan ni be yog e bin m’on e deer ko taufe?
5 Bin som’on e deer ni yira fith ngak e en ni ra un ko taufe e ke kalngan’ ko tin ni ke rin’ ma ke ognag e yafos rok ngak Jehovah ni nge rin’ e tin nib m’agan’ ngay fa. Re deer ney e ra tamilangnag l’agruw ban’en ni thingar ni rin’ u m’on ni ra un be’ ko taufe, ni aram e nge kalngan’ ma nge ognag ir ngak Got.
6, 7. (a) Mang fan ni thingari kalngan’ urngin e piin ni ngar uned ko taufe? (b) Mang boch ban’en nra thil u tomren ni ke kalngan’ be’?
6 Mang fan ni thingari kalngan’ be’ u m’on ni nge un ko taufe? I weliy apostal Paul ni gaar: “Ma bin riyul’ riy e gadad gubin ni ud moyed ni gadad bod yad, ma ud pired ni gadad be ngongol nrogon e tin ni gadad be ar’arnag, ma gadad be rin’ e pi n’en ni ir e mm’agan’ dowdad nge lanin’dad ngay.” (Efesus 2:3) U m’on ni tamilang e tin nib m’agan’ Got ngay u wan’dad ma ku uda ngongolgad nrogon yalen e fayleng. Ma Satan ni ir e got ko re m’ag ney e ir e ki i gagiyegnag e ngongol rodad. (2 Korinth 4:4) Machane tomren ni kada nanged e tin nib m’agan’ Got ngay ma ke mudugil lanin’dad ni nge “par pangidad u n’umngin i nap’an e yafos rodad u roy u fayleng ni Got e be gagiyegnag nrogon ni be finey, ma gathi tin ni ma yim’ e girdi’ ni bochan nde mat’aw u wan’ Got e ir e nge gagiyegnag pangidad.”—1 Peter 4:2.
7 Boor e tow’ath nrayog ni bochan e re kanawo’ ni beech nem ni gad ra un ngay. Bin ni ba ga’ fan e tow’ath nrayog riy e ra fel’ u thildad Jehovah, ma i yog David ni gowa kan piningdad ni ngada uned nga lan e “tempel” rok Got ara “burey rok nib thothup.” (Psalms 15:1) Dabi pining Jehovah yugu be’ ni nge un nga lan tafen ya ke mus ni “cha’ ni ma fol rok Got u fithik’ urngin ban’en, ma gubin ngiyal’ ni ma rin’ e tin nib mat’aw, ma ba riyul’ e thin ni ma yog ma ba yul’yul’.” (Psalms 15:2) Thingar da thilyeged rarogodad ni fan e ngada folgad ko re thin nem nge thil e ngongol rodad nge pangidad. Ma ra be’ ma nge thilyeg e tin nib kireb ni i rin’ kakrom. (1 Korinth 6:9-11; Kolose 3:5-10) N’en ni ra k’aringdad ni ngada thilgad e aram e kalngan’uy ara ngari kireban’dad ko tin ni kada rin’ed kakrom ma ngari mudugil lanin’dad ni nguuda felan’naged Jehovah. Ma aram e ngada pied keru’dad ko ngongol ko re fayleng ney ma ngada leked e kanawo’ nra felan’ Got ngay.—Acts 3:19.
8. Uw rogon ni gadad ra ognagdad ngak Jehovah, ma mang e ra tamilang u nap’an nra un be’ ko taufe?
8 Bang ko fa bin som’on e deer ni yira fith ngak e piin ni yad ra un ko taufe e be fith ko kar ognaged yad ngak Jehovah ni ngar rin’ed e tin nib m’agan’ ngay fa. Thingar ni ognagey u m’on ni ngan un ko taufe. Gadad ra ognagdad u fithik’ e meybil ni gad be ognag e yafos rodad ngak Jehovah u daken Kristus. (Roma 14:7, 8; 2 Korinth 5:15) Ma aram e ra mang Jehovah e Masta rodad ma gad ra felan’ ni ngada rin’ed e tin nib m’agan’ Got ngay ni bod rogon ni i felan’ Jesus ngay. (Psalms 40:8; Efesus 6:6) Ke mus ni taa bayay ni nge ognag be’ ir ngak Jehovah. Goo gimew Jehovah e gimew manang ni kam ognagem ngak, ere n’en ni kam mog u fithik’ e yoor e ra tamilangnag ngak urngin e girdi’ ni kam ognagem ngak e Chitamangidad nu tharmiy.—Roma 10:10.
9, 10. (a) Mang e muun ko ngan rin’ e tin nib m’agan’ Got ngay? (b) Uw rogon ma ki mada’ ko salthaw rok Hitler ma yad manang ni kad ognaged gadad ngak Got?
9 Mang e thingar da rin’ed ni faan gad ra folwok rok Jesus ni gad be rin’ e tin nib m’agan’ Got ngay? I yog Jesus ngak pi gachalpen ni gaar: “Faanra ba adag be’ ni nge un ngog ma thingari pag talin ir, nge fek e kuruth rok nge lekeg.” (Matthew 16:24) Bay dalip ban’en ni yog Jesus ni thingar da rin’ed. Som’on, ma thingar da “paged fadad.” Fan e re thin ney e dab da folgad ko tin ni gad ma ar’arnag ara tin nib kireb ni bay u lanin’dad, machane thingar da folgad ko fonow ara gagiyeg rok Got. Bin l’agruw e thingar da feked ‘fare ley i gek’iy rodad ni fan ko gafgow.’ U nap’an Jesus e yima gafgownag e girdi’ u daken baley i ren ni be yip’ fan e tamra’ nge gafgow. Gad e Kristiano e ba fel’ u wan’dad ni ngad gafgowgad ni bochan fare thin nib fel’. (2 Timothy 1:8) Yugu aram rogon ni ra moningnagdad e girdi’ nu fayleng, ma gad ra rin’ e n’en ni rin’ Kristus ni “daki tafinaynag e tamra’” ya gad ra felfelan’ ni bochan e ke felan’ Got ngodad. (Hebrews 12:2) Ma bin dalip e ‘nguuda leked.’—Psalms 73:26; 119:44; 145:2.
10 Mus rok e piin ni ma togopluw ngak e Pi Mich Rok Jehovah e yad manang ni kada ognaged gadad ngak Got ni ngada pigpiggad ngak. U reb e kalbus u Buchenwald u Germany u nap’an Hitler e immoy boch e Pi Mich Rok Jehovah ni dar n’iged e michan’ rorad, me ere ka nog ngorad ni ngar sayinnaged reb e babyor ni gaar: “Ka gag reb e Mich Rok Jehovah ma dab gu th’ab fare thin ni kug micheg ngak Jehovah.” Ma ku arrogon u wan’ urngin e pi tapigpig rok Got ni kar ognaged yad ngak!—Acts 5:32.
Kan Nang ni Reb e Mich Rok Jehovah
11. Mang boch e tow’ath nrayog ngak e en ni ra un ko taufe?
11 Bin l’agruw e deer ni yira fith ngak be’ ni ra un ko taufe e yira fith ko manang ni taufe ni kan ta’ ngak e be dag ni ir reb e Mich Rok Jehovah. Ma tomren ni ke un ko taufe ma kan dugliy ni nge mang reb e tamachib ni bay e ngochol rok Jehovah u daken. Re n’en ney e reb e tow’ath ni fel’ ma ku bay e maruwel riy ni ra mil fan ngak. Maku rayog e yafos ni manemus ngak e en ni ke un ko taufe ni faanra par nib yul’yul’ ngak Jehovah.—Matthew 24:13.
12. Mang maruwel nib muun ko fare tow’ath ni bay fithingan Jehovah u dakendad?
12 Rib gel e tow’ath riy ni nge par e ngochol rok Jehovah u dakendad. Be gaar Mikah ni profet: “Ra reb e nam ma yad be meybil ma yad be fol rok e birorad e kan, machane gadad e bay ud meybilgad ngak Somol ni Got rodad ma gadad be fol rok ndariy n’umngin nap’an.” (Mikah 4:5) Machane bay reb e maruwel ni kub muun ko re tow’ath ney. Thingar da ngongolgad nrogon ya nga ni pining e sorok ngak e en ni bay e ngochol rok u dakendad. I yog Paul ngak e pi Kristiano nu Roma ni yi ra “yog e thin nib kireb nga fithingan Got” ni faanra dab da folgad ko tin ni gad ma machibnag.—Roma 2:21-24.
13. Mang fan nib mil fan ngak e pi tapigpig rok Jehovah ni kar ognaged yad ngak Got ni ngar weliyed e tin riyul’ u murung’agen e Got rorad?
13 Nap’an nra mang be’ reb e Mich Rok Jehovah, ma ke mil fan ngak ni nge weliy e tin riyul’ u murung’agen e Got rok. I ognag e nam nu Israel yad ngak Jehovah me ere i piningrad Jehovah ni ngar manged e pi mich rok ni fan e ngar micheged ni ir Got. (Isaiah 43:10-12, 21) De rin’ fare nam e n’en ni ke mil fan ngorad ni ngar rin’ed, ere munmun ma dar fel’gad u wan’ Jehovah. Ngiyal’ ney, e kari tow’ath e tin riyul’ e Kristiano ya rayog ni ngar weliyed e tin riyul’ u murung’agen Jehovah. Gad ma rin’ ni bochan e ba t’uf Got rodad ma ri gad ba adag ni ngan tay fan fithingan. Dabiyog ni nge dab da nonad ya gad manang e tin riyul’ u murung’agen e Chitamangidad nu tharmiy nge tin nib m’agan’ ngay. Taareb lanin’dad apostal Paul ni faani gaar: “Ya bbugithin ni ke yog Got ngog ni nggu rin’. Faan mang e da gu machibnag ngak e girdi’ e Thin Nib Fel’ ni yib rok Got ma ri gu ra gafgow!”—1 Korinth 9:16.
14, 15. (a) Mang ayuw ni ma yib rok e ulung rok Jehovah ni be ayuwegdad ni ngki gel e michan’ rodad? (b) Mang ayuw ni bay ni nge ayuweg e michan’ rodad?
14 Bin l’agruw e deer ni yira fith ngak e en ni ra un ko taufe e ma puguran ngak ni kub mil fan ngak ni nge maruwel u taabang ko ulung rok Jehovah, ma be gagiyegnag Jehovah e ulung rok u daken e kan ni thothup rok. Gathi gad be pigpig ngak Got ni goo gad u bayang, ya ba t’uf e ayuw rodad, ma ‘fare ulung i walag’ e ma pi’ e athamgil nga lanin’dad. (1 Peter 2:17; 1 Korinth 12:12, 13) Ba ga’ e ayuw ni ma yib rok e ulung rok Got ni nge ayuweg e michan’ rodad ni nge gel i yan. Ku ma pi’ fare ulung boor e babyor ni ma weliy fan e Bible ni fan e nge tamilangan’dad, ma bay e fonow riy ni ma gagiyegnag e ngongol rodad u nap’an ni bay e magawon rodad, ma bay e thin riy ni ra ayuwegdad ni ngki fel’ e thin rodad Got. “Fare tapigpig nib yul’yul’ mab gonop” e ma ayuwegdad ni bod ba matin ni ma duruw’iy e bitir rok, ya ma pi’ e ggan ni machib ko ngiyal’ ni ngan pi’ riy ni fan e ngki gel e michan’ rodad.—Matthew 24:45-47; 1 Thessalonika 2:7, 8.
15 Yima skulnag e girdi’ rok Jehovah u nap’an e pi muulung rorad ko yu wik ma ku yima pi’ e athamgil nga lanin’rad ni ngar yul’yul’gad ni yad e Pi Mich Rok Jehovah. (Hebrews 10:24, 25) Fare Theocratic Ministry School e ma skulnagdad u rogon ni ngada nonad ngak yugu boch e girdi’ ma fare Service Meeting e ma fil ngodad rogon ni ngada machibgad nrogon. Nap’an ni gad ra un ko pi muulung rodad ngu nap’an ni gad ma fil e Bible ma gad be guy e maruwel rok e kan ni thothup ni be gagiyegnag e ulung rok Jehovah. Pi ayuw ney ni ma yib rok Got e ma ginangdad ko gini bay e riya’ riy, ma ku ma fil ngodad rogon ni ngada machibgad ma ku ma ayuwegdad ni ngada tedan’dad.—Psalms 19:7, 8, 11; 1 Thessalonika 5:6, 11; 1 Timothy 4:13.
N’en ni Ma K’aringdad ni Ngada Uned ko Taufe
16. Mang e ma k’aringdad ni ngada ognaged gadad ngak Jehovah?
16 Fa gali deer ni yira fith ngak e piin ni ra un ko taufe e ma puguran ngorad fene ga’ fan e taufe nge maruwel nib mil fan ngak e piin nra un ko taufe. Ere mang e ma k’aringrad ni ngar turguyed ni ngar uned ko taufe? Gad ma un ko taufe ni gad pi gachalpen Jesus ni gathi bochan e ke towasariydad be’, ya gad ma un ko taufe ni bochan e ke “pow’iydad” Jehovah ngada bad ngak. (John 6:44) “Got e ba t’uf e girdi’ rok” ere ma gagiyeg u fithik’ e t’ufeg ma der ma towasariy e girdi’. (1 John 4:8) Gad ma chugur ngak Jehovah ni bochan e ir e ba gol ma ku ma ngongol ngodad u fithik’ e runguy. Ke pi’ Fak ni maagirag rok ni fan ngodad ma goo tin nib fel’ e mm’agan’ ngay ni fan ngodad. (John 3:16) Re n’en ney e ma k’aringdad ni ngada ognaged e yafos rodad ngak.—Proverbs 3:9; 2 Korinth 5:14, 15.
17. Mang e gathi ir e kada ognaged gadad ngak?
17 Gad ma ognagdad ngak Jehovah ma gathi barba’ i teliw ara barba’ i maruwel. Fare maruwel ni ma pi’ Got ni fan ko girdi’ rok e ra thil, machane n’en ni ke ognag e girdi’ ngak Got e dabi thil. N’en ni yog Got ngak Abraham ni nge rin’ e ba thil ko fare maruwel ni ke pi’ ngak Jeremiah. (Genesis 13:17, 18; Jeremiah 1:6, 7) Machane yow l’agruw ni kar rin’ew e maruwel ni pi’ Got ngorow ni bochan e ba t’uf Jehovah rorow ma yow ba adag ni ngar rin’ew e n’en nib m’agan’ Got ngay u fithik’ e yul’yul’. Ngiyal’ ney ni ngiyal’ ko tomur e ba adag urngin pi gachalpen Kristus ni kar taufegad ni ngar folgad ko motochiyel rok Kristus ni ngan machibnag fare thin nib fel’ u murung’agen Gil’ilungun Got ma ngar ayuweged yugu boch e girdi’ ni ngar manged pi gachalpen Jesus. (Matthew 24:14; 28:19, 20) Gad ra rin’ e re maruwel nem u polo’ i gum’irchadad ma aram e kanawo’ nib fel’ ni ngada daged riy ni ba t’uf rodad e Chitamangidad nu tharmiy ma riyul’ ni kada ognaged gadad ngak.—1 John 5:3.
18, 19. (a) Mang e gad be yog ngak e girdi’ ni yoor u nap’an ni gad ra un ko taufe? (b) Mang e gad ra fil ko bin ni migid e thin ara article?
18 Dabi siy ni ra mab e kanawo’ ko flaab ni boor ni bochan e kada uned ko taufe, machane thingar da fal’eged i lemnag e re kanawo’ nem u m’on ni gad ra un ko taufe. (Luke 14:26-33) Ya taufe e be yip’ fan ni kada turguyed ni ka ba ga’ fan e re maruwel nem nga yugu boch e maruwel. (Luke 9:62) Bin riyul’ riy e nap’an ni gad ra un ko taufe ma gad be yog ngak e girdi’ ni yoor ni: “Re Got ney e ir e Got rodad ni dariy n’umngin nap’an ara manemus. Ir e ra pow’iydad nge mada’ ko ngiyal’ ni gad ra yim’.”—Psalms 48:14, NW.
19 Bin migid e thin e ra weliy yugu boch e deer ni yira fith u murung’agen e taufe. Bay fan ni nge dabi un be’ ko taufe, fa? Bay rogon yangaren be’ fa? Mang e nge rin’ urngin e girdi’ ya ngan tay fan e taufe?
Rayog ni Ngam Weliy Fan?
• Mang fan ni thingari kalngan’ urngin e Kristiano u m’on ni nge un ko taufe?
• Mang e thingar ni rin’ u m’on ni ngan ognagey ngak Got?
• Mang boch e maruwel nib mil fan ngak e piin ni bay fithingan Jehovah u dakenrad?
• Mang e ma k’aringdad ni ngada turguyed ni ngada uned ko taufe?
[Box/Picture on page 13]
Fa Gal Deer Ni Yira Fith Ngak E Piin Ngar Uned Ko Taufe
Kam kalngan’um ko pi denen rom ma kam ognagem ngak Jehovah ni ngam rin’ e tin nib m’agan’ ngay u daken e maligach rok Jesus Kristus, fa?
Ga manang fan ni yira nang ni gur reb e Mich Rok Jehovah ni bochan e kam ognagem ngak ma kam un ko taufe, ma aram e kam un ko ulung rok Got ni fare kan ni thothup e be gagiyegnag, fa?
[Picture on page 14]
Ra ognag be’ ir ngak Jehovah u nap’an ni ra micheg u fithik’ e meybil
[Picture on page 16]
Ra m’ug ni kada ognaged gadad ngak Got ko machib ni gad ma tay