N’en ni Kan Sunmiy e De Sunmiy Be’, Fa?

KE CHUGUR ni nge 150 e duw nap’an ni ke yog Charles Darwin ni n’en nrayog ni nga i par ma be yoor ko gin ni bay riy ara natural selection ni ir e be k’aring feni thilthil nge feni yoyoor rogon e yafas. Machane, fare n’en ni yog u murung’agen e evolution nge rarogon nib thilthil e ke togopuluw e piin ni ke mich u wan’rad ni bay fan rarogon e pi n’en ni kan sunumiy nib fas. Mus ngak boor e scientist ni th’abi llowan’ ni de mich u wan’rad ni pi gamanman nib fas u roy u fayleng e ra sumgad u boch ban’en ma de sunmiy be’ ara evolution.

Pi scientist ney e yad ba togopuluw ko re n’ey, yad be yog ni rarogon yaan e pi n’en ni kan sunumiy e rib puluw nga rogon e pi n’en ni yibe fil u murung’agen e pi n’en nib fas, matheeg, nge llowan’. Yad ma gay rogon ni ngan weliy murung’agen e re n’ey u skul. Fare maluagthin ko evolution e be buch u Meriken, machane ku be buch ni aram rogon u England, Netherlands, Pakistan, Serbia, nge Turkey.

Fare N’en ni Kan Chuweg ni Ke Balyangan’uy Ngay

Ba ga’ ni bay ban’en nib gagiyel ni kan chuweg ko thin ko pi scientist nem. Re n’em e darur weliyed murung’agen e en ni sunmiy e pi n’en nib fas. Ba mich u wan’um ni ban’en ni kan sunmiy nde sunmiy be’? Piin ni yad be togopuluw ko evolution e ra “weliyed murung’agen ara mini’ e en ma sunmiy ban’en,” aray rogon ni yog fare The New York Times Magazine. Be’ nib ta yol ni Claudia Wallis fithingan e yog ni piin ni yad be togopuluw ko evolution e “yad be kol ayuw ni nge dabi un Got ko thin rorad.” Ma fare magazine ni Newsweek e ke weliy ni “thin rorad e dariy ban’en ni be yog u murung’agen ni bay ara mini’ e en ni ta sunmiy.”

Rayog ni ngam nang fan ndariy fan ni ngan gay rogon ndabni fulweg fare deer u murung’agen e en ta sunmiy. Uw rogon nrayog ni ra tamilang i weliy murung’agen rogon e pi n’en ni bay u palpalth’ib nge yafas ni bay riy ni faanra yira mithag ara dab ni weliy murung’agen nge mini’ e en ni sunmiy?

Yooren e girdi’ e ra m’agan’rad ko n’en ni yog apostal Paul ni gaar: “Urngin e naun ma mmudugil ni ba’ be’ ni ir e toy.” (Hebrews 3:4) Ngemu’ me ul’ul Paul ko pi thin ni baaray ni gaar: “Got e ir e ke sunumeg urngin ban’en.” Be piningem e Pi Mich Rok Jehovah ni ngam nang e En Th’abi Salap i Sunumiy Ban’en nriyul’ ni be’. Rayog ni ngam nang murung’agen fithingan nge pi fel’ngin nge n’en ni ke rin’ ko girdi’. U daken e babyor rok ni Bible, e rayog ni ngam guy fan ni gathi kemus ni ngad adaged e pi n’en ni ke sunmiy machane ku thingar da pininged e sorok ngak ni ir e Tasunmiy.​—Psalm 86:12; Revelation 4:11.

[Pictures on page 3]

Charles Darwin e ba mich u wan’ ni n’en nrayog ni nga i par ma be yoor ko gin ni bay riy e be k’aring feni thilthil nge feni yoyoor rogon e yafas

[Credit Line]

Darwin: From a photograph by Mrs. J. M. Cameron/​U.S. National Archives photo