Mu Ayuwegem ko M’ar Nrogon nib Puluw ko Bible

“Thingari t’uf rom Somol, ni ir e Got rom, u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim.”​—MARK 12:30.

1. Mang e immoy nib m’agan’ Got ngay ni fan ko girdi’?

DE UN e m’ar nge yam’ ko n’en nib m’agan’ Jehovah Got ngay ni fan ko girdi’. Nni tay Adam nge Efa nga lan fagi milay’ nu Eden ni ngar ‘ayuwegew ma yow be matangiy’ ni manemus. (Gen. 2:8, 15; Ps. 90:10) Faan gomanga dag e gal mabgol nem e t’ufeg rorow ngak Jehovah ngar folgow u mat’awun ko gagiyeg mi yow par ni yow ba yul’yul’ ngak, ma dab ra m’argow maku dab ra m’ow.

2, 3. (a) Mang wenegan e pilibthir? (b) Mini’ e kireb rok e yam’ ni tay Adam, ma uw rogon ni yira chuweg angin ni ke af ngodad?

² Rib tamilang rogon ni be weliy e Eklesiastes guruy ni 12 murung’agen e “pi rran nge duw” ni kan pilibthir riy ni bochan rarogoy nde flont. (Mu beeg e Eklesiastes 12:1-7.) Llugey ni ke manna’ e kan taarebrogonnag ko floras ko ‘gek’iy ni almond.’ Immoy nib gel ey machane chiney e ke “par ni ke war.” Piin ni ppin ni ka ranod ko winda ni yad be gay e tamilang ma talumor e ra pirieged e be susunnag rogon ko piin ni ke “buugol e changar” rorad. Ma bochan nri ka in nguweley ma ‘ke mo’maw’ rogon ni ngaun yengyeng e ggan.’

³ Gathi aram e n’en nib m’agan’ Got ngay ko som’on. Maku, yam’ ni ke af rok Adam ngodad e bang ko ‘maruwel rok Moonyan’’ nra taleg Fak Got u daken Gil’ilungun fare Messiah. I yoloy apostal John ni gaar: “Ereray fan ni yib i m’ug Fak Got, ni bochan e nge kirebnag e maruwel rok e re moonyan’ nem.”​—1 John 3:8.

Magafan’ Nde Pag Rogon e Ban’en ni Ka Ma Buch

4. Mang ni ma magafan’ e pi tapigpig rok Jehovah nga rarogon fithik’ i dowrad, ma mang e yad manang?

⁴ Ngiyal’ ney e bay boch e pi tapigpig rok Jehovah ni bay e magawon rorad ko m’ar nge pilibthir ni ban’en ni ka ma buch rok e girdi’ ya yad ba tadenen. Magafan’ ni gad be tay nga dowdad ni bochan boch ban’en ni aray rogon e ban’en ni ka ma buch ma kub ga’ angin. Ma gathi gad baadag ni ngad pigpiggad ngak Jehovah ‘u polo’ i gelngidad? (Mark 12:30) Machane, nap’an ni gad be gay rogon ni ngad pired nib fel’ fithik’ i dowdad ma ka gad be gay rogon ni ngad pired nib puluw e tafinay rodad ma ngkud nanged nri buchuuw ban’en ni gad ra rin’ me sowath ni ngad pilibthirgad ara dab ki yib e m’ar ngodad.

5. Mang e gad ra fil ko n’en ni rin’ boch e tapigpig rok Got nib e m’ar ngorad?

⁵ Boor e pi tapigpig rok Jehovah ni yad ba yul’yul’ ni keb e m’ar ngorad. Epafroditus bagayad e pi girdi’ ney. (Fil. 2:25-27) Timothy ni ur machibgow apostal Paul u taabang e boor yay ni i m’ar ko yal rok, ma aram fan ni yog Paul ngak ni nga i unum “buchuuw e wain.” (1 Tim. 5:23) Mus ngak Paul miki yib “ba liliy” ngak nib gel, nrayog ni m’ar u owchen ara ku yugu ba mit e m’ar ndariy e falay riy e ngiyal’ nem. (2 Kor. 12:7; Gal. 4:15; 6:11) Boor yay ni meybil Paul ngak Jehovah ni murung’agen e re “liliy” rok nem. (Mu beeg e 2 Korinth 12:8-10.) De golnag Got e “liliy” rok Paul u daken e maang’ang. Ya ke pi’ gelngin nge yog ni k’adan’ riy. Me m’ug gelngin Jehovah ko n’en nib meewar Paul riy. Gur, rayog nda filed ban’en ko re n’ey?

Dabi Pag Rogon e Magafan’ Rom u Rogon ni Ngam Ayuwegem ko M’ar

6, 7. Mang fan ndabi magafan’dad nga rarogon fithik’ i dowdad nge pag rogon?

⁶ Gad manang ni boor mit e tafalay ni ma un e Pi Mich Rok Jehovah ngay. Fare babyor rodad ni Awake! e bay boch e article riy ni murung’agen e tafalay. Yugu aram rogon ndarur da mon’ognaged ba mit e tafalay, mab fel’ u wan’dad e ayuw nge maruwel ni ma tay e togta. Gad manang ndawor ri’ ni nge par fithik’ i dowey nib fel’. Ere, gad ba gonop nfaanra dabi magafan’dad nga rarogon fithik’ i dowdad nge pag rogon fa yug uda pired ni gad be lemnag. Thingari thil e ngongol rodad ko piin ‘ndariy ban’en ni ke l’agan’rad ngay,’ ma yad be lemnag ni kari mus e yafas aray ma demtrug e re mit i tafalay ni yad ra un ngay ni nge golnag e m’ar rorad. (Efe. 2:2, 12) Dab da kirebnaged e tha’ u thildad Jehovah ni fan e ngad ayuweged e yafas rodad, maku ba mich u wan’dad ni faan gad ra par ni gad ba yul’yul’ ngak Got ma ra yog ngodad e “yafos ni ir e bin riyul’ e yafos,” ni aram e yafas ni manemus u lan e bin nib beech e m’ag.​—1 Tim. 6:12, 19; 2 Pet. 3:13.

⁷ Ku bay reb i fan ndar pag rogon e magafan’ rodad nga rarogon fithik’ i dowdad. Rayog ni nge k’aringdad ngad pired ni kemus ni goo gadad e gad be lemnagdad. I ginangey Paul ko re n’ey u nap’an ni pi’ e athamgil nga laniyan’ piyu Filippi ni ‘nge bagayad mi i lemnag bagayad ngi i ayuweg u rogon nrayog rok, ma gathi go ir e ngi i lemnag ir.’ (Fil. 2:4) Ba puluw ni ngad ayuweged fithik’ i dowdad nib fel’ rogon, machane feni ga’ fan pi walagdad nge piin ni gad be fek e re “thin rok Got ney nib fel’” i yan ngorad e ra talegdad ndab da pired ni kemus ni yigoo rarogon fithik’ i dowdad e gad be lemnag.​—Matt. 24:14.

8. Faanra magafan’dad nga rogon fithik’ i dowdad nge pag rogon ma mang e ra k’aringdad ngad rin’ed?

⁸ Bay e riya’ riy nfaanra mon’eg reb e Kristiano e magafan’ rok nga rarogon fithik’ i dow me pagtalin e pigpig rok ku Jehovah. Ma faanra kud lemnaged rarogon fithik’ i dowdad nge pag rogon ma rayog ni k’aringdad ngaud turguyed e re miti ggan ara tafalay ara falay nra fel’ ngak boch e girdi’. Mu lemnag kenggin e machib ko fapi thin ni yog Paul u murung’agen e re n’ey ni gaar: “Ngam mel’eged e tin ni ir e ba th’abi fel’. Me yog ni um pired ni kam gilafgad nga orel ko urngin mit e kireb nge n’en ni yira yog e tagan riy ngomed ko Chirofen nra sul Kristus riy.”​—Fil. 1:10.

Mang e Kab Ga’ Fan?

9. Mang ban’en nrib ga’ fan ndab da paged talin, ma mang fan?

⁹ Faan gad ra tiyan’dad ko tin nib ga’ fan, ma rayog ni ngad pasiggad ko fare maruwel ni ngan ayuweg e girdi’ nge fel’ thilrad Got. Yima rin’ e re n’ey u daken e machib nge Thin rok Got ni yibe fil ngak e girdi’. Re maruwel n’ey e ra yib angin ngodad nge piin gad ma machibnag. (Prov. 17:22; 1 Tim. 4:15, 16) Fare Wulyang Ntagil’ E Damit nge Awake! e bay yungiyal’ ni yima tay boch e article ngay ni murung’agen boch i walagdad ni Kristiano ni keb ba mit e m’ar nib ubchiya’ ngorad. Pi n’en ney e yu ngiyal’ ma ma yog rogon ni ma athamgil e pi girdi’ nem u fithik’ e pi magawon rorad nem ni yad be gay rogon ni ngar ayuweged boch e girdi’ ngar nanged Jehovah nge tin ke micheg.a

10. Mang fan ni bay rogon e re miti tafalay ni gad ra mel’eg?

¹⁰ Ra keb ba mit e m’ar ngak reb e Kristiano, ma thingari fek “gilban” ko re miti tafalay nra mel’eg ni nge un ngay. (Gal. 6:5) Machane ku thingar dab da paged talin ni bay fan u wan’ Jehovah e re miti tafalay ni gad ra mel’eg. Rogon feni ga’ fan e Thin rok Got u wan’dad e ra k’aringdad ni ngad siyeged boch e tafalay nrayog nda th’abed e motochiyel rok Got riy ni bod boch i kenggin e motochiyel nu Bible ni be palognagdad ko “racha’.” (Acts 15:20) Boch e tafalay e bay rogon ko pig. Dabun Jehovah piyu Israel ni kar digeyed nguur uned nga boch e “madnom” ni bay rogon ko pig. Me gaar: ‘Pi n’en ni gimed be pi’ ngog nib m’ay fan e kug dabuy ni gimed be pi’ ngog. Kar gu dabuy bon e incense ni gimed be urfiy ni fan ngog. Dabkiyog ni gu k’adan’ug ko pi madnom ni gimed be tay ni fan ngog; urngin ni ke kirebnag e denen ni gimed be ngongliy.’b (Isa. 1:13) Ra keb ba mit e m’ar ngodad ma dab da rin’ed ban’en nra magawonnag e meybil rodad ara kirebnag e tha’ u thildad Got.​—Lam. 3:44.

Ba Ga’ Fan ni Ngaud T’ared “Lanin’dad”

11, 12. Uw rogon ma ngad t’ared “lanin’dad” u nap’an ni ngad mel’eged e re miti tafalay ni ngad uned ngay?

¹¹ Nap’an ni gad ra m’ar, ma dab da lemnaged ni nge golnagdad Jehovah u daken e maang’ang, machane rayog ni ngad yibilayed e gonop rok u nap’an ni gad be mel’eg e re miti tafalay ni ngad uned ngay. Susun ni kenggin e motochiyel u Bible e ir e nga i pow’iydad. Faanra rib gel e m’ar rom, mag gay e re togta nra ayuwegem, mag rin’ nrogon nib puluw ko fare thin ni bay ko Proverbs 15:22 (NW), ni gaar: “Dabi yib angin e n’en kan lemnag ni faanra dariy e puruy’, machane ra yoor e piin ni be fonow ma rayog nni mu’nag ban’en.” I tay apostal Paul chilen ngak e piin taareb e michan’ rorad ni ngar ‘t’ared lanin’rad ko tin nde fel’, ma yad ba yal’uw, ma yad be rin’ e tin nib m’agan’ Got ngay u roy u fayleng.’​—Titus 2:12.

¹² Boor e girdi’ ni ke buch rok e n’en ni buch rok be’ ni pin nib m’ar u nap’an Jesus. Gad ra beeg ko Mark 5:25, 26 ni gaar: “Ba’ be’ ni ppin u rom nrib gel e gafgow ni be tay, ya nga ragag nge l’agruw e duw nib m’ar nib molul, ma ke yoor e togta ni be yan ngorad ma der gol. Ke pi’ urngin e salpiy rok nga puluwon e taflay ni yibe ta’ ngak ke m’ay, machane der yodor boch ko liliy rok, ya fini aram e be ubchiya’.” Golnag Jesus e re ppin nem me ngongol u fithik’ e runguy ngak. (Mark 5:27-34) Yu ngiyal’ ma ma math e liyeb ngak boch e Kristiano mar mel’eged boch e tafalay nib togopuluw ko bin nib machalbog e liyor.

13, 14. (a) Uw rogon nra fanay Satan e re miti tafalay ni gad ra mel’eg nge k’aringdad nge dab kud yul’yul’gad? (b) Mang fan ni ngad pired ni gad ba dar ko urngin ban’en ni bay buchuuw i rogon e pig riy?

¹³ Demtrug e n’en nra fanay Satan nge gay rogon ni nge magawonnag e pigpig ni gad be tay. Rogon ni ma fanay e ngongol ndarngal nge chogow ni nge bannag boch e girdi’ ngay e ku aram rogon ni ma gay rogon ni nge k’aring boch e girdi’ ni nge dab kur yul’yul’gad ni bochan boch e tafalay ni gathi rib tamilang rarogon u wan’uy maku bay rogon ko pig. Gad ma meybil ngak Jehovah ni nge chuwegdad rok “Faanem nib Kireb” nge urngin mit e “kireb.” Susun ndab da paged gadad nga tan gelngin Satan ngad uned nga boch ban’en ni bay rogon ko pig.​—Matt. 6:13; Titus 2:14.

¹⁴ I yog Jehovah ngak piyu Israel ndab ra uned ko pig. (Deut. 18:10-12) Uneg Paul e “pig” ko “kireb ni yima ar’arnag.” (Gal. 5:19, 20) Maku ‘piin ni yad ma pig’ e dab ra uned nga lan e bin nib beech e m’ag rok Jehovah. (Rev. 21:8) Ere rib tamilang ni ban’en ni bay buchuuw i rogon ko pig e ba kireb u mit Jehovah.

“Mu Sumunguygad Ngak Urngin e Girdi’”

15, 16. (a) Mang nib t’uf ni ngad gonopgad u nap’an ni gad be mel’eg e re miti tafalay ni ngad uned ngay? (b) Mang fonow ni bay e gonop riy e ke pi’ fare governing body ko bin som’on e chibog?

¹⁵ Rogon nib puluw ko tin ni kad weliyed e faanra kad nanged ba mit e tafalay ni bay rogon ko pig ma gad ba gonop ni ngad siyeged. Gathi bochan ndabiyog ni ngad weliyed rogon ni yima rin’ ba mit e tafalay nge ba mit ma aram e be yip’ fan ni gubin ni bay rogon ko pig. Ra ngad ayuweged dowdad nrogon nib puluw ko Bible mab t’uf ni nge yog e gonop nge tamilangan’ nu Bible ngodad. U Proverbs guruy ni 3 e gad ra pirieg riy e re fonow ni baaray ni gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, . . . Dariy e ngiyal’ ni ngam pithig paam riy nge chuw rom. Ra yib riy ngom ba yafas ni ba fel’ ma ba felfelan’.”​—Prov. 3:5, 6, 21, 22.

¹⁶ Nap’an ni gad be gay rogon ni ngad pired nib fel’ fithik’ i dowdad, maku thingar da kol ayuwgad ndab da kirebniged e tha’ u thildad Got. Ere faanra gad be ayuweg fithik’ i dowdad ma susuna ngad ‘sumunguygad ngak urngin e girdi’’ u rogon e par rodad nib puluw ko pi kenggin e motochiyel nu Bible. (Fil. 4:5) Ba babyor ni pi’ e governing body ko bin som’on e chibog e bay e thin riy ni be fonownag e Kristiano e ngiyal’ nem ni ngar pired u orel ko meybil ko liyos nge racha’ nge ngongol ndarngal. Ba muun ko gi babyor nem e pi thin ni baaray ni gaar: “Gimed ra rin’ e tin nib mat’aw ni faan gimed ra par ni dab mu rin’ed e pi n’ey.” (Acts 15:28, 29) Ko mang kanawo’?

Yibe Ayuweg Fithik’ i Dowey Ma Yibe Lemnag e Ngiyal’ Nra Chuw e M’ar

17. Uw rogon ni ke fel’ rogodad ko fol ni gad be tay ko pi kenggin e motochiyel nu Bible?

¹⁷ Gad gubin nib fel’ ni ngad fithed gadad ni nge lungudad, ‘Ba fel’ u wan’ug angin e fol ni kug tay ko pi kenggin e motochiyel ni murung’agen e racha’ nge ngongol ndarngal, fa?’ Kum lemnag angin nra yib ngodad ni faan gad ra athamgil ngad “pithiged gadad u urngin ban’en ni ma alitnag e dowef nge lanin’uy.” (2 Kor. 7:1) Faan gad ra fol ko Bible u rogon ni ngan par ni yib beech, ma rayog ni ngad siyeged boor mit e m’ar. Ba fel’ rogodad ni bochan e gad be par u orel ko tamagow nge boch e falay nib kireb nra kirebnag fithik’ i dowdad nge tha’ u thildad Got. Kum lemnag angin nra yib ni faan gad ra kol ayuw ko abich nge garbod nib pag rogon. (Mu beeg e Proverbs 23:20; Titus 2:2, 3.) Yugu aram rogon ni kub fel’ ni nge gaman e toffan me gaman rogon e mithmith ni gad be tay, ma faan gad ra fol u rogon ni be pow’iydad e thin ko Bible ma ra yib angin nga dowdad nge tirok Got ban’en.

18. (a) Mang e susun ni nguud lemnaged? (b) Mang yiiy u murung’agen e dowef e rayog ni ngad athapeged ni nge lebug?

¹⁸ Bin th’abi ga’ fan riy e susuna ngad ayuweged gadad ko tirok Got ban’en ma gad gelnag e tha’ u thildad e Chitamangidad ni bay u tharmiy, ni ir Tabolngin e “biney e tamilang nge binem e tamilang” u puluwdad u lan e bin nib beech e m’ag. (1 Tim. 4:8; Ps. 36:9) U lan e bin nib beech e m’ag rok Got, ma ra fel’ rogoy ko tirok Got ban’en mi ki fel’ fithik’ i dowey ni bochan e denen ni kan n’ag fan u daken e biyul ni ke pi’ Jesus. Fare Fak e Saf rok Got, ni aram Jesus Kristus, e ra pow’iydad ko “alublub ni bay e ran ko yafos riy,” me n’ag Got urngin e lu’ u owchedad. (Rev. 7:14-17; 22:1, 2) Ngemu’ ma ka gad ra guy rogon nra lebug fare yiiy ni gaar: “Dariy be’ ni be par u lan e nam rodad ni bay ki yog nib m’ar.”​—Isa. 33:24.

19. Nap’an ni gad be ayuwegdad ko m’ar, ma mang e ba mich u wan’dad?

¹⁹ Ba mich u wan’dad ni ke chugur ni ngan chuwegdad u fithik’ e gafgow, ma gad be sonnag e ngiyal’ nra chuweg Jehovah e m’ar nge yam’. Machane chiney e ba mudugilan’dad nra ayuwegdad e Chitamangidad ni gad ba t’uf rok nge yog nda k’adedan’dad ko m’ar rodad ni bochan e ‘be lemnagdad.’ (1 Pet. 5:7) Ere, ngad ululgad i ayuwegdad ko m’ar machane ngad rin’ed u rogon nib puluw ko Thin rok Got ni kan thagthagnag!

[Footnotes]

Ngan Sul Nga Daken

• Mini’ e kireb rok e m’ar ni ma yib ngodad, ma mini’ e ra chuweg angin e denen ni ke af ngodad?

• Yugu aram rogon ni ka ban’en ni ma magafan’dad nga dowdad, ma mang e ngad siyeged?

• Mang ni bay fan u wan’ Jehovah e re miti tafalay ni gad ra mel’eg?

• Uw rogon nra fel’ rogodad ni faan gad ra fol ko pi kenggin e motochiyel u Bible u rogon ni ngad ayuweged gadad ko m’ar?

[Picture on page 23]

Dan sunmiy e girdi’ ni nguur m’argad ma yad be pilibthir

[Picture on page 25]

Ma pirieg e girdi’ rok Jehovah e felfelan’ ko machib ni yad ma tay ni yugu aram rogon ni ma yib e m’ar ngorad