Tapigpig rok Jehovah nib Fel’ u Wan’

“Baaray e tapigpig rog ni . . . kug turguy ni ir e ba fel’ u wun’ug.”​—ISA. 42:1.

1. Chiney ni ke chugur ko fare Puguran ko yam’ ni tay Jesus, mang athamgil e yibe pi’ nga laniyan’ e girdi’ rok Got ni ngar rin’ed, ma mang fan?

CHINEY ni ke chugur ni ngan madnomnag e yam’ ni tay Kristus, e ba fel’ ni nge fol e girdi’ rok Got ko fonow ni yog Paul ni gaar, “ma gad par ni kad l’eged owchedad ngak Jesus, yi ir e be tor e michan’ rodad ngak ko tabolngin nge yan i mada’ ko tungun.” Miki yog Paul ni gaar: “Mu tafinayniged gelngin e gafgow ni tay, nge rogon ni k’adan, nge gelngin e fanenikan ni tay e piin ntadenen ngak! Ere dabi mulan’med ngam paged gimed.” (Heb. 12:2, 3) Yira fal’eg i lemnag kanawoen e yul’yul’ ni tay Kristus, ni tomur riy me pi’ e yafas rok ni maligach. Ma ra ayuweg e piin kan dugliyrad nge yugu boch e saf ni ngaur ululgad ko pigpig ku Jehovah u fithik’ e yul’yul’ ma ‘dabi chalbarad.’​—Mu taareb rogonnag ko Galatia 6:9.

2. Mang e gad ra fil ko pi yiiy rok Isaiah ni bay rogon ngak Fak Got?

² U daken Isaiah ni profet, e thagthagnag Jehovah boch e yiiy riy ni bay rogon ngak Fak. Pi yiiy ney e ra ayuwegdad ni nguud “l’eged owchedad ngak Jesus, yi ir e be tor e michan’ rodad ngak ko tabolngin nge yan i mada’ ko tungun.”a Pi n’ey e be weliy murung’agen, nge gafgow ni tay, nge murung’agen e liw rok nib Pilung ma Ta Biyul. Pi yiiy ney e ra ayuwegdad nge yoor boch e tamilangan’ rodad u murung’agen e Puguran ko yam’ ni tay Jesus, ni yira madnomnag ko re duw ney ko Aningeg fen e maruwel, April 9, u tomren ni ke aw e yal’.

Kan Nang fare Tapigpig

3, 4. (a) Fare bugithin ni “tapigpig” u lan e babyor rok Isaiah, mang e be yip’ fan? (b) Uw rogon ni ke dag e Bible ko mini’ fare Tapigpig ni bay ko Isaiah guruy ni 42, 49, 50, 52, nge 53?

³ Fare bugithin ni “tapigpig” e boor yay ni ke m’ug ko babyor rok Isaiah. Yu ngiyal’ ma be yip’ fan e re profet nem ni Isaiah. (Isa. 20:3; 44:26) Ma yu ngiyal’ e be yip’ fan fare nam nu Israel, ara Jakob. (Isa. 41:8, 9; 44:1, 2, 21) Machane uw rogon fa tin nib ga’ fan e yiiy ni murung’agen fare Tapigpig ni bay ko Isaiah guruy ni 42, 49, 50, 52, nge 53? Fapi babyor ko Bible nni yoloy nsom’on ni thin ni Greek e kari tamilangnag ko mini’ fare Tapigpig rok Jehovah ni kan weliy murung’agen u lan e pi guruy nem. Be’ nu Ethiopia nib tolang e liw rok ni kan weliy murung’agen ko babyor ni Acts e i beeg reb ko pi yiiy nem me pow’iy Got Philip ni reb e tamachib nge yan ko re moon nem. Tomren ni ke beeg e cha’ nem fare thin nu Bible ni bay ko Isaiah 53:7, 8 me fith Philip ni gaar: “Mog ngog ko mini’ e cha’ ney ni be weliy e profet murung’agen. Ir e be weliy murung’agen ara yugu be’ e be weliy murung’agen?” Ka chingiyal’ nem me yog Philip ni be weliy Isaiah murung’agen Jesus ni fare Messiah.​—Acts 8:26-35.

⁴ U nap’an ni kab bitir Jesus, ma immoy be’ nib moon nib mat’aw ni Simeon fithingan ma bochan gelngin Got me weliy ni “fare tir ni Jesus” e ra mang “tamilang ni nge dag e kanawo’ rom ngak e piin ni gathi yad piyu Israel,” ni bod e yiiy ko Isaiah 42:6 and 49:6. (Luke 2:25-32) Maku reb e, fare gafgow ni tay Jesus ko fare nep’ ni yib e skeng ngak e kun yiiynag ko Isaiah 50:6-9. (Matt. 26:67; Luke 22:63) Tomren e Pentekost ko duw ni 33 u tomren Jesus miki tamilangnag Peter ni Jesus e ir fare “Tapigpig” rok Jehovah. (Isa. 52:13; 53:11; mu beeg e Acts 3:13, 26.) Mang e gad ra fil ko pi yiiy ney ni murung’agen fare Messiah?

Ma Skulnag Jehovah e Tapigpig Rok

5. Uw rogon ni kan skulnag fare Tapigpig?

⁵ Reb ko fapi yiiy rok Isaiah ni murung’agen e tapigpig rok Got e be dag feni fel’ e tha’ u thilin Jehovah nge bin nganni’ i Fak u nap’an ni dawori mang girdi’. (Mu beeg e Isaiah 50:4-9.) Faen Tapigpig e ir e ke yog ni Jehovah e ma skulnag ni gubin ngiyal’ ni gaar: “Gubin e kadbul ni ma pasignag lanin’ug ni nggu motoyil ko n’en ni nge fil ngog.” (Isa. 50:4, BT) Faen ni Tapigpig e i par ni be motoyil ngak Jehovah ma be fol skul rok, me mang gachalpen ni ri ma fol. Rib tow’ath e cha’ ni En ni ke sunmiy e palpalth’ib e ir e skulnag!

6. Uw rogon ni ke dag fare Tapigpig ni ri ma fol ko Chitamangin?

⁶ U lan e biney e yiiy, e be yog fare Tapigpig riy murung’agen e Chitamangin ni “Somol ni Th’abi Tolang.” Re n’ey e be dag ni ke nang fare Tapigpig e tin riyul’ u murung’agen Jehovah ni ir fare Somol ni Th’abi Tolang u palpalth’ib. Me yog murung’agen e Chitamangin ni gaar: “Machane moning ni yad be tay ngog e dariy ban’en nra rin’ ngog, ya Somol ni Th’abi Tolang e be pi’ e ayuw ngog.” (Isa. 50:7, BT) Nap’an ni be sunmiy e palpalth’ib nge girdi’ ma bay Jesus “u tooben [Jehovah] ni bod be’ nib salap i maruweliy ban’en.” Ma faen ‘nib salap i maruweliy ban’en, e i par ni gubin e rran ni be felfelan’ ngak, ma gubin ngiyal’ ni be par rok ni ba felfelan’, ni ba felfelan’ ko fayleng ma ba fel’ u wan’ e girdi’ ni ba’ riy.’​—Prov. 8:22-31.

7. Mang e ke dag nib pagan’ fare Tapigpig ngak e Chitamangin u nap’an ni ra yib e skeng ngak?

⁷ Pi n’en ni fil fare Tapigpig rok e Chitamangin nge t’ufeg rok ngak e girdi’ e ke ayuweg ko togopuluw ni yib ngak nib gel u nap’an ni yib nga fayleng. I par ni be rin’ e tin nib m’agan’ e Chitamangin ngay u fithik’ e felfelan’ ni ki mada’ ko ngiyal’ ni yib e togopuluw ngak nib gel. (Ps. 40:8; Matt. 26:42; John 6:38) N’umngin nap’an ni par Jesus u fayleng ma urngin e skeng ni yib ngak ma i par nib pagan’ ngak e Chitamangin ni ra ayuweg. Rogon ko yiiy rok Isaiah e gaar Jesus: “Got e ba chugur ngog, me ir e bayi micheg ni dariy e kireb rog. Gur ba’ be’ nra gaaran’ ni nge yog ban’en nib tagan ni kug rin’? . . . Somol ni Got e ir e be yoror rog.” (Isa. 50:8, 9) Kari ayuweg Jehovah fare Tapigpig rok nib yul’yul’ u nap’an ni i machib u fayleng, nib puluw nga reb e yiiy rok Isaiah.

Machib ni Tay fare Tapigpig u Fayleng

8. Mang e be micheg ni “ke turguy” Jehovah Jesus ni bod ni yog ko Isaiah 42:1?

⁸ Be yog e Bible ni yib gelngin Got nib thothup ngak Jesus u nap’an nni taufenag ko duw ni 29. Me rung’ag laman e Chitamangin ni gaar: “Ereray Fakag nib t’uf rog, ni kari felan’ug ngak.” (Matt. 3:17) Ere rib tamilang rogon ni yog Jehovah ko mini’ e ‘ke turguy’ ni bod ni yiiynag Isaiah. (Mu beeg e Isaiah 42:1-7.)b U nap’an e machib ni tay Jesus u fayleng, me lebguy e re yiiy ney nib fel’ rogon. I yoloy Matthew boch e thin ni i fanay e thin ko Isaiah 42:1-4 me yog ni pi thin nem e murung’agen Jesus.​—Matt. 12:15-21.

9, 10. (a) Uw rogon ni lebguy Jesus fare thin ko Isaiah 42:3 u nap’an ni i machib? (b) Uw rogon ni fek Jesus i yib e ‘tin nib yal’uw’ u nap’an ni immoy u fayleng, ma wuin e bayi tay e “tin nib yal’uw” nga fayleng?

⁹ Yu girdi’ u fithik’ yu Israel e dariy farad u wan’ e pi tayugang’ ko teliw. (John 7:47-49) Ur gafgownaged e yu girdi’ ngar pared ni kar boded “ba ley i ro’uy ni ke m’ing” ara “ba magal” ni be n’en ni nge math. Machane, Jesus e ma runguy e girdi’ nib gafgow. (Matt. 9:35, 36) Me piningrad ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed.” (Matt. 11:28) Maku, Jesus e ‘be fek e tin nib yal’uw i yib’ ya be fil e motochiyel rok Jehovah ngak e girdi’. (Isa. 42:3) Miki dag nib t’uf ni ngan fanay e motochiyel rok Jehovah nib fel’ rogon ngu fithik’ e runguy. (Matt. 23:23) Ki dag Jesus ni de laniyan’ ya i machibnag e girdi’ nib fel’ rogon nge girdi’ ni gafgow.​—Matt. 11:5; Luke 18:18-23.

¹⁰ Yiiy rok Isaiah e ki yog ni faen ni Jehovah e “ke turguy” e bayi tay e “tin nib yal’uw” nga fayleng. (Isa. 42:4) Dabki n’uw nap’an ma Jesus Kristus ni Pilung e ra lebguy e re n’ey u nap’an ni ra gothey urngin e am ko girdi’ me tay e gagiyeg rok nib mat’aw ngalon. Ma ra yibnag fare fayleng nib beech ni “tin nib mat’aw e ngongol e bay i par riy.”​—2 Pet. 3:13; Dan. 2:44.

“Ba Tamilang” nge “Ba M’ag”

11. (a) Uw rogon ma Jesus e ir e “tamilang ko girdi’ nu fayleng” ko bin som’on e chibog? (b) Ma uw rogon ni ke be par ni aram rogon ke mada’ ko chiney?

¹¹ I micheg Jesus ni ir e “tamilang ngak e pi nam” nib puluw ko thin ni bay ko Isaiah 42:6? Nap’an ni i machib, ma yu Israel e som’on ni machibnag e tin riyul’ ngorad. (Matt. 15:24; Acts 3:26) Machane yog Jesus ni gaar: “I gag e tamilang ko girdi’ nu fayleng.” (John 8:12) Gathi kemus ni bochan ni ke fil ngak e girdi’ e tin riyul’ ma ke mang ba tamilang ngak piyu Jew nge pi nam ya ku ke pi’ e yafos rok nib flont ni maligach ni fan ngak urngin e girdi’. (Matt. 20:28) Tomren ni kan faseg ko yam’, me tay chilen ngak pi gachalpen ni ngar weliyed murung’agen “nge yan i mada’ ko yungi n’en ni yan i mus e fayleng ngay.” (Acts 1:8) Nap’an ni i machib Paul nge Barnabas ma ur fanayew fare yiiy ni bay ko Isaiah 42:6 ni murung’agen fare “tamilang ko girdi’ nu fayleng.” Ma rognew ni re tamilang nem e be yip’ fan e machib ni yow be tay ngak e girdi’ ni gathi yad piyu Jew. (Acts 13:46-48; mu taarebnag Isaiah 49:6.) Re maruwel nem e ka be ulul i yan, ya piin ni kan dugliyrad nge piin nib chag ngorad e ka yad be machibnag e tin riyul’. Ma yad be ayuweg e girdi’ ni nge mich Jesus u wan’rad ni ir fare “tamilang ko girdi’ nu fayleng.”

12. Uw rogon ni ke pi’ Jehovah e Tapigpig rok ni nge mang “ba m’ag ngak e girdi’”?

¹² Ku lan e re yiiy nem, i yog Jehovah riy ngak fare Tapigpig rok ni ke turguy ni gaar: “Kug pi’ gelngim ni ngam guy rogon ngam rin’ e tin nib yal’uw u fayleng. Ngug ngongliy ba m’ag u thilmad urngin e girdi’ ni nggu rin’ u dakenam.” (Isa. 42:6) Me athamgil Satan ni nge kirebnag Jesus ma nge taleg ni dabi mu’nag e machib rok u fayleng. Machane i ayuweg Jehovah nge taw ko ngiyal’ ni kan dugliy ni nge yim’ riy. (Matt. 2:13; John 7:30) Me faseg Jehovah Jesus ko yam’ me pi’ ni “ba m’ag” ngak e girdi’ nu fayleng. Ere fare m’ag e be micheg ni faen ni Tapigpig rok Got nib yul’yul’ e ra par ni ir e “tamilang ko girdi’ nu fayleng,” me ayuwegrad ngar nanged e tin riyul’.​—Mu beeg e Isaiah 49:8, 9.c

13. Uw rogon ni ayuweg Jesus e piin ni yad be par u “fithik’ e lumor” u nap’an e machib rok u fayleng, ma uw rogon ni ka be rin’ e chiney?

¹³ Rogon nib puluw ko re m’ag ney, e faen Tapigpig rok Jehovah ni ke turguy e ra golnag e “pi malmit” ma bayi “chuweg u kalbus e piin ni yad be par riy u fithik’ e lumor.” (Isa. 42:7) Nap’an e machib rok Jesus u roy u fayleng, me rin’ e re n’ey ni gagiyelnag e pi yalen e teliw ni googsur me machibnag fare thin nib fel’ ni murung’agen fare Gil’ilungun. (Matt. 15:3; Luke 8:1) Me chuweg piyu Jew ni kar manged pi gachalpen ko teliw ni googsur. (John 8:31, 32) Maku aram rogon ni i ayuweg bokum milyon e girdi’ ni gathi yad piyu Jew ngar nanged e tin riyul’. Me tay chilen ngak pi gachalpen ni nga ranod ‘ngak girdien e pi nam u gubin yang ngar pingeged yad ngar manged pi gachalpen’ me micheg ngorad ni ‘ba’ rorad, nge yan i mada’ nga tomren e fayleng.’ (Matt. 28:19, 20) Chiney e bay Jesus u tharmiy ni be gagiyegnag rogon e machib u fayleng ni polo’.

Ke tolangnag Jehovah Faen “Tapigpig”

14, 15. Uw rogon, ma mang fan ni ke tolangnag Jehovah faen Tapigpig rok?

¹⁴ Ma ku reb e yiiy u murung’agen faen Tapigpig rok ni Messiah e yog Jehovah ni gaar: “Tapigpig rog e bayi yan i aw nga rogon e tin ni be muruwliy; bayi gilbuguwan mu un tay fan.” (Isa. 52:13) I par Jesus nib yul’yul’ mab sobut’an’ ni fan ko gagiyeg rok Got ni th’abi tolang, miki par nib yul’yul’ ko skeng nib gel ni yib ngak. Ma aram fan ni ke tolangnag Jehovah Jesus.

¹⁵ Ke yoloy apostal Peter murung’agen Jesus ni gaar: “Ke yan nga tharmiy ke yan i par nga ba’ ni mat’aw rok Got, ni ir e be gagiyegnag urngin e engel nge piin ni yad bay u tharmiy ni yad be tay murung’agen ban’en nge piin ni yad be yog e thin.” (1 Pet. 3:22) Ku ke yoloy apostal Paul ni gaar: ‘I par nib sobut’an’ ma be fol rok Got nge yan i mada’ ko ngiyal’ ni yim’ riy. . . . Ereray fan me fek Got Jesus nge tay ni ir e th’abi tolang u tharmiy, me pi’ fare ngochol ngak ndariy reb e ngochol ni ba ga’ ngay, ya nge urngin e piin ni yad bay u tharmiy, nge piin ni yad bay u daken e fayleng,  . . . e ngar tiyed fan fithingan Jesus, ma yad gubin ni bay rogned u fithik’ e girdi’ ni Jesus Kristus e ir e Somol, mi nog e sorok riy ngak Got.’​—Fil. 2:8-11.

16. Uw rogon ni kan gilbuguwannag Jesus ko duw ni 1914, ma mang e ke lebguy ko ngiyal’ nem ke mada’ ko chiney?

¹⁶ Nap’an e duw ni 1914 miki tolangnag boch Jehovah Jesus. I ‘gilbuguwannag’ Jesus u nap’an ni tay nge mang pilung ko fare Gil’ilungun. (Ps. 2:6; Dan. 7:13, 14) Ka aram nap’an, me tabab Kristus i “gagiyegnag e pi toogor” rok. (Ps. 110:2) Som’on me cham ngak Satan nge tirok e engel, me wun’rad nga fayleng. (Rev. 12:7-12) Me maruwel ni ir e bin ga’ e Cyrus, me chuweg Kristus e tin ka bay pi walagen u fayleng u pa’ fare “Babylon nib gilbuguwan.” (Rev. 18:2; Isa. 44:28) Me gagiyegnag fare maruwel ni machib u polo’ e fayleng. Ma angin ni keb e kan kunuy e “piin ni yad ba’” ni kan dugliyrad nge bokum milyon ko fapi “yugu boch e saf.” Pi yugu boch e saf ney e yad ma maruwel fa “chi ulung” u taabang.​—Rev. 12:17; John 10:16; Luke 12:32.

17. Mang e kad nanged ko pi yiiy rok Isaiah ni kad filed ni murung’agen fare “tapigpig”?

¹⁷ Tin kad filed ko pi yiiy ney nib fel’ ko babyor rok Isaiah e ke fel’ rogodad riy. Ya ke ayuwegdad kari fel’ u wan’dad Jesus Kristus ni Pilung nge Tabiyul rodad. Rogon e tay fan ni dag ko Chitamangin u nap’an e machib ni i tay e ke dag rogon e skul ni tay e Chitamangin ngak u m’on ni yib nga fayleng. Ke micheg ni ir fare “tamilang ko girdi’ nu fayleng” ko machib ni i tay nge fare maruwel ni machib ni ir e be gagiyegnag keb i mada’ ko chiney. Bin migid e yiiy ni bay da guyed ni murung’agen fare Tapigpig ni Messiah ni be dag ni bayi gafgow me pi’ e yafas rok ni fan ngodad. Ireray e pi n’en ni thingar da “tafinayniged” e chiney ni be chugur i yan ko fare Puguran ko yam’ ni tay.​—Heb. 12:2, 3.

[Footnotes]

Ngan Sul Nga Daken

• Mini’ fare “tapigpig” ni ka nog ko yiiy rok Isaiah, ma uw rogon ni kad nanged?

• Mang e ke fil fare Tapigpig rok Jehovah?

• Uw rogon ni ke mang Jesus “ba tamilang ko girdi’ nu fayleng”?

• Uw rogon ni kan Tolangnag fare Tapigpig?

[Picture on page 21]

Ke yog Filip ni fare “tapigpig” ni yog Isaiah e Jesus, ni fare Messiah

[Picture on page 23]

Fare Tapigpig ni ke turguy Jehovah ni Jesus e ma runguy e piin ni kar gafgowgad

[Picture on page 24]

Chitamangin Jesus e ke gilbuguwannag ke mang Pilung ko fare Gil’ilungun