Thin rok Jehovah e Ba Fas

Tin Ba Ga’ Fan ko fare Babyor ni Revelation—I

NAP’AN nib kalbus apostal John ko fare donguch nu Patmos, ma ni pilyeg e changar rok me guy 16 ban’en. Me guy e pi n’en ni ra rin’ Jehovah nge Jesus u nap’an fare Rran rok Somol. Ke tabab Gil’ilungun Got ko duw ni 1914 ma ra mus u tungun fare Biyu’ e Duw ko Gagiyeg rok Kristus. Re babyor ney ni Revelation e yoloy John ko duw ni 96 u tomren Jesus e be weliy murung’agen e pi n’en ni ke guy.

Ngad guyed e pi n’en nib ga’ fan ko Revelation 1:1–12:17, ni murung’agen fa medlip ni som’on e n’en ni guy John. Pi n’ey ni guy e ba ga’ fan ngodad ni bochan e bay riy murung’agen e pi n’en ni be buch u fayleng nge mang e ra rin’ Jehovah ngay ni dab ki n’uw nap’an. Piin bay e michan’ rorad ni yad ra beeg murung’agen e pi n’en ni guy John e ra pagan’rad ma yad ra mon’og.​—Heb. 4:12.

“FARE FAK E SAF” E TH’AB FA NEL’ NI M’ON KO FA MEDLIP I HANG

(Rev. 1:1–7:17)

Som’on me guy John Jesus Kristus ma aram mi ni pi’ ngak boch e thin ni nge ‘yoloy nga babyor nge pi’ ngak fa medlip i galesiya.’ (Rev. 1:10, 11) Ma aram ma ki guy tagil’ e pilung u tharmiy. Ma bay Be’ ni ke par ngay ma u ba’ ni mat’aw rok e bay fare babyor ni kan bachiy ni bay medlip e hang riy. Ma en ni “ba’ rogon ni nge guchthuy e pi hang nem” e ke mus ni “fare Layon ni yib ko ganong rok Judah” ara fare ‘Fak e Saf . . . ni medlip e gagey ni ba’ u lolugen ma medlip i lan mit.’​—Rev. 4:2; 5:1, 2, 5, 6.

Bin dalip e n’en ni guy John e be dag ko mang e buch u nap’an ni th’ab “fare Fak e Saf” e bin taareb e hang nge yan i mada’ ko bin nel’ e hang. Ma nap’an ni th’ab e bin nel’ e hang ma aram me yib e durru’ ni ba ga’ me yib fare rran ko damumuw rok Got. (Rev. 6:1, 12, 17) Ma aram ma kun dag ngak ‘aningeg i engel ni bay ko fa aningeg i tabthung nu fayleng’ ni kar taleged fa aningeg i nifeng nge mada’ ko ngiyal’ ni ke m’ay i tay e hang ko fare 144,000 e girdi’. Ma aram me guy e “girdi’ ni ke muulung ni pire’ ni pire’” ni dawor ni tay e hang ngorad ni “kar sak’iygad u p’eowchen tagil’ Got nge fare Fak e Saf.”​—Rev. 7:1, 9.

Fulweg u Boch e Deer ko Bible:

1:4; 3:1; 4:5; 5:6​—Mang e be yip’ fan fare thin ni “fa medlip i kan”? Rogon ni be sap Got ko matheeg ni medlip e be yip’ fan ban’en nib polo’. Ere fare thin ni yan ngak “fa medlip i galesiya” e rib sor fan ngak gubin e girdi’ rok Got ni yad be yib nga taabang e ke pag 100,000 e ulung u ga’ngin e fayleng. (Rev. 1:11, 20) Ere gelngin Got nib thothup e ir e be maruwel ngay nge rin’ e tin nib m’agan’ ngay. Fare thin ni “fa medlip i kan” e be yip’ fan e maruwel rok Got nib polo’ ma be pi’ e tamilangan’ nge tow’ath ngak e piin ni yad be tiyan’rad ko thin rok Got. Re babyor ney ni Revelation e ba ga’ ni be tamilangnag fan fare matheeg ni medlip, ni aram e be yip’ fan ni ra m’unag e tin nib m’agan’ ngay ni immoy ni ‘dan nang fan.’​—Rev. 10:7.

1:8, 17​—Fagal liw ni “fare Alpha nge fare Omega” nge “Tabolngin nge Tungun” e fan ngak mini’? Jehovah e ir “fare Alpha nge fare Omega” ma be dag ni dariy reb e Got ni ba ga’ ngak, ma dariy reb nib m’on rok maku dariy reb nga tomren. I ir e “tabolngin nge tungun.” (Rev. 21:6; 22:13) Yugu aram rogon ni be yog e Revelation 22:13 ni Jehovah e ir e “tabolngin nge tungun,” machane ku be dag ni Jesus e ka bay fan e re liw nem ngak. Ya ir e bin som’on maku ir e bin tomur e girdi’ ni faseg Jehovah ko yam’ ma dabki yim’, ma tin ka bay e girdi’ e ra fasegrad Jesus.​—Kol. 1:18.

2:7​—Mang fan e “Milay’ rok Got”? Pi thin ney e murung’agen e pi Kristiano ni kan dugliyrad ere re n’ey e be micheg ni re milay’ ney e be yip’ fan rarogorad u p’eowchen Got u tharmiy. Piin ni kan dugliyrad ni yad ba yul’yul’ e ra ni tow’athnagrad ni ngar ked wom’engin “fare ke gek’iy ko yafos.” Ma dab kur m’ad.​—1 Kor. 15:53.

3:7​—Wuin e ke fek Jesus “fare kiy rok David,” ma uw rogon ni ke maruwel ngay? Nap’an ni taufenag Jesus u tomren 29 e duw ni kan gargelnag ma aram e kan dugliy ni ir faen ni owchen David ni ra mang Pilung. Nap’an ni yan i par Jesus nga ba’ ni mat’aw rok Got ko duw ni 33 u tomren ni kan gargelnag ma aram min pi’ fare kiy ngak. Ma fin aram e ngiyal’ ni ke yog urngin mat’awun Gil’ilungun Got ngak, ma aram e ke yog ni nge maruwel ko fare kiy. Nap’an e duw ni 1919 ma aram e ngiyal’ ni pi’ fare kiy rok “David” ngak “fare tapigpig nib yul’yul’ mab gonop,” ni yad e piin ni kan dugliyrad ni aram e nge “mil fan urngin ban’en rok” ngorad.​—Isa. 22:22; Matt. 24:45, 47.

3:12​—Mang fan fare thin ni yog Jesus ni “fithingag nib beech”? Re thin ney e bay rogon ngak Jesus ni aram e bay e maruwel nib beech ara boch ban’en ni kan pi’ ngak ni nge rin’. (Fil. 2:9-11) Dariy be’ ni rayog ni nge nang fan e re thin ara re ngochol nem ni yog Jesus ya ke mus ni ir e manang. Ma aram e bod ni ke yoloy nga daken e piin walagen ni yad ba yul’yul’ u tharmiy ya ngar pared nib fel’ thilrad. (Rev. 19:12) Ma aram e be pi’ boch e maruwel rok ngorad.

Tin Gad Ra Fil Riy:

1:3. Bochan ni “ngiyal’ ni bayi m’ug e pi n’ey ni urngin e ke chugur” ma aram e bayi pufthinnag Got e girdi’ rok Satan. Ere rib ga’ fan mab t’uf ni nge tamilangan’dad ma gad fol ko thin ni bay ko Revelation.

3:17, 18. Faanra nge fel’ rogodad ko pi thin ni ke yog Jesus ma ba fel’ ni nge yog fapi “gol ni de maathuk ban’en ngay.” Aram e thingar da athamgilgad ni nge yoor e maruwel nib fel’ ni ngad rin’ed. (1 Tim. 6:17-19) Thingar don’ed e “mad nib wechwech” ni aram e be dag e pow ni gadad be lek Kristus. Ma ngad fanayed boch e falay nga owchedad ni aram e pi fonow ni bay ko Wulyang Ntagil’ E Damit, ya nge yog ni da fal’eged i lemnag e thin rok Got.​—Rev. 19:8.

7:13, 14. Fa 24 e piilal e be yip’ fan 144,000 e girdi’ ni kan dugliyrad ni bay e maruwel rorad u tharmiy ni aram e ngar uned ngak Jesus ko maruwel ni pilung ma ngar ayuweged e girdi’ ni ngar flontgad. Yad be dag yaan e piin ni ke tayrad David ni pilung nu Israel kakrom ni ngar pigpiggad u tempel, ni yad 24 ulung u gubin. Bagayad fapi piilal e dag ngak John ko chon mini’ fapi girdi’ ni pire’ ni pire’. Ere be dag ni pi Kristiano ni kan dugliyrad e ni tabab i fasegrad u ba ngiyal’ u m’on ko duw ni 1935. Mang fan? Kad nanged ni bochan e re duw nem me nang fa piin ni ke dugliyrad Got ni ka yad bay u fayleng ko chon mini’ girdien fare ulung ni pire’ ni pire’.​—Luke 22:28-30; Rev. 4:4; 7:9.

NAP’AN NI TH’AB E BIN MEDLIP E HANG MA ARAM MA NI THOY E BIN MEDLIP E RAPPA

(Rev. 8:1–12:17)

Me th’ab fare Fak e Saf e bin medlip e hang. Ma ni pi’ medlip e rappa ngak medlip e engel. Nel’ ko fapi engel e ra thoyed e rappa rorad ni yad be yog e pufthin ni yira tay ngak “taab guruy ko dalip guruy” ko girdi’ nu fayleng ni aram e Kristiano ni googsur. (Rev. 8:1, 2, 7-12; 9:15, 18) Baaray e n’en ni dag ngak John ko bin lal e n’en ni dag ngak ni guy. Ma aram me longuy fachi gi babyor ni kan bachiy me foleg e tempel. Tomren ni kan thoy fa bin medlip e rappa, me yan lamay ni be gaar: “Ke yib gelngin Somol rodad nge Messiah rok ni ngar gagiyegnigew e girdi’ nu fayleng, ma bayi gagiyegnag ndariy n’umngin nap’an!”​—Rev. 10:10; 11:1, 15.

Fa bin medlip e n’en ni guy John e be tamilangnag e thin ni bay ko Revelation 11:15, 17. Me m’ug ba pow nib ga’ u tharmiy. Me gargelnag fare pin nu tharmiy bochi pagal. Ma aram ma ni chuweg Moonyan’ u tharmiy. Ma ri damumuw ngak fare pin, ma aram me yan ni “nge cham ngak e piin ni yad ba’ ni owchen fare pin.”​—Rev. 12:1, 5, 9, 17.

Fulweg u Boch e Deer ko Bible:

8:1-5​—Mang fan ni daki non be’ u tharmiy, ma mang e ka non’ nga daken e fayleng? Fan daki non be’ u tharmiy e be yip’ fan ni aram e ngan motoyil ko “meybil ni i pi’ e girdi’ rok Got.” Ma ireray e ngiyal’ ni tomren fa bin som’on e mahl u fayleng. De yan e piin ni kan dugliyrad nga tharmiy e ngiyal’ nem. Kar gafgowgad u nap’an e mahl. Mi yad meybil nib gel, ma aram me yib angin e meybil rorad. Me puog fare engel e nifiy nga daken e fayleng ni aram e be yip’ fan ni ke yoor e maruwel ni nge rin’ fapi Kristiano ni kan dugliyrad. Yugu aram rogon ni yad buchuuw machane kar tababnaged e machib u ga’ngin e fayleng ni yad be gagiyelnag Gil’ilungun Got, ma aram ke magawon e Kristiano ni googsur. Thin ko Bible e bod lingan e dirra’ ni be ginang e girdi’, ma be tamilang e thin riyul’ nu Bible ni bod e uluch ni be matmat ramaen. Urngin e pi yurba’ i teliw ni googsur e kan nang e machib rorad ni goo bogi ban’en ni bod rogon e durru’ ni rurug e naun.

8:6-12; 9:1, 13; 11:15​—Wuin e ke fal’eg fa medlip i engel rogorad ni ngar thoyed e rappa? Ma wuin nge uw rogon ni yan lingan fapi rappa? Kar fal’eged rogorad ni ngar thoyed fa medlip i rappa ko duw ni 1919 nge mada’ ko duw ni 1922 ni aram e ngan pow’iy e piin ni kan dugliyrad ni ka yad bay u roy u fayleng. Ma ke yoor e maruwel rorad ni ngar yarmiyed rogon e machib u fithik’ e girdi’ ni yoor maku yad be toy boch e naun ni ngan fal’eg e babyor riy. (Rev. 12:13, 14) Lingan fapi rappa e be yip’ fan e pufthin rok Got ngak e girdi’ rok Satan ni aram e n’en ni be machibnag e girdi’ rok Got ni darur rusgad ni bay e ayuw ko pi engel riy. Be dag nib riyul’ ya ke tabab e re n’ey u nap’an reb e muulung nib ga’ ni kan tay u Meriken ko duw ni 1922 ma ra yan i mus ko fare gafgow ni ba ga’. (Cedar Point, Ohio)

8:13; 9:12; 11:14​—Uw rogon ni yan lingan fa dalip ni tomur e rappa ni be yog e “gafgow”? Fa aningeg ni som’on lingan e rappa e be weliy rogon ni ke m’ug ni ba yam’ ara dariy e tin riyul’ ko pi Kristiano ni googsur, ma fa dalip ni tomur e aram e pi gafgow ni yugu fan nga boch ban’en. Ma Lingan e bin lal e rappa e be yip’ fan ni ke puf rogon e girdi’ rok Got ni ngar ululgad ko machib bayay u nap’an e duw ni 1919 ma kar pasiggad ko machib ma kari gafgow e pi Kristiano ni googsur ya dariy e tin riyul’ rorad. (Rev. 9:1) Ma bin nel’ e be weliy murung’agen e pi tamachib rok Got ni bod ni kar gelgad ma kar tababgad ko machib u gubin yang u fayleng u nap’an e duw ni 1922. Ma lingan e bin tomur e rappa e bay ban’en ni ra rin’ nga tabolngin e Gagiyeg rok Kristus.

Tin Gad Ra Fil Riy:

9:10, 19. Fapi thin ni be pi’ “fare tapigpig nib yul’yul’ mab gonop” ko Bible e bod ni be amithnag e girdi’. (Matt. 24:45) Re thin ney e kan taarebnag ko asmen’ing ni bod e scorpion ni ba’ p’ebuk’ ni ma amithnag e girdi’ ngay, maku yad bod e os ko salthaw ni bay p’ebuk’rad ni bod e porchoyog. Mang fan? Bochan e pi babyor ney e ni yibe fal’eg e be ginangey ko fare “rran rok Jehovah.” (Isa. 61:2) Ere ngad athamgilgad ma gad pasig i wereg e machib ngak gubin e girdi’.

9:20, 21. Boor e girdi’ nib sobut’an’rad ni gathi yad e Kristiano e kar motoyilgad nib fel’ rogon ko pi thin ney. Yugu aram ni gathi gubin e girdi’ ko pi Kristiano ni googsur ara “fa tin ni magey e girdi’” e yad ra adag e tin riyul’, machane ku gad be ulul ko machib.

12:15, 16. “But’”​—e aram e pi n’en u lan e re fayleng ney rok Satan, ara pi am ni be gagiyeg ko pi nam—​ma be pi’ mat’awey ko liyor ni yibe tay. Nap’an e pi rran ko duw ni 1940 ma pi am ney e bod ni ke “fal e but’ l’ugun nge ful’ fapi ran [togopluw] ni keb u l’ugun fare dragon.” Faanra m’agan’ Jehovah ngay ni nge rin’ ban’en ma rayog rok ni nge fanay mat’awen e pi am ni ngar rin’ed e tin nib m’agan’ ngay. Ni bod ni be yog e Proverbs 21:1, BT, ni gaar: “I Somol e ma gagiyegnag laniyan’ ba pilung ni rib mom ni bod ni ma pow’iy woen e lul’.” Re n’ey e ra gelnag e michan’ rodad ngak Got.