Bible e Rayog ni Nge Thilyeg e Ngongol Rok Be’
Mang fan ni reb e ppin e dakir pagan’ ko teliw rok, machane chiney e be fanay boor e tayim rok ni nge ayuweg e girdi’ ngar nanged murung’agen Got? Mang e k’aring reb e pumoon ni ma un ko gosgos ni yima maad’ad riy ni nge adag e gapas? Ma ku mang e k’aring be’ ni ma fanay e drugs, ma ma chingaw, ma ba ta cham ni nge thilyeg e ngongol rok? Mu beeg e n’en ni yad ra yog.
MURUNG’AGEN BE’
FITHINGAN: PENELOPE TOPLICESCU
DUW ROK: 40
NAM ROK: AUSTRALIA
N’EN NI BUCH ROK: KE DABUY E TELIW ROK
YAFAS ROG KAKROM: Kan gargelnageg u Sydney, Australia, machane nap’an ni ke gaman l’agruw e duw rog ma kug warod e tabinaw rog gu pired nga New Guinea. Ke chugur ni nge gaman l’agruw e duw ni gu pired u Rabaul ma meruk e duw ni kug pired u Bougainville. Ngiyal’ nem e dariy e TV u New Guinea, ere gag nga walageg e ba ga’ ni gamow ma yan ko maluk u maday nge ku boch e fafel.
Nap’an ni ke gaman ragag e duw rog ma kug adag ni nggu nang boch murung’agen e teliw. Nina rog e ba Katolik, ere ke yog ngog ni nggu un ngak reb e sibester nguug warow ko fol Bible. Kan taufenageg u nap’an ni ke ragag e duw rog.
Machane nap’an ni kug sulod nga Australia ni ke fel’ yangareg ma ke yib ngan’ug boch ban’en ni kug filed ko fol Bible. Nap’an ni gu ba’ u high school ma kug fil murung’agen boch ban’en ni buch kakrom, ma gamow e chitamag e kug weliyew nib n’uw nap’an rogon ni sum e pi teliw nge thin nu Bible. Ma gamow be lemnag ni thin nu Bible e de riyul’ e ngiyal’ nem. Munmun mug dabuy e Katolik.
Nap’an ni 16 e duw rog me dar e gallabthir rog. Ke gafgow e nina rog, ma munmun mu gu wan gu par ko papa rog nge yugu reb e ppin. Fare pagal ni walageg nga nina romow e ka ranow ra pirew nga bang. Ngiyal’ nem e kari kireban’ug. Ke yan l’agruw e duw ma fini fel’ e tha’ u thilmow e nina’ rog bayay. Kug tabab ni nggu un ko chingaw, nge fek e drugs, mur ni ke pag rogon. Kug tal ko skul, mug un ko maruwel, ma kug un ko ngongol ni darngal.
Nap’an ni ke gaman 25 e duw rog ma aram e ke yib ngan’ug e thin nu Bible bayay. Kug pirieg yugu reb e maruwel ma gamow mada’ Liene ni reb e ppin ni gubin ngiyal’ ma ba gol ko ani ga’ ko maruwel rok ni yugu aram rogon nib kireb e ngongol rok ngak. Kug fith ko mang fan ni be par nib gol ko ani ga’ ko maruwel rok. Me yog ni bochan e be fil e Pi Mich Rok Jehovah e Bible ngak ma be guy rogon ni nge fol riy. Ke yog Liene ni baadag ni nge fil e Bible ngog. Kug lemnag nrayog ni nggu fil urngin ban’en u Bible u lan taareb e awa. Ere fulweg urngin e deer rog u lan dalip e awa. Ma kug gin ya be fanay e Bible u nap’an ni be fulweg e pi’ deer rog.
Ke yib ngan’ug nnap’an ni gu be yan u karrow rog e re nep’ nem kug damumuw ngak Got ya de fil ngog e tin riyul’ u murung’agen kafram. Gu manang ni Pi Mich Rok Jehovah e yad ma guy rogon ni ngar folgad ko pi n’en ni bay u Bible ma kug lemnag ni dabiyog ni nggu thilyeg e ngongol rog. Ug lemnag ni dabiyog ni nggu un ko machib u mit e tabinaw i yan ni bod ni yad ma rin’, ma aram mu gu lemnag ni nggu tal i fil Bible. Machane kug pag ni nguur filed e Bible ngog ya gu baadag ni nggu pirieg e oloboch ko machib rorad, machane da gu pirieg reb.
ROGON NI KE AYUWEGEG E BIBLE NI NGGU THILYEG E NGONGOL ROG: Nap’an ni be yoor i yan e tamilangan’ rog ko motochiyel u Bible ma gubin ngiyal’ ni ma magawonnageg e nangan’ rog. Ere kug dugliy ndab kug fanay e drug. Machane kug wan nga reb e nam ma aram mug tabab ni nggu un ko chingaw nge mur ni ke pag rogon. Ngiyal’ ni gu ra guy rogon ni nggu fol ko thin nu Bible machane dar yog ya gu be sul nggu rin’ e ngongol nib kireb. Gu ma meybil ngak Jehovah machane kug be par nib kireban’ug.
Nap’an ni kug fil murung’agen e n’en ni buch ku David nge Bathsheba nge rogon ni ke runguyrow Jehovah, aram me pi’ e athamgil nga lanin’ug. De gay David e tawey u fan ni ke oloboch ya ke fol ko fonow u fithik’ e sobut’an’. (2 Samuel 12:1-13) Gubin ngiyal’ ni gu ra rin’ e kireb ma gu ma lemnag e n’en ni ke buch rok David ma aram e ke mom ngog ni nggu wenig ngak Jehovah. Machane kug dugliy ni nggu meybil u m’on ni nggu rin’ e kireb ma aray e n’en ni ke ayuwegeg.
ROGON NI KE YIB ANGIN NGOG: Gub ta damumuw kafram. Machane fare thin u Efesus 4:29-31 e ke ayuwegeg ni dab gu ‘damumuw’ ma kug nang rogon ndab ku gog e thin ni kireb. Ma thin rok Jesus ni gaar, Ke mus ni nge lungum “Er rogon” fa reb e nge lungum “Dangay” e ke ayuwegeg ni nggu nang rogon ni nggu dugliy ban’en.—Matthew 5:37.
Nina’ rog e ke yog ngog ni dab gu cheg ngak e pi mich rok Jehovah machane munmun me yog ngog ni ke felfelan’ ko n’en ni kug rin’. Mi ki gaar, “Gu manang ni kam thilyeg e ngongol rom ni bochan e n’en ni kam fil u murung’agen Jehovah.” Kar gu felfelan’ u nap’an ni non ngog ni aram rogon.
Chiney e kug nang ni bay fan e yafas rog. Mereb e duw ni gamow e pumoon rog e gamow ma un ko machib ni gubin ngiyal’. Gu manang ni aray e maruwel ni gu ma rin’ ni rib fel’.
MURUNG’AGEN BE’
FITHINGAN: DENIS BUSIGIN
DUW ROK: 30
NAM ROK: RUSSIA
N’EN NI BUCH ROK: MA UN KO KARATE
YAFAS ROG KAKROM: Kan gargelnageg u Perm’ ma kug ilal u Furmanov nreb e mach u Ivanovo, Russia ni gonap’an 40,000 e girdi’ ni ma par u rom. Furmanov e reb e binaw nib fel’ yaan ma boor e gek’iy riy ni ma thil raen yuwan nge rowrow nge magchol u nap’an e September nge mada’ ko December. Nap’an e pi duw ni 1980 nge 1990 me gel e kireb u lan e re mach nem. Tabinaw romad e ba gafgow ma buchuuw e salpiy ni ma yog ngomad, ma gamad ma par u lan reb e apartment ni taareb e singgil ni yima mol riy ere rib apinpin.
U nap’an ni ke medlip e duw rog mug un ko karate. Ri gu baadag ni nggu un ko re n’ey. Gubin ngiyal’ nra dariy e maruwel rog ma gu ma yan nga tafen e gosgos, ere urngin e fager rog e girdien e gosgos. U nap’an ni 15 e duw rog ma ke yog bang e leed nib rowrow ngog, tomuren reb e duw ma ke yog bang e leed ngog nib raen but’. Kug un nga reb e ulung ko karate u nap’an ni immoy e pinow riy u Russia nge Eurasia. Kug guy ni rayog ni nge gilbuguwag, machane nap’an ni ke 17 e duw rog ma ke yib e magawon ngog.
Gamad e pi fager rog e kug rin’ed reb e kireb min kalbusnagmad. Kan dugliy ni ngan kalbusnageg u lan l’agruw e duw. Mo’maw’ e par u kalbus, machane nap’an ni gu bay u kalbus ma aram e som’on ni kug guy e Bible. Kug beeg e Genesis, Psalms, nge pi thin ni bay ko Matthew nge mada’ ko Revelation. Maku ke mit ngog fare meybil rok Somol ma gu ma fek e re meybil ney ni gubin e nep’ u m’on ni nggu mol, ya gu ma lemnag ni rayog ni nge ayuwegeg.
Kug chuw u kalbus ko duw ni 2000, mug lemnag ni yafas rog e dariy fan. Ere kug tabab ni nggu fanay e drugs. Ngiyal’ nem me yim’ e nina’ rog. Rib t’uf rog e nina’ rog ere kari kireban’ug u nap’an ni ke yim’. Machane, ke yog ni nggu palog ko drugs mug un bayay ko gosgos. Ngemu’ kugu wan nga Ivanovo mu gu un ko maruwel u reb kantin u rom. En tolang ko re kantin nem e reb e Mich Rok Jehovah. Ke fil ngog boch e thin nu Bible me yarmiy yugu reb e Mich Rok Jehovah ni nge fil e Bible ngog ni gubin ngiyal’.
ROGON NI KE THILIYEG E BIBLE E NGONGOL ROG: Nap’an ni gu be fil e Bible ma kar gu felfelan’ ni kug nang nib m’agan’ Got ngay ni ngan fal’eg e fayleng nge mang ba paradis. Gu baadag ni nggu rin’ e n’en nib t’uf ni ngan rin’ ya nge yog e re flaab nem ngog boch nga m’on. Ma de n’uw nap’an ma kug nang ni bay e motochiyel rok Jehovah ni thingar ni fol riy. Kafram e ba ga’ ni kemus ni gag e gu ma lemnageg. Machane kug fil ni baadag Jehovah ni nggu lemnag rarogon boch e girdi’, ma nggu maruweliy ni nge yog ngog e pi fel’ngin ni bod e gol, t’ufeg, nge gapas.
Nap’an ni kug fl’eg i lemnag urngin ban’en nib fel’ ni ke rin’ Jehovah ngog ni bod rogon ni pi’ fak nib t’uf rok ni maligach, ereray e n’en ni ke k’aringeg ni nggu thilyeg e ngongol rog. Kug fil ko Psalm 11:5 ni dabun Jehovah e cham, ere kug tal i yaliy e TV ni yaan e cham. Ma kug tal ko fare karate ni yugu aram rogon nib mo’maw’ rog. Fare thin nu Bible ko 1 Korinth 15:33 e ke ayuwegeg ni nggu mel’eg e piin ni nggu chag ngorad. N’en ni buch rog ni kan kalbusnageg e be dag nriyul’ e re n’ey. Ere kug dugliy ni dab kug chag ko piin ni yad ma un ko gosgos ni yima cham riy.
ROGON NI KE YIB ANGIN NGOG: Bochan ni kug chag ngak e Pi Mich Rok Jehovah nge fol Bible ma ke ayuwegeg ni nggu mang be’ nib yul’yul’. Kug fil ko n’en ni be yog u Hebrews 13:5 ni nge fel’ u wan’dad e tin bay rodad ma dabi m’on e salpiy u wan’dad. Re fonow ney e ke ayuwegeg ni nggu pag e moro’ro’ nge malulfith.
Gubin ngiyal’ ni gub adag ni bay e fager rog. Machane, kug guy ni ke kireb e tha’ u thilin e pi tafager ni bochan e chogow ara marus. Pi Mich Rok Jehovah e dawor ra flont gad machane, yad ma tayfan e motochiyel rok Got ma yad ma ngongol ngak boch e girdi’ u rogon nib puluw ko pi motochiyel nem. Ma bay boch i yad ni kar manged e fager rog nib fel’.
Rayog ni nggog ko uw rogon e yafas rog ni faan gomanga da gu fil e Bible. Sana kan kalbusnageg bayay ara kug gafgownag boch e girdi’. Machane chiney e kug pirieg reb e ppin nib manigil, bay l’agruw e pagel ni fakmow ma gamad ma felfelan’ ni nggu ayuweged boch e girdi’ ni ngar nanged murung’agen Got.
MURUNG’AGEN BE’
FITHINGAN: JOSÉ CARLOS PEREIRA DA SILVA
DUW ROK: 31
NAM ROK: BRAZIL
N’EN NI BUCH ROK: BE’ NIB TA CHAM
YAFAS ROG KAKROM: Kug ilal u reb e binaw u Americana, São Paulo nib alit ma ma par e girdi’ nib gafgow riy. Dariy e ran nib beech ni rayog ni ngan unum. Re binaw nem e yima nang ni girdi’ ni ma par riy e yad ba kireb ma yad ba ta cham.
Gag be’ ni gub ta damumuw ma gu baadag e cham. Gubin ngiyal’ ni gu ma un ko cham, aram fan ni ma rus e girdi’ ngog. Rogon e mun mad rog nge ngongol rog e ma k’aring e marus ko girdi’. Gu ma chingaw nga mada’ ko ngiyal’ ni kug aw, ma kug ma fanay e drugs ni bod pi walageg ni pumoon. Ni yugu aram rogon ni ke yim’ reb i walageg ni bochan ke fanay e drugs nib pag rogon.
ROGON NI KE THILIYEG E BIBLE E NGONGOL ROG: Nap’an ni gu mada’nag e Pi Mich Rok Jehovah, mar daged ngog u Bible ni ra fal’eg Got ere fayleng ney nge mang ba paradis. (Luke 23:42, 43; Revelation 21:3, 4) Ma kug fil ni piin nib yam’ e dariy ban’en ni yad manang ere dar ma gafgownag Got e girdi’ ni kireb u fithik’ e nifiy. (Eklesiastes 9:5, 6) Kari fal’eg e pi thin ney lanin’ug. N’en ni kug fil u murung’agen Got e ke k’aringeg ni nggu thilyeg e ngongol rog. Machane de mom ni nggu tal i fek drugs, unum nib pag rogon,cham, nge nggog e thin nib kireb.
Machane thin rok Paul u 1 Korinth 6:9-11 e kari pi’ e athamgil nga lanin’ug. Re thin nu Bible ney e be dag ni boch e Kristiano kakrom e ur moyed nib kireb e ngongol rorad ni bod gag. Machane pi thin ney e be gaar: “Ba’ boch i gimed ni immoy ni aram rogon. Machane ke n’ag Got fan e denen romed ke beechnagmed; ma ka ni pi’med ngak Got; ma ka ni mat’awnagmed ngak Got u daken fithingan Somol Jesus Kristus” ngu daken gelngin Got. Pi thin n’em e ke pi e athamgil nga lanin’ug nrayog nggu thilyeg e ngongol rog nge yog ni nggu felfelan’nag Got.
Nap’an ni kug chag ngak e Pi Mich Rok Jehovah ma ke mich u wan’ug ni aram e bin riyul’ e teliw. Yad manang e ngongol rog kafram, machane kar adaged ni nggu chag ngorad.
ROGON NI KE YIB ANGIN NGOG: Faan mang e da gu fil e Bible nggu thilyeg e ngongol rog ma sana ku gum’. Kug ayuweg reb i walageg ke fil e Bible me tal i fanay e drugs. Ma kug pi’ e athamgil nga laniyan’ boch e girdi’ rog yad be fil e Bible e chiney. Kari gu felfelan’ ni kug ognag e yafas rog ngak fare Got nri ma lemnagdad!
[Blurb on page 24]
“Machane kug dugliy ni nggu meybil u m’on ni nggu aw ko kireb ma aray e n’en ni ke ayuwegeg”