Mu Folwok rok Jesus​—Mu Athamgil ni Ngam Machib ma Dabmu Rus

“Got rodad e pi’ e athamgil nga lanin’mad ni nggu weliyed ngomed e Thin Nib Fel’ ni yib rok.”​—1 THESS. 2:2.

1. Mang fan ni susun e nge adag e girdi’ fare thin nib fel’?

RIB manigil ni ngan rung’ag murung’agen ban’en nib fel’! Machane fare thin nib fel’ ni murung’agen Gil’ilungun Got e ir e th’abi fel’ ni ngan rung’ag. Re thin nib fel’ ney e ma micheg ngodad ni ra chuweg Got e gafgow, m’ar, amith, kireban’ nge yam’. Be dag e kanawo’ nrayog e yafas ni manemus nge tin nib m’agan’ Got ngay maku be dag rogon ni ngad t’ufeged Jehovah me fel’ thildad. Sana ga ra lemnag ni ra felfelan’ gubin e girdi’ ni yad ra rung’ag e re thin nib fel’ ney ni i machibnag Jesus. Machane gathi aram rogon ni gad be guy.

2. Mu weliy fan fare thin ni yog Jesus ni: “Ku gub ni nggu pingeg e bitir ni pumoon ngar togopuluwgad ngak e chitamangirad.”

² Gaar Jesus ngak pi gachalpen: “Dab mfiniyed ni ku gub ni nggu fek e gapas i yib nga fayleng; danga’, gathi gub ni nggu fek e gapas i yib, machane ba sayden e kug fek i yib. Ya ku gub ni nggu pingeg e bitir ni pumoon ngar togopuluwgad ngak e chitamangirad, ma ku er rogon e bitir ni ppin ni ngar togopuluwgad ngak e chitiningrad, nge leengin be’ ngak e chitiningin figirngin; pi toogor rok be’ nth’abi ga’ e ra yan i aw ni girdi’ nu lan e tabinaw rok.” (Matt. 10:34-36) Susun ni nge adag e girdi’ fare thin nib fel’, machane boor e girdi’ ni dabun. Boch e girdi’ e ma togopuluw ko piin ni yad ma machib nib muun e girdi’ rorad ngay.

3. Mang e ba t’uf ni nge yog ngodad ya ngad machibgad nib fel’ rogon?

³ Gadad ma machibnag e tin riyul’ ni bod rogon ni i rin’ Jesus, ku ma fanenikaydad e girdi’ u nap’an ni yad ra rung’ag fare thin nib fel’ ni gad be weliy. Ra i buch e re n’ey. Be gaar Jesus ngak pi gachalpen: “Dariy reb e sib ni ba ga’ ngak e masta rok. Faanra kar gafgownaged gag, ma bay kur gafgownaged gimed.” (John 15:20) Boor e binaw e gathi ri yima togopuluw nib gel, machane daburad ni ngar nonad ngodad. Ere thingarda gelniged e michan’ rodad ma da k’adedan’dad ya nge yog ni da machibnaged fare thin nib fel’ ni dabda rusgad.​—Mu beeg e 2 Peter 1:5-8.

4. Mang fan nib t’uf rok Paul ni nge athamgil nge dabki rus u nap’an ni i machib?

⁴ Sana yu ngiyal’ ma ga ra pirieg nib mo’maw’ ni ngam un ko machib fa ga be rus ni ngam machibnag be’. Machane gathi kemus ni yigoo gur e ga ma rus ni ngam machibnag fare thin nib fel’. Apostal Paul e i athamgil ni nge dabi rus ma ba salap i machibnag e tin riyul’, machane bay yu ngiyal’ ni i yib e magawon ngak ni nge machib. Yog Paul ngak e pi Kristiano u Thessalonika ni gaar: ‘Gimed manang rogon e gafgow ntay ngomad nge thin nib kireb ni unog ngomad u Filippi u m’on riy ndawor gu bad ngomed nga Thessalonika. Machane Got rodad e pi’ e athamgil nga lanin’mad ni nggu weliyed ngomed e Thin Nib Fel’ ni yib rok, ni yugu aram rogon gelngin e togopluw ni yibe tay ngomad.’ (1 Thess. 2:2) Ni gafgownag Paul nge Silas u Filippi nib elmerin, un toyrow ko dimow mi nin’row nga kalbus. (Acts 16:16-24) Machane kar ‘athamgilgow’ ni nge dabkur rusgow mar ululgow ko machib. Ere uw rogon ni ngad rin’ed e re n’em? Rayog rodad ni faan gad ra guy e pi n’en ni ke ayuweg e pi tapigpig rok Got kakrom ni ur athamgilgad ni dabkur rusgad ni ngar machibniged e tin riyul’ u murung’agen Jehovah. Ngada guyed ko uw rogon ni gad ra folwok ko pi girdi’ nem.

Ngan Athamgil Ma Dab ni Rus ko Togopuluw

5. Mang fan ni piin nib yul’yul’ ngak Jehovah kakrom e thingar ra athamgilgad ni dab ra rusgad?

⁵ Jesus e ke dag e bin th’abi fel’ e kanawo’ ni ngad athamgilgad ma dab kud rusgad. Nap’an ni sum e girdi’, mab t’uf ko piin nib yul’yul’ ngak Jehovah ni ngar athamgilgad ma dab rusgad. Mang fan? Tomren fare togopuluw ni tay ngak Jehovah u Eden ma aram me yog ni ra fanenikay me par nib toogor e piin ni ma pigpig ngak Got nge piin ni ma pigpig ngak Satan. (Gen. 3:15) Re fanenikay nem e yib i m’ug u nap’an ni li’ Kain Abel ni walagen nge yim’. Boch nga tomren u m’on ko fare day ni tharey e fayleng ma i fanenikay e girdi’ Enok ni i par nib yul’yul’ ngak Got. I yog Enok ni ra yib Got nge bokum biyu’ e engel rok ni ngar pufthinniged urngin e girdi’ ni dariy fan Got u wan’rad. (Jude 14, 15) Re thin nem e de ga’ fan u wan’ e girdi’ e ngiyal’ nem. Ke fanenikay e girdi’ Enok ma yad baadag ni ngar lied ngem’, ma aram me ngochnag Jehovah e yafas rok. Kari athamgil Enok ni nge par ni dabi rus!​—Gen. 5:21-24.

6. Mang fan nib t’uf ni nge athamgil Moses ni nge dabi rus ni nge non ngak Farao?

⁶ Maku mu lemnag Moses ni de rus ni nge non ngak Farao ni ir be’ ni yima lemnag ni ir ba got, ni fak Ra nreb e got nu Egypt. Ma i liyor ko liyos ni yaan ni bod fa tinem e Farao ni ur liyorgad ko liyos ni yaarad. Ma ra yog ban’en ma thingar ni fol riy. Ba gel e thin rok ma ba tolangan’ ma dabun ni nge yog be’ e n’en ni nge rin’. Machane Moses e ba sobut’an’ ma i sul ngak Farao ni yugu aram rogon ni ma nang ni dabun Farao ni nge motoyil ngak. Mang e yog Moses ngak Farao? Ke yog ni bay yib e gafgow ngak piyu Egypt. Ma mang e baadag ni nge rin’ Farao? Baadag ni nge pag Farao bokum milyon e sib rok! Ere mang e ba t’uf ni nge rin’ Moses? Ba t’uf ni nge athamgil ni nge dabi rus!​—Num. 12:3; Heb. 11:27.

7, 8. (a) Mang boch e togopuluw ni ke yib ngak boch e girdi’ kakrom? (b) Mang e ke ayuwegrad ni ngar athamgilgad ni dab rusgad ma ra liyorgad ngak Got?

⁷ Pi profet nge pi tapigpig rok Got nib yul’yul’ u m’on ni yib Jesus e ur athamgilgad ni ngar pared ni yad be liyor ngak Got. I togopuluw e girdi’ rok Satan ngorad. Be gaar Paul: “Ma un malangnagrad ngar m’ad, ma un goloyochiy boch i yad nge ruw ley, ma boch i yad e un li’ ko sayden. Ma u ranod i yan ni keru’ e saf nge kaming e ka ron’ed ni mad, ni kar gafgowgad, ma yibe gafgownagrad, ma ba tagan e ngongol ni yibe rin’ ngorad.” (Heb. 11:37) Ere mang e ke ayuweg e pi tapigpig rok Got e ngiyal’ nem ni ngar pired ni yad ba gel? Ke yog Paul u boch e verse u m’on ko mang e ke pi’ e athamgil ngak Abel, Abraham, Sarah nge ku boch e tapigpig rok Got. Be gaar: “De yog ngorad ko biney e tamilang e pi n’en ni yog Got ni bayi pi’ ngorad, machane ra changargad u urel mi yad guy e tin ni ke yog Got ni bayi pi’ ngorad mi yad felfelan’ ngay.” (Heb. 11:13) Ere dariy e maruwar riy ni pi profet ni bod Elijah nge Jeremiah nge boch e tapigpig rok Got u m’on ni yib Jesus e ra athamgilgad ni nge dab rusgad ni ngar liyorgad ngak Got, ya ke pagan’rad ko pi n’en ni ke micheg Jehovah.​—Titus 1:2.

⁸ Pi tapigpig rok Got e ngiyal’ nem u m’on ni yib Jesus e ur sapgad ko pi n’en ni bay nga m’on. Nap’an ni ra ni fasegrad ma yad ra flont ma “bay ra pired ni gathi yad e sib rok e wod” ni bochan e bayi gagiyegnagrad Jesus nge fare 144,000. (Rom. 8:21) Ere ke athamgil Jeremiah nge boch e tapigpig rok Jehovah kakrom ni nge dab rusgad ni bochan e n’en ni ke micheg Got ngorad, ya micheg ngak Jeremiah ni gaar: “Dabiyog rorad ni ngar gelgad ngom, ya bay gu un ngom nguug yoror rom. I gag Somol e gu be non.” (Jer. 1:19) Ere ku arrogodad e ngiyal’ ney ni faanra da tedan’dad ko pi n’en ni ke micheg Got ni bay nga m’on ma rayog ni mich u wan’dad ni ra ayuwegdad e thin rok Got ngad pired ni gad ba gel.​—Prov. 2:7; mu beeg e 2 Korinth 4:17, 18.

T’ufeg e K’aring Jesus ni Nge Machib ni De Rus

9, 10. Mang boch e kanawo’ ni dag Jesus riy ni de rus ngak e (a) pi tayugang’ ko teliw, (b) pi salthaw, (c) pi prist nib tolang, (d) Pilate?

⁹ Boor e kanawo’ ni ke dag Jesus ni de rus. Piin nib tolang e liw rorad nge boch e girdi’ e ra fanenikayed Jesus machane de tal i machibnag e girdi’. De rus ni nge yog ngak e pi tolang ko pi yurba’ i teliw e machib ni googsur ni yad be weliy ma yad be dake mat’awnaged yad. Ba puluw mab tamilang e thin i yog Jesus ngorad. Bay bayay ni gaar: “Kari mu gafgowgad e piin ni tamachib ko Motochiyel nge gimed e pi Farise! Ya gimed be dake modingniged gimed! Gimed bod malangen e yam’ ni kan achey wuru’ ko wech, nib fel’ yaan u wuru’, ma ba sug lan ko yil nge mel. Ere ku er rogomed ni gubin e girdi’ ma be guymed ni gimed ba fel’ u wuru’ i dowmed, machane ba sug lanin’med ko lifith l’ugun nge denen.”​—Matt. 23:27, 28.

¹⁰ Maku de rus Jesus ni nge yog ngak fapi salthaw u lan fare milay’ ni Gethsemane ko ir mini’. (John 18:3-8) Boch nga tomren ma ke pufthinnag e pi tolang ko prist Jesus. Yugu aram rogon ni manang ni be guy rogon e pi tolang ko prist ni nga rogned ban’en nib kireb u murung’agen ya nge yib tapgin ni ngar lied, machane de rus ni nge micheg ni ir Kristus ni fak Got. Miki yog ni bay ra “guyed e en ni Fak e Girdi’ ni ke par nga but’ u ba’ ni mat’aw rok faanem ni Gubin ma Rayog Rok ni be yib u lan e lang i yib nga but’ ni yow e manileng!” (Mark 14:53, 57-65) De n’uw nap’an nga tomren, me sak’iy Jesus u p’eowchen Pilate ni kan m’ag e chen ngak, ma bay mat’awun Pilate ni nge pag. Machane de fulweg Jesus e thin nib kireb ni ka nog u murung’agen. (Mark 15:1-5) Ma ke yog rok ni nge rin’ e pi n’em ya de rus.

11. Uw rogon nra ayuwegdad e t’ufeg ni ngad athamgilgad ma dab kuda rusgad?

¹¹ Yog Jesus ngak Pilate ni gaar: “Ni gargelnigeg ngaray nga fayleng ni bochan e nggu weliy murung’agen e tin riyul’.” (John 18:37) Ke yog Jehovah ngak Jesus ni nge machibnag fare thin nib fel’ me rin’ e re maruwel nem nib felfelan’ ya bochan e ba t’uf e Chitamangin rok. (Luke 4:18, 19) Maku ba t’uf e girdi’ rok Jesus ma manang ni kar gafgowgad. Maku arrogodad, ni gad be athamgil ni ngad machibniged fare thin nib fel’ ni dabda rusgad ya ba t’uf Got rodad nge girdi’.​—Matt. 22:36-40.

Gelngin Got e Ma Ayuwegdad Ngad Machibgad ni Dabda Rusgad

12. Mang e ke felfelan’nag e tin som’on i gachalpen Jesus?

¹² In e wik nga tomren ni ke yim’ Jesus, ma ke felfelan’ e pi gachalpen ya ke yoor boch e girdi’ ni kar uned ngorad. U lan taareb e rran ma 3,000 e girdi’ nu Israel nge girdi’ ni gathi yad piyu Israel ni ra uned ko taufe u nap’an reb e madnom! Ere ke gin e girdi’ ni boor ko n’en ni ke buch! Be gaar e Bible: “Boor e maang’ang nge pi n’en ni un ngat ngay ni i ngongliy Got u pa’ e pi apostal.”​—Acts 2:41, 43.

13. Mang fan ni meybil e pi gachalpen Jesus ni nge dabkur rusgad, ma mang angin?

¹³ Kari damumuw e pi tolang ko pi yurba’ i teliw ma aram mi yad kol Peter nge John nga nin’row nga kalbus ni reb e nep’, ma aram minog ngorow dabkur weliyew murung’agen Jesus. Nap’an ni pagrow mi yow weliy ngak e tin ni ka bay i gachalpen Jesus e n’en ni ke buch ngorow ma aram mi yad meybil ni lungurad: “Somol, mu changar ko tin ni ka rogned ni yad ra rin’ ngomad, ma ga ayuwegmad e pi tapigpig rom nggu weliyed e thin rom ndab kug rusgad.” Ere mang angin ni ke yib riy? Ma yad gubin ni yib gelngin Got ngorad “mi yad tabab i weliy e thin rok Got ngak e girdi’ ndaki yib e marus ngorad.”​—Acts 4:24-31.

14. Uw rogon ni ma ayuwegdad gelngin Got u nap’an e machib?

¹⁴ Kad guyed ni pi’ Jehovah gelngin ngak pi gachalpen Jesus ma aram mi yad machibnag e thin rok Got ni dakur rusgad. Jehovah e ma pi’ gelngidad ni ngad athamgilgad ni ngad machibnaged e girdi’ nib muun e piin ni yad ma togopuluw ko tin riyul’. Ra pi’ Jehovah gelngin ngodad ni faanra gad ra ning ngak. Ayuw ni ma pi’ Jehovah ngodad e ra ayuwegdad ni nge dabkud rusgad ko pi togopuluw ni ma tay e girdi’ ngodad.​—Mu beeg e Psalm 138:3.

Pi Kristiano e Ngiyal’ N’ey e Yad Ma Machib ni Darur Rusgad

15. Uw rogon ni fare thin nib fel’ e ma ruwraba’nag e girdi’ e ngiyal’ ney?

¹⁵ Fare thin nib fel’ ni yibe machibnag e ngiyal’ ney e be ruwraba’nag e girdi’ ni bod kakrom. Boch e baadag ni nge motoyil me fol riy, ma boch e girdi’ e darur nanged fan e tin riyul’ ma daburad ni ngar liyorgad ngak Got. Ma boch i yad e ma yog e thin nib kireb ngodad ma yad ma gathibthibnagdad maku yad ma fanenikaydad ni bod rogon ni yog Jesus. (Matt. 10:22) Yu ngiyal’ ma yima yog boch e thin ni de puluw u murung’agdad. (Ps. 109:1-3) Machane, Pi Mich Rok Jehovah u ga’ngin yang u fayleng e yad ma machibnag fare thin nib fel’ ni darur rusgad.

16. Mang e n’en ni buch ni be dag ni ra ngan machib ni dabni rus ma rayog ni nge thilyeg laniyan’ e en ni yibe machibnag?

¹⁶ Faanra dabda rusgad i machibnag fare thin nib fel’ ma rayog ni nge thilyeg e lem rok e piin ni ma togopuluw ko machib ni gad ma tay. Reb e walag ni ppin u Kyrgyzstan e yog ni gaar: “U nap’an ni gu be un ko machib ma bay e girdi’ ni non ngog ni gaar: ‘Ke mich Got u wan’ug machane gathi Got ko piin Kristiano. Faanra ngam mub bayay, ma nggog ngak e pilis rog ni nge k’adem!’ Ma immoy reb e pilis ni ba ga’ u tooben. Machane u nap’an ni yibe wereg fare babyor ni Kingdom News 37, ni fithingan e ‘Teliw Ni Googsur E Ke Chugur Ni Nge Mus!,’ ma kug dugliy ni nggu sul ko fare tabinaw ya kug lemnag ni rayog ni nggu mada’nag yugu be’. Machane ka fare pumoon e ke bing e mab. Ka chingiyal’ nem mug meybil ngak Jehovah nge mu’ mu gaar ngak: ‘Siro’, ke yib ngan’ug fare sabathin ni kad tew fowapringan. Maku ke yib ngan’ug fare pilis rom. Machane gu baadag ni nggu pi’ ngom e re babyor ney ya ba mich e bin riyul’ e Got u wan’ug ni bod gur. Dabki n’uw nap’an ma ra gechignag Got e pi yurba’ i teliw ni yad be dariyfannag. Faan ga ra beeg e re babyor ney ma rayog ni nga kum nang boch u murung’agen.’ Kug gin ngay ya ke fek fare pumoon fare babyor, ma aram ma ku gu wan ko bin migid e tabinaw. Ma de n’uw nap’an, me yib fare pumoon ni be mil ni be fek fare babyor. Me gaar ngog: ‘Kug beeg, ere mang e nggu rin’ ma rayog ni nggu thay ko damumuw rok Got?’” Me un fare pumoon ko fol Bible me tabab ni nge un ko muulung.

17. Uw rogon ni ke pi’ fare walag ni ppin e athamgil nga laniyan’ e en ni be fil e Bible ngak?

¹⁷ Maku faanra dabda rusgad ma rayog ni ngad pied e athamgil nga laniyan’ boch e girdi’ ni nge dab ra rusgad. Reb e walag ni ppin u Russia e ke pi’ reb e babyor ngak be’ ni pumoon u lan e bus u nap’an ni be milekag. Ma aram me sak’iy fare pumoon ni ke damumuw me fek fare babyor ni be kol fare walag, me duduguy, me yon’ nga but’ u lan e bus. Me puwan’ ngak nib ga’ laman me fith ko mang binaw e ma par riy me yog ngak dabki machib u rom. Me meybil fare walag ngak Jehovah ni nge ayuweg ma aram me lemnag fare thin ni yog Jesus ni gaar: “Dab mu tamdaggad ngak e piin ni yad ra li’ e dowef ngem’.” (Matt. 10:28) Me non ngak fare pumoon nib sumunguy ni gaar, “Dab gog ngom e gin ni gu ma par riy, ma dab gu tal ko machib u rom.” Me yan nga wen. Ma de nang fare walag ni immoy be’ nib pin ni ma fil e Bible ngak u lan fare bus. Ma der ma un e re pin nem ko muulung ya ma rus ko girdi’. Machane tomren ni ke guy ni de rus fare walag ni ppin me dugliy ni nge tabab ni nge un ko muulung.

18. Mang e ra ayuwegem ngam machib ni dab mu rus ni bod Jesus?

¹⁸ Girdi’ ni de mich Got u wan’rad e ba t’uf ni ngan athamgil ngan machibnagrad ni dab  ni rus ni bod Jesus. Mang e ra ayuwegem ni ngam rin’ ni aram rogon? Ngam sap ko pi n’en ni ke micheg Got ni bay nga m’on, ma ngam athamgil ni nge par nib gel e t’ufeg rom ngak Got nge girdi’. Nga um meybil ngak Jehovah ni nge dab mu rus. Ma dab mu pag talin ni ba’ Jesus rom ni gubin ngiyal’. (Matt. 28:20) Ra ayuwegem gelngin Jehovah. Ere dabda rusgad ni nge lungudad: “I Somol e ir e be ayuwegeg, ere dab gu tamdag! Mang e rayog ni nge rin’ e girdi’ ngog?”​—Heb. 13:6.

Uw Rogon ni Ga Ra Fulweg?

• Mang fan nib t’uf ni nge dabi rus e pi tapigpig rok Jehovah?

• Mang e gad ra fil riy ni be dag ni de rus . . .

e pi tapigpig rok Got u m’on ni dawori yib Kristus?

Jesus Kristus?

e piin Kristiano kakrom?

e piin Kristiano e ngiyal’ ney?

[Picture on page 25]

De rus Jesus ni nge yog e tin nib kireb ni ke rin’ e pi tayugang’ ko teliw

[Picture on page 27]

Ma pi’ Jehovah e athamgil nga lanin’dad ni ngad machibgad