“Ngam Tiyed Fan e Piin ni Yad Be Maruwel” nib Gel u Fithik’med

“Ngam tiyed fan e piin ni yad be maruwel u fithik’med, ni piin ni ke mel’egrad Somol ni ngar pow’iyed gimed mi yad fonownagmed.”​—1 THESS. 5:12.

1, 2. (a) Uw rogon fare ulung nu Thessalonika u nap’an ni yoloy Paul e gin som’on e babyor nge yan ngorad? (b) Mang e pi’ Paul e athamgil nga laniyan’ piyu Thessalonika ni ngar rin’ed?

SUSUN e gur reb i gothon e ulung nu Thessalonika ko bin som’on e chibog, ni aram reb e tin som’on e ulung nni sunmiy u Europe. Ke n’uw nap’an ni ke ayuweg Paul e pi walag u rom ma be pi’ e athamgil nga lanin’rad. Sana ke dugliy boch e pumoon ni ngar ayuweged e ulung ni bod rogon e tin baaram e ulung ni ka i lekag. (Acts 14:23) Machane tomuren ni sum e re ulung nem me kunuy piyu Jew ba ulung i girdi’ ni ngar tulufed Paul nge Silas ngar chuwgow ko re mach nem. Pi Kristiano nra mageygad e sana ra lemnaged ni dakuriy be’ nra ayuwegrad, ma sana kur rusgad.

² Tomuren ni chuw Paul u Thessalonika, ma i magafan’ ko ulung u rom. Machane nap’an ni guy rogon ni nge sul e ngaram ma ‘de pag Satan.’ Ere l’og Timothy ni nge yan i pi’ e athamgil nga lanin’rad. (1 Thess. 2:18; 3:2) Ma nap’an ni sul Timothy ni ke fek e thin nib fel’ i yib, ma aram me yoloy Paul bangi babyor nge pi’ nge yan nga Thessalonika. Boor ban’en ni weliy Paul ngorad u lan e gi babyor nem, ma reb riy e pi’ e athamgil nga lanin’rad ni ‘ngar ted fan e piin ni yad be pow’iyrad.’​—Mu beeg e 1 Thessalonika 5:12, 13.

3. Mang boch i fan ni ngari tay e pi Kristiano nu Thessalonika fan e piin piilal?

³ Pi walag ni pumoon ni u rogned e thin ko ulung nu Thessalonika e gathi ri boor ban’en ni yad manang ni bod Paul nge piin ni ur uned ngak ko milekag; ma dawor ri n’uw nap’an ni kar manged Kristiano ni bod e piin piilal u Jerusalem. Maku reb e dawori gaman reb e duw ni ke sum e re ulung ney! Machane, bay fan ni nge felfelan’ e girdi’ u lan e ulung ko pi pumoon nem ni bochan e ur maruwelgad nib gel ni yad be ‘pow’iy’ e ulung ma yad be ‘fonownag’ e pi walag. Ere ri bay fan ni ngaur ‘ted farad mi yad t’ufegrad.’ Tomuren ni yog e re bugithin ney miki yog ngorad ni ‘ngaur pared nib fel’ thilrad.’ Faan gomanga um moy u Thessalonika e ngiyal’ nem ma ga ra dag ni ga be tayfan e maruwel ko piin piilal u rom, fa? Uw rogon u wan’um e pi “pumoon ni tow’ath” ni ke pi’ Got ko ulung u daken Kristus?​—Efe. 4:8, NW.

“Maruwel” nib Gel

4, 5. Mang fan nib gel e maruwel ni i tay e piin piilal u nap’an Paul ni ngar filed e thin rok Got ko ulung, ma mang fan ni ku aram rogon e ngiyal’ ney?

⁴ Nap’an ni kan l’og Paul nge Silas nga Beroea, ma uw rogon ni i “maruwel” e piin piilal nu Thessalonika nib gel? Dariy e maruwar riy ni kar folwokgad rok Got ngaur filed e thin rok Got ko ulung ni yad be fanay e thin ni bay u lan e Babyor nib Thothup. Machane, sana ga ra lemnag ko ‘Rib ga’ fan e Thin rok Got u wan’ e pi Kristiano nu Thessalonika, fa?’ Ya bin riyul’ riy e be yog e Bible ni girdi’ nu Beroea e “de manan’rad ni bod e girdi’ nu Thessalonika nib manan’rad . . . ma gubin e rran ni ur gayed u lan e babyor nib thothup ni ngar guyed ko riyul’ e tin ni ke yog Paul fa.” (Acts 17:11) Machane, yug girdi’ ni Jew ni ur pared u Thessalonika e ir e un taarebrogonnagrad ngak piyu Beroea, ma gathi piin Kristiano. Piin ni mich e thin rok Got u wan’rad e ‘dar lemniged ni thin rok e girdi’, ya ra lemniged ni thin rok Got.’ (1 Thess. 2:13) Ba mudugil nib gel e maruwel ni i tay e piin piilal ni ngar filed e thin rok Got ko re ulung ney.

⁵ Ngiyal’ ney e ma pi’ fare tapigpig nib yul’yul’ mab gonop e tin nib t’uf ko ulung rok Got “ko ngiyal’ ni yima pi’ riy.” (Matt. 24:45) Ku ma maruwel e piin piilal ko pi ulung i yan ni ngar ayuweged e pi walag ko tirok Got ban’en nrogon ni be pow’iyrad e re tapigpig ney. Boor e babyor nib puluw e thin riy ko Bible ni ma fanay e pi ulung i yan, ma boch e thin e bay riy fare Watch Tower Publications Index nge Watchtower Library ko CD-ROM. Ku boor e tayim ni ma fanay e piin piilal ni ngar fal’eged e welthin rorad ni fan ko pi muulung ni yima tay ya nge yog nra pied nib fel’ rogon me yib angin ko ulung. Ka am lemnag urngin e tayim ni ma fanay e piin piilal ni ngar fal’eged rogon e welthin rorad ni fan ko muulung, nge pi assembly, nge pi convention ni gad ma tay, fa?

6, 7. (a) Mang e ke fil e piin piilal nu Thessalonika rok Paul? (b) Mang fan nrayog ni nge mo’maw’ rok e piin piilal e ngiyal’ ney ni ngar folwokgad rok Paul?

⁶ Piin piilal nu Thessalonika e dar paged talin rogon ni i ayuweg Paul e ulung rok Got. Gathi kemus ni i rin’ e re maruwel ney ni bochan e ban’en nib milfan ngak, ya i rin’ u fithik’ e t’ufeg ma be ayuwegrad ko tin nib t’uf rorad. Kad weliyed ko fa binem e article ni feni sumunguy Paul ngorad e “bod feni munguy ba matin ngak pi fak ni be ayuwegrad.” (Mu beeg e 1 Thessalonika 2:7, 8.) Ki m’agan’ ngay ni nge ‘pi’ ir’ nga pa’rad nge ayuwegrad! Ere ku arrogon e pi piilal nem ni thingar ra folwokgad rok u nap’an ni yad be ayuweg e ulung.

⁷ Piin ni yad ma ayuweg e ulung ni Kristiano e ngiyal’ ney e yad ma folwok rok Paul ngaur t’ufeged e girdi’ u lan e ulung. Bay boch e walag ni gathi ri yad ba gol. Yugu aram rogon ma ma guy e piin piilal rogon ni ngar nanged fan e magawon ko pi walag nem mar ‘ted farad.’ (Prov. 13:15) Bochan ndawor da flontgad ma bay yu ngiyal’ nib mo’maw’ rok reb e piilal ni nge yaliy fel’ngin e pi walag u lan e ulung. Machane susun ni ngan pining e magar ngak ni be athamgil ni nge rin’ e maruwel rok u tan pa’ Kristus, ma be guy rogon ni nge sumunguy ko girdi’ u lan e ulung.

8, 9. Mang boch e kanawo’ ni ma matanagiy e piin piilal lanin’dad riy e ngiyal’ ney?

⁸ Gad gubin ni bay fan ni ngaud “folgad” ko piin piilal ya yog Paul ni ‘yad be matanagiy lanin’dad ndarir talgad.’ (Heb. 13:17) Re thin ney e be dag e n’en ni ma rin’ e piin ni yad ma chuguliy e saf ni bay yu ngiyal’ ndarur molod ni bochan e ngar matanagiyed e saf rorad. Ere ku er rogon e piin piilal e ngiyal’ ney ni bay yu ngiyal’ ndarur molod ni bochan e ngar pithiged e magawon ni ke sum u lan e ulung. Bod ni pi walag ni pumoon ni yad ma maruwel ko fare Hospital Liaison Committeea e bay yu ngiyal’ ni yima pugrad ni yad be mol ya ngar ayuweged be’ ni ke m’ar. Rib ga’ fan u wan’dad e ayuw ni ma pi’ e pi walag ney u nap’an ni kad mada’naged e magawon ni aray rogon!

⁹ Pi piilal ni yad ma maruwel ko Regional Building Committeeb nge pi ulung ni yad ma ayuweg e walag u nap’an e yoko’, nge durru’ nge ku boch ban’en e ba gel e maruwel ni yad ma tay. Bay fan ni ngad pied e ayuw ko maruwel ni ma tay e pi walag ney! Am lemnag rogon e ayuw nni pi’ nga Myanmar u tomuren reb e yoko’ nib gel ni aw e ngaram ko duw ni 2008 ni ka nog e Cyclone Nargis ngay. Piin ni ranod ni ngar pied e ayuw ko ulung u Bothingone ni bay u bangi ban’en ni ka nog yu Irrawaddy Delta ngay ni aram e gin nib gel e magothgoth riy e u ranod u fithik’ e lldow. Nap’an ni guy e pi walag u rom e tin som’on e girdi’ ni ke taw e ngaram nib muun ngay e en ni i lekag e ulung u rom kafram, mi yad tolul ni lungurad: “Am sapgad! Ke yib e circuit overseer rodad! Ke ayuwegdad Jehovah!” Ba ga’ fan u wan’um e maruwel nib gel ni ma tay e piin piilal ni rran nge nep’, fa? Boch e piilal e kan tayrad ni ngar maruwelgad u boch e ulung ni ma pithig boch e magawon nib ga’ ni ke sum u lan e ulung. Pi piilal ney e darur ufanthingad ni bochan e pi n’en ni kar rin’ed; machane piin ni ma yib angin e ayuw ni kar pied ngorad e ri yad ma pining e magar ko maruwel ni kar ted.​—Matt. 6:2-4.

10. Mang boch e maruwel ni ma rin’ e piin piilal ni gathi ri yima guy?

¹⁰ Ku bay boch e maruwel ni ku ma rin’ e piin piilal e ngiyal’ ney. Bod ni en ma yarmiy e piin piilal e ir e ma ngongliy e schedule ko muulung ni yima tay u gubin e wik. Ma en ni ir e secretary ko ulung e ir e ma ngongliy rogon e report ko machib ni yima tay. Ma en ni ma yarmiy e skul e ir e ma ngongliy e schedule ko welthin ni yima pi’ u nap’an e skul. Gubin e yu dalip e pul ni yima yaliy babyoren e salpiy ko ulung. Piin piilal e yad ma beeg e pi babyor ni ke yib ko branch ma yad ma fol ko pi fonow ni yima pi’ riy ni ir e ma ayuwegdad ni ngad pared ni kad “taab girdi’gad u daken e michan’ rodad.” (Efe. 4:3, 13) Bochan e maruwel nib gel ni ma tay e pi piilal ney ma aram fan ni gubin ban’en ni yima rin’ “nib fel’ rogon ma ba yaram.”​—1 Kor. 14:40.

“Ngar Pow’iyed Gimed”

11, 12. Mini’ e ma pow’iy e ulung, ma mang e ba muun ngay?

¹¹ I yog Paul ni pi piilal ni ur maruwelgad nib gel ko ulung nu Thessalonika e ur ‘pow’iyed’ e re ulung nem. (1 Thess. 5:12) Ki yog Paul nib gel e “maruwel” ni i tay e pi piilal nem. Ere gubin e piilal u lan e ulung ni be weliy murung’agen u roy. Ngiyal’ ney e yooren e piin piilal e yad ma yan ra sak’iygad nga lang ngaur pied e welthin u nap’an e muulung. Ere fare n’en ni kan thilyeg fithingan e en ni u nog kafram ni ir e ma yog e thin ko piin piilal kan tay ni “en ni ma yarmiy e piin piilal” e be tamilangnag ni piin piilal e yad reb e ulung ni yad ma maruwel u taabang nib taareban’rad.

¹² Ra ngan ‘pow’iy’ e ulung ma gathi kemus ni ngan fil e thin rok Got ngorad. Ya re bugithin ney e kun fanay ko 1 Timothy 3:4. U rom e yog Paul riy ni be’ ni ma un i tay murung’agen e ulung e “thingari yog rok ni gagiyegnag girdien e tabinaw rok nib fel’ rogon, me guy rogon e bitir rok ngar folgad rok mi yad ta’ fan.” Arrogon, piin piilal e yad ma ayuweg e ulung ya nge yog ni fol urngin e girdi’ u lan e ulung rok Jehovah.​—1 Tim. 3:5.

13. Mang fan ni yu ngiyal’ e ba n’uw nap’an mfini dugliy e piilal ban’en u nap’an e muulung rorad?

¹³ Ma weliy e piin piilal nib fel’ rogon murung’agen e tin nib t’uf ko ulung ya nge yog nra pow’iyed e ulung nib fel’ rogon. Sana ba fel’ ni faanra dugliy taareb e piilal e n’en ni ngan rin’. Machane, piin piilal e yad ma fol ko n’en ni i rin’ fare ulung ni ma pow’iyey ko bin som’on e chibog ni aram e yad ma weliy u taabang gubin ban’en mar paged e thin nu Bible ni nge pow’iyrad. N’en ni yad be nameg e aram e ngar puluwniged e pi kenggin e motochiyel nu Bible ko tin nib t’uf ko ulung. Ra yib angin e re n’ey ni faan yad ra fal’eged rogorad u m’on ko muulung ni ngar ted, ni aram e nge bagayad me beeg e pi thin nu Bible nge fonow ni ke pi’ fare tapigpig nib yul’yul’ mab gonop. Riyul’ ni boor e tayim nib t’uf ni ngan rin’ e pi n’ey riy. Faanra der taareban’rad nga ban’en mab t’uf ni ngar ted ba ngiyal’ ni ngar fal’eged i gay murung’agen u Bible ya nge yog nra dugliyed e n’en ni ngan rin’. Aram e n’en ni rin’ fare ulung ni ma pow’iyey ko bin som’on e chibog ko fare magawon ni sum u murung’agen e maad’adnagey.​—Acts 15:2, 6, 7, 12-14, 28.

14. Ga ma felfelan’ ni ma maruwel e piin piilal u taabang nib taareban’rad, fa? Mang fan ni aram rogon u wan’um?

¹⁴ Mang e ra buch ni faanra bay reb e piilal ni be guy rogon ni ir e ngan fol rok? Fa uw rogon ni faanra bay be’ ni bod Diotrefes ni immoy ko bin som’on e chibog ni be guy rogon ni nge ruw raba’nag e girdi’? (3 John 9, 10) Ba mudugil nra gafgow e ulung. Faanra ke guy Satan rogon ni nge magawonnag e ulung ko bin som’on e chibog, me ere gad manang ni ku baadag ni nge kirebnag e gapas u lan e ulung rodad e ngiyal’ ney. Rayog ni nge k’aring e girdi’ ngar adaged ni ngar tolanggad ko tin ka bay e girdi’. Ere aram fan nib t’uf ni nge athamgil e piin piilal ngaur pared nib sobut’an’rad ma yad be maruwel u taabang nib taareban’rad. Ri gad ba felfelan’ ko sobut’an’ ni ma m’ug ko ngongol ko piin piilal ni yad ma maruwel u taabang!

“Mi Yad Fonownagmed”

15. Mang fan ni ma fonownag e piin piilal e pi walag u lan e ulung?

¹⁵ I tamilangnag Paul reb e maruwel ni ma rin’ e piin piilal nib mo’maw’ machane ba ga’ fan, ni aram e ngar fonownaged e ulung. U lan e pi babyor ko Bible nni Yoloy Som’on ni Thin ni Greek e yigoo Paul e fanay fare bugithin ni Greek ni kan pilyeg ni “fonow.” Re bugithin ney e rayog ni nge yip’ fan e fonow nni pi’ ni yibe yal’uweg be’, machane gathi be yip’ fan e thin nib gel ni ka nog ndariy e t’ufeg riy. (Acts 20:31; 2 Thess. 3:15) Bod ni yol Paul ngak piyu Korinth ni gaar: “Kug yoloy e babyor ni aray rogon ke yib ngomed, ni gathi bochan e gub adag ni nggu tamra’nagmed; kug rin’ ni bochan e nggu fonownagmed ni gowa gimed pi fakag ni gimed ba t’uf rog.” (1 Kor. 4:14) N’en ni k’aring ni nge pi’ e re fonow ney e aram e t’ufeg rok ko girdi’.

16. Mang e susun ndabi pag e piin piilal talin u nap’an ni yad be fonownag e pi walag?

¹⁶ Ma lemnag e piin piilal feni ga’ fan rogon ni yima fonownag e girdi’. Yad ma athamgil ni ngar folwokgad rok Paul nib gol, ma ma t’ufegey, ma ma ayuwegey. (Mu beeg e 1 Thessalonika 2:11, 12.) Riyul’ ni piin piilal e darur ‘paged e thin rok Got ni ir e nge pagan’uy ngay, ya nge yog nra filed e tin nib riyul’ ngak boch e girdi’ mar pied e athamgil nga lanin’rad.’​—Titus 1:5-9.

17, 18. Mang e dab mu pagtalin u nap’an ni ke fonownigem reb e piilal?

¹⁷ Riyul’ ni piin piilal e dawor ra flontgad ma rayog ni nga rogned ban’en ndar lemnaged me tomur riy mar kalgadngan’rad. (1 Ki. 8:46; Jas. 3:8) Ku yad manang nib ga’ ni yira fonownag e pi walag ma ma ‘kireban’rad ngay, ma gathi nge felfelan’nagrad.’ (Heb. 12:11) Ere u m’on ni nge fonownag reb e piilal reb e walag ma nge fal’eg i lemnag e magawon rok nib fel’ rogon me meybil. Faanra kan fonownigem, mab ga’ fan u wan’um e t’ufeg ni ke dag e piin piilal ngom, fa?

¹⁸ Susun e bay e m’ar rom nib mo’maw’ ni ngam weliy ko togta. Ma tomuren ni skengnagem e togta me nang ko mang e m’ar rom, machane ba mo’maw’ ni nge riyul’ u wan’um e n’en ni ke yog. Ere, ga ra damumuw ko fare togta? Danga’, ya mus ni faanra yog nib t’uf ni ngan seyem, mab mudugil nra m’agan’um ngay ya ga manang ni ga ra gol riy. Rogon ni ke non e togta ngom e ra rin’ ban’en ko lem rom, machane, ga ra pag e re n’em ni nge magawonnagem, fa? Sana danga’. Ere, dab mu pag ni nge dab mu fol ko fonow ni ke pi’ e piin ni be fanayrad Jehovah nge Jesus ni ngar weliyed ngom rogon nrayog ni ngam ayuweg e tha’ u thilmew Jehovah ni bochan rogon ni kar fonownaged gur.

Nge Ga’ Fan u Wan’um e Piin Piilal ni Ke Tayrad Jehovah ni Ngaur Ayuweged Gadad

19, 20. Uw rogon ni nge m’ug ni ga be pining e magar ni bochan e pi “pumoon ni tow’ath” ni kan pi’ ni nge ayuwegdad?

¹⁹ Mang e ga ra rin’ ni faanra ke pi’ be’ reb e tow’ath ngom? Ga ra maruwel ngay ya nge m’ug nib ga’ fan u wan’um, fa? Fapi “pumoon ni tow’ath” e aram e n’en ni ke pi’ Jehovah u daken Jesus Kristus ni ngar ayuweged gur. Ere, reb e kanawo’ ni nge m’ug riy ni ga be pining e magar ni bochan e pi tow’ath ney e aram e ngaum motoyil nib fel’ rogon ko pi welthin ni ma pi’ e piin piilal mag guy rogon ni ngam fol riy. Ku rayog ni nge m’ug nib ga’ fan e piin piilal u wan’um ko pi fulweg ni ga ma pi’ u nap’an e muulung. Mu pi’ e ayuw ko maruwel ni be pow’iy e piin piilal ni bod rogon e machib. Faanra ke yib angin e fonow ni ke pi’ reb e piilal ngom, ma mang ndab mog ngak? Maku reb e, mang ndab mu dag ni ga be pining e magar ngak chon e tabinaw rok e piin piilal? Dab mu pagtalin ni faanra nge yog ni maruwel reb e piilal nib gel u lan e ulung, ma thingari pag chon e tabinaw farad u boch ban’en.

²⁰ Arrogon, boor fan ni ngan pining e magar ko piin piilal ni yad be maruwel nib gel u fithik’dad ni yad be pow’iydad ma yad be fonownagdad. Pi “pumoon ni tow’ath” ney e rriyul’ ni yad e ayuw ni ke yib rok Jehovah!

[Footnotes]

Ka Ga Manang?

• Mang boch i fan ni nge ga’ fan u wan’ e pi Kristiano nu Thessalonika e pi piilal ni kan tay ni nge pow’iyrad?

• Uw rogon ni ma maruwel e pi piilal nib gel u lan e ulung rom?

• Uw rogon ni ke yib angin ngom rogon ni ma pow’iyem e piin piilal?

• Mang e thingar dab mu pagtalin u nap’an ni ke fonownigem reb e piilal?

[Picture on page 27]

Ba ga’ fan u wan’um e pi n’en ni ma rin’ e piin piilal ni ngar ayuweged e ulung, fa?