1 Dabiyog ni Ngan Nang Fan Rarogon Got—Riyul’ e Re N’ey, Fa?
Sana kam rung’ag ni: “Ma maruwel Got u boch e kanawo’ ndab nnang fan.”
“Chitamangiy, nge Fak, nge fare Kan ni Thothup e dabiyog ni nge nang e girdi’ fan.”—Kredo rok Athanasia ni be tamilangnag murung’agen fare machib ni Trinitas ni yima fil u boor e galesiya ko piin ni yad ma yog ni yad e Kristiano.
N’en ni be fil e Bible: I yog Jesus ni piin ni kar nanged e “bin riyul’ e Got” e ra yog e tow’ath ngorad. (John 17:3) Machane, uw rogon ma gad nang e tin riyul’ u murung’agen Got ni faanra dabiyog ni ngan nang fan rarogon? Got e der mithag ir ya baadag ni nge gubin e girdi’ mar nanged.—Jeremiah 31:34.
Dabiyog ni ngar da nanged gubin ban’en u murung’agen Got ni bochan e ba thil e birok e lem nge birok e kanawo’ ko tirodad.—Eklesiastes 3:11; Isaiah 55:8, 9.
Rogon nra ayuwegem e tin riyul’: Faanra dabiyog ni ngan nang rarogon Got me ere de ga’ fan ni ngan gay rogon ngan nang. Bin riyul riy e gathi kemus ni be ayuwegdad ni ngad nanged murung’agen ya ku be guy rogon ni nge fel’ thildad. I yog Got ni Abraham ni be’ nib yul’yul’ e ‘fager rok’ me David ni Pilung e yoloy ni gaar: “Somol e tafager rok e piin ni yad be fol rok.”—Isaiah 41:8; Psalm 25:14.
Gur dabiyog ni ngad fagergad ngak Got? Som’on e sana gad ra lemnag ni aram rogon, machane mu tay fanam i yan ko n’en ni be yog e Acts 17:27 ni be gaar: “Dariy bagadad nib mal’af Got rok nga orel.” Ere Got e be ayuwegdad ni ngad nanged rarogon nib fel’ rogon u daken e Bible.a
Ke yog ngodad ni Jehovah fithingan. (Isaiah 42:8) Ke yog ngodad u Bible rogon e ngongol rok ko girdi’ ya nge yog nda nanged ko ba miti mang Got. Maku reb e ma yog Got ngodad fel’ngin. Ir e “ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Exodus 34:6) Ngongol rodad e rayog ni nge felfelan’nag fe kireban’nag. Bod rogon ni piyu Israel kakrom e ra “kirebnaged laniyan’” u nap’an nra togopuluwgad ngak, ma piin ur folgad rok e ra felfelan’naged.—Psalm 78:40; Proverbs 27:11.
[Footnote]
a Mu guy e guruy ni 1 ko fare ke babyor ni Mang e Ri Be Fil e Bible? ni ke ngongliy e Pi Mich Rok Jehovah ni be weliy e n’en ni be yog e Bible u murung’agen Got.
[Blurb on page 4]
Faanra Got e ir bang ko Trinitas ndabiyog ni ngan nang fan, me ere uw rogon ma gad nang rarogon?
[Picture Credit Line on page 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International