Mini’ Abraham?

RI IN e girdi’ e yima tay farad ko pi yurba’ i teliw u ga’ngin yang e fayleng, ma Abraham bagayad. Pi Jew, nge Muslim, nge piin Kristiano e yad gubin ni yad ma yog ni Abrahama e ir be’ ni “be weliy e Bible murung’agen ni be’ nib ga’ fan” mab “gel e michan’ rok ngak Got.” Be yog e Bible ni ir e “chitamangin urngin e piin ni ke mich Got u wun’rad.”​—Roma 4:11.

Mang fan nri ma tay e girdi’ fan Abraham? Ya dalip yay ni be yog u Bible ni Abraham e fager rok Got.​—2 Kronicles 20:7, Isaiah 41:8; James 2:23.

Machane Abraham e taareb rogon ko yug girdi’. Boor ko pi magawon ni i yib ngak e ku ma yib ngodad, machane ke gel ko pi magawon nem. Ga baadag ni ngam nang ko uw rogon? Mu lemnag ko mang e be yog e Bible u murung’agen.

Yafas Rok ko Som’on

Kan gargeleg ko duw ni 2018 B.C.E. Me ilal ko fare binaw ni Ur. (Genesis 11:27-31) Ur e reb e mach nib ga’ mab fel’ rogon. Boor e girdi’ u rom ni yad ma liyor ko liyos. Terah ni chitamangin Abraham e sana bagayad e piin ni ur liyorgad ko liyos. (Joshua 24:2) Machane Abraham e ke dugliy ni nge liyor ngak Jehovahb.

Mang e ke k’aring Abraham ni nge dugliy e re n’ey? Kan gargeleg Abraham ni 150 e duw u m’on ni yim’ Shem ni fak Noah. Ere faanra ke yog ni ngar mada’gow Shem, ma mang angin nra yib ngak? Dabisiy ni ke fil Shem ngak rogon nra mageygad ni yad ba fas u nap’an ni ke yib e Ran ni nge tharey e fayleng. Dabisiy ni ke fil feni ga’ fan ni ngan liyor ngak Jehovah, ni ir e Got ni ke ayuweg Shem nge tabinaw rok.

Demtrug ko Shem e ke fil e pi ney ngak fa danga’, machane ke fol Abraham ko n’en ni ke fil u murung’agen e bin riyul’ e Got. Jehovah e ir e ma “skengnag” gum’irchaen e girdi’, ma nap’an ni ke yaliy Abraham ma ke guy ni bay fel’ngin nib fel’, ma aram me ayuweg ni nge mon’og ko tirok Got ban’en.​—Proverbs 17:3, BT; 2 Kronicles 16:9.

Yafas Rok

Ba ga’ ni gubin ngiyal’ ni boor ban’en ni i rin’ Abraham nib mo’maw’, machane ba ga’ fan. Mu lemnag boch ko pi n’en ni i rin’.

▪ Nap’an ni be par Abraham u Ur, me yog Got ngak ni nge chuw u rom ya nge yan nga reb e binaw ni bay fini dag ngak. Yugu aram rogon nde nang Abraham nge Sarah ko uw e nga ranow ngay nge fan ni ke yog Got ni ngar chuwgow ko binaw rorow, machane kar folgow. Ma tomur riy mu ur parew u tento ko fare nam nu Kanaan, nib thilthil yu yang ko fare binaw ni ur parew riy.​—Acts 7:2, 3; Hebrews 11:8, 9, 13.

▪ Nap’an ni dawori fakay Abraham nge Sarah e bitir, me micheg Jehovah ngak Abraham ni piin owchen e ra mang ba nam nib ga’. Miki yog Jehovah ni urngin e tabinaw nu fayleng e yira tow’athnagrad u daken Abraham. (Genesis 11:30; 12:1-3) Me munmun me yog Jehovah bayay nra lebguy e tin ni ke micheg. Ke yog ngak Abraham ni piin owchen e ra yoor ni bod e pi t’uf u lan e lang.​—Genesis 15:5, 6.

▪ Nap’an ni ke gaman 99 e duw rok Abraham, ma Sarah e ke chugur ni nge gaman 90 e duw rok me micheg Jehovah ngorow ni yow ra fakay bochi pagel. Re n’em e gowa ba mo’maw’ ni nge riyul’, machane kar guyew ni dariy “ban’en nrib mo’maw’ u puluwon Somol.” (Genesis 18:14) Tomuren reb e duw ma ke gaman 100 e duw rok Abraham me fakay bochi pagel, me tunguy fithingan ni Isak. (Genesis 17:21; 21:1-5) Ba tamilang ni ke micheg Got nu daken Isak e yira tow’athnag e girdi’ riy.

▪ Boch e duw nga tomuren me yog Jehovah ban’en ni yugu ba thil ngak Abraham. Ya ke yog ngak ni nge pi’ Isak ni fak ni maligach ni yugu aram rogon ni kab pagel ma dawori fakay e bitir. Yugu aram rogon nib mo’maw’ rok Abraham ni nge rin’ e re n’ey ni ke yog Jehovah ngak machane ke athamgil ni nge fol. Kari mich u wan’ Abraham ni bay gelngin Jehovah ni nge faseg Isak ni faanra ba t’uf, ni fan e nge lebug e n’en ni ke micheg. (Hebrews 11:19) U nap’an ni be n’en Abraham ni nge li’ Isak me taleg Got. Me yog Jehovah nrib fel’ e n’en ni ke rin’ ya ke fol. Me sul Jehovah bayay u daken fare n’en ni ke micheg ngak Abraham nra rin’.​—Genesis 22:1-18.

▪ I yim’ Abraham u nap’an ni ke gaman 175 e duw rok, ya be yog e Bible ni “aray rogon e pi rran ko yafos rok.” (Genesis 25:7, 8) Ere ke guy Abraham rogon ni ke lebguy Got e n’en ni ke micheg nra par nib n’uw nap’an ma ra yim’ u fithik’ e gapas.​—Genesis 15:15.

N’en ni Ke Tay

Chep u murung’agen Abraham e rib ga’ fan. Ngiyal’ ney e ka yima weliy murung’agen e n’en ni ke rin’, ma boor ban’en nrayog ni ngad folwokgad riy. (Hebrews 11:8-10, 17-19) Gad ra weliy aningeg ko pi fel’ngin Abraham. Gad ra tabab i weliy murung’agen reb i fel’ngin nib lingagil ni aram e michan’ rok.

[Footnotes]

[Box on page 4]

Be’ nib Ga’ Fan ko Chep nu Bible

Fa ragag ni m’on e guruy ko Genesis e be weliy murung’agen boch e girdi’ nib gel e michan’ rorad ni bod Abel, nge Enok, nge Noah. Machane fa ragag nge lal i guruy nga tomuren e ba ga’ ni be weliy murung’agen Abraham.

Som’on e be weliy e Bible boch ban’en nib ga’ fan ni bay rogon ngak Abraham. Bod nnap’an Abraham min weliy ko som’on  . . .

▪ ni Jehovah e ir e bod ba Yoror ara Ma Yororiy e pi tapigpig rok.​—Genesis 15:1; mu guy e Deuteronomy 33:29; Psalm 115:9; Proverbs 30:5.

▪ ni nge mich u wan’uy ngak Got.​—Genesis 15:6.

▪ murung’agen fare bugithin ni profet.​—Genesis 20:7.

▪ murung’agen e t’ufeg rok e gallabthir.​—Genesis 22:2.