PI DEER NI BAY E FULWEG RIY U BIBLE
Mini’ e piin ni yad ra yan nga tharmiy, ma mang fan?
Bokum milyon e girdi’ e yad ma athapeg ni nga ranod nga tharmiy. I yog Jesus ni pi apostal rok ni yad ba yul’yul’ e yad ra par u tharmiy. U m’on ni nge yim’ me micheg ngorad nra fal’eg tagil’rad ko Chitamangin u tharmiy.—Mu beeg e John 14:2.
Mang fan ni yira faseg e girdi’ nga ranod nga tharmiy? Mang e yad ra rin’ u rom? I yog Jesus ngak e pi apostal rok ni yad ra mang pilung, mar gagiyegniged e fayleng.—Mu beeg e Luke 22:28-30; Revelation 5:10.
Urngin e girdi’ nib fel’ e yad ra yan nga tharmiy, fa?
U boor e nam e kemus nri in e girdi’ riy e ma gagiyeg. Jesus e ra faseg e girdi’ ni nga ranod nga tharmiy ni ngar gagiyegniged e fayleng, ere nge mudugil u wan’dad nri in e girdi’ ni kan mel’egrad. (Luke 12:32) Be tamilangnag e Bible ni bay urngin e piin ni yad ra un ngak Jesus ko gagiyeg.—Mu beeg e Revelation 14:1.
Ke fal’eg Jesus tagil’ boch pi gachalpen u tharmiy. Ga manang ko mang e yad ra rin’ u rom?
Gathi kemus ni piin ni bay e athap rorad ko yan nga tharmiy e yira tow’athnagrad. Girdi’ ni yad ra par ni yad ba yul’yul’ u tan e gagiyeg rok Jesus e yad ra felfelan’ ko par u paradis u fayleng ndariy n’umngin nap’an. (John 3:16) Boch e pi girdi’ ney e yad ra thap nga Paradis u tomuren ni kan thang e re m’ag nib kireb ney ma boch i yad e yira fasegrad ko yam’ u Paradis.—Mu beeg e Psalm 37:29; John 5:28, 29.