PI DEER NI BAY E FULWEG RIY U BIBLE

Gur, bay ba ngiyal’ nra taw ngay me par ni kemus ni taareb e am e be gagiyegnag e fayleng ni ga’ngin?

Am lemnag rogon nrayog ni nge yib angin e gagiyeg ni be tay taab am ngak urngin e girdi’ nu fayleng. Ngiyal’ ney e boch e girdi’ e rib gafgow ma boch e rib fel’ rogorad. Machane, faanra gagiyeg reb e am u fayleng ni ma runguy e girdi’, ma aram e rayog ni nge par urngin e girdi’ ni bay e tin nib t’uf rorad. Ga be lemnag nrayog ko girdi’ ni ngar sunmiyed reb e am ni aray rogon?​—Mu beeg e Jeremiah 10:23.

Kab kakrom i yib nder yag ko pi am ko girdi’ ni ngar pied e tin nib t’uf ko piin ni yad be gagiyegnagrad. Mab ga’ ni piin gafgow e ri der yag ni ngan ayuwegrad nib fel’ rogon. Ku bay boch e am ni yad ma gafgownag e girdi’. (Eklesiastes 4:1; 8:9) Machane, ke micheg Got ni Gubin Ma Rayog Rok nra pi’ reb e am ni nge yan nga lon e pi am nu fayleng. Ma En Nra Gagiyeg riy e ra ayuweg urngin e girdi’.​—Mu beeg e Isaiah 11:4; Daniel 2:44.

Mang e ra rin’ Gil’ilungun Got?

Bay be’ ni ke mel’eg Jehovah Got ni nge gagiyegnag e fayleng. Cha’nem e aram Jesus ni Fak. (Luke 1:31-33) Nap’an ni immoy Jesus u fayleng, ma ri baadag ni ma ayuweg e girdi’. Ere, nap’an nra mang Pilung, ma ra taarebnag girdien e pi nam me chuwegrad u fithik’ urngin mit e gafgow.​—Mu beeg e Psalm 72:8, 12-14.

Gubin e girdi’ ni baadag ni nge mang Jesus e Pilung, fa? Danga’. Machane, be gum’an’nag Jehovah ir. (2 Peter 3:9) Ka be pi’ e tayim ko girdi’ ni nge m’agan’rad ngay ni nge mang Jesus e Pilung rorad. Dabki n’uw nap’an ma ra chuweg Jesus urngin e girdi’ nib kireb u fayleng, me yibnag e gapas nge pagan’ nga fayleng.​—Mu beeg e Mikah 4:3, 4.