Piin Fel’ Yangaren Uw Rogon ni Ngam Fal’eged Rogomed ni Fan ko Taufe?
“Got rog, ri gub adag ni nggu rin’ e tin nib m’agan’um ngay!”—PS. 40:8.
1, 2. (a) Mu weliy fan nrib ga’ fan e taufe. (b) Mang e ba t’uf ni ngari mudugil u wan’ be’ u m’on ni nga fini un ko taufe, ma mang fan?
GUR reb e fel’ yangaren ni ga be lemnag ni ngam un ko taufe, fa? Faanra gur bagayad, ma aram e ga be lemnag ni nge yag ngom e bin th’abi fel’ e tow’ath nrayog ni nge yag ngak be’. Machane, kad weliyed ko fa binem e article ni taufe nra un be’ ngay e ban’en nrib ga’ fan. Ya nap’an nra un be’ ko taufe ma aram e be dag ni ke ognag ir ngak Jehovah ara ke micheg ni nge pigpig ngak ndariy n’umngin nap’an, ma n’en nib m’agan’ Got ngay e aram e n’en th’abi ga’ fan u wan’. Machane, bochan ni taufe e ban’en nrib ga’ fan ma aram fan nthingar mu un ngay u nap’an ni ke bung rogom nrayog ni ngam dugliy ni ngam rin’ e re n’ey, maku ban’en nriyul’ nri ga baadag ni ngam rin’, ma kki tamilang u wan’um e n’en ni be yip’ fan ni nge ognag be’ ir ngak Got.
2 Machane, uw rogon ni faanra ga be lemnag ndawori taw nga nap’an nrayog ni ngam un ko taufe? Fa reb e ga baadag ni ngam un ko taufe, machane be lemnag e gallabthir rom nib t’uf ni ngkum son buchuuw nge taw ko ngiyal’ ni kam ilal boch ma kki yoor ban’en ni ke tamilangan’um riy u rarogon e par rom? Demtrug rogon, ma dabi mulan’um. Ya n’en ni ngam rin’ e aram e ngam athamgil ni ngam mon’og u boch ban’en ya nge yag nim un ko taufe. Am lemnag rogon nrayog ni ngam nameg boch ban’en ni bay rogon ko (1) pi n’en ni ke michan’um ngay, (2) ngongol rom, nge (3) rogon feni ga’ fan boch ban’en u wan’um.
PI N’EN NI KE MICHAN’UM NGAY
3, 4. Mang e rayog ni nge fil e piin fel’ yangaren rok Timothy?
3 Am lemnag rogon ni ga ra fulweg e pi deer ni baaray ni be gaar: Mang fan nib mich u wan’ug nriyul’ ni bay Got? Mang fan nib mich u wan’ug ni Bible e Thin rok Got ni kan thagthagnag? Mang fan ni gu be lemnag ni kab fel’ ni nggu fol ko pi motochiyel rok Got ko bin ni nggu fol ko ngongol ni yibe rin’ u roy u fayleng? Gathi kan tay e pi deer ney e ngaray ni bochan e ngan k’aringem ni nge maruwar lanin’um. Ya pi deer ney e rayog ni nge ayuwegem ni ngam fol ko fare thin ni yog apostal Paul ni gaar: “Ngam nanged e tin nib m’agan’ Got ngay ni tin nib fel’, nib fel’ u wan’ Got ma rib yal’uw.” (Rom. 12:2) Machane, mang fan nib t’uf ni ngam rin’ e re n’ey?
4 Am lemnag Timothy ni bay murung’agen u lan e Bible. Timothy e rib tamilang u wan’ e thin ni bay u lan fare Babyor nib Thothup, ya ‘nap’an ni kab bitir’ me fil e chitiningin nge titaw rok ngak. Machane, ki pi’ Paul e athamgil nga laniyan’ ni gaar: “Nguum par ko tin nib riyul’ e thin ni kan fil ngom, ni ir e kari mich u wun’um.” (2 Tim. 3:14, 15) Ere, kari mich u wan’ Timothy ni ke pirieg e tin riyul’. I fol riy ni gathi bochan e ke yog e chitiningin nge titaw rok ngak, ya bochan ni ke fal’eg i lemnag ma ke mich u wan’ ni aram e tin riyul’.—Mu beeg e 1 Thessalonika 5:21.
5, 6. Mang nib ga’ fan ni ngam fil rogon ni ngaum ‘sikengnag urngin ban’en’ u nap’an ni ka gab bitir?
5 Ma uw rogom? Sana rayog ni ke n’uw nap’an ni kam nang e tin riyul’. Faanra aram rogon, ma mang ndab mu nameg ni ngam fal’eg i lemnag boch i fan ni ke mich boch ban’en u wan’um? Ya re n’ey e ra gelnag e michan’ rom me ayuwegem ni ngam par ni gab mudugil u nap’an nra towasariyem e pi taab yangar rom ni ngam rin’ boch ban’en nde puluw, miki ayuwegem ko lem ko re fayleng ney, nge ku boch ban’en ni ga ma lemnag nde puluw.
6 Ga ra fil rogon ni ngam ‘sikengnag urngin ban’en’ u nap’an ni ka gab bitir ma ra ayuwegem ni ngam nang rogon ni ngam pi’ e fulweg u boch e deer nrayog ni nge fith e pi taab yangar rom ngom ni bod e pi deer ni baaray ni be gaar: ‘Uw rogon ni kam nang nriyul’ ni bay e Got? Faanra gad ba t’uf rok Got, me ere mang fan ni be pag ni nge buch boch ban’en nib kireb? Ma uw rogon ni Got e de sum?’ Faanra kam fal’eg rogom u m’on riy, ma nap’an nra fith be’ boch e deer ni aray rogon ngom ma dabi k’aringem ni nge war e michan’ rom, ya ra k’aringem ni ngam adag ni ngkum fil boch ban’en u lan e Bible ni goo gur.
7-9. Mu weliy rogon nrayog ni nge ayuwegem fare study guide ni bay ko website rodad ni kenggin e “Mang e Ri Be Fil e Bible?” ni ngari gel e michan’ rom.
7 Ra um fal’eg i fil e Bible ni goo gur ma rayog ni nge ayuwegem u rogon ni ngam pi’ e fulweg u boch e deer ni yira fith ngom, me tamilangan’um u boch ban’en ni be maruwar u lanin’um, me gel e michan’ rom. (Acts 17:11) Boor ban’en ni kan pi’ ngodad nrayog ni nge ayuwegdad ko re n’ey. Boor e fel’ yangaren ni kar guyed nib fel’ ni ngar beeged boch e babyor rodad ni be weliy murung’agen e En ni Ke Sunmiydad nge pi n’en ni ke sunmiy. Ku bay boch e fel’ yangaren ni yad baadag ni yad ma fil boch ban’en ni bay ko fapi study guide ara boch ban’en nrayog ni nge ayuwegey u rogon ni ngan fil e Bible ni kenggin e “Mang e Ri Be Fil e Bible?” Pi study guide ney e bay ko jw.org. Rayog ni ngam pirieg e re n’ey u tan fare thin ni kenggin e BIBLE TEACHINGS. Ra reb e pi study guide ney ma kan ngongliy rogon u reb e kanawo’ ni nge ayuwegem ni ngari mich reb e machib u Bible u wan’um.
8 Ga manang e n’en ni bay u Bible, ere dabisiy ni sana bay boch e deer ko pi study guide ney ni ga manang e fulweg riy. Machane, ba ga’ fan ni ngam lemnag ko mang fan nib mudugil u wan’um ni ireram e fulweg riy. Pi study guide ney e ra ayuwegem ni ngam fal’eg i lemnag boch e thin nu Bible ni bay riy ma ga yoloy nga but’ e n’en ni ga be lemnag u murung’agen. Rayog ni nge ayuwegem ni ngam lemnag u m’on riy rogon ni ga ra weliy ngak boch e girdi’ e pi n’en ni ke michan’um ngay u Bible. Re n’ey ni kan tay ko website rodad ni kenggin e “Mang e Ri Be Fil e Bible?” e ke ayuweg boor e fel’ yangaren ni ngari gel e michan’ rorad. Ere, faanra rayog rom ni ngam guy e pi study guide ney ma ga athamgil ni ngam fanay e pi n’en ni bay riy u nap’an ni ga be fil e Bible ni goo gur.
9 Ga ra gelnag e michan’ rom, ma aram e ga be fal’eg rogom ni ngam un ko taufe. I yog reb e walag nib pin ni kab fel’ yangaren ni gaar: “U m’on ni gu dugliy ni nggu un ko taufe, ma aram mug fil e Bible me tamilang u wan’ug ni ireray e baan riyul’ e teliw. Ma gubin e rran ni be gel e michan’ rog i yan.”
NGONGOL ROM
10. Mang fan nib puluw ni ngan lemnag nreb e Kristiano ni ke un ko taufe e thingari puluw e ngongol rok ko michan’ rok?
10 Be gaar e Bible: ‘Faanra ke mus ni goo michan’ ngak Got ma de chag e ngongol ngay, ma aram e ba yam’ fare michan’.’ (Jas. 2:17) Ere, faanra ba gel e michan’ rom ma dariy e maruwar riy nra m’ug ko ngongol rom. Ni uw rogon? Be weliy e Bible murung’agen ‘pangidad ni nge par nib thothup ma kad pied gadad nga pa’ Got.’—Mu beeg e 2 Peter 3:11.
11. Mu weliy fan fare thin ni be gaar “pangimed e nge par nib thothup.”
11 Faanra nga i ‘par pangim nib thothup’ ma aram e thingari beech e ngongol rom. Ere, aray rogon e ngongol rom, fa? Am lemnag fa nel’ i pul ni ke yan. Uw rogon ni kam dag ko ngongol rom nriyul’ ni ‘kam fil rogon’ ni ngam nang e tin nib fel’ ko tin nib kireb? (Heb. 5:14) Rayog ni ngam lemnag boch e tayim ni ke yag ni ngam par ni gab mudugil u nap’an ni kan towasariyem ni ngam rin’ boch ban’en nde puluw, fa? Ba puluw e ngongol ni ga ma dag u skul ko pi n’en ni ke michan’um ngay, fa? Ga ma par ni gab yul’yul’ fa ga ma guy rogon ni nge taareb rogom ko tin ni ka bay e bitir u skul ni bochan e nge dab un moningnagem? (1 Pet. 4:3, 4) Riyul’ ndariy bagadad nib flont, ya mus ko pi tapigpig rok Jehovah ni ke n’uw nap’an ni kar pigpiggad ngak ni ku bay yu ngiyal’ ni yad ma rus ni ngar pared ni yad ba yul’yul’ ngak Jehovah u nap’an ni yad bay u fithik’ e girdi’ ni yoor. Machane, be’ ni ke ognag ir ngak Jehovah e ba felfelan’ ngay ni nge dag ni ir be’ ni be fek fithingan Got, maku ma dag e re n’ey u daken e ngongol rok.
12. Mang e ba muun ngay ni ngad ‘pied gadad nga pa’ Got,’ ma susun ni nge uw rogon e pi n’ey u wan’dad?
12 Ma uw rogon e bin baaray ni ngad ‘pied gadad nga pa’ Got’? Re n’ey e ba muun ngay e pi n’en ni ga ma rin’ u lan e ulung ni bod rogon e muulung nge machib ni ga ma un ngay. Re n’ey e kub muun ngay boch ban’en ni ga ma rin’ nder ma guy yugu boch e girdi’ ni bod rogon e meybil ni ga ma tay nge fol Bible ni ga ma tay ni yigoo gur. Ra ke ognag be’ e yafos rok ngak Jehovah ma dabi lemnag ni kaygi mo’maw’ ni nge rin’ e pi n’ey. Ya taareb rogon e lem rorow David ni Pilung ni faani yog ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.”—Ps. 40:8.
13, 14. Mang reb e ban’en ni kan ngongliy rogon nrayog ni nge ayuwegem ni ngam par ni kam ‘piem nga pa’ Got’? Uw rogon ni ke yib angin e re n’ey ngak boch e fel’ yangaren?
13 Bay reb e worksheet ara reb e page ni bay boch e deer riy nge boch ban’en ni kan tay ngay ko fare babyor ni kenggin e Questions Young People Ask—Answers That Work, ko Volume 2 ko page 308 nge 309 ni kan ngongliy rogon ni nge ayuwegem. Re worksheet nem e kan tay boch e deer ngay nrayog ni ngam yoloy e fulweg riy nga but’ ni bod rogon e pi deer ni baaray ni be gaar: “Ga ma weliy gubin ban’en ni bay u lanin’um u lan e meybil rom, fa? Mang e be dag e re n’ey u rarogon e t’ufeg rom ngak Jehovah?” “Mang e ga ma uneg ko fol Bible ni ga ma tay ni yigoo gur?” “Ga ma un ko machib ni mus ni faanra de un e gallabthir rom, fa?” Ku bay bang ko re worksheet nem nrayog ni ngam yoloy boch ban’en ngay ni ga be nameg ni ngam rin’ ni bay rogon ko meybil, nge fol Bible ni ga ma tay ni goo gur, nge machib ni ga ma un ngay.
14 Boor e fel’ yangaren ni yad be lemnag ni ngar uned ko taufe ni ke yib angin e pi n’en ni bay ko re worksheet ney ngorad. Bay reb e walag nib pin ni kab fel’ yangaren ni ka nog Tilda ngak ni yog ni gaar: “Kug fanay e re worksheet nem ni nggu nameg boch ban’en. Ere, kug athamgil ni nggu rin’ reb nge reb ko pi n’em. Reb e duw nga tomuren ma ke yag ni nggu rin’ ni gubin ma aram mug un ko taufe.” Ku bay reb e walag ni kab pagel ni ka nog Patrick ngak ni ku aray rogon e n’en ni rin’. I yog ni gaar: “U m’on riy ma kug mu’ i dugliy u wan’ug e pi n’en ni nggu nameg, machane nap’an ni gu yoloy e pi n’em nga but’ ma aram me ayuwegeg ni nge yag ni nggu athamgil ni nggu rin’ e pi n’em.”
Ka ga ra ulul ni ngam pigpig ngak Jehovah ni mus ni faanra ke tal e gallabthir rom ndakurur pigpiggow ngak, fa? (Mu guy e paragraph 15)
15. Mu weliy fan ni gur rom e thingar mu dugliy ni ngam ognag e yafos rom ngak Got.
15 Bay boch e deer ko re worksheet nem nra k’aringem ni ngam fal’eg i lemnag boch ban’en. Reb ko pi deer nem e be gaar: “Ka ga ra ulul ni ngam pigpig ngak Jehovah ni mus ni faanra ke tal e gallabthir rom nge pi fager rom ndakurur pigpiggad ngak, fa?” Dab mu pagtalin ni faanra gur be’ ni kam ognag e yafos rom ngak Jehovah kam un ko taufe, ma aram e pigpig ni ga be tay e kemus ni ban’en u thilmew Jehovah. Gathi ga be pigpig ngak Got ni bochan boch e girdi’ ara bochan e gallabthir rom. Ere, faanra i par pangim nib thothup ma kam piem nga pa’ Got ma aram e be m’ug riy ni ke mich u wan’um ni kam pirieg e tin riyul’ ma ga baadag ni ngam fol ko pi motochiyel rok. Faan ga ra rin’ ni aray rogon ma ra munmun ma aram e rayog ni ngam un ko taufe.
ROGON FENI GA’ FAN BOCH BAN’EN U WAN’UM
16, 17. (a) Mang e susun ni nge k’aring be’ ni nge mang reb e Kristiano? (b) Uw rogon nrayog ni ngan susunnag rogon ni nge m’ug feni ga’ fan fare biyul u wan’ be’?
16 Immoy reb e moon ni boor ban’en ni manang u murung’agen fare Motochiyel rok Moses ni fith ngak Jesus ni gaar: “Bin ngan e motochiyel e ir e th’abi ga’ u fithik’ e Motochiyel?” Me fulweg Jesus ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matt. 22:35-37) I weliy Jesus ni t’ufeg rok be’ ngak Jehovah e susun ni aram e n’en nra k’aring facha’ ni nge un ko taufe me mang reb e Kristiano. Ere, reb e kanawo’ nrayog ni ngari gel feni t’uf Jehovah rom e aram e ngam fal’eg i lemnag e bin th’abi fel’ e tow’ath ni ke pi’ ni aram fare biyul ni maligach ni pi’ u daken Fak. (Mu beeg e 2 Korinth 5:14, 15; 1 John 4:9, 19.) Faan ga ra lemnag fare biyul nge angin nra yib ngom ma ra k’aringem ni ngam adag ni ngam dag nib ga’ fan u wan’um.
17 Baaray rogon nrayog ni nge m’ug nriyul’ nib ga’ fan fare biyul u wan’um: Mu susunnag ni be n’en ni ngam limach me yib be’ i ayuwegem. Ere gur, tomuren nra ayuwegem facha’ mag sul nga arow ngam man nga tafenam, ngam chuweg e garda’ u dowam, ma dab kum lemnag e n’en ni ke rin’ facha’ ni fan ngom? Ba mudugil ni danga’, ya dariy e maruwar riy nra um pining e magar ngak facha’ u n’umngin nap’an e yafos rom. Bin riyul’ riy e, gowa bod ni ke milfan e yafos rom ngak facha’! Machane, ri kab ga’ e malfith ni bay u puluwdad ngak Jehovah Got nge Jesus Kristus. Ya faan gomanga dar piew fare biyul ma dariy be’ nrayog ni nge chuwegdad u fithik’ e denen nge yam’ ni kad awgad ngay. Machane, bochan e n’en ni kar rin’ew ni fan ngodad ma aram fan ni ke yag e athap ngodad ko yafos ndariy n’umngin nap’an u paradis u fayleng!
18, 19. (a) Mang fan nsusun e dab mu rus ni ngam pag fam ngak Jehovah? (b) Uw rogon nrayog ni nge fel’ e yafos rom nge par rom ni faan ga ra pigpig ngak Jehovah?
18 Ba ga’ fan u wan’um e n’en ni ke rin’ Jehovah ni fan ngom, fa? Faanra rib ga’ fan u wan’um, me ere ba puluw ni ngam ognag e yafos rom ngak mag un ko taufe. Dab mu pagtalin nnap’an ni ga ra ognag e yafos rom ngak Jehovah ma aram e kam micheg ngak ndemtrug rogon ma ga ra rin’ e tin nib m’agan’ ngay u n’umngin nap’an e yafos rom. Ere gur, ngam rus ni ngam micheg ban’en ni aray rogon? Danga’, ya dab mu pagtalin ni baadag Jehovah e tin nib fel’ ni fan ngom, maku ir e en ni ma “tow’athnag e piin ni yad be gayiy.” (Heb. 11:6) Gathi ga ra ognag e yafos rom ngak Jehovah ngam un ko taufe, ma aram e nge mo’maw’ rogon e yafos rom nge par rom, ya bin riyul’ riy e fin be fel’ i yan. Bay reb e walag ni pumoon ni 24 e duw rok ni un ko taufe ndawori fel’ yangaren ni gaar: “Faan gomanga gu son nggu ilal boch ma sana boor ban’en ni ke tamilang u wan’ug, machane yafos rog ni gu dugliy ni nggu ognag ngak Jehovah e aram e n’en ni ke ayuwegeg u boch ban’en ni yima nameg ko re fayleng ney.”
19 Rib thil Jehovah ngak Satan, ya Satan e der lemnagem. Kemus ni yigoo ir e be lemnag ir! Dariy ban’en nrayog ni nge pi’ Satan ngak e piin ni yad ra mang ngak nra par angin ndariy n’umngin nap’an. Ya bin riyul’ riy e dabiyog rok, ya dariy e thin nib fel’ rok, maku dariy e athap rok. Ere, uw rogon ni nge pi’ ban’en ngom ndariy rok? Kemus ni yigoo pi n’en nra yib wenegan nib kireb ngom boch nga m’on e aram e n’en nrayog ni nge pi’ Satan ngom. Ya bin riyul’ riy e aram e n’en nra buch rok boch nga m’on!—Rev. 20:10.
20. Mang e ra rin’ reb e fel’ yangaren me yag ni nge ognag e yafos rok ngak Got nge un ko taufe? (Mu guy fare thin ni kenggin e “Boch Ban’en Nrayog ni Nge Ayuwegem ni Ngam Mon’og ko Tirok Got Ban’en.”)
20 Ere, ba tamilang ni faan ga ra ognag e yafos rom ngak Jehovah ma aram e n’en nth’abi fel’ nrayog ni ngam dugliy ni ngam rin’. Ere, ke bung rogom nrayog ni ngam rin’ e re n’ey, fa? Faanra ke bung rogom, ma dab mu telem ndab mu rin’. Machane, faanra ga be guy nib t’uf ni ngkum son buchuuw, mag fol ko pi n’en ni kan weliy ko re article ney ya nge yag ni mab e kanawo’ ngom boch nga m’on ni ngam un ko taufe. I yol Paul ngak piyu Filippi ni gaar: “Nga darod i yan nga m’on ni bod rogon fapi motochiyel ni ud folgad riy ke yan i mada’ ko chiney.” (Fil. 3:16) Faan ga ra fol ko re fonow ney, ma dabi n’uw nap’an mag ra adag ni ngam ognag e yafos rom ngak Jehovah ngam un ko taufe.