Mang e Ga Ra Rin’ ko Bin Th’abi Fel’ e Tow’ath ni Ke Pi’ Got?

FAANRA kan pi’ ba tow’ath ngodad nrib pag feni fel’, ma susun e ra k’aringdad ni ngad daged ni gad be pining e magar ko en ni ke pi’. I tamilangnag Jesus e re n’ey u tomuren ni golnag ragag i pumoon ni ke yib ba mit e m’ar ngorad nrib ubchiya’ ma dariy e falay riy e ngiyal’ nem. Tomuren ni golnagrad, ma kemus ni taa bagayad u fithik’rad e ir e “sul ni be pining e sorok ngak Got ni ba ga’ laman.” Ma aram me gaar Jesus: “Ragag e pumoon ni kan chuweg e daraw rorad; me ere ba uw mereb i yad?” (Luke 17:12-17) Mang e gad be fil ko re n’ey? Gad be fil riy nib papey ni ngad paged talin ban’en nib fel’ ni ke rin’ be’ ni fan ngodad!

Dariy reb e tow’ath ni taareb rogon ko fare biyul. Aram e bin th’abi fel’ e tow’ath ni kan pi’ ngodad. Ere, mang e ngam rin’ ni bochan e n’en ni ke rin’ Got ni fan ngom?

• Mu gay rogon ni ngam nang murung’agen e En ni Ke Pi’. Bay ban’en nib t’uf ni ngad rin’ed mfini yag ni nge yag e yafos ndariy n’umngin nap’an ngodad u daken fare biyul. I meybil Jesus ngak Got ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Faanra yog be’ ngom ni bay be’ nib pumoon ni ayuweg e yafos rom u nap’an ni ka gab bitir, ma gathi ga ra adag ni ngkum fil boch ban’en u murung’agen nge fan ni ke ayuwegem? Jehovah Got ni ir e en ni ke pi’ fare biyul nib tow’ath nra yognag e yafos ngodad e gathi kemus ni baadag ni ngam nang ko ir mini’, ya ku baadag ni ngki chugur e tha’ u thilmew. Be gaar e Bible: “Mu chugurgad ngak Got, me chugur ngomed.”​—James 4:8.

• 

  Mu dag ko ngongol rom nib mich fare biyul u wan’um. “En nra mich u wan’ [ara “maruweliy e michan’ rok ngak”] e en ni Fak Got e aram e ke yog e yafos ndariy n’umngin nap’an ngak.” (John 3:36) Mang e be yip’ fan ni ngad maruweliyed e michan’ rodad? Be yip’ fan nra nge m’ug nriyul’ nib mich fare biyul u wan’dad ma bay ban’en nib t’uf ni ngad rin’ed. (James 2:17) Mang e re n’em? Rayog ni nge yag reb e tow’ath ngom ni faanra m’agan’um ngay ni ngam fek. Ere, aram rogon fare biyul nthingar mu guy rogon ni nge m’agan’um ngay. Ni uw rogon? Thingar mu fil ngam nang e n’en nib m’agan’ Got ngay ni ngam rin’, mag fol riy.a Mmeybil ngak Got ni nge n’ag fan e denen rom me beechnag e nangan’ rom. Mu non ngak mag dag ngak nib pagan’um ni piin ni yad ra dag ko ngongol rorad nriyul’ ni ke mich fare biyul u wan’rad e yad ra par u fithik’ e gapas, nge pagan’, nge flaab boch nga m’on!​—Hebrews 11:1.

• 

  Mu un ko fare Puguran ko yam’ ni tay Jesus. I tababnag Jesus reb e madnom ni ngaun tay u gubin e duw nra puguran ngan’uy e re biyul nem ni pi’. I weliy murung’agen e re madnom nem ni gaar: “Um rin’ed e re n’ey ngi i pugurag ngomed.” (Luke 22:19) Ra madnomnag e Pi Mich Rok Jehovah e yam’ ni tay Jesus ko L’agruw Fen e Maruwel ko April 11, 2017 u tomuren ni ke aw e yal’. Sogonap’an reb e awa n’umngin nap’an e re muulung nem, ma bay reb e welthin ni yira pi’ riy ni be tamilangnag feni ga’ fan e yam’ ni tay Jesus nge rogon nra yib angin ngodad e chiney i yan’ nga m’on. Fa binem e duw e sogonap’an 20 e milyon e girdi’ u ga’ngin yang e fayleng nra uned ko re Puguran nem. Ere, gamad be piningem ni ngam un ngomad ko re madnom ney ya nge yag ni ngad daged nrib ga’ fan u wan’dad e bin th’abi fel’ e tow’ath ni ke pi’ Got ngodad.