Deer Ko Piin Ma Beeg

Be yog e Bible nib t’uf l’agruw ni’ ni ngar michegew ban’en ni ke buch. (Num. 35:30; Deut. 17:6; 19:15; Matt. 18:16; 1 Tim. 5:19) Machane rogon ni bay ko fare Motochiyel e faanra kol reb e pumoon reb e ppin ni kan m’ag e mabgol rok u gelngin u “wuru’ e binaw” me tolul fare pin, ma aram e dabi aw nib kireb e rok fare pin ni kar parew be’ ni gathi mabgol rok, machane fare moon e ir e ba kireb e rok ko biney e ngongol. Ere faanra dariy be’ ni ke guy ni kan kol fare pin u gelngiy, ma mang fan ni fare moon e ir e ba kireb e rok ma gathi fare pin?

Fapi thin ko Deuteronomy 22:25-27 e gathi be weliy rogon ni ngan micheg nib kireb e rok fare moon, ya ke tamilang ni ir e ba kireb e rok. Biney e motochiyel e be weliy rogon nrayog ni ngan nang ko ba kireb e rok fare pin fa danga’. Am lemnag e pi verse ni bay u m’on ko pi thin ney.

Pi verse nem e be weliy murung’agen be’ nib moon ni kar parew reb e ppin “u lan binaw” ni kan m’ag e mabgol rok. Ba kireb e rok fare moon ko re n’ey ni ke rin’, ya kar parew be’ ni gathi mabgol rok. Fare pin e kan m’ag e mabgol rok, ere rayog ni nga nog nib mabgol. Ere uw rogon fare pin? “De tolulnag e ayuw.” Ya faanra tolulnag e ayuw mab mudugil nra rung’ag e girdi’ laman, ma aram e rayog ni ngar micheged nder ban e re ppin ney. Machane bochan nde tolul, ma aram e ra yan i aw ni kar parew be’ ni gathi mabgol rok. Ere yow l’agruw nib kireb e rorow ko binem e ngongol ni kar rin’ew.​—Deut. 22:23, 24, BT.

Machane ki ulul fare Motochiyel ngki weliy yugu reb e ban’en ni ke buch nib thil: “Faanra be’ nib pumoon ni kol be’ nib pin u wuru’ e binaw ni fare pin e kan m’ag e mabgol rorow reb e pumoon. Ma aram e kemus ni fare moon e yira thang e pogofan rok. Ma fare pin e dariy ban’en ni yira rin’ ngak, ya dawori rin’ ba denen ni labgen e yam’. Ya re pa’ i oloboch ney e taareb rogon ngak be’ nib pumoon ni og ngak be’ nge li’ nge yim’, ya fare moon e kol fare pin u gelngin u wuru’ e binaw. Ma fare pin ni kan m’ag e mabgol rorow reb e pumoon e i tolulnag e ayuw, ma dariy be’ ni ayuweg.”​—Deut. 22:25-27, BT.

Faanra ke buch e re n’ey rok be’ nib pin, ma aram e pi ta puf oloboch e ra mich u wan’rad e n’en ni ke yog fare pin. Ni uw rogon? Yad manang ni “i tolulnag e ayuw, ma dariy be’ ni ayuweg.” Ere dabi aw nib kireb e rok ni kar parew be’ ni gathi mabgol rok. Machane fare moon ni ‘ke kol fare pin ni kan m’ag e mabgol rok u gelngin’ e ba kireb e rok ya ke kol be’ u gelngin, ma kur parew be’ ni gathi mabgol rok.

Ere yugu aram rogon ni fare motochiyel e be weliy rogon nrayog ni ngan nang ko ba kireb e rok fare pin fa danga’, machane ku be weliy nib kireb e rok fare moon ni bochan e ke kol be’ u gelngin ma kur parew be’ ni gathi mabgol rok. Rayog ni nge pagan’dad ni pi ta puf oloboch e yad ra ‘maruweliy ngari mich u wan’rad ko rriyul’ e re n’em fa danga’,’ mi yad dugliy e n’en ni ngan rin’ nib puluw ko fare motochiyel ni boor yay ni ke sul Got u daken.​—Deut. 13:14; 17:4; Ex. 20:14.