Rogon ni Ngam Taw ko Tin ni Kam Nameg ko Tirok Got Ban’en
1. Mang boch ban’en ko tirok Got ban’en ni be nameg boor e Kristiano nib fel’ yangarad?
1 Pi Kristiano ni piin ni fel’ yangaren, dariy e maruwar riy ni pi n’en ni gimed be nameg ko yafos romed e bochan e ba t’uf Jehovah romed nge thin ni yog Jesus ngak e pi Kristiano ni ngam ‘m’oneged u wan’med e gagiyeg rok Got.’ (Matt. 6:33) Sana ga be nameg ni ngam yoornag e machib ni ngam tay ma ngam un ko pioneer ara ngam man nga ba yang nib t’uf e pi tamachib ko Gil’ilungun Got riy. Ma boch i gimed e gimed be lemnag ni ngam uned ko international construction, nge maruwel ko tochuch, ara maruwel ko missionary. Uw fene fel’ ni ngam nameg e pi n’en ney!
2. Mang e ra ayuwegem nge yog ngom e tirok Got ban’en ni kam nameg?
2 Faan ga ra yoloy e pi n’en ni ngam nameg nga but’ ma ra ayuwegem ni nge yog ngom. Pi thin ko July 15, 2004, English Watchtower e ke weliy ni gaar: “Ba lem ni ngan rin’ ban’en e ra yog ni nge tamilang iyan ni faan [ga] ra meleg e thin nra weliy e n’en ni [ga] baadag ni [ngam] rin’. Ma aram ma [ga] yoloy e pi n’en ni [kam] nameg nge rogon ni [ngam] rin’ nga daken e babyor.” Maku faan ga ra nameg yugu boch ban’en ni dabi n’uw nap’an ma ga taw ngay ma ra ayuwegem ngam nang rogon ni ga be mon’og iyan ma ga par ni ngam tiyan’um ngay.
3. Mang boch ban’en nrayog ni ngam nameg nra ayuwegem ngam un ko taufe?
3 Pi N’en ni Ngan Nameg ni Dabi N’uw Nap’an Min Taw Ngay: Faanra dawor ni taufenagem, nga mu lemnag e pi n’en nib t’uf ni ngam rin’ ngam taw ngay. Sana ba t’uf rom ni nge tamilang e pi machib nu Bible u wan’um. Faanra aram rogom, nga mu nameg ni ngam fil e babyor ni Bible Teach ni polo’, ma ga bieg urngin e thin nu Bible riy. (1 Tim. 4:15) Maku ngam nameg ni ngam bieg e Bible ni polo’ ko Genesis nge mada’ ko Revelation, ni bod rogon nib t’uf rok e piin ni ma un ko maruwel u Bethel nge skul ko Gilead. U tomur riy, nguum bieg e Bible u gubin e rran. (Ps. 1:2, 3) Nga mu lemnag ko uw rogon nra ayuwegem ngam mon’og iyan ko tirok Got ban’en! Mu tabab nge musnag e fol Bible rom ko meybil ni ba yul’yul’ gum’ercha’em, ma ga guy rogon ni nguum rin’ e tin ni kam fil u gubin ngiyal’.—Jas. 1:25.
4. Faanra baadag e Kristiano ni nge un ko maruwel u Bethel ara maruwel ko missionary nga m’on rok, ma mang boch ban’en nrayog ni nge nameg e chiney?
4 Faanra kan taufenagem kafram, mang boch ban’en ni ku rayog ni ngam nameg? Ba t’uf ni ngam mon’og i salap ko machib fa? Sana, rayog ni ngam salap iyan u rogon ni ngam fanay e Thin Rok Got ko machib u mit e tabinaw? (2 Tim. 2:15) Uw rogon ni ngam yoornag e machib ni ngam tay? Ngam nameg e pi n’en ni dabi n’uw nap’an ma rayog ni ngam taw ngay u rogon ni ba puluw ko duw rom nge salpem ma aram ma ra ayuwegem ngam taw ko n’en ni ngam nameg ni fan ko ba ngiyal’ nib n’uw nap’an boch nga m’on.
5. Uw rogon e pi n’en ni ke nameg ni dabi n’uw nap’an ma ke taw ngay e ke ayuweg reb e walag ni nge un ko n’en ni ke nameg nge un ko maruwel u Bethel?
5 Ke Yib Angin Riy: Faani yan Tony ni 19 e duw rok ni nge guy e branch ofis ko Pi Mich Rok Jehovah, ma kan pug e tafinay rok ni nge un ko maruwel u Bethel. Machane, dawori puluw e par rok, ya dawori ognag ir ngak Got. Ere ke dugliy Tony ni nge yaluweg e yafos rok nge puluw ko kanawoen Jehovah me nameg ni nge un ko taufe. Tomren ni kan taufenag, ma ke yol nga daken e calender e rran ni baadag ni nge un ko pioneer ni ayuw nge regular pioneer. Tomren ni ke un ko pioneer, ma amu lemnag e falfalan’ ni ke yib ngak ko ngiyal’ ni kan pining ni nge un ko maruwel u Bethel!
6. Mang e ra ayuwegem ngam taw ko pi n’en ni ngam nameg ko tirok Got ban’en?
6 Ku rayog rom ni ngam taw ko pi n’en ni ngam nameg ko tirok Got ban’en ko ngiyal’ ni ngam m’oneg e Gagiyeg rok Got. Nga mu tay e “maruwel rom” u p’eowchen Jehovah ni nguum meybil ngak ma ga athamgil ni ngam taw ngay.—Prov. 16:3; 21:5.