Mu Fl’eg Rogom—Reb e Kanawo’ Nra Yibnag Angin e Sul ni Ga Ra Tay Ku Be’
1. Uw rogon ni ga’ i yan e machib ni tay e tin som’on e Kristiano?
1 I fl’eg Jesus rogon pi gachalpen ni ngar manged boch e tamachib nib salap i wereg fare “thin nib fel’ ni murung’agen e gagiyeg rok Got.” (Matt. 4:23; 9:35) I fil rogon e machib ngorad u Palestine. Machane u m’on ni nge yan Jesus nga tharmiy, me tamilangnag nra ga’ i yan e machib nra tay e piin Kristiano ya nga ‘ranod ngak girdien e pi nam u gubin yang ngar pingeged yad ngar manged pi gachalpen.’—Matt. 28:19, 20.
2. Mang e ba muun ko ngan fol ko n’en ni tay Jesus chilen ni aram e ngan ‘pingeg e girdi’ ngar manged boch pi gachalpen’?
2 Re maruwel nem e ba muun ngay ni ngan sul ngak e girdi’ ni kar daged ni yad baadag fare thin nib fel’ min ayuwegrad ngar manged pi gachalpen Jesus. Rayog ni ngad rin’ed e re n’ey ni ngad filed rogon ngorad ngar folgad ko pi n’en ni i tay Jesus chilen. Ra ngeb angin e pi sul nem ni gad ma tay mab t’uf ni ngad fl’eged rogodad u m’on riy.
3. Yugu aram rogon ni aram e som’on ni kam machibnag be’ ma uw rogon ni nge mab e kanawo’ ngom nge yog nim sul ngak bayay?
3 Mu lemnag Boch Ban’en u M’on Riy: Boch e publisher e yad ma fith reb e deer u tungun e sabethin rorow be’ ni ke mada’nag ngemu’ me micheg ngak nra sul ngar weliyed e fulweg riy. Kar pirieged nfaanra ra fanayed boch e thin u lan fare babyor ni Bible Teach (Be Fil e Bible) ko ngiyal’ ni kar sulod riy ma ma ayuwegrad ni ngar tababnaged e fol Bible.
4. Mang fan ndab da songad ngeb e tin nib beech e magazine rodad mfin da sulod ngak be’?
4 De t’uf ni ngad sonnaged e magazine ko bin migid e pul mfin da sulod ngak be’. Rayog ni ngad ayuweged nge adag e machib u daken e thin ni bay ko fabin ni kad pied ngak e magazine.
5. Uw rogon nra fel’ rogodad ni ngad nameged ban’en ko ngiyal’ ni ngad sulod ngak e girdi’?
5 Mu Nameg Ban’en: U m’on ni ngam sul ngak be’, mag fal’eg i yaliy e tin ni kam yoloy nga but’ mag lemnag e n’en ni ga baadag ni ngam rin’. Bod nrayog ni ngam weliy ban’en ko fare magazine nim pi’ ngak fayanem nim mada’gow. Fa ku rayog ni ngam pi’ reb e babyor nib m’ag ko n’en ni um weliyew fayanem. Faanra kam fith reb e deer fayanem nim mada’gow, mag nameg ni ngam fulweg e re deer nem. Nap’an ni ga be tamilangnag reb e thin nu Bible nib m’ag ko n’en ni kam weliyew, mag gay rogon ni ngam beeg ko Bible.
6. Mang e ngad nameged u nap’an ni kad sulod ngak be’?
6 N’en ni Ngad Nameged: Arrogon, n’en ni gad be nameg e ngad tababnaged e Bible study. Reb e walag e ognag e fol Bible u nap’an ni ke sul ngak be’ machane me yog fare moon ni dabun. Yay ni migid me sul fare walag ngak fare moon ni ke fek boch e magazine ni kab beech me gaar ngak, “Gamow be pi’ e fulweg ko deer ni be fith e girdi’ u murung’agen e Bible e daba’.” Tomren ni ke yog fare moon e n’en be lemnag, me beeg fare walag reb e thin nu Bible nge reb e paragraph u lan ba ken e babyor ni yima fanay ko fol Bible nib puluw ko n’en yow be weliy. Ma aram mar tababnagew e Bible study.
7. Uw rogon ni ke yog rom ni ngam tababnag e fol Bible ku be’ ni bochan e kam fl’eg rogom u m’on riy?
7 Boor ban’en nib t’uf ni ngan rin’ u nap’an ni yibe fal’eg rogoy ni ngan sul ngak be’. Machane, ra gel e felfelan’ rodad ma gad ra tow’ath ni ngad ayuweged e “piin ni ke mel’egrad Got” ni nga ranod ko kanawo’ ni yan’ ko yafos.—Acts 13:48.